Jesuspa wañuyninta yuyarinapaq tantakuyman tukuyta waqyarina
1. Kay marzo 21 pʼunchaymantapacha, ¿imatá Jallpʼantinpi ruwayta qallarisunchik, imaraykutaq?
1 Kay wata, abril 9 pʼunchaypi, tukuy Jehovap kamachisnin, Jehová runasta mayta munakusqanpi tʼukurinanchikpaq, inti yaykupusqantawan Jallpʼantinpi tantakusunchik (Rom. 5:6-8). Achkha runas ñuqanchikwan Jesuspa wañuyninta yuyarinankupaq, kay tantakuyman jamunankuta munanchik, chayrayku Jallpʼantinpi kay marzo 21 pʼunchaymantapacha kay tantakuyman waqyariyta qallarisunchik.
2. ¿Imaynatá invitacionesta jaywarisunman?
2 ¿Imaynatá runasta waqyarisunman? Invitacionpi rikhuriq dibujosmanta, tapuykunamanta, Bibliap pʼitisninmanta ima, parlarispa. Chantapis, invitacionpa qallariyninta rikuchispa nisunman: “Jesucristop wañuyninmanta, ñuqaykuwan khuska yuyarikunaykipaq, abril 9 pʼunchaypaq waqyariyta munayku”. Chantá qallariyninpi qillqasqata, tapuykunasninta ima ñawiripusunman. Sutʼincharisunmantaq, chay tantakuyman pay, familian, pillatawanpis pusamusqan ima, allin jamusqa kanankuta.
3. Pikunamanchus invitacionesta jaywarqanchik paykuna tantakuyman jamunankupaq, ¿imatá ruwananchik tiyan?
3 Qutuchakuy maypichus willan chaypi achkha wasis kaptinqa, ichá ancianosqa hermanosta tukuy wasispi juk invitacionta saqinankuta ninkuman, wakin wasispi runa mana kaptinkupis. Sabadotaq, Domingotaq revistaswan, invitacioneswan ima, willaq risunchik. Chantapis, Bibliamanta yachakuqkunata, familiaresninchikta, escuelamanta chayri llamkʼaymanta compañerosninchikta, tukuy riqsisqasninchikta ima, waqyarinapaq kallpachakuna. Qayna wata, juk hermana, 30 familiaresninman invitacionesta jaywarisqa, jamunankupaqtaq yuyarichillasqapuni. Iskay chunka phichqayuqtaq jamusqankumanta, ¡mayta kusikusqa! Paykunamantataq tawa, Bibliamanta yachakuyta qallarisqanku.
4. ¿Imapaqtaq kunanmantapacha wakichikuna, imaraykutaq?
4 Ñawpaqmanta wakichikuna. Kay marzo, abril killaspi, astawan willamunanchikpaq wakichikuna. Pikunatachus yachachichkasqanchikmanta, chayri wawasninchikmanta mayqillanpis sumaqta ñawparichkan chayqa, ichá ancianoswan parlarisunman mana bautizasqa kaspapis willaq lluqsinanpaq. Kunanmantapacha wakichikuna tukuy runasta chay tantakuyman waqyarinapaq, ñuqanchikwan khuska, Jehová, Jesús ima mayta munakuwasqanchikta yuyarinankupaq (Juan 3:16; 15:13).