Jesuspa wañuyninta yuyarinapaq abril 2 pʼunchaymanta waqyarisun
1. Jesuspa wañuyninta yuyarinapaq, ¿maykʼaqtaq invitacionesta jaywasunchik? ¿Runas jamunankupaq, yanapanchu?
1 Jesuspa wañuyninta yuyarinapaq tukuy runasta abril 2-17 pʼunchaykama waqyarisunchik. Pasaq wataspi achkha runas waqyarisqanchikman rirqanku. Juk warmi, Jesuspa wañuyninta yuyarinapaq chay pʼunchaypi, sucursalman waqyaspa nirqa: “Kunallan wasiyman chayaspa, punku urapi juk invitacionta tarini, rinaypaqtaq ima horatachus ruwakunanta yachayta munani”. Chantá sucursalmanta recepcionista, invitacionpi mayniqpichus hora willakuchkasqanta sutʼincharqa, warmitaq kutichirqa: “¡Jesuspa wañuyninta yuyarinapaq tantakuyman risaqpuni!”, nispa.
2. Invitacionta jaywarinaykipaq, ¿imatá niwaq?
2 Imaynatá ruwakunqa. Kay invitacionesta jaywarinapaq pisi tiempolla kasqanrayku, runaswan pisillata parlarinanchik tiyan. Ichapis jinata niwaq: “Imaynalla, familiayki juk sumaq tantakuyman rinanpaq kay invitacionta jaywariyta munayki, kaytaq tukuy jallpʼantinpi abril 17 domingo pʼunchaypi ruwakunqa [invitacionta jaywariy]. Jesús kay pʼunchaypijina wañurqa. Jehová Cristoniqta rantiwasqanchik, imaynatachus yanapawasqanchikta juk umallirichiypi Bibliawan sutʼinchakunqa. Kayta uyarinapaqqa mana pagakunchu. Maypichus, ima horachus kananta kaypi sutʼinchachkan”.
3. Achkha runas kay tantakuyman jamunankupaq, ¿imatá ruwasunchik?
3 Qutuchakuy willan chaypi mana tukuyman chayanapaqjina kaptinqa, ichá ancianos wasispi ni pí kaptin, invitacionesta punku uraman mana wak runas rikunankupaqjina saqinankuta ninkuman. Bibliamanta astawan yachakuyta munaqkunata, parientesniykita, llamkʼayniykimanta chayri yachaywasimanta compañerosniykita wakkunata ima, kay tantakuyman waqyariy. Sapa semana tukukuypitaq invitacionesta saqichkaspa, atikuptinqa revistastawan saqiwaq. Abril killapi invitacionesta jaywachkaspa, ¿precursor auxiliarjina llamkʼawaqchu?
4. Jesuspa wañuyninta yuyarinapaq tantakuyman, ¿imaraykutaq wakkuna jamunankuta munanchik?
4 ¡Jamuqkunaqa mayta yachakunqanku! Jehová runasta mayta munakusqanrayku, wawanta kachamuspa rantinawanchikpaq kay tantakuypi uyarinqanku (Juan 3:16). Diospa Reinon imastachus runaspaq qhipaman ruwananta yachakullanqankutaq (Isaías 65:21-23). Chantapis pikunachus Bibliamanta astawan yachakuyta munaqkunata, qutuchakuypi yanapaqkunaman willanankuta nikunqa. Llampʼu sunqu runas ñuqanchikwan khuska Jesuspa wañuyninta yuyarinankupaq Jehovamanta mañakunchik.