Diospa munaynin ruwasqa kachun
1. Juk pʼunchaypaq jatun tantakuy 2012 watapaq, ¿imataq sutikunqa chantá imaraykutaq kayta ukhunchakunan tiyan?
1 Runasqa Jehovap munayninrayku ruwasqa karqanchik (Apo. 4:11). Imachus Diospa munaynin kasqanta yachananchik tiyan, chaymanjinataq kawsana, ajinamanta imapaqchus ruwasqa kasqanchikta yachasunchik. Chayjinata kawsayqa mana atikullanchu, imaraykuchus “aychanchejpa sajra munayni[nwan], [...] yuya[yninwan] ima” chayri “mana creejkunaj munasqankuta ruwa[sqankuwan]”, nisunman kay pachawan maqanakunanchik tiyan (Efe. 2:3; 1 Ped. 4:3; 2 Ped. 2:10). Mana Diospa yanapayninwanqa Kuraq Supaypa “munayninta ruwanan[chik]paj”, tuqllasninpi urmasunman (2 Tim. 2:26). Kay 2012 watapaq —2011 septiembre killamanta 2012 agosto killakama— juk pʼunchaypaq jatun tantakuy wakichikusqan, padrenuestropi kimsa kaq nisqan Jesús yachachiwasqanchikmanjina kawsanapaq yanapawasunchik (Mat. 6:9, 10). “Diospa munaynin ruwasqa kachun”, nisqa sutichakunqa.
2. ¿Ima tapuykunasmantaq juk pʼunchaypaq jatun tantakuypi kutichikunqa?
2 ¿Ima tapuykunasmantaq kutichikunqa? Wakichikusqanta sumaqta uyarina, umallirichiqkunaqa kay tapuykunasman kutichinqanku: Diospa Palabranta uyarispapis, ¿imatawantaq ruwananchik tiyan? ¿Imaynamantataq imachus Diospa munaynin kasqanta reparallasunmanpuni? ¿Imaraykutaq tukuy laya runasman willayta munananchik tiyan? ¿Imaynamantataq kusisqa, sunqu juntʼasqataq kawsakusunman? Waynas, sipaskuna ima, ¿imatá Jehovaman rikuchinaykichik tiyan? ¿Ima bendicionestataq Diospa munayninta ruwaspa japʼisun? ¿Imaraykutaq kunan hermanosninchikta kallpachana, sunquchana ima kachkan?
3. Juk pʼunchaypaq jatun tantakuy sumaqta yanapanawanchikpaq, ¿imatá ruwasunman?
3 Jatun tantakuyman rinaykipaq kallpachakuy, wakichikusqanta sumaqta uyarinaykipaq. Ichapis jatun tantakuypi umallirichinanpaq Betelmanta chayri qutuchakuykunata waturiq hermano waqyarisqa kanqa. Paywan chayri casarasqa kaptinqa warminwan parlanaykipaq kallpachayku, jatun tantakuy manaraq qallarichkaptin chayri tukukuptin. Imatachus uyarisqaykita “mana[...] qunqap[unaykipaq]”, wasiykiman chayaspa familiaykiwan yachakusqaykichikta ukhunchariychik. Imaynatachus Diospa munayninta astawan ruwanaykichikpaq khuska parlariychik (Sant. 1:25).
4. ¿Imaraykutaq kawsayninchikpi Diospa munaynin ñawpaqpi kanan tiyan?
4 Jehovaqa juk chhikamantawan munaynillankuta ruwayta munaqkunata chantá Diospa munayninmanjina mana kawsaqkunata tukuchinqa (1 Juan 2:17). Chayrayku Jehovaman kay jatun tantakuyta wakichipuwasqanchikmanta may agradecesqas kachkanchik. Kaytaq Diospa munayninta ñawpaqman churanallapaqpuni yanapawasun.