Diospa Palabranqa yachachinapaj may sumaj

1. Iskay pʼunchaypaj jatun tantakuyninchej, ¿imataj sutikonqa, ima tapuymantaj kutichenqa?

¹ Jehovaqa May Sumaj Yachachejninchej, ni pipis pay jina kanchu (Isa. 30:20, 21). Palabran Biblianejtataj yachachiwanchej, chaytaj ni mayqen librowanpis kikinchakunchu. ¿Imaynatá Diospa yachachiynin mana onqonapaj, yuyayniyoj, kusisqa, qayllallanpipuni kanapaj ima yanapawasunman? Kay tapuymanqa, jamoj iskay pʼunchaypaj jatun tantakuyninchejpi kutichikonqa. Chay tantakoyqa sutichasqa kashan: “Diospa Palabranqa yachachinapaj may sumaj”. Orqhokuntaj 2 Timoteo 3:16 versiculomanta.

2. ¿Ima tapuykunataj jatun tantakuypi yachachikusqanta sumajta japʼeqanapaj yanapawasun?

² Imastachus japʼeqananchej tiyan. Kay urapi tapuykunaqa, jatun tantakuypi yachachikusqanta sumajta japʼeqanapaj yanapawasun.

• ¿Imaynatá Diospa yachachiynin kausayninchejpi yanapawanchej? (Isa. 48:17, 18.)

• Jehovapaj astawan llankʼanapaj ruwanasninchejta pisiyachejtinchej, ¿imamantá mana iskayrayasunmanchu? (Mal. 3:10.)

• ¿Imatá “llulla yachachiykunawan” ruwananchej tiyan? (Heb. 13:9.)

• ¿Imatataj Jesuspa “yachachiyninmanta” yachakusunman? (Mat. 7:28, 29.)

• Qotuchakuypi yachachejkuna, ¿imaraykú paykuna kikinkuta ñaupajta yachachikunanku tiyan? (Rom. 2:21.)

• ¿Imapajtaj Diospa Palabran may sumaj? (2 Tim. 3:16.)

• ¿Imapajtaj Jehová “nacionesta kharkatichi[n]”? (Hag. 2:6-8.)

• ¿Imata ruwananchejpitaj Jehová atienekun? (Efe. 5:1.)

• ¿Imaraykú Jehovaj yachachiyninpi kanallapajpuni kallpachakuna tiyan? (Luc. 13:24.)

3. ¿Imaraykutaj jatun tantakuypi tukuynin umallirichiykunata uyarinapaj wakichikuna tiyan?

³ Kay 2 Timoteo 3:16 versiculomanta ñaupaj versiculosnenqa, tukukuy pʼunchaykuna imaynachus kananta sutʼinchan. Chaymanta parlaspa, Pablo nerqa: “Sajra runas, chʼawkiyajkunataj, sajra kasqankumanta aswan sajraman tukonqanku, pantaspa, wajkunatapis pantachispallataj”, nispa (2 Tim. 3:13). Mana chʼaukiyasqa kayta munanchej chayqa, Diospa yachachisqanta uyarina, kasukunataj. Chayrayku jamoj jatun tantakuypi, tukuynin umallirichiykunata sumajta uyarinapaj wakichikuna.