Yuyayninchejta jarkʼana
1. ¿Imataj iskay pʼunchaypaj jatun tantakuy sutikun, chantá imapajtaj wakichikun?
1 Jesusqa, discipulosninman tukuy sonqonkuwan, almankuwan, yuyayninkuwan ima, Jehovata munakunankuta yachacherqa (Mat. 22:37, 38). Kay watamanta jatuchaj tantakuykunaqa, imayna runachus sonqonchejpi kasqanchejta qhawarikunapaj wakichikun. Willakorqa jina, jatun tantakoyqa, “Sonqonchejta jarkʼana”, nisqa sutikun. Septiembre 2012 watamanta, agosto 2013 watakama, uj pʼunchaypaj jatun tantakoyqa, “Sonqo yuyayninchejta jarkʼana”, nisqa sutikun, iskay pʼunchaypaj jatun tantakuytaj “Yuyayninchejta jarkʼana” nisqa sutikun, chaytaj Mateo 22:37 versiculomanta orqhokun, qhepan killataj qallarenqa. Iskay pʼunchaypaj jatun tantakoyqa, imaynachus yuyayninchej kasqanpi tʼukurichinawanchej tiyan, Jehovaj munayninman jina kanapaj.
2. Iskay pʼunchaypaj jatun tantakuypi, ¿ima tapuykunaman kutichikonqa?
2 ¿Ima tapuykunamantaj kutichikonqa? Iskay pʼunchaypaj jatun tantakuypi kashaspa, imaynatachus kay tapuykunaman kutichikusqanta uyarina, imajtinchus chaykuna yuyayninchejpi qhepakunanku tiyan:
• Kay pachamanta runas jina mana yuyanapaj, ¿imatá ruwasunchej?
• ¿Imaynatá runasta, yuyayninku mana laqhayaypi kanallanpajpuni yanapasunman?
• ¿Imayna yuyayniyojta kayta munanchej?
• ¿Ima bendicionestataj japʼisunchej yachakusqanchejpi tʼukurispa?
• ¿Imaynatá Jehová yanapanawanchejta saqesunman, pay jina yuyanapaj?
• Qosas, warmis, tatas, wawas ima, familia kusisqa kausakunanpaj, ¿imatá ruwankuman?
• ¿Imaynatá Jehovaj pʼunchayninpaj wakichikusunman?
• Reinonmanta willamunapaj, ¿ima ninayantaj yuyayninchejta wakichiy?
• Yachakusqankuman jina ruwajkuna, ¿ima bendicionestataj japʼinku?
3. ¿Imaraykú chay tantakuyman rinanchej, allinta uyarinanchej, yachakusqanchejman jina kausananchej may allin?
3 Satanasqa, yuyayninchejta pantachinanpaj tukuy imata ruwashan (2 Cor. 11:3). Chayrayku yuyayninchejta jarkʼananchej tiyan, allinta apaykachananchej tiyan, Cristo jinataj yuyananchej tiyan, kay pachaj yuyaynintataj qhesachananchej tiyan (1 Cor. 2:16). Chay tantakuyman rinapaj mayta kallpachakuna, allintataj uyarina. Yachakusqanchejman jina kausasun chayqa, sonqo kʼajaywan Reinomanta willamunapaj yuyayninchejta wakichisun (1 Ped. 1:13).