8. Rurayniquiwan yachachiy

¿CAYGA IMA NINANTAJ?

Wamrayquita yachachishgayquinola ruranquiman. Imaraj canman pipis wasiquiman shamun gamwan parlacunanpaj, pero wamrayquita mandanqui “taytäga ilaycan” ninanpaj. Wamra cashganlapita lulacunanpaj yachachiptiquiga, ama shuyaraychu rasun cajlata parlacunanpaj.

David jutiyoj runa nin: “Achca runacuna nipäcun: ‘nishgäta ruray, pero rurashgätaga manami’, chayga manami alichu. ¿Imanir? Wamracunaga ricashgantami ruran. Paycunaga cuentata gocunmi yachachishganchinola mana ruraptinchi”.

BIBLIAGA NIN: “Mana suwacunanpaj yachaycächerga ¿imanirtaj suwacuycanqui?” (Romanos 2:21, Tayta Diosninchi Isquirbichishan).

¿IMANIRTAJ CHAYTA RURANQUIMAN?

Wamracunaga taytancuna rurapäcushgantami lapanta ruran. Chaymi taytacunaga shumaj calpachacunman ruraynincuna ali cananpaj, chayno captinga wamrancunapis chaynolami rurapäcunga, manami lutan cajtaga rurangachu.

Juc warmi cayno nin: “Wambranchicunata cutin cutin parlapaptinchipis, öraga mana wiyacunchu y casucunpischu, pero taytacuna imacunacho pantashganta jucla cuentata gocärin y niycäshunqui: ‘¿y gamga imanirtaj chayno ruranquichu?’. Paycunaga lapantami ricaycan”.

BIBLIAGA NIN: “Tayta Diosninchi yachayta goptinmi ichanga Tayta Dios munashanno goyan. [...] Manami ishcay quimsataga yarpanchu, manami janan shongullachu” (Santiago 3:17, TDI).

¿IMATARAJ RURANQUIMAN?

Tapucuriy: “¿Imanotaj majäwan y wamräcunawan apanacärë? ¿Imataj gustaman televisiuncho ricayta? ¿Pïcunataj amigücuna? ¿Waquincunaman yarpachacö?”. Juc parlacuychoga, ¿wamrayqui gamno cananta munanquimanchuraj?

Juc warmi cayno nin: “Quiquëcuna mana rurapäcushgätaga, wamräcunata manami mandapäcöchu cayta o wacta rurananpaj”.

Perdunta mañacuy. Wamracunaga musyapäcunmi taytancunapis juchayoj capäcushganta. Chaymi majayquita o wamrayquicunata perdunta mañacuptiqui pantashgayquipitaga, paycuna yachacäringa humilde y ali shongu capäcunanpaj.

Juc tayta nin: “Wamranchita perdunta mañacuptinchi pantashganchipitaga, paycunapis waquincunata perdunta mañacäringa”.