¿Imataj rurashwan Bibliapita shumaj yachacurcunapaj?

¿Imaraj canman purmacashga chacrayquita pichapacunayquipaj captenga? ‘¿Maypataj aruyta galaycüman cay jatun chacracho?’ ninquimanchi ¿au? Chaynola Bibliata leirpis ichanga ¿‘maypataj galaycüman’? nir tapucunquiman. Canan yachacushun mä imacunash yanapämashwan ganas ganasla y cushi cushila Bibliapita yachacunapaj.

1. ¿Imanirtaj ali canman Biblianchita cutin cutin leipaptinchi?

Cushishgami goyanga waran waran Bibliata o Jehovapa ‘leynincunata’ cäsucojcunaga, ima rurashgancunapis alimi camacanga (leiriy Salmo 1:1-3). Walca walcala galanancho leipärishgayquega alimi canga. Y tiempuwan yachacashgana carga masraj cushichishunqui.

2. ¿Imacunata ruraptiquitaj Bibliapita masraj yachacunqui?

Bibliataga tantiapärir tantiapärir-rämi leipänanchi. Aumi, manami janan jananlaga leipänanchilachu, Diospa Palabranga “yarpachacuy” nimanchimi (Josué 1:8). Leiycashgayqui horapis tapucunquimanmi cayno: “¿Imatataj Jehová Diospitaga yachachiman cay versiculucuna? ¿Imano cawacunäpätaj yanapäman? ¿Yanapämaptenga waquincunatapis leiparcümanchuraj?”.

3. ¿Imanotaj tiempuyquita camacächir Bibliata leinquiman?

Öraga tiempo alapa mana captin Bibliata leinapaj sasa canman. Pero quiquin Biblia nishgannopis “timpu cashancama ima-aycanöpapis” calpachacushwan (Efesios 5:16). Cada junaj imay hora leinapaj anotacurcuptinchega alimi canga. Waquincunaga sharcurcular Bibliata leipäcun; waquincunaga tardipayparaj, micunapaj jamapäcushgan hora; waquincunana pununanpäna caycar. ¿Gampäga maygan horataj ali canman?

SHUMAJ YACHACURCUNAPAJ

4. Bibliata leirga cushishga ricacunqui, ¿imano?

Öraga sasami canman Bibliata leir galaycunapaj. Pero imanomi chaylaraj yawaycushganchi micuytapis tiempuwanraj antojapanchi, chaynolami Bibliata ichiclata ichiclata leipärerga tiempuwanga jaguiyta munanchinachu. Leipäcuy 1 Pedro 2:2 y caypita parlapacäriy:

• Bibliata waran waran leirga, ¿tiempuwanga micuycunatanopis ‘achalau’ ninquimanchuraj?

VIDEUTA ricapäcuy, mä imanotaj jovincunapis Biblia leiyta yachacärishga. Nircur caycunapita parlapacäriy:

VIDEO: ¿Imanotaj jovincuna galaycärish Diospa Palabranta cuyar? (5:33)

• ¿Imacunata rurartaj calpachacärergan cay videucho jovincuna?

• ¿Imatataj rurapäcurgan mana uticaypa Bibliata leipäcunanpaj?

• Bibliata leir yachacänanpäga, ¿imatataj rurapäcurgan?

Caycuna caycan galaycunayquipaj:

• Fácil-la tantianapaj Bibliata acray. Parlashgayqui idiumacho captenga Traducción del Nuevo Mundo Bibliata leiy.

• Unaypita Biblia wilacushganta leiyta galaycuy, gustashushgayqui cajta. Yanapäshunayquipaj caycho tarinqui: “Bibliata imano leinayquipaj”.

• Leishgayqui cajcunata señalarcuy. Chaypäga cayman yaycuy: “Bibliacho ima leishgäta señalacunäpaj”.

• JW Library^® aplicaciunta utilizay. Celularniquicho o maquinayquicho captenga may chaycho caycarpis leinayquipaj o wiyanayquipaj ali caycanga.

• Yanapäshunayquipäpis masraj caycan Traducción del Nuevo Mundo Biblianchicho. Caycanmi mapacuna, recuadrucuna y glosario nishganpis; caycunaga shumajmi yanapäshunqui.

5. Yachachishojniquiwan tincurga ‘canan yachacunapaj cajtaga leishcäna’ ninquiman

Leipäcuy Salmo 119:34 y caypita parlapacäriy:

• ¿Imanirtaj Diosta mañacunquiman Bibliata manaraj leir y yachacunayquipaj cajta preparacurpis?

¿Imataraj ruranquiman yachacushgayqui hora, mishquichipaylapa micushgayquino sacsashga yargunayquipaj? Cay publicaciunta ali yachacunayquipäga caycunata ruray:

1. Yachacunayquipaj caj galanancho caycaj parrafucunata leiriy.

2. Parrafucunacho leiriy nej textucunatapis ashiy, nircur tincuchiy yachacushgayquiwan.

3. Preparacurga tapucuycunapa respuestanta shumaj tantiarcur señalay, cayga yanapäshunqui yachachishojniquiwan maslata yachacurcunayquipaj.

¿Mayashcanquichu?

Jehovapa testiguncunaga utilizashcanchi waquin traducicämushgan Bibliacunatapis, pero Traducción del Nuevo Mundo Bibliami yanapämanchi shumaj tantiarcunapaj y fácil-la Diospita yachacunapaj, jutinpis chaycho caycan. (jw.org paginapita cay yachachicuycho ricäriy: “¿Jehovapa testiguncunaga munashgannochuraj Biblianta ruracärish?”).

ICHIC YACHACUY

Bibliapita shumaj yachacunayquipäga, tiempuyquita camacächiy, tantiarcunayquipaj Diosta ruwacuy y yachacunayquipaj cajta preparacuy.

Yarpänapaj

• ¿Imaraj yanapäshunqui Bibliapita shumaj yachacurcunayquipaj?

• ¿Imay horataj gampaj más ali canman Bibliapita yachacunayquipaj?

• Yachachishojniquiwan manaraj tincur, ¿imanirtaj yachacunayquipaj cajtaga mayna leinquiman?

MASLATA YACHACUNAYQUIPAJ

Caycho leipänayquipaj caycan, Bibliapita shumaj yachacurcunayquipaj.

“Bibliata leishpayqui cushicuy” (Wilacamoj, núm. 1 2017)

Bibliata imano leinapaj caycanmi quimsa cajcuna.

“¿Imanotaj yanapäman Bibliata leiptëga? Juc caj: Shumaj yachachicuyta Bibliacho ashiy” (jw.org paginapita yachachicuy)

Ricäriy imanotaj cushi cushila Bibliayquita leinquiman.

“¿Imanotaj Biblia yanapämanman? Ishcay caj: Imataraj ruranquiman Bibliata cushishgala leinayquipaj” (jw.org paginapita yachachicuy)

Mä ricäriy imacunatataj unaypitana Bibliata liejcuna wilacamun.

“Imanotaj Bibliata leir shumaj yachacurcushwan” (2:06)