12 CAJ YACHACUY
¿Imaraj yanapäshunqui Bibliapita yachacuycarla caycänayquipaj?
Bibliapita yachacushganchega imaycachomi yanapämanchi caway vidanchicho. Pero calpachacunanchirämi yachacunapaj, chaymi öraga ‘¿camäpacushächuraj Bibliapita yachacuycänapaj?’ nirpis yarpachacunquichi. ¿Imanotaj calpachacushgayquega yanapayculäshunqui? Imacuna pasaptinpis, ¿imaraj yanapäshunqui yachacushgayquita mana jaguirinayquipaj?
1. ¿Imanirtaj alapa calpachacunayqui Bibliapita yachacurga?
“Tayta Diospa palabran cawaj carmi munayniyoj caycan” (Hebreos 4:12). Bibliaga manami waquin librocunanochu, chaychoga caycan Dios yarpashgancuna, imano cuyashushgayquitapis wilacunmi. Imayca caycan yachacunayquipaj, calpachacurga ali cawaytami tarichishunqui. Y manami chaylachu, yanapäshunquimi Jehovapa amigun canayquipäpis. Mana gongaypa yachacuptiquega cushi cushilami cawacunqui.
2. Bibliacho rasunpa cajcunataga ¿valuranquimanchuraj?
Bibliacho rasunpa cajcunaga ima guellaypitapis mas valuryojmi. Chaymi quiquin Bibliapis nin: “Chay tarishayquitaga ama imawanpis rucachiychu” (Proverbios 23:23). Bibliacho lapan caycajcunata valurarga, imayca problemacuna captinpis jinalami calpachacuycäshun yachacunapaj (leiriy Proverbios 2:4, 5).
3. ¿Imataraj Jehová ruranga yachacuycarla caycänayquipaj?
Camacojniqui y amiguyqui captinmi Jehovaga reguiyculäshunqui y paypita masraj yachacunayquita munan. Chaypäga “quiquinmi shacyächishunqui y poderta goshunqui” (leiriy Filipenses 2:13). Aumi, chauraga ganas ganasla yachacunayquipäga y mandashushgayquinola cawanayquipäga quiquinmi yanapäshunqui. ‘Öraga calpalä manami cannachu’ niptiquipis Jehovaga calpantami goshunqui. Imacunapa pasarpis, Jehovata ruwacuy Palabranpita yachacuycarla caycänayquipaj (1 Tesalonicenses 5:17).
SHUMAJ YACHACURCUNAPAJ
Ricärishun imacunata rurartaj Bibliapita yachacuycarla caycanquiman, waquincuna ‘amana yachacuychu’ nishuptiquipis. Nircurpis ricärishun imanopataj Jehová yanapäshunquiman guepaman mana cutinayquipaj.
4. Yarpachacuy Bibliata estudiashgayquita imawanpis mana trucachinayquipaj
Wasicho ruranapäga ima aycapis caycanmi, chaymi öraga tiempupis canmanchu Bibliata estudianapaj. Chayno captenga ¿imatataj ruranquiman? Bibliami nin caway vidanchicho “maygan más ali caj caycashganta acranapaj” (Filipenses 1:10, TNM), chayman yarpar caycunapita parlapacäriy:
¿Gampäga ‘maygantaj más ali caj caycanman acranayquipaj’?
¿Imatataj ruranquiman Bibliapita yachacushgayquita imaypis mana jaguirinayquipaj?
Matiman alpataraj garpuptinchega, nircur más rumicunata yaycachinapäga puedicanganachu.
Pero naupata rumicunataraj winaptinchega, nircur lapan alpaga yaycongami. Chaynolami “maygan más ali caj caycashganta” puntaman churarga tiempuyqui cangami gampaj cajtapis ruranayquipaj.
Runacunaga camashga cargunchi Diospita yachacunapaj y paylata aduranapämi, chaypäga Bibliapitami yachacunanchi. Leipäcuy Mateo 5:3 y caypita parlapacäriy:
Imata jaguiycurpis Bibliapita yachacurga, ¿imanotaj yanapaycalämäshun?
5. ‘Waläla estudianqui’ pipis nishuptiquega ama cäsupaychu
Öraga pilapis nishunquimi ‘imapätaj Bibliata estudianqui, ¡jaguiriy!’ nir. Ricäriy Francisco pasashganpita. VIDEUTA ricapäcuy y caycunapita parlapacäriy:
Francisco yachacuycashganpita familian y amiguncuna musyarcur, ¿imatataj rurapäcush?
¿Imanirtaj Francisco calpachacushganga mana yangalapächu cargan?
Leipäcuy 2 Timoteo 2:24, 25 y caycunapita parlapacäriy:
Familiayquicuna y amiguyquicuna, ¿imata nishunqui Bibliapita yachacushgayquipita?
Textucuna nishganno, ¿imata ruranquiman pilapis Biblia estudiayta michäshuptiqui? ¿Imanirtaj chayta ruranquiman?
6. Jehovalaman yäracuy yanapäshunayquipaj
Jehovapa amigunman ticrarga masrämi shongulanta cushichishun. Chayno cananpäga calpachacunanchirämi Palabrancho mandamashganchinola cawanapaj. Cäsucunapaj alapa sasa cashganta imaylapis yarpachacurga ama guepamanga cutiychu, Jehovaga yanapäshunquimi. VIDEUTA ricapäcuy y caycunapita parlapacäriy:
Videucho ricashganchino, ¿ima cambiucunatataj Jim rurargan Jehová mandacushgannola?
Cambiananpaj valurcharcushganpitaga, ¿maygantaj gampäga almiraypaj caycan?
Leipäcuy Hebreos 11:6 y caycunapita parlapacäriy:
¿Imatataj Jehová ruranga payta adurananpaj ‘ashejcunaraycur’?
¿Imanoraj Jehová ricacun Palabranta estudianayquipaj calpachacuptiqui?
WAQUINCUNA NIPÄCUN: “¡Gamga Bibliayquilata aptaräcunqui!, ¿imata chaycho yachacunqui?”
Chayno pipis nishuptiqui, ¿imataraj ninquiman?
ICHIC YACHACUY
Bibliata yachacushpayquega ali cawaytami tarichishunqui, pero chaypäga calpachacunayquirämi. Jehovapa maquinlaman lapanta jaguiycuptiquega, payga bendiciunnintami goyculäshunqui.
Yarpänapaj
¿Imanirtaj valuranqui Bibliacho caycaj rasunpa yachachicuycunata?
¿Imataraj ruranquiman “maygan más ali caj caycashganta” cuentata gocuptiqui?
¿Imanirtaj Diostaraj mañacunquiman Bibliapita yachacunayquipaj?
MASLATA YACHACUNAYQUIPAJ
Tiempunchita imano shumaj camacächinayquipaj chuscu caycan yanapämänanchipaj.
“¿Imatataj rurashwan tiempunchita mana ogranapaj?” (¡Ricchayna!, febrero 2014)
Juc warmi Jehovata sirviyta munargan, pero majan mana alitano ricargan calpachacushganta. Ricäriy imano Jehová yanapashganta.
Juc warmi, Diosta sirvinanpaj calpachacushganraycur runanpis chayta ricar Diosta sirvir galaycun.
Öraga testigucunapita nipäcun familiacunata peliachir raquichishganta, ¿rasunpachuraj chayga?