¿Jatun guerra galaycunanpänachuraj caycan? | ¿Ima nintaj Biblia?

Pasaj 30 watacunacho achca runacuna yarpapäcurgan caway ali cashganta y masraj mejorananpaj. Pero imayca mana ali noticiacunata wiyar canan runacuna chayta yarpapäcunnachu.

“Gaza marcacho guerra cashganraycu achca runacuna manchacärin Israel y Hizbulá naciuncunapis chiquinacushpan guerraman yaycunanpaj” (Reuters, 6 de enero de 2024).
“Irán, Rusia y China naciuncuna shuntacuycan waquin naciuncunawan peliananpaj. Irán naciunpa munaynincho caycaj soldaducunaga achca sitiucunacho atacaycanna, y camaricushgana carcaycan guerraman yaycunanpaj” (The New York Times, 7 de enero de 2024).
“Rusia cada cadala más atacaptin, Ucraniacho runacuna alapa nacarcaycan” (UN News, 11 de enero de 2024).
“China naciunpa alapa guellaynin captin imayca armancuna caycan, Taiwán naciunpita runacunapis naciunninraycu imatapis ruranapaj listo carcaycan, Pekín y Washington marcacunapis chiquinacun; chaycunaraycu juc guerrapis galaycungachi” (The Japan Times, 9 de enero de 2024).

¿Bibliaga wilacurganchuraj canan wichan imayca pasaycashganta? ¿Nishwanchuraj jatun guerra galaycunanpaj cajta?

Biblia wilacurganna canan ima pasananpaj

Bibliaga manami wilacurganchu maygan naciuncunacho canan ricaycashganchi guerracuna cananpaj. Ichanga wilacurganmi imayca mana alicuna cashganraycu “runakuna chikinakur” cawananpaj (Apocalipsis 6:4, Tayta Diospa Wilakuynin).

Daniel libruchopis wilacun cay ushanan tiempucho munayniyoj naciuncuna chiquinacur peliananpaj pï cay munduta gobernananpaj. Chaymi ricächicun imayca armamentuncuna charashganta y chaychicaj guellaypis chaycunaman gastacashganta (Daniel 11:40, 42, 43).

Juc guerra galaycungana

Biblia wilacun cay pasaycashgancuna más mana aliman chayananpaj. Jesucristo nergan: “Runakuna fiyupami nakapäkunqa. Tayta Dios kay patsata kamashqanpita patsa manami imaypis tsayjinanpa nakapäkushqatsu” (Mateo 24:21, TDW). Chay fiyu nacayga Armagedón guerracho ushanga. Chay junajcho mana ali runacuna shuntacanga “Tayta Dios juzganan junaq pelyananpaq” (Apocalipsis 16:14, 16, TDW).

Ichanga Armagedón guerracho Jehová runacunata manami ushacächengachu, sinoga lapan mana ali gobiernucunata ushacächenga. Mana ali runacunapa culpanraycu canan nacaycanchi. Musyayta munaptiqui imano Armagedón guerra jauca cawayta apamunga, cay yachachicuycuna leiriy: