QARANCHÖ YACHATSIKÏPITA | JEHOVÄPA TESTÏGUNKUNAPITA MANA MUSYANQËKI
¿Imatataq creiyan?
Testïgukunaqa creiyä ‘Teyta Diospa palabranqa quiquimpita shamunqanta, y alläpa alli’ kanqantam (2 Timoteu 3:16). Bibliatam utilizäyä Kamakoq Diospita yachakuyänäpaq y consëjunkunatam wiyakuyä kushishqa kawakuyänäpaq.
Bibliaqa kënömi nin: “Llapan nunakuna musyayänampaq qampa jutikiqa Jehovämi, entëru patsa janampaqa qamllam këkanki” (Salmu 83:18). Tsëmi Jehovä Diosllata adorayä, y Testïgun karmi jutinta reqitsikuyänäpaq kallpachakuyä (Isaïas 43:10-12).
Cristiänum kayä, y Jesus “Diospa tsurin” kanqanta, patsaman shamunqanta y Diospa Akrashqan kanqantam creiyäa (Juan 1:34, 41; 4:25, 26). Wanurirpis kawarimurqanmi y ciëlutam kutikurqan (1 Corintius 15:3, 4). Tiempuwannam Diospa Gobiernunchö Mandakoq kanampaq churashqa karqan (Apocalipsis 11:15, NTCN). Tsë Gobiernuqa patsakashqanam këkan y Patsatam juk shumaq huertaman yapë tikratsimunqa (Daniel 2:44). Bibliam kënö änikun: “Manshukunapaqmi patsaqa kanqa, y tsëchömi alläpa alli kawakïta tarirnin kushishqa kawakuyanqa” (Salmu 37:11, 29).
Alemania nacionpa juk periödicunchömi Catölicu cüra Benjamin Cherayath kënö nirqan: “Bibliata leyirqa Dios parlapëkanqantanömi sientiyan. Y problëmankuna kaptinqa Diospa Palabranchömi consëjuta imëpis ashiyan. [...] Pëkunapaqqa Diospa Palabran kawëkanmi”.
Testïgukunaqa creiyä Biblia yachatsikunqanqa kanan witsan nunakunatapis yanapëta puëdinqantam (Isaïas 48:17, 18). Tsëmi mandakunqanta cäsukuyänäpaq kallpachakuyä. Tantiyarinapaq, Bibliaqa mandakun cuerpuntsikta y pensënintsikta mana rakchatänapaqmi, tsëmi cigärruta shoquyätsu ni drögakunata utilizäyätsu (2 Corintius 7:1). Jina tsëmi machayätsu, jukwan jukwan pununakuyätsu ni suwakuyätsu (1 Corintius 6:9-11).
a Jesus “Diospa jucllella tsurin” kanqantapis Bibliaqa ninmi, porqui kikin Jehovämi pëtaqa puntata kamarqan (Juan 3:18; Colosensis 1:13-14; 1:15, NM).