Jehovapa Testigonkunapa 2008 watapaq Hatun Asambleankuna
1. a) ¿Imanirtaq alläpa alli noqantsikpaq, hebreukunata Pablu willapanqan? (Leiri Hebreus 10:24, 25.) b) ¿Apóstol Pablupa willapäkïninta qatinapaq, imataq kapamäshun ichikllachöna?
1 Hebreu cristianokunatam apóstol Pablu yarpätserqan ëllukäyänan o qorikäyänan alläpa alli kanqanta, huknin hukninkunawan yanapanakur këkäyänampaq, masraq tsë hunaq yëkarëkämoqta rikar (Heb. 10:24, 25). Kananqa musyantsikmi Pablu nenqan hunaq këllachöna kanqanta, tsëmi wawqi panintsikkunawan ëllukëta munantsik y Diospa yachatsikïnin yanapamänapaq, y kë ushakë hunaqkunaqa imëpitapis masmi mantsëpaq tikrakïkan (2 Tim. 3:1). Y 2008 watapaq hatun asambleantsikmi yanapamäshun tsëta ruranapaq.
2. a) ¿Imanirtaq alläpa alli kiman hunaqnimpi asambleachö kanantsik? b) ¿Imanöraq alistakur qallankiman ewanëkipaq?
2 Kiman hunaqmi ëwanëki: Kiman hunaq asambleaman ewanëkipaqmi willapäriyaq. “Imepis ellucashun” ninanqa, espiritual kaq mikïman mana faltananmi (Heb. 10:25). Kanampitanam asambleapaq alistakurnin qallankiman. Patronnikitapis willëna trabajocho arreglokunata ruranampaq. Asamblea witsan wambrakuna escuelachöraq këkäyaptenqa, asambleaman ewayänëkita willë profesorninkunata, y kë rurëqa Diosta adorayänäpaqmi nï. Reinota puntaman churayaptikeqa, llapan rurënikikunatam Jehová bendecimonqa (Mat. 6:33).
3. ¿Imanötaq wakin nunakunatapis kuyakïwan yanapashwan?
3 Wakintapis yanapë ewayänampaq: Hina apóstol Pablum nerqan wawqi paninkunata “jucnintsic jucnintsic yanapanacur cuyanacur” kanapaq (Heb. 10:24). ¿Pillapis kanku Libropita Yachakunapaq reunionchö asambleaman ewanampaq yanapëta wanaq? ¿Yanapankimanku Bibliapita yachëkätsinqëkikunata asambleaman huk hunaqllapis ewayänampaq? Mana testigo familiëkikunata asambleapaq parlaparnin, pëkunatawan invitë. Itsa tsënö willariptikeqa asambleaman shayämunman.
4. ¿Imanöraq musyashun hatun asamblea imë y mëcho kanantapis?
4 Imanöraq musyashun imë y mëcho kanantapis: Cada watam sucursalman telefonopa alläpa qayakuyan tapukurnin, imë y mëcho asamblea kanantapis. Tsë llapan qayakoqkunaqa kayan mëcho asamblea kanantapis mana yarpaq wawqi panikunam, y allichi rikäriyanman manaraq sucursalman qayakurnin La Atalaya del 1 de marzo de 2008 nishqanta.
5. a) ¿Imanirtaq tocamanqantsik markachö asambleaman ewashwan? b) ¿Imatataq rurankiman huk markachö asambleaman ëwarqa?
5 Atska asientokuna, publicacionkuna, posädakuna y imakunapis mana pishinampaqqa, llapëki publicadorkunatam mañayaq congregacionnikikunapa asambleanman ewayänëkipaq. Kikikipa asambleëkiman mana ewëta puëderqa y huk markachö asambleaman ewarqa, congregacionpa secretarionta huk formulariota mañë posädapaq y tsëman qellqanëkipaq. Ewanëkipaq markachö más asambleakuna kaptenqa, churë imë ewanëkipaq kaqtapis. Kë formulariota qellqarïkurnam secretariota qonëki, pënam apatsenqa asamblea kanan markaman.
6-8. ¿Imakunatayanraq yarpashwan posädacho arreglokunapita y imanir?
6 Posäda: Posadakunapaq Departamentom, posädakunata ashiyan wawqikunapa wayinkunachö, alli publicadorkunapaq y alli portakoq wambrankunapaq, këtaqa rikanqa Congregacionchö Comité de Servicio nishqanmi. Kë posädakunaqa hotelchö posadakuyänampaq mana qellëta tareqkunallapaqmi. Kë arregloqa imëpis allim kashqa, posadakoqkunapa y wayiyoqkunapa yanapakïninwan.
7 Asamblea kaq markakunachö tärarqa, kushishqam posadatsishwan karu markapita shamoq wawqi panikunata. Wakin asambleakunapaqqa wanayan atska cuartokunatam. Kuyakïwan posadatsikoq karnenqa, atska bendicionkunatam chaskishun Jehovapita, Romanos 12:13 kënö nimantsik: “Pipis posadacunanpaq wayiquiman chämuptin posadecatsiyë”. Tsëmi congregacionpa secretarionwan parlashun, y qellqashun formulariocho posadatsikunapaq.
8 Posädaqa asamblea hunaqkunallapaqmi; manam posadatsimänantiskta shuyarashwantsu atska hunaq, manaraq asamblea kaptin o usharishqanchö, huk cosaskunata ruranantsik-rëkur o huk markakunata reqipakïta munanqantsik-rëkur. Hinamampis, cristiano kuyakïmi rikätsenqa wayiyoqta agradecikuyanqëkita más hunaqkuna mana quedakurnin. Hina wambrankunatapis willapäyanmanmi posadatsikoqpa wayinta respetayänampaq, mana yëkuna cuartoman mana yëkuyänampaq. Kë llapan yachakonqantsikta yarpëqa kikintsikpaqmi kanqa, y tsënöpam wawqi panintsikkunawan kuyanakïnintsikta más chachaqyätsishun (Juan 13:35).
9, 10. a) ¿Imataq pasëkan wakin asambleakunachö? b) ¿Imanö kanqantsiktaraq rikätsikushwan asientokunata tsarikorqa?
9 Alli rurëkuna: Jehovata shumaq alabanapaq ëllukëqa o qorikëqa kikintsiktam yanapamantsik. Tsëpitapis más shumaqqa kanqa Jehovapa shutinta alabëmi (Isa. 48:17). “Alli rurënintsiktaqa rikäyanqa” hatun asambleakunachömi. Tsënö kaptimpis más yachakunapaq pishipamantsik-ran. Wakin asambleakunachömi rikarqontsik punku manaraq kichaptin shuyarëkäyaqta, y kichariyaptinnam raslla yëkurnin munayanqanchö atska asientokunata tsarikur kakïkäyaqta. Höraqa manam wiyakuyashqatsu acomodadorkuna niyaptimpis. Huk wawqim kënö nerqan, “täkuyanampaq asientokunata asheqkunaqa karullachönam tariyarqan”.
10 Kënömi tapukushwan, ¿imaraq niyanqa rikämaqnintsikkuna tsënö kashqaqa? ¿Wakinkunata kuyanqantsikta rikätsikuntsiktsuraq? ¿Cristiano pura kuyanakonqantsikta rikätsikuntsiktsuraq? (Fili. 2:4; Rom. 12:10.) Jehovata unëllana adoraqkunaqa, munashwanmi alli rurëta wakinkuna rikämarnintsik yachakuyänampaq. Tsënö rurashqam, awkinkuna, qeshyaqkuna, huk kutillaraq asambleaman ewaqkuna, asientonkuna tariyanqa chäyanqanmannö shumaq täkuyänampaq (Mat. 7:12).
11. ¿Imanötaq rikätsikun Mateo 4:4 asambleachö llapan yachatsikayämonqanta alleq wiyakunapaq?
11 Jesusmi kënö nerqan, kawënintsikqa alli kanqa “Dios llapan nenqanta casucurninmi” (Mat. 4:4). Wata wata asambleakunachömi Jehová ‘tsecho caqcunata miquinincuna örancho qaramantsic’ “mäcoq, mäcoq, cumplidu sirweqnin” ruramonqanwan (Mat. 24:45). Asambleachö espiritual kaq mikïta chaskinapaqqa alli unëpitam rurayämushqa y alläpa trabäjom kashqa. Tsëmi Jehová shumaq kuyamanqantsiktaqa rikätsikushun asambleaman ëwar y llapan yachatsikayämonqanta alleq wiyakurnin.
[3 kaq päginachö recuadru]
Asambleapa horarion
Punta y sigueqnin hunaq
Qoyapa 9.20 qallanqa - Tardepa 4.55 ushanqa
Kima kaq hunaq
Qoyapa 9.20 qallanqa - Tardepa 4.00 ushanqa