¿Imashinata ñucanchi yuyaicunapi tranquilo caita ushapanchi?
Bibliapica ali munaicunata, yuyaicunata charina cashcata, cutin nali munaicunata, yuyaicunata na charingapaj esforzarina cashcatami yachachin.
ÑAPASH FIÑARINA
BIBLIAPICA NINMI: “Ninan shinlli runapaj randica, na ñapash fiñarij runami ashtahuan ali” (Proverbios 16:32).
¿IMATATA NINGAPAJ MUNAN? Ñucanchi munaicunata, yuyaicunata controlanata yachanaca alimi can. Huaquinbi culiranaca normalmi can. Shinapash ñapash fiñarinaca nalipachami caita ushan. Ñapash fiñarijcunaca na ali pensarishpa imatapash ninlla, o ruranllami. Chaimandami jipamanga arripintirin.
¿IMATATA RURAI USHAPANGUI? Ama ñapash fiñaringapami esforzarina capangui. Chaita na rurashpaca quiquinballatami nali canga. Huaquin gentecunaca pensanmi, ñapash fiñarijcunaca imatapash na manllaj shinllicunami can nishpa. Shinapash ñapash fiñarijcunaca na shinlli cashcatami ricuchinajun. Chaimi Bibliapica nin: “Ñapash fiñarina yuyaita na jarcarij runaca, muyundi pirca urmashca jatun pirca illaj puebloshnami” can nishpa (Proverbios 25:28). Imatapash nara nishpallata o rurashpallata ima ciertopacha pasashcata yachanami ama ñapash fiñarichun ayudanga. Bibliapica: “Aliguta yarishpa causaj runaca, ñapash fiñarishpapash jarcarinmi” ninmi (Proverbios 19:11). Shinallata shujcunata aliguta uyanami aliguta pensarichunbash, ama ñapash fiñarichunbash ayudanga.
AGRADICINATA YACHANA
BIBLIAPICA NINMI: ‘Pagui ninajuna canguichi’ (Colosenses 3:15).
¿IMATATA NINGAPAJ MUNAN? Huaquingunaca agradicinata yachaj gentecunallami cushilla causaita ushan nin. Agradicinata yachaj gentecunaca paipa familia ucumanda pipash huañujpi o ima llaquita charishpapash cushilla causashpa catin. Paicunaca ninmi, agradicinata yachana, llaquicunapilla na yapata pensarinami cushilla sintirichun ayudan nishpa.
¿IMATATA RURAI USHAPANGUI? Cada punlla imagumandalla agradicishca cashcataca shuj cuadernogupi anotapangui. Na jatun cosascunamandallachu agradicina capangui. Por ejemplo, indi llujshishcamanda, shuj familiahuan traquilo parlashcamanda o cada punlla causajushcamandami agradicita ushapangui. Cai consejocunata catishpaca ashtahuan cushillami causapangui.
Chaipaca quiquinba familiata, amigocunata imagumandapash agradicinami capangui. Shinallata paicunamanda imata alicachishcatami nita ushapangui. Na cashpaca shuj cartagupi, shuj correopi o celularpi shuj mensajeguta escribipangui. Shina rurashpaca ashtahuanmi quiquinba familiahuan, amigocunahuanbash ali llevarita ushapangui. Shujcunamanda alita rurashcamandami quiquinllata cushilla sintiripangui (Hechos 20:35).
BIBLIAPA YACHACHISHCACUNA
Bibliata descargapangui, jw.org paginapica 40 shimicunapimi tian.
ÑAPASH FIÑARINAMANDA JARCARIPANGUI
“Fiñanajuita callarichij runaca, jatun yacuta cacharinshnami. Narapash fiñanajushpa rimari callarijpillata anchuringuilla” (PROVERBIOS 17:14).
NA YAPATA PREOCUPARINA
“Na cayandi punllamanda yarishpa musparinachu canguichi. Punllandimi llaquicunaca tian. Ima llaqui shamushpapash, punllandi yalijunllami” (MATEO 6:34).
ALIGUTA PENSARISHPARA IMAGUTAPASH RURANA
“Cai ali shimicunaca, canda alichingami. Cai ali yuyaicunaca, imamandapash cuidangami” (PROVERBIOS 2:11).