Carmelo shuti urcupica ¿imata pasarca?

Israelmanda 10 familiacunaca tauca nali reycunatami charirca. Paicunapuramandaca rey Acabmi ashtahuan nali carca. Paica Baal nishca yanga diosta sirvij nali, millai Jezabel huarmihuanmi cazararca. Shinami Acabpa, Jezabelpa chaquita catishpa ashtaca gentecuna Baal nishca diosta adoranajurca. Shinallata Jehová Diospa ashtaca profetacunatapashmi huañuchirca. Chaita ricushpaca ¿imatata Jehová Diosca rurarca? Profeta Eliastami Acabman shuj mensajeta villachun cacharca.

Eliasca Acabtaca, can nali rey caimandami caipica na tamianga nirca. Chaimi quimsa huata yalita pambacunapi imapash na viñajpi gentecunaca yarjai pasanajurca. Jipamanga Jehová Diosca cutinmi Eliasta, Acabhuan parlachun cacharca. Chaipimi rey Acabca Eliastaca: Canmi israelitacunata pandachij cangui. Canmandami tucui nalicunata pasajunchi nirca. Shina nijpimi Eliasca: Ñucaca na culpata charinichu can Baal dioscunatara catijushcamandami na tamiashca. Cunanga tucui israelitacunata, Baalta catijcunatapash Carmelo urcupi tandanajuchun cachai. Chaipimi pipacha Taita Dios cashcata ricushun nirca.

Carmelo urcupi israelitacuna tandanajujpimi Eliasca paicunataca nirca: Jehová ‘Taita Dios cajpica, paita catichi. Ashtahuangarin Baal dios Taita Dios cajpica, paita catishpa richilla. Chaita yachangapaca caita ruraichi, Baalta sirvij 450 profetacuna shuj sacrificiota rurashpa’ cangunapa diospa shutipi mañaichi. Shinallatami ñucapash shuj sacrificiota rurashpa Jehová ‘Diospa shutipi mañasha mañajujta uyashpa, maijan Dios cashpapash ninata cachamushpaca, chaimi Taita Diospacha canga nircami. Shina nijpimi, tucuilla gentecuna: alimi can’ ninajurca.

Baal diosta sirvijcunaca sacrificiota rurashpami punlla entero “Baal, ñucanchi mañajujta tigrachihuayari” nishpa mañanajurca. Shina mañanajujpipash: Baal “tigrachijllapash na uyarircachu”. Chaimi: ‘Eliasca paicunata asishpa, cashna nirca: Baalta shinllita caparichi paica puñujungami, rijchachinami canga’ nishpa. Ña amsayajujpipash Baalta sirvijcunaca mañanajurcarami. Shinapash nipi na tigrachircachu.

Eliasca sacrificiota altar jahuapi churashpa chaipi ashtaca yacuta churashca jipami, cashna mañajurca: Jehová Dioslla ‘Israel llactapica canlla Taita Dios cajta ricuchipai’ nirca. Chai jipallami Jehová Diosca ‘ninata urai cachamushpa Eliaspa sacrificiotaca tucuillata rupachirca’. ‘Chaita tucuicuna ricushpami [‘Jehová Diosmi TNM-S], Taita Diospacha can ninajurca’. Chaimi Eliasca: ‘Baalmanda profetacunataca shujllapash ama pacajushpa richun saquinguichichu’ nirca. Shinami chai punllapica 450 Baalmanda profetacunata huañuchirca.

Chai jipaca ‘asha fuyu mama cuchamanda vichai jatarijta Elías ricushpami’ Acabtaca: “Ama tamia japichun, caballocunapi carretata huatashpa ucha urai rilla” nirca. Chaimi ‘huairahuan fuyu shamushpa yanayashpa ninandapacha tamiarca’. Shinami chaquishca tiempoca tucurirca. Chaimi Acabca carretapi vitsashpa uchalla rirca. Ashtahuanbash Jehová Dios ayudajpimi Eliasca, Acabpa carretatapash mishashpa rirca. Shinapash ¿Eliasca ñanachu llaquicunata charigrijurca? Chaitaca shamuj capitulopimi yachajushun.