Huauquipanicuna ciertopacha juyashcatami sintirca

YOMARA jovencitaca Marcelo y Hiver shuti turicunatami charin. Paicunaca Guatemala llactamanda shuj uchilla pueblopimi causan. Yomaraca Testigocunahuanmi Bibliamanda estudiai callarirca. Jipamanga paipa turicunapashmi yachajui callarirca. Pero quimsandi ciegogucuna caimanda, braille nishcatapash na lii ushashcamandami shinlli carca. Chaimandami Bibliamanda yachachij huauquica parrafocunata y Bibliamanda textocunatapash liishpa uyachina carca.

Reuniongunaman rinapash paicunapaca shinllimi carca. Ashtahuan ladolla Salón del Reinoman chayangapaca 40 minutotami rina carca. Shinallata paicunalla ritaca na usharcachu. Chaimandami congregacionmanda huauquipanicunaca paicunata pushangapaca turnarin carca. Y chaupi semanapa tandanajuipi partecunata chari callarijpica, imata nina cashcata de memoria yachajuchunmi huauquipanicunaca paicunata ayudan carca.

Mayo de 2019​pica Testigocunaca paicunapa pueblopimi reuniongunata chari callarirca. Y chai tiempopillatami shuj precursor regular cusahuarmica chai puebloman causangapaj rirca. Cai cusahuarmica braille nishcataca na lii usharcachu. Shinapash “cai quimsa huauquipanicuna braille nishcata liichun y escribichunmi yachachigrinchi” nircami. Chaita pactachingapaca braille nishcata yachajungapaj y chaita imashina yachachinata yachajungapapashmi shuj bibliotecaman rirca.

Quimsa quillaguhuanllami Yomara, Marcelo y Hiverca braille nishcata liinata yachajurca. Chaimandami Jehová Diosta ashtahuan aliguta sirvi usharca.a Cunanga quimsandimi precursor regularcuna can. Marcelocarin siervo ministerialmi can. Paicunaca cada semanami espiritual cosascunata rurangapaca ashtaca tiempota llujchin. Paicunaca Jehová Diostaca cushijushpami sirvin. Chaimandami shujcunapash chaitallata rurangapaj munan.

Yomara, Marcelo y Hiverca congregacionmanda huauquipanicuna paicunata ninanda ayudashcamanda y juyaita ricuchishcamandami ninanda agradicin. Panigu Yomaraca: “Turiñañacunata rijsishca horasmandapachami paicunaca ñucanchita ciertopacha juyashcata ricuchishca” ninmi. Cutin huauqui Marceloca: “Congregacionbica alipacha amigocunatami charinchi. Mundo enteromanda huauquipanicunahuan juyarishcamandami shuj familiashna capanchi” ninmi. Yomarapash, paipa turicunapash cai alpa shuj paraíso tucuchunmi tucui shunguhuan shuyanajun (Sal. 37:10, 11; Is. 35:5).