Gentecunaca tapunmi

Junio de 2020 Villajun revistapi “Jehová Diospa shutita santificana” temapica, Jehová Diospa shutimanda, pailla mandana derechota charishcamandaca ¿ima mushuj entendimientota llujshirca?

Chai temapica gentecunapash, angelcunapash Jehová Diospa shutita santificangapaj imata rurana cashcatami yachajuparcanchi. Jehová Diosllami tucuita mandana derechotaca charin. Paipa Gobiernoca alipachami can. Maijan gobiernohuanbash na igualanllu. Shinapash caica Jehová Diospa shuti santificado cachunga shuj partegullami can. Shinallata gentecuna Jehová Diostalla sirvina o na sirvishpa catinaca shuj importante partepashmi can.

Shinapash ¿imamandata cunanbica Jehovapa shuti, paipa shutita santificanami ashtahuan importante can ninchi? Quimsa yuyaicunata ricupashun.

Primeroca, jardín de Edenbimi Satanasca Jehovapa shutita o Jehová Diostaca nalipi quidachirca. Satanasca Evahuan parlashpaca Jehová Dios mitsa cashcata, paipa mandashcata pactachina shinlli cashcatami crichirca. Shinapash jipamanga Satanasca Jehová Diospa nishcacunaca na ciertochu can, paica llullajunmi nircami. Shinami Jehová Diospa shutitaca nalipi churarca. Chai punllamandapachami Satanás Diablo shutita japirca. “Diabloca” “llullacunata nin” nisha ninmi (Juan 8:44). Evaca Diablopa llullacunata crishpaca Taita Diosta na cazushcatami ricuchirca. Shinami Jehová Dios mandachun na munashcata ricuchirca (Gén. 3:1-6). Cunanbipash Diablo Jehová Diosmanda llullacunata nishpami paipa shutita mapayachishpa catin. Chai llullacunata crij gentecunaca Jehová Diosta cazungapaca na munanllu. Chaimandami Jehová Diosta sirvijcunapaca paipa shutimanda llullacunata uyanaca nalipacha can. Chai llullacunamandami mundo enteropi gentecunaca sufrishpa, nalicunata rurashpa causan.

Catipica, tucuicunapallata ali cachunmi Jehová Diosca paipa shutita limpiashpa difindinga. Chaita ruranaca Jehová Diospaca importantepachami can. Chaimandami paillata cashna nin: “Ñuca jatun shutitami, jucha illaj cajta ricuchisha” nishpa (Ezeq. 36:23). Padrenuestro oracionda Jesús yachachishpaca cashnami nirca: “Quiquinba shutiguca santificado cachun” nishpa. Shinami Jesusca Jehovata sirvijcuna oracionda rurashpa imamanda ashtahuan mañana importante cashcata ricuchirca (Mat. 6:9). Bibliapica Jehová Diospa shutita jatunyachina importante cashcatami cutin cutin ricuchin. Huaquin ejemplocunata ricupashun. “Mandaj Diostaca, paipaj shutita cazushpa alicachina cashcamandallata alicachinajuichi” (1 Crón. 16:29; Sal. 96:8). “Paipaj punchapamba shutiguta candaichiyari” (Sal. 66:2). “Tucui causaipimi, cambaj shutigutaca, punchapambami nijusha” (Sal. 86:12). Jehová Diospacha jahua cielomanda parlajpica Jesusca Jerusalén templopimi carca. Jesusca paipa Taitataca cashnami mañarca: “Ñuca Taitalla quiquinba shutita gentecuna alabachun ayudapayari” nishpa. Chaimi Jehová Diosca nirca: “Ñami chaitaca rurashcani y ñami gentecunaca ñuca shutita alabashca. Cutinbashmi chaitallata rurasha. Chaimi paicunaca ñuca shutitaca alabanga” nishpa (Juan 12:28).a

Ultimopica, Jehová Diosca paipa shuti para siempre alabai tucushca cachunmi munan. Jesús mil huatacunata mandashca jipa, shinallata último prueba tucurishca jipa Jehová Diospa shuti imamanda importante cashcapi pensaripashunchi. Chai punllapica gentecunapash, angelcunapash Jehová Diospa shuti santificado canamandaca ¿imatashi pensanga? Caita aliguta intindingapaca Jehová Dioslla mandana derechota charishcata, shinallata Jehová Diostalla gentecuna sirvina cashcata yaripashunchi. Chai tiempocunapica gentecunaca pita sirvinataca ñana agllanachu canga. Paicunaca perfecto, shinallata último pruebatapash ña yalishcami canga. Para siemprepashmi causaita ushanga. Shinallata Jehová Dioslla mandana derechota charishcamandaca ¿imatata pensashun? Pailla mandana derechota charishcata seguro cajpimi pipash ñana pandachi ushanga. Jehová Diospa Gobiernolla ashtahuan ali cashcatami intindishun. Gentecunapash, angelcunapash tucuicunallatami Jehová Diospa Gobiernotaca cushijushpa chasquishcanga. Shinaca Jehová Diospa shutihuanga ¿imata pasanga?

Jehová Diospa shutica santificashcami canga. Chai shutitaca pipash ñana mapayachingachu. Jehová Diospa shutica gentecunapapash, angelcunapapash importante cashpami catinga. ¿Imamandata shina ninchi? Jehová Diosca ñucanchi na yashca juyailla cosascunatami rurashpa catinga. Por ejemplo, Jesusca humilde caimandami tucuilla autoridadta paipa Taitaman cutin tigrachinga. “Shinami Taita Dioslla tucuita mandanga” (1 Cor. 15:28). Chaipa jipaca, cai alpapi causajcunaca “Taita Diospa huahuacunashnami libre causanga” (Rom. 8:21). Ashtahuanbash Jehová Diospa munai tucuipi pactarijpimi gentecunapash, angelcunapash shujlla familiashna canga (Efes. 1:10).

Tucui caicuna pactarijpica Jehová Diospa familiaca ¿imashinashi sintiringa? Tucuicunallatami jahua cielopipash, cai alpapipash Jehová Diospa juyailla shutitaca tucui shunguhuan alabashpa catingapaj munanga. Rey Davidca Taita Dios yarichijpimi cashna escribirca: ‘Mandaj Taita Diosca alicachi tucushca cachun. Paipa juyailla shutica causaita causaicaman alicachi tucuchun’ nishpa (Sal. 72:18, 19). Siempremi Jehová Diospa shutita imamanda alabana cashcataca yachajushpa catishun.

Imashina cashpapash Jehová Diospa shutica pai imashina cashcatami ricuchin. Chaimandami paipa shutipi pensashpaca shuj juyaj Dios cashcatami yarinchi (1 Juan 4:8). Shinallata Jehová Dios ñucanchita juyaimanda rurashcata, juyaimanda salvashcata, juyaimanda shuj ali Gobierno cashcata ricuchishcatami siempre yarishun. Ashtahuangarin Jehová Dios tucuicunata ashtacata bendiciajtami ricushun. Tucui ñucanchi causaipimi Jehová Diosman ashtahuan quimiringapaj, Jehová Diospa shutita candashpa alabangapaj ashtaca oportunidadcunata charishun (Sal. 73:28).