Jesushna cushijushpa villachipashunchi

1. Testigo de Jehovacunaca ¿imatata munapanchi?

TESTIGO de Jehovacunaca cushijushpami ali villaigucunataca predicangapaj munapanchi (Tito 2:14). Shinapash huaquingunaca ñana pundashna cushijushpa villachinajushcatami cuenta japishca. Shuj huauquica ali anciano cashpapashmi “huaquinbica predicana munaitaca na charinichu” nin.

2. ¿Imamandata huaquinbica cushijushpa villachinaca difícil can?

² Predicanata gushtashpapash huaquingunaca, huauquipanicuna imashina ñapash beneficiarijta ricushpami, Salón del Reinocunata ruranata, mantenimientota ruranata, labores de socorropi ayudanata o huauquipanicunata animanata ashtahuan gushtan. Shinallata chai proyectocunapi tucuicunahuan llevarimanda, juyaita ricuchishpa trabajaimanda, huauquipanicunapash agradicishcamandami chai proyectocunapi participanataca ninanda gushtan. Cutin shujcunaca, huaquin gentecunalla uyangapaj munaj territoriocunapimi ashtaca huatacunata predicanajushca. Jipacunamangarin gentecunaca ashtahuanmi na uyangapaj munanga (Mat. 10:22). Chaicunamandami huaquingunapaca cushijushpa predicanaca difícil can. Shinaca cushilla predicashpa catingapaca ¿imatata rurai ushapanchi?

3. Lucas 13:​6-9​pica ¿imatata Jesusmandaca yachajupanchi?

³ Cushijuihuan predicashpa catingapaca Jesuspa ejemplotami catina capanchi. Jesús cai alpapi cashpaca, predicanataca na saquircachu. Chaipa randica ashtahuan cushijushpami gentecunamanga predicashpa catirca (Lucas 13:​6-9​ta liipangui). Jesusca quimsa huatacunata higos yurata cuidajushca runaguhuanmi compararirca. Chai runaguca nima na fucujpipash chai higos yurataca cuidashpami catirca. Jesusca chai runagushnallatami quimsa huatata judiocunamanga predicarca. Huaquingunalla paipa discipulocuna tucujpipash Jesusca na desanimarircachu, predicashpami catirca. Ashtahuangarin, gentecunapa shunguman chayangapami ashtahuan cushilla predicashpa catirca.

4. Jesusmandaca ¿ima chuscu cosascunatata yachajugripanchi?

⁴ Cai temapica último 6 quillacunata Jesús cai alpapi cashpa imashina ashtahuan cushijushpa villachishcatami yachajupashun (Lucas 10:1​pi español Biblia de estudiopi “Después de estas cosas” nishca notata ricupangui). Jesusmandaca cai chuscu cosascunatami yachajupashun: 1) Jesusca Jehová Diospa voluntadtami en primer lugar churarca, 2) Jesusca Bibliapi profeciacunataca yaipimi charirca, 3) Jehová Dios ayudanapimi confiarca, 4) huaquin gentecuna uyanataca seguromi carca.

JESUSCA JEHOVAPA VOLUNTADTAMI PUNDAPI CHURARCA

5. Jehovapa voluntadta en primer lugar churangapaca ¿imacunatallata Jesusca rurarca?

⁵ Jehová Diosca paipa sirvijcuna cushijushpa villachichunmi munan. Chaita yachashpami Jesusca “Taita Diospa Gobiernomanda ali villaicunataca” cushijushpa villachirca (Luc. 4:43). Jesuspaca predicanami ashtahuan importante carca. Chaimi cai alpapi último quillacunata cashpaca ‘shuj shuj llactacunapi, shuj shuj pueblocunapi gentecunamanga yachachirca’ (Luc. 13:22). Shinallata paishna predicashpa purichunmi paipa discipulocunamanga yachachirca (Luc. 10:1).

6. ¿Imacunata rurashpata predicaciondaca apoyapanchi? (Fotocunata ricupangui).

⁶ Cunanbipashmi predicanaca importante can. Chaimandami Jehová Dios y Jesusca predicachun munan (Mat. 24:14; 28:​19, 20). Shuj shuj cosascunata rurashpami predicaciondaca apoyapanchi. Por ejemplo, predicashca gentecuna Jehovata adorangapaj richunmi Salón del Reinocunataca rurapanchi. Predicacionbi apoyangapami Betelpipash trabajapanchi. Shinallata llaqui apashca huauquipanicuna minishtirishca cosascunata charichun y predicashpa catichunmi labores de socorropipash ayudapanchi. Jehová Dios ñucanchicuna predicachun munashcata yaipi charishpaca, siempremi predicaciondaca en primer lugar churapashun. Hungría llactamanda János shuti anciano huauquiguca ninmi: “Jehová Diosta sirvingapaj shuj shuj cosascunata rurashpapash, predicanataca na huashaman saquinachu capanchi. Predicacionmi ashtahuan importante can”.

7. 1 Timoteo 2:​3, 4​pi nishcashnaca ¿imamandata Jehová Diosca ñucanchicuna predicashpa catichun munan?

⁷ Cushijushpa villachingapaca, gentecunata Jehová Dios juyanshnami juyana capanchi. Jehová Diosca ashtaca gentecuna ali villaicunata uyashpa yachajuchunmi munan (1 Timoteo 2:​3, 4​ta liipangui). Ali villaicunata chasquishca gentecuna salvarita ushana cajpimi Jehová Diosca ñucanchicuna ashtahuan aliguta villachichun munan. Chaipaca Juyaimandami: Bibliamanda Yachachipanchi folletota cushca. Chai folletoca gentecunahuan ashtahuan aliguta parlashpa paicunahuan shuj estudio biblicota callarichunmi ayudan. Cunan horasca gentecunaca Jehová Diosta sirvingapaca na munanllu. Pero Ninan Manllanai Llaqui Punllacunapimi gentecunaca paicunaman imata predicashcata yuyarishpa talvez Jehová Diosta sirvingapaj munanga. Chaimandami predicashpa catinaca importante can.

JESUSCA BIBLIAPA PROFECIACUNATAMI YAIPI CHARIRCA

8. Bibliapi profeciacuna imashina pactarinata yachaimandaca ¿imatata Jesusca rurarca?

⁸ Jesusca Bibliapi huaquin profeciacuna imashina pactarinataca alimi yacharca. Chaimandami paica solo quimsa huata chaupitalla predicanataca ali yacharca (Dan. 9:​26, 27). Jesusca imashina, ima hora huañunatapash alimi yacharca (Luc. 18:​31-34). Bibliapi profeciacuna imashina pactarinata yachaimandami Jesusca Jehová Dios mingashca obrata pactachingapaca tiempotaca aliguta aprovecharca.

9. Profeciacunata intindinaca ¿imashinata ayudan?

⁹ Bibliapa profeciacuna imashina pactarijta intindishpaca cushijushpami predicapashun. Diablo mandajuj mundo ñalla tucurinataca alimi yachapanchi. Cunanbica ashtaca profeciacuna pactarijtami ricunajupanchi. Por ejemplo, Bibliapi nishcashnaca último punllacunapi causanajuimandaca guerracuna, terremotocuna y nali gentecuna ashtahuan miranajujtami ricunajupanchi. Shinallata, último punllacunapi causanajuimandami rey del sur y rey del norte macanajujtapash ricunajupanchi. Rey del surca Reino Unido y Estados Unidosmi can. Cutin rey del norteca Rusia y Rusia llactata apoyaj llactacunami can (Dan. 11:40). Shinallata Daniel 2:​43-45​pi profeciata intindimandami, Reino Unido y Estados Unidos llactacuna estatuapa chaquicunata representajushcataca yachapanchi. Cai profecía imashina pactarijushcata intindimandami, Taita Diospa Gobierno cai alpapi tiashca gobiernocunata ñalla tucuchinataca seguro capanchi. Profeciacunata intindinami tucurimui punllacunapi causajushcata cuenta japishpa ashtahuan uchalla predicachun ayudan.

10. Bibliapa profeciacunata yachajunaca ¿imashinata ayudan?

¹⁰ Bibliapa profeciacunapi shuj ali causaigu tianata yachaimandami shujcunamanbash cushijushpa parlangapaj munapanchi. República Dominicana llactapi sirvijuj Carrie shuti paniguca ninmi: “Shamuj punllacunapi shuj ali causaiguta Jehová Dios caranapi pensarishpaca, shujcunamanbashmi parlangapaj munapani. Gentecuna sufrijujta ricushpaca, Jehová Diospa promesacunataca paicunamanbashmi parlana cani yanimi”. Bibliapi profeciacunaca predicacionbi Jehová Dios ayudajushcatami ricuchin. Jehová ayudajushcata yachaimandami predicashpa catipanchi. Hungría llactamanda Leila paniguca ninmi: “Isaías 11:​6-9​pica Jehová Diospa ayudahuanga pi cashpapash cambiai ushashcatami yachajupashcani. Chaimi na uyangapaj munanshnalla gentecunamanbash predicapani” nin. Zambia llactamanda Christopher huauquiguca “Marcos 13:10​pi nishcashnami ali villaigucunataca mundo enteropi predicanajupanchi. Chai profecía pactarichun ayudajushcamandaca ninandami cushijupani” ninmi. Quiquindaca ¿maijan profeciata predicashpa catichunga ayudashca?

JESUSCA JEHOVÁ AYUDANAPIMI CONFIARCA

11. Lucas 12:49 y 53​pi nishca shinaca ¿imamandata Jesusca Jehová Dios ayudanataca seguro cana carca?

¹¹ Cushijushpa predicachun Jehová Dios ayudanataca Jesusca seguromi carca. Jesusca gentecunaman respetohuan predicajpipash, ashtaca gentecuna na uyangapaj munashpa paipa contra tucunataca alimi yacharca (Lucas 12:​49, 53​ta liipangui). Ñaupaman pushaj sacerdotecunaca, Jesús imata predicajushcata na gushtashcamandami tauca viajecunata huañuchingapaj munarca (Juan 8:59; 10:​31, 39). Shina cajpipash Jehová Dios ayudajushcata seguro cashpami Jesusca predicanataca na saquirca. Jesusca ‘ñucaca na ñucalla canichu. Sino ñucata cachamuj Taitahuanmi cani’ nircami (Juan 8:16). Shinallata nircami: “Na ñucatalla saquihuashcachu. Porque ñucaca siempremi pai imata munashcata rurani” (Juan 8:29).

12. ¿Imatata Jesusca paipa discipulocunamanga yachachirca?

¹² Jesusca Jehová Dios ayudanataca seguromi cana canguichi nishpami paipa discipulocunamanga yachachirca. Paicunata catiriashpa llaquichinata yachaimandami Jehová Dios paicunata ayudanataca cutin cutin Jesusca yarichirca (Mat. 10:​18-20; Luc. 12:​11, 12). Shinallata yaipimi cana canguichi nishpapashmi yachachirca (Mat. 10:16; Luc. 10:3). Ali villaigucunata gentecuna na uyangapaj munajpica, na obliganachu canguichi nishpapashmi yachachirca (Luc. 10:​10, 11). Shinallata catiriashpa llaquichijpica, pacajushpa rinami canguichi nishpapashmi yachachirca (Mat. 10:23). Jesusca Jehová Dios ayudanata seguro cashpa y cushilla villachishpapash na yangata peligrocunapi satirinllu carca (Juan 11:​53, 54).

13. Jehová Dios ayudanataca ¿imamandata seguro caita ushapanchi?

¹³ Jesuspa catijcunaca cunan punllacunapipashmi catiriashpa llaquichi tucunajupanchi. Chaimandami cushijushpa villachingapaca Jehová Diospa ayudachun minishtipanchi (Apoc. 12:17). Shinapash Jehová Dios ñucanchicunata ayudanataca ¿imamandata seguro caita ushapanchi? Juan capítulo 17​pi Jesús rurashca oracionda ricushpami Jehová Dios ayudanataca seguro capanchi. Chai oracionbica, Jesusca paipa apostolcunata cuidachunbashmi Jehová Diosta mañarca. Imashinami Hechos libropi ricupanchi, Jehová Diosca Jesuspa oracionda uyashpami apostolcuna cushijushpa villachichun ayudarca. Oracionda rurashpaca, Jesusca ali villaigucunata uyashca gentecunamandapashmi mañarca. Ñucanchicunapashmi chai gentecunashnallata ali villaigucunataca uyapashcanchi. Jehová Diosca Jesús rurashca oraciondaca cunanbipashmi contestajun. Chaimandami apostolcunata ayudashcashnallata ñucanchicunatapash ayudanataca seguro caita ushapanchi (Juan 17:​11, 15, 20).

14. Cushilla predicashpa catinataca ¿imamandata seguro caita ushapanchi? (Fotota ricupangui).

¹⁴ Jipacunamangarin cushijushpa predicanaca ashtahuan dificilmi tucunga. Pero Jesús nishca shinaca Jehová Dios ayudanataca seguromi caita ushapanchi (Luc. 21:​12-15). Jesuspa y paipa discipulocunapa ejemplota catishpami gentecuna uyachunga na obligapanchi, ni plituritapash na paicunahuanga plituripanchichu. Huaquin llactacunapi huauquipanicunaca libremente predicaitaca na ushanllu. Shinapash paicunapillata confianapa randica, Jehová Dios ayudanapi confiashpami predicashpa catita ushashca. Apostolcunapa punllacunapica, Jehová Diosca paipa ‘shimipi ima nijujta tucuita predicachunmi’ paipa sirvijcunamanga paipa espíritu santota cushpa ayudarca. Cunanbipash Jehová Diosca paipa espíritu santota cushpami ayudan. Chaimi caicamanlla predicaichi ningacaman predicashpa catita ushapashun (2 Tim. 4:17). Jehová Dios ayudanapi confiashpaca cushillami predicashpa catita ushapashun.

JESUSCA GENTECUNA UYANATACA SEGUROMI CARCA

15. ¿Imashinata Jesusca ashtaca gentecuna ali villaicunata uyanataca seguro carca?

¹⁵ Jesusca ashtaca gentecuna ali villaigucunata uyanataca seguromi carca. Chaimandami ali villaigucunataca cushijushpa predicarca. Huata 30 ña tucurinallapimi Jesusca ashtaca gentecuna ali villaicunata uyangapaj munanajujta ricushpa, chai gentecunataca cosechangapaj listo cashca pambacunahuan compararca (Juan 4:35). Más o menos shuj huata jipapashmi Jesusca “cozechanaca ashtacami tian” nirca (Mat. 9:​37, 38). Chai jipapashmi ‘cozechanaca ashtacami tian. Pamba Dueñotaca, cozechadorcunata ashtahuan cachamupai nishpami rogana canguichi’ nirca (Luc. 10:2). Jesusca ashtaca gentecuna ali villaigucunata chasquingapaj munanata yaipi charishpami ali villaigucunata pipash chasquijpica ninanda cushijun carca (Luc. 10:21).

16. Cushijushpa predicachunga ¿ima comparaciongunatata Jesusca utilizarca? (Lucas 13:​18-21; fototapash ricupangui).

¹⁶ Paipa discipulocuna cushilla villachishpa catichunga, huaquin gentecuna uyanataca seguromi cana canguichi nishpami Jesusca yachachirca. Chaita intindichunmi ishcai comparaciongunata nirca (Lucas 13:​18-21​ta liipangui). Primeroca, Taita Diospa Gobiernomanda ali villaigucunataca mostaza muyuguhuanmi Jesusca compararca. Chai muyuguca uchillagu cashpapash jatun yura tucungacamanmi viñan. Chai comparacionbica, ashtaca gentecuna ali villaicunata uyashpa y mirashpa catichun pipash na jarcai ushanatami Jesusca intindichijurca. Shinallata Taita Diospa Gobiernomanda ali villaigucunataca levadurahuanmi compararca. Chai comparacionbica, ali villaigucunata mundo enteropi predicana cashcatami intindichijurca. Shinallata callaripi na ricunalla cajpipash gentecuna paicunapa causaipi cambiocunata ruranatami Jesusca chai comparacionbica intindichijurca. Jesusca chai comparaciongunata utilizashpaca ashtaca gentecuna ali villaigucunata uyanatami paipa discipulocunamanga intindichirca.

17. Cushilla predicashpa catingapaca ¿imatata yaipi charina capanchi?

¹⁷ Cushilla predicashpa catingapaca, mundo enteropi ashtaca gentecuna miranajujtami yaipi charina capanchi. Cada huatami ashtaca millón gentecunaca Conmemoracionman shamushpa Bibliatapash estudiai callarin. Shinallata ashtaca gentecunami ñucanchihuan predicai callarishpa bautizarin. Mashna gentecuna ali villaigucunata chasquinataca na yachapanchichu. Na cuentai ushanalla ashtaca gentecunata cunanbi Jehová Dios tandachijushcatallami yachapanchi. Chai gentecunaca Ninan Manllanai Llaqui Punllacunapimi salvaringa (Apoc. 7:​9, 14). Jehová Diosca ashtaca gentecuna ali villaigucunata uyanataca alimi yachan. Shinaca predicashpami catina capanchi.

18. Gentecuna ñucanchita ¿imashina ricuchunda munapanchi?

¹⁸ Jesuspa discipulocunataca cushilla villachinajushcamandami gentecunaca rijsin. Apostolcuna na manllashpa cushilla villachinajushcata ricushpami chai tiempopi gentecunaca paicunapash ‘Jesushuan purinajushcata cuenta japirca’ (Hech. 4:13). Ñucanchicunapash Jesushna cushilla villachinajujta ricuchunmi munapanchi.