Muyugu viñachunga yacuta churashpa catishunchi
1. ¿Imamandata yacuta churajuj cuenda gentecunataca visitashpa catina capanchi?
1 Imashinami shuj muyuguta tarpushpaca viñachun nishpa yacuguta churashpa catinchi, shinallatami ali villaicuna gentecunapa shungupi viñachunga yacuguta churajuj cuenda Bibliamanda parlangapaj visitashpa catina canchi (1 Cor. 3:6). Shina rurajpimi gentecunaca shuj muyugu cuenda sapiyashpa, viñashpa fucunga.
2. Cutin visitashpa parlangapaca ¿imatata rurai ushapanchi?
2 Shuj tapuita saquipangui. Shuj punlla tigrashpa cutin parlangapaca, villachingapaj prepararijushpallatami uyashpa catichunga ima tapuitata saquisha nishpa pensarina canchi. Ña parlai tucuchinajushpami chai tapuitaca cutin shamushpami parlapasha nishpa saquina canchi. Ashtacacunaca cati visitapi Bibliata yachachi callaringapami, Enseña libropi shuj tapuita rurashpa saquin.
3. Gentecuna ali uyajpica ¿imacunatallata anotai ushapangui?
3 Aliguta anotapangui. Gentecuna ali uyajpica ima shuti cajta, maipi causajta, ima punlla, ima horas, ima temata parlashcata, publicacionda saquishca cashpaca imata saquishcatapash ucha anotapangui. Shinallata, ima religión cajta, familiata charijta, imata parlanata gushtajtapash anotanallami capangui. Shinami cutin tigrashpaca gentecunata aliguta ayudai ushapangui. Ima punlla tigranata, ima tapuita contestasha nishcata anotanatapash ama cungapanguichu.
4. ¿Imamandata gentecunataca na shaijushpa cutin cutin visitana capanchi?
4 Ama shaijunguichu. Ali villaicunata gentecuna uyajpica Diabloca chai uyashcacunata ‘cungachingapami’ munan (Mar. 4:14, 15). Chaimandami ali uyashca gentecunata cutin na tarishpaca, shuj papelgupi escribishpa o shuj cartaguta saquishpa ali canman. Shuj precursora paniguca, Bibliata shuj huarmiguman pungupillata yachachi callarishpapash cutinga huasipi ñana tuparcachu. Chaimandami shuj cartaguta escribishpa cacharca. Jipaman chai huarmiguhuan parlajpica cartata escribishcamandami tucui shunguhuan agradicirca. Villachishca jipa cutin cutin visitashpami, shuj muyugu viñashpa ‘quimsa chungata fucunshna, sucta chungata fucunshna, patsajta fucunshna mirajta’ ricushpa ninanda cushijushun (Mar. 4:20).