GENTECUNATA JUYACHUNGA ¿IMATA AYUDANGA?

1 | Tucuicunata igual tratapashunchi

Bibliapica ¿imatata nin?

HECHOS 10:34, 35pica cashnami nin: “Cunanmi alipacha intindini, Taita Diosca tucuicunatami igual ricun cashca. Ashtahuangarin, maijan llactamanda cashpapash, paita manllashpa causajcunata, alita rurashpa causajcunataca tucuicunatami chasquin cashca”.

Caica ¿imata significan?

Jehováa Diosca gentegucuna maijan llactamanda cajpipash o costumbrecunata charijpipash igualmi tratan. Paica gentegucuna shungu ucupi imashina cajtami ashtahuanbachaca ricun. Bibliapica, gentecunaca “ñavipi ricurishcatallami ricun. Ashtahuangarin Mandaj Dios ñucaca, shungutami ricuni” ninmi (1Samuel 16:7).

Caita rurapai:

Jehová Dios gentecunata tratanshnallatami ñucanchipash trataita ushapanchi. Talvez paicuna imata pensajta, imata sintijta na yachashpapash paicunataca ali trataita ushanchimi. Gentegucuna maijan llactamanda o costumbrecunata charijpipash igual tratangapaj Jehová Diosta ayudahuai nishpa mañaita ushapangui (Salmo 139:23, 24). Jehovami gentegucunata na ricunayachina nali sentimientocunata saquichun ayudanga (1 Pedro 3:12).

a Bibliapica yachachinmi, Taita Diospa shutica Jehovami can nishpa (Salmo 83:18, TNM).

TITUS shuti runaca cashnami nin: “Primera vezmi shuj gringo gentehuan tranquilo micungapaj tiarircani. Cunanga mundo enteropimi huauquipanicunataca charini”.

Runapa experiencia (TITUS)

Gentecunata millanayachishpa ricunatami saquirca

Titus shuti runaca yana gentegucunata discriminashpa trataj leycunataca nimamanda na gushtashpami causan carca. Chaimi shuj pandillaman yaicurca. Paica cashnami nin: “Macanajuita mascashpami yana gentecuna na yaicui ushana pushtucunaman yaicun carcani. Shinallata gentecunataca nimamanda na ricunayachishpami jaricunahuan cashpa, hasta huarmicunahuan macanajungapaj shayarin carcani”.

Titus shuti runaca testigo de Jehovacunahuan Bibliata yachajushpami gentecunata millanayachishpa ricuna nali sentimientocunata saqui usharca. Paica Bibliata liinami ñucataca ninanda ayudahuarca nin. Shinallata jipa punllacunapi ‘huañuipash, huacaipash, llaquipash, nanaipash’ tucurinata yachanami ñucataca ninanda ayudahuarca nin (Apocalipsis 21: 3, 4).

Callaripica de golpe cambianaca shinllimi carca nin. Pero shinapash Taita Dios tucui gentegucunata igual tratajta Bibliapi Hechos 10: 34, 35pi yachajunami paitaca ninanda ayudarca nin.

Titus shuti runaca paihuan ima pasashcata parlashpami cashna nin: “Testigo de Jehovacuna randimanda juyarijta ricushpami ñucaca paicuna si Taita Diostaca alimi catin nishpa pensarircani. Porque paicunaca tucui laya gentecunahuanmi randimanda ali tratarin. Incluso ñuca nara bautizarijpillatami shuj gringo huauquiguca paipa huasiman micungapaj invitahuarca. Chaiman rishpaca primera vezmi shuj gringo gentehuan tranquilo micungapaj tiarircani. Cunanga mundo enteropimi huauquipanicunataca charini”.