GENTECUNATA JUYACHUNGA ¿IMATA AYUDANGA?

4 | Taita Diospa ayudata mascapashunchi

Bibliapica ¿imatata nin?

GÁLATAS 5:22, 23pica cashnami nin: “Taita Diospa espíritu santo pushajpi causajcunaca cashnami can, shujcunata juyan, cushijun, tranquilo ali causan, pacienciata charin, ali shunguta charin, ali ali can, tucui shunguhuan crin, na ñapash culiran, controlarin”.

Caica ¿imata significan?

Jehová Dios paipa espíritu santohuan ayudajpillami pitapash na ricunayachina munaitaca saquita ushapanchi y ali cualidadcunatapash charita ushapanchi. Ñucanchimandallata chai nali sentimientocunata saquitaca na ushapanchichu. Chaimandami Taita Diospa ayudata mañana capanchi. Si ñucanchi shina ruranchica apóstol Pabloshnami cashna nita ushapashun: Taita Dios “poderta cujpimi, ñucaca tucui cosascunata mishangapaj fuerzata charipani” nishpa (Filipenses 4:13). Shinallata “ñucata ayudanaca, Mandaj Diosmandami shamun” nishpami nita ushapashun (Salmo 121:2).

Caita rurapai:

WALDO runaca ninmi: “Pundacunaca nali, violento personami carcani […]. Pero cunanga Jehová Diospa ayudahuanga shuj ali personami tucurcani”.

Taita Diostaca ali gente cangapaj paipa espíritu santota carahuai nishpami tucui shunguhuan mañana capanchi (Lucas 11:13). Por ejemplo, juyaita charingapaj, tranquilo ali causangapaj, pacienciata charingapaj, shinallata controlaringapaj ayudahuai nishpami Taita Diostaca mañana capanchi. Shinami na ricunayachina sentimientocunataca saquipashun. Caicunamanda Bibliapi imata yachachijta ricushpa ñucanchi causaipi pactachina capanchi. Shinallata shina ali gentecunahuanmi tandanajuna capanchi. Shinami ñucanchipash juyaita ricuchishpa alita ruraita ushapashun (Hebreos 10:24).

Runapa experiencia (WALDO)

Violento canata saquirca

Waldo shuti runaca pai uchilla cashpaca difícil causaitami charirca. Paica cashnami nin: “Ñucaca siempremi callecunapi drogacunata jatudorcunahuan macanajun carcani. Shuj viajecarin caishuj pandillamandaca ñucata huañuchichunmi shuj runata contratarca”.

Waldoca paipa huarmi testigo de Jehovacunahuan Bibliata yachajujujta ricushpaca nimamanda na gushtanllu carca. Chaimi paica cashna nin: “Ñucaca testigocunataca ricuitallapash na ricunayanllu carcani. Paicunataca shinllita butashpami calpachin carcani. Shinapash paicunaca na chashnallatachu tigrachin carca”.

Tiempohuanga paipashmi Bibliata yachajui callarirca. Paica ninmi: “Bibliapa consejocunata ñuca causaipi na fácil pactachishpapash ninandami esforzarircani. Ñucaca nunca na cambiai ushashachu yarcanimi”. Shinapash pai cambiachunga ¿imata ayudarca?

Paica cashnami nin: “Ñucata Bibliata yachachij huauquigumi Gálatas 5:22, 23ta liichun mañahuarca. Chaimi huauquiguca cai textopi parlashca cualidadcunata pactachingapaca, na ñucapi confiarishpa Jehová Diospa espíritu santopi confiana cashcata yachachihuarca. Chaita yachanami ñucataca ninanda ayudahuarca”.

Jehová Dios ayudachun saquijpimi Waldo runaguca gentecunata millanayachishpa ricunataca saquirca. Paica cashnami nin: “Ñuca familiarcuna y punda amigocunaca ñuca imashna cambiashcata ricushpaca manllarishpami ricun. Pundacunaca nali, violento personami carcani. Pero cunanga Jehová Diospa ayudahuanga shuj ali personami tucurcani”.