Na tucuita crinachu capanchi

1, 2. a)  Imapash cabal o na cabal cashcata yachanaca ¿imamandata minishtirishca can? b) Cai temapica ¿imatata yachajupashun?

TAITA DIOSTA sirvijcunaca cabalta yachashparami imatapash rurana capanchi (Prov. 3:21-23; 8:4, 5). Na shina rurajpica Satanasca ñucanchita pandachingami. Shinallata cai mundopi gentecunashnami pensai callarishun (Efes. 5:6; Col. 2:8). Shinaca imata ruranata yachangapaca imatapash cabalta yachanami minishtirin. Chaimi Proverbios 18:13​pica nin: “Narapash uyashpata imatapash tigrachijlla runaca, muspa runashnami nalicachishpa rimai tucun” nishpa.

² Shinapash cabalta yachanaca ¿imamandata huaquinbica shinlli ricurin? Cai tapuitaca cai temapimi yachajupashun. Shinallata Bibliapa consejocunata, huaquin ejemplocunatapashmi yachajupashun. Chaicunata yachajunami cabal o na cabal cashcata yachachun ayudanga.

“IMATA NIJPIPASH” NA TUCUITA CRINACHU CAPANCHI

3. Proverbios 14:15​pi shimicunaca ¿imashinata ñucanchitaca ayudan? (Callari dibujota ricupangui).

³ Cunan punllacunapica Internetpi, telepipash ashtaca informaciondami ricunchi. Shinallata ashtaca gentecunaca paicunapa amigocunamandaca correocunata, mensajecunata noticiacunatapashmi chasquin. Shinapash ashtaca nali gentecunaca llulla informacionda llujchishpami shujcunata pandachishca. Chaimanda ali ricushparami imatapash liina o uyana capanchi. Chaipaca ¿maijan textota ñucanchitaca ayudan? Proverbios 14:15​pica ninmi: “Na yachajushca runaca, imata nijpipash tucuita crinllami. Ashtahuangarin ali yachajushca runaca, imata rurangapajpash aliguta yarinrami” nishpa.

4. a) Filipenses 4:8, 9​ca ¿imashinata ayudan? b) Cabalta yachanaca ¿imamandata minishtirishca can? (“Cabalta yachangapaj ayudacuna” nishca recuadrotapash ricupangui).

⁴ Cabalta yachashparami imatapash decidina capanchi. Chaipaca ali ricushparami imatapash liina capanchi (Filipenses 4:8, 9, liingui). Shinallata Internetpica napash cierto cajpitami noticiacunata o imapash cosascunata yangata churan. Huaquinbicarin celularcunapipashmi imapash mensajecunata cachan. Chaicunata ricuna o liinaca nimapa na sirvinllu. Apostatacunaca Jehová Diosta sirvinata saquichun, Bibliamanda panda yuyaicunata charichunmi munan. Apostatacuna Internetpi llujchishca informaciondaca nimamanda na liinachu capanchi. Chaicunata liishpa o ricushpaca nali decisiongunata agllashpami ñucanchi yuyaipipash, shungupipash pandarishun (1 Tim. 6:20, 21).

5. Israelitacunaca ¿imata uyashpata llaquirirca?

⁵ Huaquinbica llullacunata crishpaca llaquicunatarami charishun. Chaita intindingapaca Moiseshuan ima tucushcata ricupashunchi. Moisesca Jehová Dios carasha nishca alpacunata ricuchunmi 12 jaricunata cacharca. Chunga jaricuna tigramushpaca na cabalta nishpami mirachishpa villaj shamurca (Núm. 13:25-33). Chaita uyashpami israelitacunaca llaquirirca (Núm. 14:1-4). Israelitacunaca Josuepash, Calebpash ima nishcata crinapa randica pensashcangami: “Chai 10 jaricunami ciertota ninajunga” nishpa (Núm. 14:6-10). Paicunaca Jehová Diospi confianapa randica, na cabalta yachashpapashmi chai 10 jaricuna nishcata crirca.

6. Jehová Diosta sirvijcunamanda imatapash uyashpaca ¿imamandata na tucuita crina capanchi?

⁶ Jehová Diosta sirvijcunamanda imatapash uyashpaca na tucuita crinachu capanchi. Jehovata tucui shunguhuan sirvijcunataca Diablomi llullacunata nishpa yangata juchachijun. Chaitaca na cunganachu capanchi (Apoc. 12:10). Chaimi Jesusca cashna nirca, gentecunaca ñucanchicunata ‘na ricunayachishpami imatapash llullashpa’ ninajunga nishpa (Mat. 5:11). Chaicunata yaria causashpaca Jehovata sirvijcunamanda llullacunata nijpica na crishunllu.

7. ¿Imatata tapurina capanchi?

⁷ Tucuicunallatami ñucanchi amigocunaman Internetpi o celularpi mensajecunata cachanata gushtanchi. Shinapash tapuripashunchi: “¿Uyai na uyaichu imatapash shujcunaman villangapaj munani? ¿Chai mensajecuna cierto o na cierto cashcata yachanichu? ¿Chai mensajecunamandaca tucui tucuitachu yachani?” nishpa. Na cabalta yachashpata ñucanchi huauquipanicunaman imapash mensajecunata cachashpaca llullacunataimanrami ninchiman. Shinaca na cabalta yachashpaca na cachanachu capanchi.

8. a) Uyai na uyai imatapash shujcunaman parlana o mensajeta cachanaca ¿imamandata nali can? b) Ñucanchicunatapash ama shina pasachunga ¿imatata rurana capanchi?

⁸ Uyai na uyai imatapash shujcunaman villana o mensajeta cachanaca ¿imamandata nali can? Ashtaca llactacunapimi gobiernocunaca ñucanchi huauquipanicuna villachichun, tandanajuchunbash na saquin. Chai llactacunapica Jehovata sirvijcuna paicunapura culirachunmi imapash llullacunata nishca. Cunanga huaquin huatacuna huashaman Unión Soviética nishcapi ima pasashcata ricupashunchi. Chai punllacunapi KGB nishca policiacunami llullacunata nishpa ashtaca huauquipanicunata yangata juchachirca.a Chai nishcacunataca ashtaca huauquipanicunami crirca. Chaimi huaquingunacarin Jehovata sirvinatapash saquirca (1 Tim. 1:19). Shinaca ñucanchicunatapash ama shina pasachunga, imatapash uyashcandica na cachana, na parlanachu capanchi. Chaipa randica imapash cierto o na cierto cashcatarami ricuna capanchi. Shinallata shujcuna nishcata na tucui tucuitaca crinachu capanchi.

CABALTA YACHANACA SHINLLIMI CAN

9. ¿Imamandata huaquinbica imata ruranatapash na atinanchi?

⁹ Huaquinbica imata parlashpapash huaquingunaca paicunapa yuyaicunata mirachishpami parlan. Cutin shujcunaca na cabalta parlanllu. Chaimi imatapacha ruranatapash na atinanchi. Shinallata yaripashunchi, na cabalta yachashpata imatapash crishpaca ñucanchillatami llaquicunata charishun. Shinaca ama shina pasachunga ¿imata ayudanga? (Efes. 4:14).

10. a) ¿Imamandata israelitacunaca paicunapura macanajugrinajurca? b) Jordán yacu caishuj ladopi causaj israelitacunaca ama macanajungapaca ¿imatata rurarca?

¹⁰ Josuepa punllacunapi israelitacunahuan ima tucushcata ricupashunchi (Jos. 22:9-34). Rubén, Gad, Manasespapuramanda israelitacunaca yacu ladopi shuj jatun altartami rurashcarca. Chaitami Jordán yacu caishuj ladopi causaj israelitacunaca yachaj chayarca. Chai altartaca Jehovata na cazushpami rurashcanga nishpami paicunahuan macanajungapaj rigrinajurca (Josué 22:9-12, liingui). Shinapash Rubén, Gad, Manasespapuramanda israelitacunaca animalcunata rupachishpa Jehovaman carangapaca na rurashcarcachu. Paicuna Jehovata tucui shunguhuan sirvishcata, jipa miraicuna yachachunmi chai altartaca rurashcarca. Jordán yacu ladopi causaj israelitacunaca nara huaquin jaricunata cachashpallatami imapacha pasashcata yachaj chayarca. Paicunaca nara macanajungapaj rishpallatami shina rurarca. Shina ruraimandami cushilla sintirishcanga.

11. a) Davidca ¿imamandata Mefibóset runagutaca llaquichirca? b) Davidca ¿imatata rurana carca?

¹¹ Huaquinbica ñucanchimanda na cabalta parlashpami ñucanchita llaquichita ushan. Cunanga rey Davidhuan, Mefibóset runaguhuan ima tucushcata ricupashunchi. Davidca Mefibóset runaguta llaquishpami Saulpa alpacunataca paiman curca. Saulca Mefibóset runagupa abuelomi carca (2 Sam. 9:6, 7). Tiempo jipaca Mefibóset runagu nalita rurashca nijtami uyarca. Chai nishcacuna cierto o na cierto cashcata nara yachaj chayashpallatami Davidca tucuita quichurca (2 Sam. 16:1-4). Shinapash jipaman Mefibóset runaguhuanbacha parlashpami chai nishcacuna llulla cashcata cuenta japishpa cutin alpacunata tigrachirca (2 Sam. 19:24-29). Davidca imapacha pasashcata nali yachashpallata shina rurashpami Mefibóset runagutaca yangata llaquichirca.

12, 13. a) Jesusca ¿imatata rurarca? b) Ñucanchicunamanda llullacunata nijpica ¿imatata rurana capanchi?

¹² Ñucanchicunamanda llullacunata nijpica ¿imatata rurana capanchi? Chaipaca Jesusmanda, Bautizaj Juanmandapash ricupashun. Gentecunaca llullacunata nishpami yangata paicunataca juchachirca (Mateo 11:18, 19, liingui). Shinapash Jesusca paicunahuan igualarijunapa randica cabalta yachachunrami gentecunamanga yachachirca. Chaimi cashna nirca, ‘ali yachaitaca’ ruraicunahuanmi ricuchina can nishpa.

¹³ ¿Imatata Jesusmandaca yachajui ushapanchi? Taita Dios mandashcashna causashpami Jesusca gentecunapa nishcacuna llulla cashcata ricuchirca. Shinaca ñucanchimanda gentecuna huashalla rimajpi o imacunatapash nishpa nalipi quedachijpica Jehová Dios munashcashnami causana capanchi. Shina causajpimi chai nishcacuna llulla cashcata gentecunaca cuenta japinga.

TUCUITAMI YACHANI YASHPACA AMA JARIYANGUICHU

14, 15. Shujcuna ninanda alicachijpica ¿imata pasai ushan?

¹⁴ Imashinami ricupashcanchi na cabalta yachashpaca imata ruranatapash na atinarinllu. Shinallata juchayucuna caimandami imata ruranatapash na atinarin. Pensaripashunchi, ashtaca huatacunata Jehovata sirvijuimanda aliguta pensarishpa decidinata yachajushcanchiman. Chaita ricushpami shuj huauquipanicunaca ninanda alicachinman. Shina alicachijpica ¿imata pasai ushanman?

¹⁵ Shujcuna ñucanchita ninanda alicachijpica tucuita yachani yashpami pensai callarinchiman. Shina pensarishpaca ñucanchillatami pandarinajunchiman. Ashtahuanbash imatapash nali yachashpatami caica ciertomi canga nishpa pensanchiman. Shinapash Bibliapica cashnami nin: “Aligutapacha yarishpami purini yashpaca, ama jariyanguichu” nishpa. Chaita pactachinami ama shina pensachun ayudanga (Prov. 3:5, 6; 28:26).

16. a) Tomás shuti ancianoca ¿imatata ricurca? b) Tomás huauqui chaita ricushpaca ¿imatata pensarirca?

¹⁶ Pensaripashunchi. Tomás shuti ancianoca shuj restaurantepi cashpami Juan shuti ancianota shuj huarmihuan cushilla micujujta ricun. Juan shuti huauquica cazado cashpapashmi chai huarmihuan ugllaritapash ugllarin. Chaita ricushpami Tomás huauquica ninanda manllarin. Chaimi cashna pensarin, Juanga paipa huarmitami traicionajun yarin nishpa. Tomasca cashnatapashmi tapurin: “¿Juanga paipa huarmihuan divorciaringacha? Paicuna divorciarijpica paicunapa huahuacunaca ¿imashi tucunga?” nishpa. Tomasca shuj huauquipanicunatapash shina pasashcata ricushcamandami llaquilla sintirin. Ñucanchicuna chaita ricushca cashpaca Tomás huauquishnami llaquilla sintirinchiman carca.

17. a) Tomás huauquica ¿imatata yachaj chayarca? b) Tomás huauquimandaca ¿imatata yachajupanchi?

¹⁷ Cutin Tomás huauquipi pensaripashunchi. Tomás huauquica chai huarmi pi cashcataca na cabalta yacharcachu. Chaimi Tomás huauquica imata ricushcata pimanbash nara parlashpallatami chai tutallata Juanda cayarca. Chaipimi Tomasca chai huarmi Juanba pani cashcata yachaj chayarca. Juanga paipa panita unaita na ricushca caimandami paihuan micungapaj llujshishcarca. Juanga paipa huarmigu na cumbai ushajpimi pailla rishcarca. Tomás huauquica chaita yachaj chayashpami tranquilo sintirirca. Shinaca Tomás huauquimandaca ¿imatata yachajupanchi? Ashtaca huatacunata Jehová Diosta sirvinajushpapash imatapash nara nishpallata o nara rurashpallata cabalta yachana minishtirishcapacha cashcatami yachajupanchi.

18. Shuj huauquihuan o shuj panihuan nali llevarishpaca ¿imashinata ricui callarishun?

¹⁸ Shuj huauquihuan o shuj panihuan nali llevarishpaca paimanda imatapash nijpica cierto o na cierto cashcata na yachashpallatami nalicachishpa ricui callarishun. Shinallata chai huauquimanda o chai panimanda llullacunata parlajpica crishpami uyanajushun. Imashinami ricupanchi, shuj huauquihuan o shuj panihuan risintirishca causashpaca paicunamanda pandatami pensai callarinchiman (1 Tim. 6:4, 5). Shinaca chai huauquipanicunata envidiashpa o nalicachishpa ricujunapa randica paicunata juyangapaj, tucui shunguhuan perdonangapaj esforzarina capanchi (Colosenses 3:12-14 liingui, NM )b.

BIBLIAPA CONSEJOCUNACA AYUDANMI

19, 20. a) Cabalta yachachunga ¿maijan textocunata ayudanga? b) Cati temapica ¿imatata yachajupashun?

¹⁹ Huaquinbica llullacunata nijpi, na cabalta yachaimanda, juchayu caimandami imapacha pasashcata yachanaca shinlli ricurin. Shinapash cabalta yachachunga ¿imata ayudanga? Bibliapa cai consejocunami ayudanga. Primero, Proverbios 18:13​pica ninmi: “Narapash uyashpata imatapash tigrachijlla runaca, muspa runashnami nalicachishpa rimai tucun” nishpa. Segundo, Proverbios 14:15​pica ninmi: “Na yachajushca runaca, imata nijpipash tucuita crinllami” nishpa. Shinaca tucuita crinapa randica cierto o na cierto cashcatarami aliguta ricuna capanchi. Tercero, Proverbios 3:5, 6​pi nishcashnaca, ashtaca huatacunata Jehová Diosta sirvinajushpapash ‘aligutapacha yarishpami purini yashpaca na jariyanachu’ capanchi. Cai temapica chai quimsa yuyaicunatami yachajupashcanchi. Shinallata Bibliapa consejocunaca imapash cierto o na cierto cashcata ricushpara ali decidichun ayudajtami yachajupashcanchi.

²⁰ Shinapash huaquinbica ¿imamandata shujcunata nalicachishpa ricunchi? Na ñavita ricushpalla tucuicunata igual tratachunga ¿imata ayudanga? Cai tapuicunataca cati temapimi yachajupashun.