Lo ravaj la gèr
La gèr ou in lafrontman violan, sa lé bann zafèr térib pou domoun i viv sa. Kisoi bann solda ou bann domoun, zot i koz dési bann zafèr térib ké zot la viv.
BANN SOLDA
« Nou oi toultan bann katastrof, ousa domoun lé blésé, lé tué. Tou lé jour nou la pèr i ariv anou in zafèr » (Gary, Gran-Brotagn).
« Ma la gingn in bal dann do é o nivo la tèt, ma la vu bonpé domoun, kisoi bann marmay ou bann gramoun fé tué azot. Akoz la gèr, mon kèr la vni dur » (Wilmar, Kolonbi).
« Kan i tué in moun dovan ou, lé difisil éfas zimaj-la dan out tèt. Toultan bann kri-la i rézone dan out tèt. Jamé ou va oubli so moun-la » (Zafirah, Zéta Zuni).
BANN DOMOUN
« Mi navé linprésion ké pu jamé mi noré trouv kontantman dan mon kèr. Nou la pèr pou nout vi é nou la pèr osi pou la vi nout famiy é nout bann kamarad » (Oleksandra, Lukrèn).
« Lé térib fé la ké dopi 2 zèr lo matin juska 23 zèr lo soir pou gingn in zafèr pou manjé, surtou kan ou koné ké a ninport kèl moman ou pé gingn in bal » (Daler, Tadjikistan).
« Mon papa momon la été tué pandan la gèr. Akoz la gèr, moin la rotrouv amoin tousèl san pèrsone pou konsol amoin é rasur amoin » (Marie, Rouanda).
Malgré bann zafèr térib ké bann domoun-la la viv akoz la gèr, zot la trouv la pé. An plis ké sa, èk sèrié zot i kroi ké tout bann gèr é tout bann zafrontman violan va disparèt biento. So Tour d’Gard-la i èsplik avèk la Bib koman i sa fé sa.