BANN JEUN I POZ AZOT BANN KÉSTION
Poukosa mi devré priyé ?
Dapré in lankèt, 80 % bann jeun amérikin i pri, mé anparmi banna néna rienk la moitié i pri chak jour. Somanké, désèrtin bann jeun la, i poz azot se késtion la : « Èske la priyèr lé in nafèr ke nou ansèrv rienk pou alé mieu dan nout tèt, oubien li lé kékchoz ke lé ankor plus inportan ? »
Kosa i lé la priyèr ?
Priyé, sé koz avèk Sak la kré tout zafèr. Réfléchi in kou kosa sa i ve dir ! Jéova lé plu supèryeur ke bann zumin dann tout kalité domèn. Pourtan, li lé « pa loin chakèn d’nou » (Akt 17:27). Dayeur dan la Bib, néna se linvitasion ki sort de lordinèr : « Kos koté Bondieu, é li va kos koté zot » (Jak 4:8).
Koman ou pe kos koté Bondieu ?
An premié, kan ou pri : sé komsa ke ou koz avèk Bondieu.
An deuzièm, kan ou étudi la Bib : sé komsa ke Bondieu i « koz » avèk ou.
É donk, kom zot i kos koté inn é lot par la priyèr é par létud la Bib, sé komsa ke ou va très in lien for avèk Bondieu.
« Parl ansanm Jéova, sétadir koz avèk le Tré O, sa lé le plu gran kado ke bann zumin i pe avoir » (Jeremy).
« Kan mi dévid mon fonn d’keur devan Jéova dan mon bann priyèr, mi san amoin ankor plus proch koté li » (Miranda).
Èske Bondieu i ékout bann priyèr ?
Mèm si ou kroi an Bondieu, é mèm si ou pri ali, petèt lé difisil pou ou aksèp lidé ke li ékout aou vréman. Mé la Bib i di ke Jéova i « ékout la priyèr » (Psom 65:2). Li ankouraj aou osi « a rejèt tout [out] traka su li ». Poukosa ? « Parske li sousi ali pou [ou] » (1 Pièr 5:7).
Kosa ou pans de sa ? Èske souvan ou na labitud pran in tan, pou diskut avèk out bann bon kamarad ? Ou pe fé osi komsa avèk Bondieu. Pri ali toultan, é kan ou fé sa, ansèrv son non, Jéova (Psom 86:5-7 ; 88:9). An vré, la Bib i invit aou pou « priyé toultan » (1 Tésalonisien 5:17).
« Mon bann priyèr sé in diskusion ant mon Papa dann sièl é moin, é kan mi koz ansanm li, mi gingn di ali tout mon fonn d’keur » (Moises).
« Kan mi koz ansanm Jéova, mi rakont ali vréman tout, kom mi noré fé avèk mon momon ou avèk in vré bon kamarad » (Karen).
Pou kèl zafèr mi pe priyé ?
La Bib i di : « Mé pou tout zafèr, par la priyèr é la suplikasion avèk bann remèrsiman, fé konèt Bondieu zot bann demann » (Filipien 4:6).
Èske sa i ve dir ke ou pe rakont ali out bann problèm ? Bien sur ! La Bib i di osi : « Jèt out fardo su Jéova, é li va soutien aou » (Psom 55:22).
Bien sur, kan ou pri Bondieu, ou devré pa rakont rienk out bann problèm. Gard kosa in jeun fiy ki apèl Chantelle i di : « Si mi té koz avèk Jéova rienk kan ma lavé bezoin son lèd, alor mi sré pa osi bon kamarad ansanm li ». « Amoin mi pans ki fo di ali mèrsi an premié, é mi remèrsi Bondieu pou in kantité dot zafèr ankor. »
Kosa ou pans de sa ? Pou kèl zafèr dan out vi, ou pe di mèrsi Jéova ? Èske zordi, ou gingn sit 3 zafèr ki pous aou di mèrsi Jéova ?
« Pou in nafèr ke lé sinp, kom par égzanp admir in joli fleur, sa i pe pous anou pri Jéova pou di ali mèrsi » (Anita).
« Réfléchi an profondeur su in nafèr ke Jéova la kréé é ke ou trouv inkroiyab oubien su in vèrsé la Bib ki touch vréman out keur, é aprésa pri Jéova pou di ali mèrsi » (Brian).