LESON 6

Ésplik bien bann vèrsé

Jan 10:33-36

POIN INPORTAN : Kontant pa ou lir in vèrsé é alé toutsuit su lidé i vien apré. Asur aou ke, sak lapou ékout aou, i konpran bien le lien, ke néna ant le vèrsé ou lir é lidé ou koz desu.

KOMAN I FO FÉ :

Fé resort bann mo inportan. Kan ou la finn lir in vèrsé, fé resort bann mo an lien avèk lidé prinsipal out sujé. Ou pe fé sa, kan ou répèt bann mo la, oubien kan ou poz in késtion ke va pous domoun rekonèt bann mo inportan la.

Si ou utiliz dot mo pou ésplik lidé ke néna dan le vèrsé, fé an sort ke domoun i konpran bien le lien ant bann mo ékri dan la Bib é out lidé prinsipal.
Fé bien resort lidé. Si avan lir le vèrsé, ou la di klèrman poukosa ou lir sa, alor ésplik kèl rapor néna ant bann mo inportan dann vèrsé la é poukosa ou la lir sa.

Kan ou ésplik in vèrsé ke ou vièn lir, lès out bib rouvèr. Sa va èd sak lapou ékout aou, relié sak ou lé antrèn di é se vèrsé la.
Rès sinp kan ou ésplik in vèrsé. Pa bezoin ésplik bann détay ke na okin lien avèk le sujé, ou ki apui pa lidé prinsipal. Tien kont sak domoun i koné déja su le sujé. Sa va èd aou choizi kèl kantité zinformasion ou va di, pou ke out lésplikasion lé klèr é fasil pou konprann.