Septemvri

O Isus sikavgja sočuvstvo e Martake hem e Marijake. Keda dikhlja kobor tane tažna so mulo lengoro phral o Lazar, o Isus počmingja te rovel (Jovan 11:32-35). O Isus na rungja adaleske so mulo leskoro paše amal. Ov džanela sine kaj ka voskresninel e Lazare. O Isus rungja adaleske so pogodingja le i dukh so osetingje la leskere paše amala. Adava so džanaja kaj o Isus tano sočuvstvitelno, but ohrabrinela amen. Isto agjaar, keda razmislinaja bašo adava sar postapinela sine e javerencar, amaro mangipe sprema leste bajrola. Ohrabrinela amen adava so džanaja kaj ov akana vladinela sar Cari ko e Devleskoro Carstvo. Panda hari o Isus ka cidel sa o posledice taro vladibe e Satanaskoro hem ka spasinel e manušen taro dukha hem taro mukhe. Adaleske so živingja sar manuš ki Phuv, o Isus tano ki najšukar položba te kerel adava. Čače siem bahtale so isi amen Vladeteli kova so šaj te „haljovel amare slabostija“ (Evr. 2:17, 18; 4:15, 16; w19.03 17, pas. 12-13).

Amen pomožinaja e manušenge te zapoznajnen e Devle, ama na valjani te bistra kaj o Jehova tano adava so privlečinela e manušen ki peste (1. Kor. 3:6, 7). Isto agjaar, sekova manuš reagirinela ko šukar haberi sprema adava soj leske ko vilo (Mat. 13:4-8). Ma bistre kaj, iako o Isus sine o najbaro Učiteli so živingja nekogaš, sepak but manuša na prifatingje leskiri poraka. Adaleske na valjani te obeshrabrina amen ako but manuša kolenge so mangaja te pomožina na prifatinena o šukar haberi. Ka oven amen šukar rezultatija ako siem sočuvstvitelna keda propovedinaja. Ka uživina poviše ki služba. Ka ova pobahtale adaleske so siem darežliva. A okolenge so dikhena ispravno ko večno životo ka ovel polokho te prifatinen o šukar haberi (Dela 13:48). Adaleske „džikote isi amen prilika bašo adava, te kera šukaripe sarinenge“ (Gal. 6:10). Agjaar ka falina amare Dade soj ko nebo, a adava ka kerel amen but bahtale (Mat. 5:16; w19.03 25, pas. 18-19).

O cari o David pišingja: „Baro tano o Jehova hem zaslužinela i najbari falba“ (Ps. 145:3). Ov manglja e Jehova hem adava mangipe pottikningja le te falinel le „maškar o khedimo narodo“ (1. Let. 29:10-13; Ps. 40:5). Jekh način sar avdive falinaja e Jehova tano agjaar so komentirinaja ko amare sostanokija. Sarine amen uživinaja keda šunaja različna komentarija ko amare sostanokija. Uživinaja keda o tikne čhave komentirinena ednostavna hem iskrena lafencar. Ohrabrime siem keda nekoj taro vilo komentirinela bašo nesavo biblisko čačipe kova so halilo le. A vooduševinaja amen okolenge so khedena hrabrost te komentirinen iako tane ladžutne ili samo so počmingje te sikljoven amari čhib (1. Sol. 2:2). Sar šaj te sikava kaj ceninaja lengoro trudo? Otkeda ka završinel o sostanok šaj te blagodarina lenge bašo ohrabruvačka komentarija. Javer način tano agjaar so amen da ka komentirina. Tegani na samo so amen ka ova ohrabrime, nego amen da ka ohrabrina e javeren (Rim. 1:11, 12; w19.01 8, pas. 1-2; 9, pas. 6).

Deš manuša sine ki but phari situacija. Sine len lepra hem na sine len nadež kaj ka sasljon. Ama jekh dive dural dikhle e Isuse, e Bare Učitele. Šungje kaj ov sasljargja manušen so sine len različna nasvalipa. Adaleske vikingje: „Isus, Učitele, ov milostivo sprema amende!“ Tegani o Isus sasljargja e deše leprozna manušen. Sigurno ola sine leske blagodarna. Ama jekh lendar na samo so osetingja blagodarnost, nego isto agjaar sikavgja leske plo cenenje. Adava manuš, kova so sine Samarjani, sine pottiknimo te slavinel e Devle „celo glasoja“ (Luka 17:12-19). Isto sar o Samarjani, amen da mangaja te sikava blagodarnost nekaske so sine šukar sprema amende. O Jehova sekogaš sikavela cenenje, hem adalea dela amenge sovršeno primer. Jekh način sar kerela adava tano agjaar so nagradinela adalen so služinena leske (2. Sam. 22:21; Ps. 13:6; Mat. 10:40, 41). E Devleskoro Lafi pottikninela amen: „Postapinen sar o Devel, sar leskere mangle čhave“ (Ef. 5:1). Jekh glavno pričina soske valjani te sikava cenenje tani adaleske so mangaja te postapina sar o Jehova (w19.02 14, pas. 1-2; 15, pas. 4).

Jekh phen ki škola, ljubezno odbinela te učestvujnel ko jekh prazniko. Jekh ladžutno terno phral propovedinela taro kher ko kher hem khuvela ko kher kote so živinela jekh leskoro součeniko kova so nekobor puti asandilo e Jehovaskere svedokonge. Jekh phral but trudinela pe te šaj te grižinel pe bašo materijalna potrebe ple familijakere o šefi rodela lestar te kerel nešto so nane česno hem te phagjel o zakoni. Iako šaj te našavel pli buti, o phral objasninela kaj valjani te ovel česno hem te poštujnel o zakoni soske adava adžikerela o Devel ple slugendar (Rim. 13:1-4; Evr. 13:18). Koja osobina primetingjan ko akala trin sluge e Devleskere? Šaj primetingjan kaj tane hrabra hem česna. Ama jekh osobina posebno istakninela pe — i besprekornost. Sekova jekh lendar ačhilo verno e Devleske hem odbingja te phagjel e Jehovaskere merilija. I besprekornost pottikningja len te postapinen agjaar. O Jehova sigurno dičinela pe sekole ple slugaja so sikavela akaja osobina. Amen da mangaja te kera amaro Dad soj ko nebo te dičinel pe amencar (w19.02 2, pas. 1-2).

O Zakoni posebno zaštitinela sine okolen so našti sine korkori te zaštitinen pe, sar na primer o čhave bizo dad, o udovice hem adala so ale te živinen maškar e Devleskoro narodo. O Jehova vakergja akala lafija e sudienge ko Izrael: „Ma gazin o pravija adalengere so ale te živinen maškar tumende, ni e čhavengere soj bizo dad, hem ma le e udovicakere šeja sar garancija kaj ka iranel o dugo“ (5. Moj. 24:17). O Jehova sikavela sine kaj but grižinela pe okolenge so nane koj te braninel len, hem kazninela sine okolen so ponašinena pe lencar lošno (2. Moj. 22:22-24). O Jehova mangela okola so dengja lenge avtoriteti mangipaja te grižinen pe e javerenge. Ov mrzinela i seksualno zloupotreba hem mangela sarine te oven zaštitime hem te dobinen pravda, posebno okola so nane koj te braninel len (3. Moj 18:6-30). Keda siem uverime kaj o Jehova postapinela pravedno, amaro mangipe baši leste ka bajrol panda poviše. A keda mangaja e Devle hem leskere pravedna merilija, pottiknime siem te manga e javeren hem te postapina lencar pravedno (w19.02 24-25, pas. 22-26).

Te dikha jekh primer bašo adava sar šaj te arakha amen taro e Satanaskoro razmislibe. O Jehova sikavela amen kaj „o blud hem sekova melalipe“ na valjani ni te spomninel pe maškar amende (Ef. 5:3). Ama, so ka kera ako o kolege ili o součenikija počminena te keren lafi bašo nemoralna bukja? Amari sovest, sar jekh budno stražari šaj te predupredinel amen baši opasnost (Rim. 2:15). Ama, dali ka šuna la ili ka ova ko iskušenie te šuna okolen okolu amende, pa čak te dikha nesave slike so spodelingje len? Ustvari, tegani tano o vreme te phanda o simbolična „porte e dizjakere“ agjaar so ka menina i tema ko javer pravco ili ka dža amenge. Valjani amenge hrabrost te borina amen protiv o pritisok taro okola so mangena te razmislina ili te postapina pogrešno. Šaj te ova uverime kaj o Jehova dikhela kobor trudinaja amen hem ov ka del amenge i sila hem i mudrost kola so valjanena amenge te šaj te borina amen protiv e Satanaskoro razmislibe (2. Let. 16:9; Isa. 40:29; Jak. 1:5; w19.01 17-18, pas. 12-13).

O Solomon sine jekh taro najbarvale hem najmokjna manuša so nekogaš živingje ko sveto. Ov manglja te uživinel ko zadovolstvija te šaj te dikhel dali adava ka kerel le bahtalo (Prop. 2:1-10). Adaleske o Solomon gradingja peske luksuzna khera, kergja peske but šuže gradine hem parkija hem kergja sa so manglja. Dali sine zadovolno hem bahtalo? Keda o Solomon dikhlja sa adava so kergja, ov vakergja o lafija taro avdisutno stiho. Šaj li te sikljove nešto taro primer e Solomoneskoro? Nesave manuša sikljovena o lekcie ko životo samo keda kerena nesavi greška hem keda isi len lošna posledice. O Jehova na mangela te ovel tuke adava. Ov mangela te šune le hem te ove leske poslušno. Bašo akava valjani tuke vera, ama nikogaš nane te kaine tut so angjan asavki odluka adaleske so isi tut vera. Hem o Jehova nikogaš nane te bistrel o mangipe so sikavgjan leskere anaveske (Evr. 6:10). Adaleske, trudin tut te bajrare tli vera. Tegani ka ane šukar odluke ko životo hem ka dikhe kaj tlo Dad soj ko nebo mangela tuke o najšukar (Ps. 32:8; w18.12 18, pas. 14-15).

O duhovno zrelo manuš isi le vera hem trudinela pe te dikhel ko bukja sar so dikhela o Devel. Ov rodela vodstvo taro Jehova hem odlučno tano te ovel leske poslušno (1. Kor. 2:12, 13). O David tano šukar primer bašo duhovno zrelo manuš. Ov vakergja: „O Jehova tano delo taro mlo nasledstvo“ (Ps. 16:5). Ko adava sine vklučimo leskoro amalipe e Jehovaja kova so sine leske than garajbaske (Ps. 16:1). Sar rezultati taro adava, o David vakergja: „Bahtali tani mli duša“. E Davide na kergja ništo pobahtalo taro adava te ovel amal e Jehovaja (Ps. 16:9, 11). O manuša kolenge soj najvažna o pare ili o zadovolstvija nikogaš nane te oven bahtale sar o David so sine (1. Tim. 6:9, 10). Ako bajrarea tli vera ko Jehova hem služinea leske, ka ove bahtalo hem ka ovel tut čačutni smisla ko životo. Adaleske, sar šaj te bajrare tli vera? Valjani te nakhe vreme e Jehovaja adalea so ka čitine leskoro Lafi, te dikhe o šukar bukja so stvoringja len hem te razmisline bašo leskere osobine, sar soj o mangipe so sikavela le tuke (Rim. 1:20; w18.12 22-23, pas. 7-8).

O Pavle dengja jekh but važno sovet, ov pottikningja e hristijanen te poštujnen o brako, javere lafencar te dikhen ki leste sar nešto skapoceno. Dali tu da dikhea agjaar ko brako, posebno ko tlo brako? Ako dikhea ko brako sar nešto skapoceno, tu džaja palo e Isuseskoro primer. Leskoro stavi bašo brako dikhela pe taro adava so vakergja e fariseenge. Keda pučle le bašo razvod, ov spomningja adava so vakergja o Devel bašo prvo brako: „Adaleske o manuš ka mukhel ple daja hem ple dade hem ka spojnel pe ple romnjaja, hem ola ka oven jekh telo“. Palo adava o Isus vakergja: „O Devel so phanlja te ovel jekh, o manuš te na odvojnel“ (Mar. 10:2-12; 1. Moj. 2:24). Akalea o Isus potvrdingja kaj o Devel tano adava so kergja o brako hem kaj i bračno vrska valjani te trajnel večno. Keda o Devel kergja o prvo brako, ov na vakergja e Adameske hem e Evake kaj šaj te razvedinen pe. Namesto adava, leskiri namera sine ola te ačhoven ko brako zasekogaš (w18.12 9-10, pas. 2-4).

Keda počmingjem te sikljova o čačipe, siklilem kaj tano važno te šuna o osnovna bukja so rodela len amendar o Jehova. Ama, kobor so ovaja duhovno pozrela, sa poviše sikljovaja sar razmislinela o Jehova, ili javere lafencar, so mangela a so na mangela hem sar dikhela ko bukja. Iako uživinaja džikote sikljovaja te razmislina sar o Jehova, ponekogaš tano pharo te razmislina sar leste adaleske so siem nesovršena. Na primer, džanaja sar dikhela o Jehova ki moralno čistota, ko materijalizam, ko propovedibe, keda zloupotrebinela pe o rat hem ko javera bukja. Tegani, sar šaj te sikljova panda poviše te razmislina sar o Jehova? Hem sar akava ka pomožinel amenge te postapina ispravno akana hem ki idnina? Te šaj te uspejna ko adava mora te proučina e Devleskoro Lafi, te haljova e Devleskere misle, hor te razmislina baši lende hem but te trudina amen te razmislina sar o Devel (w18.11 27-28, pas. 2-4).

O Avakum živinela sine ko but pharo vreme. Živinela sine maškar o manuša so sine but lošna hem nasilna, adaleske sine leske previše pharo. O Izraelcija ponašinena pe sine grubo hem nepravedno jekh jekhea. O Avakum pučela pe sine keda ka avel krajo akale lošnipaske hem soske o Jehova adžikerela doborom but vreme te šaj te kerel nešto. Na sine le sila ponadari te borinel pe. Adaleske molingja e Jehova te kerel nešto. O Avakum šaj počmingja te mislinel kaj o Jehova na grižinela pe više bašo plo narodo hem kaj nane te kerel nešto. Dali tu da osetingjan tut nekogaš agjaar? Dali o Avakum pučlja akala pučiba e Jehova adaleske so našavgja pli doverba ki leste hem ko leskere vetuvanja? Na, na sine agjaar! Adava so o Avakum rodingja pomoš taro Jehova bašo ple problemija hem so vakergja leske ko so sumninela pe, sikavela kaj sine le doverba ki leste. Ama, dikhjola kaj sine sekirimo hem bunimo. Ov na halilo soske o Jehova mukhela doborom te cidel hem soske panda ništo na kerela (w18.11 16, pas. 4-5).

O Petar hem o Andrej sine ribarija, ama keda o Isus vikingja len te oven leskere učenikija, ola mukhle pli buti (Mat. 4:18-20). Akava na značinela kaj valjani te mukhe tli buti keda ka sikljove o čačipe. Sekole hristijane isi le odgovornost te kerel buti hem te grižinel pe ple familijake (1. Tim. 5:8). Ama, keda sikljovea o čačipe, meninela pe tlo stavi bašo materijalna bukja. Tegani haljovea soj tano čače najvažno ko životo. Akava kergja jekh čhaj so vikinela pe Marija. Lakiri cel ko životo sine te khelel profesionalno golf hem te zarabotinel but pare. Tegani, oj počmingja te proučinel i Biblija. I Marija zamanglja o čačipe tari Biblija hem počmingja te živinel sprema leste. Oj halili kaj ka ovel lake pharo ko isto vreme te koncentririnel pe ko plo amalipe e Jehovaja hem ki pli sportsko kariera (Mat. 6:24). Adaleske odlučingja te otkažinel pe tari pli cel te khelel profesionalno golf. Avdive i Marija služinela sar pionerka hem vakerela kaj tani but bahtali hem isi la smisla ko životo (w18.11 5-6, pas. 9-10).

Keda e Isuse sine le 30 berš, ov čhinavgja te ovel stolari hem ulo učiteli soske džanlja kaj adava tano najvažno. Ov vakergja kaj jekh taro pričine soske o Devel bičhalgja le ki Phuv sine te propovedinel o šukar haberi bašo e Devleskoro Carstvo (Mat. 20:28; Luka 3:23; 4:43). Ov čhivgja i služba bašo Jehova ko prvo than ko plo životo hem mangela sine o javera da te keren adava (Mat. 9:35-38). Iako poviše džene amendar nane stolarija, sarine amen sikavaja e javeren bašo šukar haberi. Akaja zadača tani doborom važno so o Devel da tano vklučimo ki late. Ustvari, baši amende vakerela pe kaj siem „e Devleskere sorabotnikija“ (1. Kor. 3:9; 2. Kor. 6:4). Složinaja amen e psalmistea kova so vakergja e Jehovaske: „Celo tlo lafi tano čačipe“ (Ps. 119:159, 160). Adaleske mangaja ispravno te koristina „o lafi e čačipaskoro“ ki služba (2. Tim. 2:15). Adaleske trudinaja amen pošukar te koristina i Biblija, soske oj tani amari najglavno publikacija kolaja so sikavaja e javeren bašo Jehova, bašo Isus hem bašo Carstvo (w18.10 9, pas. 1-2).

Keda jekh rom džala palo primer ple poglavareskoro, o Isus Hristos, leskere romnjake ka ovel polokho hor te poštujnel le (Ef. 5:22-25, 33). A keda oj poštujnela le, ka trudinel pe te sikavel kaj haljovela le hem ljubezno ka ponašinel pe lea. Keda o roditelija ponašinena pe obzirno jekh jekhea, ola dena šukar primer ple čhavenge. Isto agjaar, valjani te sikaven ple čhaven te razmislinen bašo javera hem te oven ljubezna. Na primer, šaj te sikaven pumare čhaven kaj na valjani te prastan ki dvorana. A keda tane ko nesavo družibe kote so isi hajbe, o roditelija šaj te vakeren pumare čhavenge te adžikeren prvo o pophure te len taro hajbe. Šukar tano te pofalina e čhaven keda ka keren nešto obzirno, na primer, keda ka phraven amenge o udar. Akava ka kerel o čhave te osetinen pe šukar hem ka pomožinel lenge te haljoven kaj „poviše isi bahtalipe keda dela pe nego keda lela pe“ (w18.09 28, pas. 5-6).

O vodstvo so dobinaja taro Isus Hristos, amaro Cari, ka pomožinel amenge akana hem ki idnina. Adaleske, te razmislina baši korist so sine amen bašo adava so prifatingjem o promene so slučingje pe sigende. Ki tumari Familijarno rat, šaj te keren lafi bašo adava sar pomožingje tumenge o promene povrzime e sostanokoncar ili e službaja. Ako na bistraja kaj amari poslušnost ko upatstvija tari e Jehovaskiri organizacija anela but šukar rezultatija, ka ovel amenge polokho te prifatina o vodstvo so dobinaja le hem te ova bahtale. Na primer, štedinaja pare adaleske so na pečatinaja doborom literatura sar angleder. Hem adaleske so koristinaja nevi tehnologija, panda poviše manuša šaj te šunen o šukar haberi. Dali amen da šaj počesto te koristina o elektronska publikacie hem o videoklipija? Akava tano jekh način sar poddržinaja o vodstvo taro Hristos, kova so mangela mudro te koristina o sredstvija so isi amare organizacija. Keda poddržinaja o vodstvo taro Hristos, pomožinaja amare phralenge hem phenjenge te ovel len pozorali vera hem pobaro jekhipe (w18.10 21, pas. 17-19).

Ako siem sočuvstvitelna hem ljubezna sar o Jehova, ov šaj preku amende te pomožinel nesave phraleske kova so molingja pe baši uteha (2. Kor. 1:3-6). Ako adžikerea te oven sovršena o phralja hem o phenja, ka razočarine tut (Prop. 7:21, 22). Ma bistre kaj o Jehova tano razumno hem na adžikerela amendar poviše taro adava so šaj te kera. Adaleske, valjani te ova strpliva jekh jekhea (Ef. 4:2, 32). Nikogaš na mangaja te kera amare phralja te mislinen kaj na kerena dovolno ki služba bašo Jehova ili te sporedina len javerencar. Namesto adava, ohrabrinaja len hem vakeraja o šukar bukja so kerena len. Akava šaj te pomožinel lenge te oven bahtale džikote služinena e Jehovaske (Gal. 6:4; w18.09 12-13, pas. 16-17).

Te kerel e Devleskiri volja sine sar hrana e Isuseske. Keda hraninaja amen zdravo osetinaja amen šukar hem amaro telo ačhovela sasto. Isto agjaar, keda keraja e Devleskiri volja osetinaja amen šukar hem amari vera ačhovela zorali. Keda keraja adava so rodela amendar o Jehova sikavaja kaj siem mudra (Jak. 3:13). A okola soj tane mudra isi len but bereketija. Ki Biblija pišinela: „Bahtalo tano o manuš so ka arakhel mudrost... Poskapoceno tani taro biserija hem nijekh buti soj tuke milo našti te sporedinel pe laja... Oj tani kaš e životoskoro okolenge so ka prifatinen la hem okola so zorale ka ikeren la ka oven vikime bahtale“ (Izr. 3:13-18). O Isus vakergja: „Ako džanena akala bukja, bahtale sien keda kerena len“ (Jovan 13:17). Leskere učenikija ka oven sine bahtale sa džikote kerena sine adava so vakergja lenge ov. Ola valjangje te keren adava so sikljovena sine taro Isus hem te džan palo leskoro primer celo plo životo, a na samo nesavo vreme (w18.09 4, pas. 4-5).

Iako o Adam hem i Eva sine korkori ki rajsko gradina, valjani sine te mislinen e javerenge da. Soske? O Jehova dengja len zadača te pheren i Phuv pumare čhavencar hem te keren la raj (1. Moj. 1:28). O Adam hem i Eva valjani sine te mangen lengere čhave so ka bijangjoven te oven bahtale, isto sar o Jehova so mangela sarine te oven bahtale. Zaedno ola valjani sine te keren i Phuv raj. Adaja sine but bari zadača. O sovršena manuša ka valjani sine te sorabotinen e Jehovaja te šaj te keren i Phuv raj hem agjaar te ispolninen leskiri namera. Zamislin samo kobor zadovolstvo hem bahtalipe ka anel lenge sine akaja zadača! O Jehova ka del len sine bare bereketija soske nane te oven sine sebična hem ka grižinen pe sine bašo javera (w18.08 15-17, pas. 2, 8-9).

So šaj te kere ako nekoj širinela hovajba baši tute? Akava slučingja pe e Isuseske hem e Jovan Krstiteleske (Mat. 11:18, 19). So kergja o Isus? Ov na trošingja plo vreme hem sila te dokažinel e manušenge kaj adala bukja nane čače. Namesto adava, ov ohrabringja len te ispitinen o dokazija. Ov mangela sine o manuša te koncentririnen pe ko adava so kerela hem so sikavela. Adaleske vakergja: „I mudrost dikhela pe taro lakere postapke“ (Mat. 11:19). Šaj te sikljova važno pouka taro adava so vakergja o Isus. Ponekogaš nekoj šaj nepravedno te kritikujnel amen hem šaj siem sekirime kaj akava ka ruminel amaro ugled. Ama, o način sar živinaja šaj te sikavel e javerenge save siem čače. Taro primer e Isuseskoro sikljovaja kaj adava so ka ponašina amen šukar šaj te sikavel kaj o hovavne bukja soj vakerde baši amende nane točna (w18.08 6-7, pas. 11-13).

O Kain, o Solomon hem o Izraelcija ki planina Sinaj sine len prilika te kainen pe hem te meninen pe (Dela 3:19). Taro akava dikhaja kaj o Jehova na otkažinela pe sigate taro manuša keda ka grešinen. Na primer, ov sine milostivo hem prostingja e Aroneske. Avdive, o Jehova mangipaja predupredinela amen te šaj te zaštitinel amen taro pogrešna postapke. Adava kerela le preku i Biblija, o publikacie hem preku javera hristijanja. Ako šunaja keda o Jehova predupredinela amen, šaj te ova sigurna kaj o Jehova ka sikavel amenge milost. E Jehovaskoro šukaripe so na zaslužinaja le isi le cel (2. Kor. 6:1). Adava šukaripe dela amen prilika „te otkažina amen taro sa adava so nane sprema e Devleskiri volja hem taro želbe e svetoskere“ (Tit 2:11-14). Ko akava sveto sekogaš ka oven situacie kola so ka čhiven ko ispit amari vernost bašo Jehova. Adaleske, ov odlučno celosno te ačhove tari e Jehovaskiri strana! (w18.07 20, pas. 20-21).

So ka pomožinel amenge te ova panda poodlučna te dobina čest taro Jehova, a na taro akava sveto? Na valjani te bistra duj važna čačipa. Prvo, o Jehova sekogaš ceninela hem nagradinela okolen so služinena leske verno (Evr. 6:10; 11:6). O Jehova ceninela sekole ple sluga hem leske tano nepravedno te bistrel okolen soj verna. Ov „džanela o drumo e pravednikongoro“ hem džanela sar te spasinel len (Ps. 1:6; 2. Pet. 2:9). O Dujto, o Jehova šaj te sikavel amenge kaj ceninela amen ko način so na adžikeraja le. Ako o manuša kerena šukar bukja samo te šaj o javera te falinen len, nane te dobinen nagrada taro Jehova. Soske? Adaleske so ola više dobingje pli nagrada (Mat. 6:1-5). Tari javer strana, o Isus vakergja kaj o Jehova dikhela okolen so nane lenge sikavdi čest bašo šukaripe so kergje e javerenge. Ov dikhela so kerena ola hem nagradinela len, ili dela len bereketija (w18.07 5, pas. 8, 10).

O Petar na halilo so mangela te vakerel leske adava glaso. Tegani, resle o glasnikija so bičhalgja len o Kornelij. O Petar dobingja upatstvo taro sveti duh te džal ko Kornelij, adaleske gelo e glasnikoncar. Te sudinel sine o Petar sprema adava so dikhjola pe avrijaldan, nikogaš nane te khuvel sine ko e Kornelijeskoro kher. O Evreija nikogaš na džana sine ko khera e manušengere so na sine Evreija. Tegani soske o Petar gelo? Iako sine le predrasude sprema o manuša so na sine Evreija, i vizija so dikhlja la hem o upatstvo so dobingja taro sveti duh meningje leskoro mislenje. Otkeda o Petar šungja so vakergja leske o Kornelij, ov phengja: „Akana čače haljovava kaj o Devel nane pristrasno, nego ov tari sekoja nacija prifatinela okole so darala lestar hem kerela adava soj pravedno“ (Dela 10:34, 35). O Petar sine vooduševimo taro akava nevo haljojbe, hem akava haljojbe vlijajngja upro sa o hristijanja (w18.08 10, pas. 3-4).

Sekova jekh amendar tano odlučno te na kerel o bukja so mrzinela len o Jehova. Ama, so valjani te kera ako arakhljovaja ki situacija kolake so nane konkretno zakoni ki Biblija? Sar šaj te džana so mangela o Devel te kera? Ako mukhlem i Biblija te školujnel amari sovest, ka ana mudro odluka. O Jehova mangela amen, adaleske dengja amen načelija kola so šaj te vodinen amari sovest. Ov vakerela amenge: „Me, o Jehova, sium tlo Devel, kova so sikavela tut bašo tlo šukaripe, okova so vodinela tut ko drumo koleste so valjani te dža“ (Isa. 48:17, 18). Keda hor razmislinaja bašo bibliska načelija hem mukhaja te vlijajnen ko amaro vilo, tegani isprajnaja hem školujnaja amari sovest. A adava pomožinela amenge te ana mudra odluke. Načelo tano osnovno čačipe tari Biblija kova so vodinela amaro razmisluvanje hem pomožinela amenge te ana šukar odluke. Adava so pendžaraja e Jehovaskere načelija pomožinela amenge te haljova sar razmislinela ov hem soske dela amen nesave zakonija (w18.06 17-18, pas. 5, 8-10).

O „sledbenikija e Irodeskere“, kola so poddržinena sine e Irodeskere politička stavija, mislinena sine kaj ako o Isus vakerela te na platinel pe o danok, šaj sine te krivinen le kaj tano dušmani e Rimsko Carstvoske. Ama, ako vakerela sine kaj valjani te platinel pe o danok, o manuša šaj sine te čhinaven te džan pali leste. O Isus pazingja te na mešinel pe ko akava problemi. O Isus džanela sine kaj but danočnikija tane rumime, ama ov na koncentririnela pe sine ko adava. Namesto adava, leske sine najvažno e Devleskoro Carstvo — o čačutno rešenie bašo manušikane problemija. Adalea o Isus dengja amenge šukar primer. Na valjani te la strana ko politička problemija, čak ako izgledinela amenge kaj jekh strana tani ko pravo, a i javer na. E čačutne hristijanenge tano najvažno e Devleskoro Carstvo hem adava so vakerela o Devel kaj tano ispravno. Adaleske, keda kerela pe nešto so šaj te izgledinel sar nepravda, na valjani ni ko amare misle a ni lafencar te la nekaskiri strana (Mat. 6:33). But džene taro e Jehovaskere svedokija uspejngje te otfrlinen o silna politička stavija so sine len (w18.06 6, pas. 9-11).

Osven o nemoral, o Satana šaj probingja te iskušinel e angelen kola so nane verna adalea so vetingja lenge kaj ka del lenge vlast upro sa o manuša. Ko akava način, o Satana šaj manglja te čhinavel te avel o potomstvo e džuvljakoro (1. Moj. 3:15). Ama, o Jehova na mukhlja adava. Ov kergja te ovel Potop hem adalea rumingja o planija e Satanaskere hem e demonengere. O nemoral hem i gordost tane but delotvorna mamke. O angelija kola so gele tari e Satanaskiri strana, angleder adava ola but berša služingje e Jehovaske. Ama, but džene lendar mukhle ki lende te bajroven pogrešna želbe kola so ule but silna. Amen da avdive na valjani te bistra kaj bizi razlika kobor vreme služinaja e Jehovaske, o pogrešna želbe šaj te mukhen korenja ko amaro vilo (1. Kor. 10:12). Adaleske valjani sekogaš te proverina so isi ko amaro vilo hem te otfrlina o nemoralna misle hem i gordost! (Gal. 5:26; Kol. 3:5; w18.05 18, pas. 11-12).

O Pavle sine obeshrabrimo adaleske so o Evreija otfrlingje o haberi bašo Carstvo. Ama, o Pavle nikogaš na čhinavgja te propovedinel lenge. Ov objasningja savo stavi sine le bašo Evreija keda vakergja: „I želba mle vileskiri hem mli molitva taro vilo dži ko Devel baši lende tani te spasinen pe. Soske, me sium svedoko kaj ola revno trudinena pe te keren e Devleskiri volja, ama na džanena koja tani točno leskiri volja“ (Rim. 10:1, 2). O Pavle vakergja kaj i želba leskere vileskiri pottikningja le te propovedinel e Evreenge. Ov čače manglja ola te spasinen pe (Rim. 11:13, 14). O Pavle molingja e Jehova te pomožinel nesave dženenge taro evrejsko narodo te prifatinen o haberi bašo Carstvo. Isto agjaar,vakergja: „Revno trudinena pe te keren e Devleskiri volja“. Ov dikhlja o šukar ko manuša hem lengoro potencijal te služinen e Jehovaske. Ov džanlja kaj adala revna Evreija šaj te oven e Isuseskere revna učenikija, isto sar leste (w18.05 4, 6-7, pas. 4, 13-14).

Sekoj amendar valjani te džanel so valjani e javerenge te šaj te pomožinel lenge. O Pavle pišingja e hristijanenge so sine Evreija: „Ispravinen o umorna vasta hem o slaba kočaka hem ispravinen o drumija kolende so phirena tumare pre, te šaj o pro soj slabo te na šininel pe, nego te sasljol“ (Evr. 12:12, 13). Sarine amen, pa čak o čhave da, šaj te zajaknina hem te ohrabrina jekh jekhe amare lafencar. O Pavle pišingja: „Adaleske, ako isi tumen nesavo ohrabruvanje ko Hristos, ako isi tumen nesavi uteha pottiknimi taro mangipe, ako isi tumen nesavo jekhipe ko duho, ako isi tumen nesave nežna čuvstvija hem sočuvstvo, keren te ovav celosno bahtalo agjaar so složno ka razmislinen hem ka ovel tumen o isto mangipe, ka oven celosno ko jekhipe, ka razmislinen isto. Ma keren ništo tari holi ili tari gordost, nego ponizno dikhen e javeren sar pobare tumendar hem ma dikhen samo tumenge te ovel šukar, nego isto agjaar e javerenge da“ (Fil. 2:1-4; w18.04 23-24, pas. 10, 12).

I pričina soske o Jehova koristingja e Isuse te oslobodinel amen taro ropstvo e grevoskoro hem e meribaskoro tani te koristina amaro životo te služina leske. Najšukar način sar šaj te koristina amari sloboda tano ako koristinaja amaro vreme hem sila celosno te služina e Jehovaske. Akava ka pomožinel te na oven amenge najvažna amare lična želbe hem o bukja soj najvažna e manušenge avdive ko sveto (Gal. 5:16). Razmislin so kergja o Noe hem leskiri familija. Iako o manuša sine nasilna hem nemoralna, o Noe hem leskiri familija na živinena sine ko isto način sar o javera manuša. Sar uspejngje ko adava? Ola sine zafatime e zadačaja so dengja len o Jehova. Gradingje i arka, khedingje hrana peske hem e životnenge, hem vakergje e javerenge kaj ka ovel Potop. Ki Biblija pišinela: „O Noe kergja sa agjaar sar so zapovedingja leske o Devel. Baš agjaar kergja“ (1. Moj. 6:22). Adaleske, o Noe hem leskiri familija sine spasime (Evr. 11:7; w18.04 11, pas. 8; 12, pas. 12).

O Satana hem o demonija isto agjaar koristinena i hovavni religija hem o trgovsko sistem te šaj te hovaven „celo sveto“ (Otk. 12:9). Preku i hovavni religija, o Satana vakerela hovajba bašo Jehova, pa čak probingja te garavel e Devleskoro anav (Erem. 23:26, 27). Adaleske, nesave iskrena manuša so mislinena kaj služinena e Devleske, ustvari služinena e demonenge (1. Kor. 10:20; 2. Kor. 11:13-15). Isto agjaar, o Satana koristinela o trgovsko sistem te hovavel e manušen. Jekh hovajbe tano kaj o pare hem o materijalna bukja kerena e manušen bahtale (Izr. 18:11). Okola so verujnena ko akava hovajbe celo plo životo tane robija e barvalipaske namesto te služinen e Devleske (Mat. 6:24). Čak ako nekogaš mangena sine e Devle, lengoro mangipe bašo materijalna bukja ulo doborom silno so lengoro mangipe bašo Devel našavdilo (Mat. 13:22; 1. Jov. 2:15, 16; w18.05 16-17, pas. 6-7).