Juli

Mora te ova šukar amala e Isusea ako mangaja o Jehova te odgovorinel ko amare molitve. Akava značinela kaj mora te kera nešto poviše, a na samo te vakera o lafija „ko anav e Isuseskoro“ ko krajo tari sekoja molitva. Mora te haljova ko savo način o Jehova odgovorinela amenge ko molitve preku o Isus. O Isus vakergja e apostolenge: „So hem te roden ko mlo anav, adava ka kerav“ (Jovan 14:13). Iako o Jehova tano adava so šunela hem odgovorinela ko amare molitve, ov dengja vlast e Isuseske te ispolninel leskere odluke. Osven adava, angleder te odgovorinel ko amare molitve, o Jehova dikhela dali primeninaja o sovetija so dengja o Isus. Na primer, o Isus vakergja: „Ako tumen prostinena e manušenge lengere greške, tumaro Dad soj ko nebo isto agjaar ka prostinel tumenge. Ama, ako tumen na prostinena e manušenge lengere greške, tegani ni tumaro Dad nane te prostinel tumare greške“ (Mat. 6:14, 15). Akatar dikhaja kaj, ako mangaja o Jehova te odgovorinel ko amare molitve, but tano važno te ponašina amen e javerencar ko isto način sar so ov hem o Isus ponašinena pe amencar! (w20.04 21, pas. 6).

O apostol Pavle halilo so interesinela e manušen kola so šunena le sine hem prilagodingja plo pristap sprema lende. Ki jekh prilika kergja lafi jekhe grupaja manuša ki Listra kola so na džanena sine skoro ništo bašo sveta spisija. Adaleske, te šaj te vakerel lenge o šukar haberi, o Pavle spomningja bukja kola so sine lenge pendžarde — vakerela lenge sine bašo vremija keda i phuv dela but plodija hem baši prilika te uživinen ko životo. Ov koristingja lafija hem primerija so šaj sine odma te haljoven o manuša so šunena le. Ov proniklivo te šaj te otkrine so interesinela e manušen ko tlo podračje, hem prilagodin tlo pristap. Džikote avea sa popaše ko e stanareskoro kher, sar šaj te doznajne so interesinela le? Šukar primetin. Šaj kerela buti ko dvoro, čitinela lil, popravinela plo vrda ili kerela nešto javer. Ako tano soodvetno, soske na počminea razgovor bašo adava so kerela ko momenti? (Jovan 4:7). Čak taro leskere šeja šaj te doznajne nešto — na primer, tari koja nacionalnost tano, solea bavinela pe ili kova tano leskoro omileno sportsko timi (w20.04 11, pas. 11-​12).

Adaleske soj tane preterano sekirime, nesave phralja hem phenja na osetinena pe šukar ko situacie kote so isi javera da manuša. Šaj pharo lenge te oven ki pobari grupa, ama ola ponadari da džana ki dvorana hem ko kongresija. Iako lenge pharo te keren lafi manušencar so na pendžarena len, ola sepak kerena adava ki služba. Ako akava slučinela pe tuke da, ov sigurno kaj na sian korkori. But javera osetinena pe sar tute. Ma bistre kaj o Jehova but tano bahtalo so ponadari da služinea leske celo dušaja. Adava so tu na otkažinea tut tano dokaz kaj ov dela tut bereketija hem kaj dela tut i sila so valjani tuke (Fil. 4:6, 7). Ako služinea e Jehovaske iako isi tut problemija e sastipaja ili emocionalna problemija, ov sigurno kaj adava kerela le but bahtalo. Amen istrajno prastaja iako bute dženen amendar isi len problemija sastipaja (2. Kor. 4:16). Adaleske so o Jehova pomožinela amen, sarine ka prasta i trka dži ko krajo! (w20.04 31, pas. 20-​21).

E Devleskiri mudrost jasno dikhela pe taro način sar kergja i Phuv — amaro kher (Evr. 3:4). I Phuv tani posebno adaleske so ki late isi sa o uslovija so valjanena bašo životo. Šaj te sporedina i Phuv ko univerzum jekhe brodea soj ko okeani. Ama isi važna razlike maškar o brodi soj pherdo manušencar hem amari Phuv. Na primer, kobor vreme šaj te živinen okola soj ko brodi ako valjani korkori te proizvodinen peske kislorod, hrana hem pani, hem ako našti te frden o gjubre avrijal taro brodi? Sigurno ka meren but sigate. A sar tano e Phuvjaja? Oj ikerela ko životo milijarde suštestvija. Ki late proizvedinela pe kislorod bizo kova so našti te dišina, isto agjaar sa i hrana hem o pani kola so valjanena amenge, hem akala bukja nikogaš na trošinena pe. Iako o gjubre na frdela pe avrijal tari Phuv, nego ačhovela ki late, oj palem tani but šuži hem šaj te živinel pe ki late. Sar šaj te ovel adava? O Jehova stvoringja amari planeta te šaj te reciklirinel o gjubre, javere lafencar te šaj palem te koristinel le bašo nešto javer (w20.05 20, pas. 3-4).

Keda o Satana vakergja e Evake kaj nane te meren, ov, ustvari vakergja lake kaj o Jehova tano hovavno. Agjaar o Satana ulo klevetniko, ili Beng. I Eva sine hovavdi (1. Tim. 2:14). Poviše verujngja e Satana nego e Jehova. Tari adaja pričina angja i najlošno odluka so postojnela. Oj odlučingja te na šunel e Jehova, hem halja taro plodi so sine lenge zabranimo. A palo adava dengja e Adameske da te hal taro plodi (1. Moj. 3:6). Razmislin samo hari ko savo javer način šaj sine te postapinel i Eva. Oj šaj sine te vakerel e Satanaske: „Na džanava koj sian tu, ama but šukar džanava koj tano mlo Dad, o Jehova. Me but mangava le hem isi man doverba ki leste. Ov dengja amen sa so isi amen. Sar na ladžaja te kere lošno lafi baši leste?! Cide tut akatar!“ Kobor ka ovel sine bahtalo o Jehova te šaj sine te šunel sar leskiri mangli čhaj verno braninela le! (Izreki 27:11). Ama, e Eva na sine la čačutno hem hor mangipe sprema o Jehova, a ni e Adame. Adaleske so na sine len asavko mangipe sprema plo Dad, ola na braningje leskoro anav keda o dušmani vakergja hovajba baši leste (w20.06 4, pas. 10-​11).

Amare phenja zaslužinena te falina len bašo sa adava so kerena ki služba e Jehovaske. Ola pomožinena te gradinen pe ili te održinen pe amare objektija, propovedinena e manušenge so kerena lafi ki javer čhib hem služinena sar dobrovolcija ko Betel. Pomožinena ko akcie keda isi katastrofe, prevedinena amare publikacie, hem služinena sar pionerija hem misionerija. Osven adava, o romnja poddržinena pumare romen te ispolninen pumare odgovornostija ko sobranie hem ki organizacija. O Jehova dengja akale phralen „sar poklon“ te šaj te pomožinen e javerenge ko but načinija (Ef. 4:8). O mudra starešine tane svesna kaj o phenja „tane bari vojska“ dobrovolcija kola so but šukar propovedinena o šukar haberi. Isto agjaar, o starešine tane svesna kaj o duhovna zrela phenja šaj te pomožinen e poterne phenjenge keda isi len problemija (Tit 2:3-5). Čače amare phenja zaslužinena te cenina len hem te manga len! (w20.09 23-​24, pas. 13-​14).

O Jehova na bistrela okolen so angleder služingje leske, a kola so akana, taro nesave pričine cidingje pe lestar. Ov na bistrela ni adava so kergje baši leste džikote služingje leske (Evr. 6:10). O proroko o Isaija dengja jekh but šuži sporedba te šaj te sikavel sar o Jehova grižinela pe ple narodoske. Ov pišingja: „Sar pastiri ov ka grižinel pe ple stadoske. Ple vastea ka khedel e bakhren hem ka phiravel len ki pli angali“ (Isa. 40:11). Sar osetinela pe o Jehova, o baro Pastiri, keda nekoj taro leskere sluge ka cidel pe taro stado? O Isus dengja amen o odgovor keda pučlja ple učenikon: „So mislinena, ako jekhe manuše isi le šel bakhre hem jekh lendar našavgjola, nane li te mukhel okole enjavardešu enja bakhren ki planina hem te džal te rodel okole so našavdilo? Hem ako arakhela le, čače vakerava tumenge, poviše ka ovel bahtalo baši leste nego bašo okola enjavardešu enja so na našavdile“ (Mat. 18:12, 13; w20.06 19-​20, pas. 8-9).

Amenge tani čest te služina e Jehovaske ko sekova način so šaj (Ps. 27:4; 84:10). Ako nesavo phral tano spremno te kerel nesavi posebno zadača, ov zaslužinela pofalba. Ama, keda ka dobinel nesavi odgovornost, na valjani te mislinel kaj tano nešto posebno hem kaj tano považno e javerendar (Luka 17:7-10). Leskiri glavno cel valjani te ovel ponizno te služinel e javerenge (2. Kor. 12:15). Ki Biblija isi predupreduvačka primerija taro nesave manuša kola so mislinena sine kaj tane považna taro javera. Na primer, o Diotref ni hari na sine skromno hem mangela sine „te ovel prvo“ ko sobranie (3. Jov. 9). O Ozija sikavgja kaj tano gordo agjaar so probingja te kerel zadača koja so o Jehova na dengja la leske (2. Let. 26:16-21). O Avesalom kergja pe kaj mangela e manušen te šaj te poddržinen le soske manglja te ovel cari (2. Sam. 15:2-6). Taro akala bibliska izveštaija jasno dikhela pe kaj o Jehova na mangela okolen so rodena čest baši peske (Izr. 25:27). Sar so nakhela o vreme, i gordost hem i ambicija anena dži ko katastrofalna posledice (Izr. 16:18; w20.07 4, pas. 7-8).

Nesave hristijanja selingje pe zaedno ple familijaja ki javer phuv adaleske so živinena sine ko phare uslovija ili mangle te arakhen buti. Tegani, lengere čhave džana ki škola ki čhib tari adaja phuv. Verojatno o roditelija da ka valjani te sikljon adaja čhib te šaj te arakhen buti. So šaj te keren ako adathe isi sobranie ili grupa ki lengiri čhib? Dali i familija valjani te džal ko sobranie ki čhib tari adaja phuv ili ko sobranie kote so kerela pe lengiri čhib lafi? O poglavari ki familija mora te odlučinel ko kova sobranie ka džal leskiri familija. Akaja tani lično buti, adaleske ov mora te razmislinel soj najšukar leskere familijake. Amen mora te poštujna leskiri odluka. Bilo so te odlučinel, amen valjani te prifatina leskiri odluka agjaar so ka kera ov hem leskiri familija te osetinen pe šukar ko sobranie hem ka sikava kaj mangaja len (Rim. 15:7; w20.08 30, pas. 17-​18).

Ako mangaja o Jehova te pomožinel amen, na smejnaja te mislina kaj amari vrednost zavisinela tari amari fizičko sila, obrazovanie, taro adava kotar avaja ili taro barvalipe so isi amen. Nane potreba te oven amen akala bukja te šaj o Jehova te koristinel amen. Ustvari, maškar e Devleskere sluge „nane but džene kola soj mudra sprema o manušikane merilija, ni but mokjna, a ni but džene so avena taro važna familie (1. Kor. 1:26). Adaleske, iako šaj nane tut o bukja kola soj spomnime ko početok taro akava pasus, adava nane prečka te služine e Jehovaske. Namesto adava, baš tegani šaj jasno te dikhe leskoro mokjno vas ko tlo životo. Na primer ako daraja taro okola so napadinena tlo veruvanje, molin e Jehova te pomožinel tuke hrabro te branine tli vera (Ef. 6:19, 20). Ako borinea tut hronično nasvalipaja, molin e Jehova te del tut i sila so valjani tuke te šaj te služine leske najšukar so šaj. Sekogaš keda osetinea sar o Jehova pomožinela tuke, tli vera ovela pozorali hem dobinea nevi sila (w20.07 16, pas. 9).

Ako mangaja te čhiva o Carstvo ko prvo than ko amaro životo, mora te ova sar o Avraam kova so sine spremno te kerel žrtve te šaj te ugodinel e Devleske (Mar. 10:28-30 Evr. 11:8-10). Ma očekujn tlo životo te ovel bizo problemija. Čak okola so celo životo služinena e Jehovaske mora te borinen pe problemencar (Jak. 1:2; 1. Pet. 5:9). Avdive, poviše taro bilo keda angleder, isi amen šukar pričine te mislina baši idnina. O bukja so slučinena pe avdive ko sveto jasno sikavena kaj živinaja ko posledna dive. Jekh taro but bukja so ka keren amen bahtale keda ka vladinel e Devleskoro Carstvo tano adava so amare najmangle so mule ka voskresninen. Tegani o Jehova ka nagradinel e Avraame baši leskiri vera hem strplivost agjaar so ka voskresninel hem le hem leskere familija te živinen akate ki Phuv. Ka ove li tu da adathe te dodžakere len? Ka ove adathe ako sar o Avraam spremno kerea žrtve bašo e Devleskoro Carstvo, ako ačhovea verno iako isi tut problemija hem ako sikljovea strplivo te adžikere ko Jehova te ispolninel ple vetuvanja (Mih. 7:7; w20.08 5-6, pas. 13-​14; 7, pas. 17).

Amen džanaja kaj, ako amare dušmanja mudarena amen, o Jehova ka iranel amen ko životo. Uverime siem kaj nikoj hem ništo našti te odvojnel amen lestar (Rim. 8:35-39). Čače o Jehova sikavgja kobor tano mudro adalea so dengja amen i nadež bašo voskresenie! Adaleske, amen na daraja ako adala so poddržinena e Satana zakaninena pe amenge kaj ka mudaren amen ako na keraja adava so ola vakerena. Isto agjaar, adava dela amen hrabrost te ačhova verna e Jehovaske. Ako adala so mrzinena e Jehova vakerena kaj ka mudaren tut, dali ka ovel tut doverba ko Jehova kaj ka voskresninel tut? Kotar šaj te džane dali tegani ka ovel tut doverba ko Jehova? Puč tut: „Dali o odluke so anava len sekova dive sikavena kaj isi man doverba ki leste?“ (Luka 16:10). „Dali mlo način sar živinava sikavela kaj isi man doverba ko leskoro vetuvanje kaj ka grižinel pe bašo mle materijalna potrebe ako čhivava o Carstvo ko prvo than?“ (Mat. 6:31-33). Ako o odgovor ko akala pučiba tano oja, ka ove spremno baši bilo koja nevolja so ka avel (Izr. 3:5, 6; w20.08 17-​18, pas. 15-​16).

Amen valjani te sikljova šukar te koristina e Devleskoro Lafi. O sostanokija pomožinena amenge ko adava. Ama, te šaj te uverina e javeren kaj o bibliska čačipa tane but korisna, mora korkori amen te proučina e Devleskoro Lafi. Ko asavko način bajraraja amari vera. Akava na značinela samo te čitina i Biblija, nego te razmislina bašo adava so čitingjem hem te istražina ko amare publikacie te šaj šukar te haljova o bibliska stihija, te džana sar te primenina len hem sar te objasnina len (1. Tim. 4:13-15). Tegani ka šaj te koristina e Devleskoro Lafi keda sikavaja e javeren. Akava značinela kaj nane dovolno samo te čitina lenge nesavo biblisko stiho. Amen mangaja te pomožina lenge te haljoven o stihija hem te džanen sar te primeninen len. Ako redovno proučinaja i Biblija, ka šaj panda pošukar te koristina la keda sikava e javeren (2. Tim. 3:16, 17; w20.09 28, pas. 12).

Šaj te ačhova koncentririme ko propovedibe ako razmislinaja bašo sa adava so kerela o Jehova te šaj te pomožinel amenge. Na primer, ov dela amen but duhovno hrana sar soj o pečatime ili elektronska publikacie, audiosnimke, videoklipija hem emisie ki amari internet-televizija. Samo razmislin bašo akava: ki amari internet-stranica isi informacie ko poviše taro 1.000 čhibja! (Mat. 24:45-47). Javer način sar šaj te ačhova koncentririme ko propovedibe tano agjaar so ka dža palo e Isuseskoro primer. Ov na mukhlja ništo te lel leskoro vnimanie taro adava te propovedinel o čačipe (Jovan 18:37). O Satana našti sine te hovavel le adalea so nudingja leske „o carstvija taro celo sveto hem lengiri slava“, hem na pelo ko iskušenie keda o javera mangle te keren le cari (Mat. 4:8, 9; Jovan 6:15). Na vlijajngje upri leste o želbe bašo materijalno barvalipe hem na darandilo keda sine progonimo (Luka 9:58; Jovan 8:59). So ka pomožinel amenge te ačhova koncentririme keda amari vera tani ko ispit? Adava so ka setina amen ko sovet so dengja le o Pavle ko avdisutno stiho (w20.09 10, pas. 6-7).

But siem bahtale so isi but phenja kola so trudinena pe ko sobranie! Ola učestvujnena ko sostanokija hem ki služba. Nesave pomožinena te održinen pe o dvorane hem grižinena pe bašo phralja hem phenja. Džangjola pe, lende da isi len problemija. Nesave grižinena pe pumare pophure roditelenge. Javera trpinena protivibe taro lengere najpaše. A nesave javera daja kola so korkori bajrarena pumare čhaven kerena phari buti te šaj te grižinen pe lenge. Soske valjani te poddržina amare phenjen? Adaleske so o sveto avdive na poštujnela sekogaš e džuvlen sar so zaslužinena. A osven adava, i Biblija pottikninela amen te pomožina lenge. Na primer, o apostol Pavle vakergja e phralenge taro sobranie ko Rim te priminen e phenja Fiva hem te „pomožinen lake ko sa so ka valjani lake“ (Rim. 16:1, 2). O Pavle sine delo tari jekh grupa manuša kola so mislinena sine kaj o džuvlja vredinena pohari taro murša hem agjaar ponašinena pe sine lencar. Ama sar hristijani, o Pavle džala sine palo e Isuseskoro primer, hem ponašinela pe sine ljubezno e džuvlencar hem sine le poštovanje sprema lende (w20.09 20, pas. 1-2).

Te šaj te pomožina amare interesentenge te ovel len želba te propovedinen o šukar haberi, šaj te puča len pučiba sar soj akala: „Sar tlo životo ulo pošukar adaleske so primeninea o bibliska sikljojba? Dali mislinea kaj o javera da valjani te šunen o šukar haberi? So šaj te kere te pomožine lenge?“ (Izr. 3:27; Mat. 9:37, 38). Ma bistre kaj o Isus dengja amen upatstvo te sikava e javeren „te ikeren sa“ so zapovedingja. Ko adava sigurno tane vklučime o duj najbare zapovedija — te manga e Devle hem te manga e pašutnen (Mat. 22:37-39). Ako isi le baro mangipe sprema o Devel hem sprema o javera, tegani ka mangel te propovedinel. Normalno tano adava so nesave interesentija darana keda mislinena kaj valjani te propovedinen. Ama, amen šaj te ohrabrina len kaj o Jehova ka pomožinel lenge hem hari po hari ka našaven i dar (Ps. 18:1-3; Izr. 29:25; w20.11 3, pas. 6-8).

Džikote spreminea tut bašo biblisko kursi, molin tut e Jehovaske bašo interesenti hem bašo leskere potrebe. Molin tut o Jehova te pomožinel tuke te sikave e interesente tari Biblija ko način so ka resel dži ko leskoro vilo. Ma bistre kaj tli cel tani te pomožine leske te krstinel pe. O interesenti isto agjaar valjani te komunicirinel e Jehovaja. Sar? Agjaar so ka šunel e Jehova hem ka kerel lea lafi. Šaj te šunel e Devle agjaar so ka čitinel i Biblija sekova dive (Is. Nav. 1:8; Ps. 1:1-3). Ov šaj te kerel e Jehovaja lafi agjaar so ka molinel pe sekova dive. Adaleske taro vilo molin tut e Devleske angleder te proučinen hem palo proučibe, hem spomnin e interesente ko tle molitve. Džikote šunela tle molitve, ov ka sikljovel sar iskreno hem taro vilo te molinel pe e Jehovaske hem te bičhalel ple molitve e Isuseske ko anav (Mat. 6:9; Jovan 15:16). Adava so sekova dive ka čitinel i Biblija (ka šunel e Jehova) hem ka molinel pe (ka kerel lafi e Jehovaja) sigurno ka pomožinel leske te ovel popaše lea! (Jak. 4:8; w20.10 8, pas. 8; 9, pas. 10-11).

Avdive da e Jehovaskiri organizacija trudinela pe but te šaj te ovel redo hem mir sar so sine ko hristijansko sobranie ko prvo veko (Dela 16:4, 5). Na primer, ako sian prisutno ko Proučibe i Stražarsko kula ko javer sobranie — pa čak ki javer phuv — ka džane sar ka ikerel pe adava sostanok hem baši koja statija ka kerel pe lafi. Odma ka osetine tut sar te phene khere sian! Samo e Devleskoro duho šaj te kerel te ovel asavko jekhipe! (Sof. 3:9). So šaj te kere tu? Adaleske puč tut: „Dali me da kerava te ovel ko sobranie jekhipe hem mir? Dali sium poslušno okolenge so predvodinena? Dali šaj o javera te potprinen pe ki mande, posebno ako isi man nesave odgovornostija ko sobranie? Dali točno ko vreme završinava mle zadače hem dali sekogaš sium spremno te pomožinav e javerenge?“ (Jak. 3:17). Ako dikhea kaj šaj te ove pošukar ko nesave bukja, molin tut bašo sveti duh. Kobor poviše dozvolinea te vlijajnel upri tute hem upro tle postapke, doborom poviše o phralja hem o phenja ka mangen tut hem ka ceninen tut (w20.10 23, pas. 12-​13).

E Devleskoro Lafi šaj te ovel amenge sar ajna (Jak. 1:23-25). But džene amendar dikhena pe ki ajna angleder te ikljoven kheraldan. Agjaar šaj te dikha dali valjani te kera nesave promene angleder te dikhen amen o javera. Slično agjaar, keda čitinaja i Biblija sekova dive, dikhaja save promene valjani te kera ko amaro razmislibe hem stavi. Bute dženenge koristinela adava so sabajle čitinena e diveskoro stiho angleder te ikljoven kheraldan. Ola dozvolinena adava so čitinena te vlijajnel upri lende. Tegani, preku celo dive trudinena pe te primeninen o sovetija taro e Devleskoro Lafi. Osven adava, mora redovno te odvojna amenge vreme sekova dive te proučina i Biblija hem te razmislina baši late. Iako dikhjola lokho, akava tano jekh taro najvažna bukja so pomožinena amenge te ačhova ko tesno drumo so vodinela ko životo. Ki nesavi smisla, e Devleskoro Lafi tano sar jekh rendgen aparati kova so pomožinela amen te dikha so isi andre ki amende. Ama, mora te ova ponizna te šaj te ovel amen korist taro sovetija so dobinaja len tari Biblija hem taro okola so o Devel koristinela len te vodinel pli organizacija (w20.11 18, pas. 3; 20, pas. 8).

Iako o hristijanja taro prvo veko but puti sine progonime, sine periodija keda živinena sine ko mir. So kergje adava vreme? Akala verna murša hem džuvlja propovedinena sine o šukar haberi bizo te čhinaven. O izveštaj taro Dela vakerela kaj ola džana sine „ki dar taro Jehova“. Adaleske so ponadari da propovedinena sine o šukar haberi, lengoro broj bajrola sine. Sigurno o Jehova dengja len bereketi soske revno propovedinena sine ko vreme džikote sine mir (Dela 9:26-31). O hristijanja taro prvo veko koristinena sine sekoja prilika te vakeren o šukar haberi. Na primer, džikote o apostol Pavle sine ko Efes, sine le prilika te propovedinel bute manušenge, hem adaleske ačhilo poviše vreme ki adaja diz (1. Kor. 16:8, 9). O učenikija revno vakerena sine „o šukar haberi bašo e Jehovaskoro lafi“ (Dela 15:30-35). Savo sine o rezultati? Adava vakerela amenge o avdisutno stiho (w20.09 16, pas. 6-8).

Keda o Adam grešingja, ov angja meribe peske hem sa e manušenge. Amen panda osetinaja o lošna posledice tari leskiri neposlušnost. Ama, adaleske so o Jehova voskresningja ple Čhave, o mule ka šaj palem te živinen! Isto agjaar „o voskresenie da e mulengoro avela preku jekh manuš“, o Isus. O apostol Pavle vakergja: „Soske, sar preku o Adam sarine so merena, agjaar preku o Isus sarine ka oven dživde“ (1. Kor. 15:22). Ki kaste mislingja o Pavle keda vakergja kaj preku o Adam sarine merena? O Pavle mislingja ko sa o manuša so nasledingje o grevo hem i nesovršenost taro Adam, hem adaleske merena (Rim. 5:12). O Adam nane te ovel maškar adala so palem „ka oven dživde“. E Adameske na važinela e Isuseskiri otkupno žrtva, soske o Adam sine sovršeno manuš so odlučingja te na šunel e Jehova. Adava so ulo e Adameske — „večno meribe“ — ka ovel adalenge da so „o manušikano Čhavo“ ka osudinel len sar „buznja“ (Mat. 25:31-33, 46; Evr. 5:9; w20.12 5, pas. 13-14).

Ako na dobinaja nesavi zadača, te razmislina bašo primer e verna angelengoro. Na primer, jekh puti o Jehova pučlja e angelen te vakeren predlogija bašo adava sar te hovaven e lošno care e Ahave. Nesave angelija dengje predlogija. Ama, o Jehova biringja jekhe angeleskoro predlog hem vakergja leske kaj adava ka uspejnel (1. Car. 22:19-22). Dali o javera verna angelija obeshrabringje pe hem dali mislingje: „So džabe trošingjum mlo vreme te dav predlog?“ Nane amen nisavo dokaz kaj agjaar razmislingje. O angelija tane čače ponizna, hem mangena te den celo slava e Jehovaske (Sud. 13:16-18; Otk. 19:10). Ma bistre kaj i najbari prednost so šaj te ovel amen tani te phirava e Devleskoro anav hem te propovedina bašo leskoro Carstvo. O zadače na kerena amen poskapocena anglo Devel. O Jehova hem amare phralja ka mangen amen ako siem ponizna hem skromna. Adaleske molin e Jehova te pomožinel tuke te ačhove ponizno hem skromno. Razmislin bašo sa o šukar primerija taro e Jehovaskere ponizna sluge soj pišime ki Biblija. Spremno služin tle phralenge najšukar so šaj (1. Pet. 5:5; w20.12 26, pas. 16-17).

O šlemi e spasibaskoro pretstavinela i nadež so dela amen o Jehova — i nadež kaj ov ka nagradinel sa okolen so kerena leskiri volja hem kaj čak ako meraja ov ka voskresninel amen (1. Sol. 5:8; 1. Tim. 4:10; Tit 1:1, 2). I nadež bašo spasenie zaštitinela amare misle. Oj pomožinela amenge te koncentririna amen ko e Devleskere vetuvanja hem te na obeshrabrina amen taro amare problemija. O šlemi phiravaja le agjaar so trudinaja amen amare misle te oven ko sklad e Devleskere mislencar. Na primer, amen na nadinaja amen ko barvalipe so nane sigurno, nego nadinaja amen ko Devel (Ps. 26:2; 104:34; 1. Tim. 6:17). O mači e duhoskoro pretstavinela e Devleskoro Lafi, i Biblija. Adava mači isi le mokj te čhinel taro koreno o hovajba hem te oslobodinel e manušen taro hovavne sikljojba hem o štetna navike (2. Kor. 10:4, 5; 2. Tim. 3:16, 17; Evr. 4:12). Amen sikljovaja šukar te koristina adava mači preku amaro lično proučibe hem preku i obuka so dobinaja la tari e Jehovaskiri organizacija (2. Tim. 2:15; w21.03 27, pas. 4; 29, pas. 10-11).

Čak džikote sine ko zatvor adaleske so propovedinela sine bašo Isus, o apostol Jovan sikavgja kaj mangela e javeren. Na primer, ov pišingja o lil Otkrovenie hem bičhalgja le ko sobranija te šaj te džanen so ka slučinel pe panda hari (Otk. 1:1). Palo adava, kratko otkeda sine oslobodimo taro Patmos, o Jovan pišingja plo evangelie kote so sine izveštaj bašo e Isuseskoro životo hem i služba. Ov isto agjaar pišingja trin pismija te ohrabrinel hem te zajakninel e phralen hem e phenjen. Tu da šaj te dža palo e Jovaneskoro primer kova so sine spremno te kerel žrtve. Adalea so ka kere ko tlo životo šaj te sikave dali mangea e manušen. E Satanaskoro sveto mangela te trošine tlo vreme hem tli energija samo tuke, adalea so ka trudine tut te zarabotine poviše pare hem te ove popularno. Namesto adava, e Devleskere sluge ko celo sveto trošinena kobor so šaj poviše vreme te šaj te propovedinen o šukar haberi hem te šaj te pomožinen e manušenge te oven popaše e Jehovaja (w21.01 10, pas. 9-10).

O Jonatan šaj sine te ovel ljubomorno e Davideske. Adaleske so sine e careskoro čhavo, o Jonatan šaj sine uporno te rodel te ovel o sledno cari (1. Sam. 20:31). Ama o Jonatan sine ponizno hem sine verno e Jehovaske. Ov celosno poddržingja e Jehovaskiri odluka o David te ovel o sledno cari. Isto agjaar, ov sine verno e Davideske iako adava holjankergja e Saule (1. Sam. 20:32-34). Adaleske so o Jonatan mangela sine e Davide, ov na sine leske ljubomorno. O Jonatan džanela sine šukar te koristinel i strela hem sine hrabro vojniko. O narodo vakerela sine kaj ov hem leskoro dad sine „pobrza taro orlija“ hem „posilna taro lavija“ (2. Sam. 1:22, 23). Adaleske o Jonatan šaj sine te falinel pe bašo hrabra bukja so kergja. Ama, ov na mangela sine te ovel pošukar taro David hem na sine ljubomorno bašo šukar bukja so kerela len sine ov. Namesto adava, o Jonatan sine vooduševimo tari e Davideskiri hrabrost hem tari leskiri doverba ko Jehova. Na primer, otkeda o David mudargja e Golijate, o Jonatan počmingja te mangel le sar korkori peste (w21.01 21, pas. 6; 22, pas. 8-9).

Sa e hristijanenge poglavari tano o Isus Hristos, a ov tano sovršeno. Ama keda jekh romni khuvela ko brako, jekh nesovršeno rom ovela lakoro poglavari, a adava šaj te ovel predizvik. Adaleske keda razmislinela te khuvel ko brako nesave phralea, šukar ka ovel te pučel pe: „So sikavela kaj akava phral ka ovel šukar familijarno poglavari? Dali o duhovna bukja leske najvažna? Ako na, dali ka ovel šukar poglavari odkeda ka la amen?“ Isto agjaar jekh phen valjani te pučel pe: „Save osobine isi man so ka keren o brako te ovel po šukar? Dali sium strplivo hem darežlivo? Dali sium paše e Jehovaja?“ (Prop. 4:9, 12). Ako jekh džuvli anela šukar odluke angleder o brako, adava ka pomožinel lake te ovel la uspešno hem bahtalo brako. But phenja dena but šužo primer adalea soj tane podložna pumare romeske. Ola zaslužinena pofalba! (w21.02 8, pas. 1-2).

Ko posledna berša, but objavitelija čhivgje peske cel te sikljoven javer čhib te šaj te služinen ki pobari mera hem te služinen ko sobranie kote so valjanena poviše objavitelija. Ola korkori angje asavki odluka te šaj panda poviše te služinen e Jehovaske. Iako ponekogaš valjanena poviše berša te šaj te sikljoven šukar te keren lafi ki nevi čhib, ola ko but načinija pomožinena ko sobranie. Ple šukar osobinencar hem iskustvoja but ohrabrinena e javeren. But ceninaja akale samopožrtvuvana phralen hem phenjen! Ako jekh phral panda na kerela šukar lafi ki čhib so koristinela o sobranie, adava na značinela kaj o starešine na valjani te preporačinen le sar starešina ili sluga-pomošniko. Keda odlučinena dali te preporačinen le bašo akala odgovornostija, o starešine na valjani te dikhen kobor šukar pendžarela i čhib, nego dali ispolninela o bibliska uslovija (1. Tim. 3:1-10, 12, 13; Tit 1:5-9; w20.08 30, pas. 15-​16).

O manuša šaj mislinena kaj nekoj šaj te ovel bahtalo samo ako isi le šukar sastipe, but pare hem sloga ki familija. Ama, o bahtalipe bašo kova so pišingja o Jakov tano jekh taro osobine so avena taro sveti duh hem na zavisinela taro okolnostija so isi jekhe manuše (Gal. 5:22). Jekh hristijani tano bahtalo keda džanela kaj kerela e Jehovaskiri volja hem kaj džala palo e Isuseskoro primer (Luka 6:22, 23; Kol. 1:10, 11). Amaro bahtalipe šaj te sporedinel pe jekhe jagaja ki jekh lampa. Adaleske so i jag tani zaštitimi tari bavlal hem taro bršim oj šaj ponadari da te thabljol. Slično agjaar, amen da šaj ponadari da te ova bahtale bizi razlika so slučinela pe ko amaro životo. Amen nane te našava amaro bahtalipe keda siem nasvale ili keda nane amen pare. Čak ka ova bahtale keda o manuša asana amenge ili keda amari familija ili o javera protivinena pe amenge. Ustvari, tegani amaro bahtalipe ka ovel panda pobaro, soske džanaja kaj o iskušenija so isi amen baši amari vera dokažine kaj amen siem čačutne učenikija e Hristoseskere (Matej 10:22; 24:9; Jovan 15:20). Adaleske o Jakov šaj sine te pišinel o lafija taro avdisutno stiho (w21.02 28, pas. 6).

Keda ka čitine bibliska stihija so sikavena kobor tano važno te ačhove smirimo hem te ovel tut doverba ko Jehova, trudin tut te pamtine len. Te šaj te kere adava čitin len ko glaso ili pišin len negde, hem palo adava povtorin len često. O Jehova vakergja e Isus Navineske redovno te čitinel o lil e zakoneskoro te šaj te postapinel mudro. Adava so čitinela sine ko e Devleskoro zakoni valjani sine pomožinel leske ma te daral hem hrabro te vodinel e Devleskere narodo (Is. Nav. 1:8, 9). But stihija ko e Devleskoro Lafi šaj te pomožinen tuke te ove smirimo ko situacie so kerena te osetine tut sekirimo ili te dara (Ps. 27:1-3; Izr. 3:25, 26). Ko amare sostanokija isi amen korist taro govorija so ikerena pe, taro komentarija so dena len o prisutna hem taro ohrabruvačka razgovorija so isi amen amare phralencar hem phenjencar (Evr. 10:24, 25). Isto agjaar, šaj but te ohrabrina amen keda vakeraja amare paše amalenge taro sobranie bašo adava so sekirinela amen (w21.01 6, pas. 15-16).

Keda krstingjan tut, tu sikavgjan kaj isi tut bari vera hem doverba ko Jehova. O Jehova sine but bahtalo keda uljan delo tari leskiri familija. Akana adava so valjani tu te kere tano ponadari da te ovel tut doverba ko Jehova. Šaj ka ovel tuke lokho te ovel tut doverba ko Jehova keda valjani te ane bare odluke, ama so ka kere ko javera situacie? But tano važno te ovel tut doverba ko Jehova keda anea odluke, kote soj vklučimi i zabava, i buti hem o životna celija. Ma te ovel tut doverba ki tli mudrost. Namesto adava, rode bibliska načelija kola so ka pomožinen tuke te ane šukar odluke hem palo adava postapin sprema lende (Izr. 3:5, 6). Ako kerea adava, ka kere e Jehova bahtalo hem o javera ko sobranie ka poštujnen tut. Džangjola pe, sar sarine tu da sian nesovršeno, hem ponekogaš ka kere greške. Sepak, adava na valjani te sprečinel tut te kere sa so šaj ki služba e Jehovaske (w21.03 6, pas. 14-15).

Dali tli familija protivinela pe tuke adaleske so služinea e Jehovaske? Ili, dali živinea ki phuv kote o aktivnostija e Jehovaskere svedokongere tane ograničime ili čak zabranime? Ako tano agjaar, šaj te ohrabrinen tut o stihija taro 2. Timotej 1:12-16 hem 4:6-11, 17-22. O apostol Pavle pišingja akala stihija džikote sine ko zatvor. Angleder te čitine akala stihija vaker e Jehovaske bašo tlo problemi hem sar osetinea tut. Ov konkretno. Palo adava molin tut e Jehovaske te pomožinel tuke te arakhe načelija ko izveštaija bašo e Pavleskere nevolje. Adala načelija ka pomožinen tuke te džane so te kere tu da keda ka arakhljove ki asavki situacija. O Jehova vakergja e Pavleske kaj ka trpinel progonstvo adaleske soj tano hristijani (Dela 21:11-13). Sar o Jehova pomožingja e Pavleske? Ov odgovoringja ko e Pavleskere molitve hem dela le sine sila. O Jehova uveringja e Pavle kaj ka dobinel i nagrada baši koja so but trudingja pe. Isto agjaar, ov pottikningja e Pavleskere verno amalen te pomožinen leske ko praktično način (w21.03 17-​18, pas. 14-15, 19).