Avgust

Šaj li te setine tut ki jekh pričina soske o Jehova ka pišinel ko plo „lil e setibaskoro“ o anava okolengere kola so ple lafencar sikavena kaj darana lestar hem hor razmislinena bašo leskoro anav? Amare lafija sikavena so isi amen andre ko vilo. O Isus vakergja: „O muj vakerela adava solea tano pherdo o vilo“ (Mat. 12:34). O Jehova mangela okola so mangena le te oven bahtale zasekogaš ko nevo sveto. O način sar keraja lafi šaj but te vlijajnel upro adava dali o Jehova ka prifatinel i služba so keraja leske ili na (Jak. 1:26). Nesave manuša kola so na mangena e Devle kerena lafi agresivno, grubo hem ko gordo način (2. Tim. 3:1-5). Amen na mangaja te ova sar lende. Amen taro vilo mangaja te kera bahtalo e Jehova amare lafencar. Ama dali o Jehova ka ovel zadovolno ako keraja ljubezno lafi ko sostanokija hem ki služba, a keraja grubo lafi amare familijaja keda o javera na dikhena amen? (1. Pet. 3:7; w22.04 5, pas. 4-5).

O Devel čhivgja e deše šingenge hem e divo zveroske i misla ko lengere vile te uništinen o Baro Vavilon. Oja, o Jehova ka pottikninel e nacien te koristinen e lole zvero, javere lafencar o Obedineta nacie, te napadinen e hovavne religien hem celosno te uništinen len (Otk. 18:21-24). So značinela akava amenge? Valjani te ikera amaro obožavibe čisto hem sveto anglo amaro Devel (Jak. 1:27). Nikogaš na valjani te dozvolina te vlijajnen upri amende o hovavne sikljojba, o spiritizam, o paganska praznikija hem o slaba moralna merilija taro Baro Vavilon! Amen ponadari da predupredinaja e manušen te ikljoven lestar te šaj te na oven kriva bašo leskere grevija (Otk. 18:4; w22.05 11, pas. 17; 14, pas. 18).

Tumen o roditelija, roden prilike te sikaven tumare čhaven bašo Jehova hem vakeren lenge bašo but šukar bukja kola so kergja len tumenge (5. Moj. 6:6, 7). Akava tano posebno važno ako isi tumen bračno pari kova so nane e Jehovaskoro svedoko, hem adaleske našti redovno te proučinen tumare čhavencar khere. Jekh phen so vikinela pe Kristina vakerela: „Na sine man but prilike te kerav lafi e čhavencar bašo duhovna bukja. Adaleske koristinava sine sekoja prilika so ka ovel man sine“. Osven adava, keren pozitivno lafi baši e Jehovaskiri organizacija hem bašo phralja hem phenja. Ma kritikujnen e starešinen, soske adava so vakerena baši lende but ka vlijajnel ko adava dali tumare čhave pokasno ka roden lendar pomoš keda ka valjani lenge. Den tumendar sa te šaj te ovel mir ko kher. Redovno sikaven tumare romeske hem tumare čhavenge kaj mangena len. Keda kerena lafi bašo tumaro rom, keren adava ko ljubezno način hem sikaven kaj poštujnena le hem sikaven tumare čhaven te keren o isto. Agjaar ka keren jekh šukar atmosfera khere, hem e čhavenge ka ovel polokho te sikljoven bašo Jehova (Jak. 3:18; w22.04 18, pas. 10-11).

E Isuseskiri poraka dži ko sobranie ko Efes sikavela kaj istrajngje hem kaj iako sine len predizvikija, na čhinavgje te služinen e Jehovaske. Sepak, našavgje pumaro mangipe so sine len ko početok. Ola mora sine palem te zamangen e Jehova sar angleder, te šaj lengoro obožavibe te ovel prifatlivo. Slično agjaar, avdive da mora te kera nešto poviše nego samo te istrajna. Valjani te istrajna taro ispravna pričine. Amare Devleske nane samo važno so keraja, nego isto agjaar soske keraja adava. Amare motivija tane leske važna soske ov očekujnela te obožavina le adaleske so but mangaja le hem siem blagodarna leske (Izr. 16:2; Marko 12:29, 30). Mora ponadari da te ačhova džangavde. O phralja hem o phenja taro sobranie ko Sard sine len javer problemi. Iako angleder sine duhovno aktivna, ola čhinavgje te keren adava. Adaleske o Isus vakergja lenge „te džangavgjoven“ (Otk. 3:1-3). Džangjola pe, o Jehova nane te bistrel adava so kergjem (Evr. 6:10; w22.05 3, pas. 6-7).

O Solomon vakergja kaj i buti šaj te anel bari radost, baši koja so vakergja kaj tani „poklon taro Devel“ (Prop. 5:18, 19). O Solomon kergja taro iskustvo lafi soske sine but bukjarno. Ov kergja khera, nive drakhencar, gradine hem ezerija. Isto agjaar kergja dizja (1. Car. 9:19; Prop. 2:4-6). Bašo sa adava valjani sine te kerel but buti hem sigurno but uživinela sine ko adava. Ama o Solomon džanlja kaj ako mangela te ovel čače radosno valjani te kerel nešto poviše. Adaleske, kergja isto agjaar but bukja e Jehovaske. Na primer, sine odgovorno te gradinel pe o hrami bašo Jehova. Adava proekti trajngja efta berš! (1. Car. 6:38; 9:1). Otkeda o Solomon kergja but različna bukja halilo kaj i najvažno buti tani te služinel pe e Jehovaske. Ov pišingja: „Adaleske, so šaj te phena ko krajo? Neka ovel tut dar taro čačutno Devel hem iker leskere zapovedija“ (Prop. 12:13; w22.05 22, pas. 8).

I Biblija tani pherdi primerencar taro manuša kolenge so o Jehova spremno prostingja. Koj avela tuke ki godi? Šaj setinea tut ko cari Manasija. Adava lošno manuš but grešingja protiv o Jehova. Ov obožavinela sine hovavne devlen hem terinela sine e javeren te keren o isto. Ov dela sine ple čhaven sar žrtva e hovavne devlenge. A soj najlošno, čhivgja čak idoli taro hovavno devel ko e Jehovaskoro sveto hrami. Baši leste i Biblija vakerela: „Ov kerela sine but lošna bukja anglo e Jehovaskere jakhja hem agjaar vredžinela le sine“ (2. Let. 33:2-7). Ama keda o Manasija sikavgja kaj čače kainela pe, o Jehova spremno prostingja leske (2. Let. 33:12, 13). Ili šaj isto agjaar setinea tu ko cari o David kova so kergja seriozna grevija protiv o Jehova sar soj i preljuba hem mudaribe. Sepak, keda o David čače kaingja pe hem priznajngja plo grevo, o Jehova leske da prostingja (2. Sam. 12:9, 10, 13, 14). Oja, šaj te ova sigurna kaj o Jehova tano spremno te prostinel (w22.06 3, pas. 7).

Nane sekogaš lokho te ovel amen zorali nadež. Šaj te počmina te ova nestrpliva džikote adžikeraja o Devel te ispolninel ple vetuvanja. Ama adaleske so o Jehova tano večno, adava so amenge dikhjola sar but vreme e Jehovaske tano kratko (2. Pet. 3:8, 9). Ov sigurno ka ispolninel pli namera hem adava ko najšukar način ama šaj nane te kerel adava keda amen očekujnaja. So ka pomožinel amenge ponadari da te ovel amen cvrsto nadež džikote strplivo adžikeraja o Devel te ispolninel ple vetuvanja? (Jak. 5:7). Ačhov paše e Jehovaja soske ov tano adava so ka ispolninel amari nadež. Ustvari, te šaj te ovel amen nadež mora te verujna kaj o Jehova postojnela hem kaj „nagradinela okolen so rodena le revno“ (Evr. 11:1, 6). So porealno amenge o Jehova doborom poviše ka ova uverime kaj ov ka kerel sa adava so vetingja. Te šaj te kera amari nadež panda pocvrsto mora te molina amen e Jehovaske hem te čitina leskoro Lafi. Iako amen našti te dikha e Jehova sepak šaj te ova lea paše. Šaj te kera lea lafi ki molitva hem te ova uverime kaj ka šunel amen (Erem. 29:11, 12; w22.10 26-27, pas. 11-13).

Zamislin tuke sar o Jov bešela tele ko pravo hem isi le bare dukha (Jov 2:8). Leskere amala celo vreme vakerena leske kaj nane šukar manuš hem kaj bilo so te kerel ništo na vredinela. Leskere nevolje sine leske sar baro tovar ko pikje, a i duša leskiri andral dukhala le sine bašo leskere čhave so mule. Ko početok, ov čutinela sine (Jov 2:13). Šaj adala hovavne amala mislingje peske kaj adaleske so čutinela ka cidel pe taro Jehova. Ako mislingje agjaar, but hovavgje pe. Ama ko jekh momenti o Jov vazdingja plo šero, dikhlja len ko jakhja hem vakergja lenge: „Sa džikote na merava, nane te otkažinav man tari mli besprekornost“ (Jov 27:5). So pomožingja leske te ovel hrabro hem silno iako but mučinela pe sine? Čak keda sine but obeshrabrimo, ov nikogaš na čhinavgja te nadinel pe kaj leskoro manglo Devel jekh dive ka anel krajo leskere mukenge. Ov džanlja kaj čak te merel, o Jehova ka voskresninel le (Jov 14:13-15; w22.06 22, pas. 9).

Isi amen jekh but skapoceno poklon, okova so stvoringja o nebo hem i phuv dozvolinela amenge te molina amen leske. Razmislin samo, šaj te phrava e Jehovaske amaro vilo ko bilo savo vreme hem ki bilo savi čhib. Šaj te molina amen keda siem ki bolnica ili ko zatvor hem te ova uverime kaj ka šunel amen amaro Dad. Amen siem but blagodarna bašo akava poklon. O cari o David but ceninela sine i prednost te molinel pe. Ki jekh gili vakergja e Jehovaske: „Mli molitva neka ovel spremimi angli tute sar temjani“ (Ps. 141:1, 2). Ko e Davideskoro vreme o sveto temjani, kova so koristinena sine o sveštenikija, sine vnimatelno spremimo (2. Moj. 30:34, 35). Isto sar okola so šukar spreminena sine o temjani, agjaar o David da manglja šukar te razmislinel bašo adava so ka vakerel e Jehovaske ki molitva. Amen da mangaja te kera o isto. Mangaja amare molitve te oven ugodna e Jehovaske (w22.07 20, pas. 1-2; 21 pas. 4).

I odmazda tani e Jehovaskiri. O Jehova na dengja amen pravo te irana lošnipaja nekaske so grešingja amenge (Rim. 12: 20, 21). Adaleske so siem ograničime hem nesovršena amen našti te procenina o bukja ispravno sar o Devel so šaj (Evr. 4:13). Ponekogaš, amare čuvstvija šaj te keren amenge pharo ispravno te postapina. O Jehova pottikningja e Jakove te pišinel: „E manušeskiri holi na anela i pravednost koja so rodela o Devel“ (Jak. 1:20). Šaj te ova uverime kaj o Jehova ka postapinel ko ispravno način hem ka kerel sa te šaj te anel i pravedno odluka. Keda prostinaja sikavaja kaj isi amen doverba ki e Jehovaskiri pravda. Ako mukhaja o bukja e Jehovaske ko vasta, sikavaja doverba ko Jehova kaj ka cidel sekoja šteta so kergja o grevo. Ko nevo sveto, nikogaš više nane te setina amen ko bukja so dukhavena amen a ni nane te pojavinen pe amenge ko vilo (Isa. 65:17; w22.06 10-11, pas. 11-12).

Adava so doživinaja asavko progonstvo tano dokaz kaj džaja palo e Isuseskoro primer hem kaj o Jehova prifatinela amen (Mat. 5:11, 12). O progonstvo avela taro Satana, ama o Isus tano but pomokjno lestar. Adaleske so poddržinela amen o Isus, o šukar haberi propovedinela pe sa e narodonge. Jekh javer predizvik so isi amen sar propovednikija tano adava so o manuša kerena ko različna čhibja lafi. Ko otkrovenie kova so sine dendo e apostol Jovaneske, o Isus prorokujngja kaj o šukar haberi ka propovedinel pe ko celo sveto, iako ka oven različna čhibja (Otk. 14:6, 7). Sar ispolninela pe akava? E propovedibaja avdive daja prilika so poviše manušenge te šunen o haberi bašo e Devleskoro Carstvo. Manuša taro celo sveto šaj te čitinen biblisko literatura ki amari internet strana jw.org adaleske so ki late isi informacie ko poviše taro 1.000 čhibja. O Vodečko telo odobringja te prevedinel pe o lil Ov bahtalo zasekogaš, amari glavno publikacija kolaja so keraja učenikija, ko poviše taro 700 čhibja (w22.07 9, pas. 6-7).

O Isus sikavgja sočuvstvo e manušenge. O apostol Matej vakergja: „Keda dikhlja bute manušen, žalingja len soske sine mučime hem otfrlime sar bakhre bizo pastiri“ (Mat. 9:36). A savo tano o Jehova? O Isus vakergja: „Mo Dad da, kova soj ko nebo, na mangela te merel nijekh taro akala tikne“ (Mat. 18:14). Kobor samo utešna tane akala lafija! Džikote zapoznajnaja pošukar e Isuse, amaro mangipe sprema o Jehova bajrola. Tu da šaj te sikljove te sikave pobaro mangipe e Jehovaske hem te napredujne sar hristijani ako družinea tut zrela phralencar hem phenjencar taro tlo sobranie. Primetin kobor tane radosna. Ola na pele pišmani so odlučingje te služinen e Jehovaske. Puč len save iskustvija sine len dži akana ki služba. Keda valjani te ane nesavi važno odluka, rode lendar sovet soske „o uspeh avela preku but sovetnikija“ (w22.08 3, pas. 6-7).

Sarine amen ka doživina nesavo pharipa. Ama na siem korkori. Isto sar jekh dad pherdo mangipaja o Jehova sekogaš grižinela pe amenge. Ov tano amencar, spremno tano te šunel amen keda rodaja lestar pomoš hem poddržinela amen (Isa. 43:2). Uverime siem kaj šaj te ikljova ko krajo bilo save pharipaja soske ov dela amen sa so valjani te šaj te istrajna. Ov dengja amen i molitva, i Biblija, i duhovno hrana hem phralja hem phenja kola so pomožinena ko phare vremija. But siem radosna so amaro nebesno Dad grižinela pe amenge! „Baši leste amaro vilo tano radosno“ (Ps. 33:21). Šaj te sikava kaj ceninaja e Jehovaskiri griža, agjaar so ka koristina sa adava so dela amenge te šaj te pomožinel amen. Ama amen da valjani te da amaro delo te šaj o Devel ponadari da te grižinel pe amenge. Javere lafencar, ako ponadari da daja amaro najšukar te šaj te ova poslušna e Jehovaske hem ako keraja adava soj ispravno tegani ov ka arakhel amen zasekogaš! (w22.08 13, pas. 15-16).

But manuša avdive na džanena ki kaste šaj te ovel len doverba. Ola nane sigurna dali o manuša kaste so poštujnena, sar na primer o političarija, o naučnikija hem o biznismenija mislinena bašo lengoro šukaripe. Isto agjaar ola na poštujnena e hristijanska verska vodačen. Hem adaleske so akala verska vodačija vakerena kaj sledinena i Biblija, na iznenadinela amen adava so but manuša nane len doverba ki late. Sar sluge e Jehovaskere siem uverime kaj ov tano o Devel e čačipaskoro hem kaj ov sekogaš mangela te ovel amenge šukar (Ps. 31:5; Isa. 48:17). Amen džanaja kaj šaj te ovel amen doverba ko adava so čitinaja ki Biblija. Soglasinaja amen adalea so pišingja jekh biblisko izučuvači: „Ništo taro adava so vakergja o Devel nane hovavno ili našti te čhinavel le te ispolninel adava so vakergja. Adaleske so e Devleskoro narodo isi le doverba ki leste ola verujnena ko adava so ov vakerela“ (w23.01 2, pas. 1-2).

Amen izgradinaja amare phralen keda pomožinaja lenge te bajraren pumari vera ko Jehova. But puti o manuša asana amare phralenge. A javera isi len pharo nasvalipa ili borinena pe povredime čuvstvoncar. A javera adžikerena više but vreme te avel o krajo akale svetoskoro. Akala situacie šaj te čhiven ko ispit amari vera avdive. O hristijanja taro prvo veko soočingje pe slična problemencar. O apostol Pavle koristingja o spisija te šaj te izgradinel i vera e phralengiri hem e phenjengiri. Na primer, o evrejska hristijanja šaj na džanena sine so te odgovorinen pumare familienge kola so vakerena sine kaj o judaizam tano but pošukar taro hristijanstvo. Sigurno e Pavleskoro pismo dži ko Evreija but ohrabringja adale hristijanen (Evr. 1:5, 6; 2:2, 3; 9:24, 25). Leskoro šukar objasnuvanje šaj sine te pomožinel lenge te džanen so te vakeren pumare familienge (w22.08 23-24, pas. 12-14).

O manuša taro e Satanaskoro sveto na džanena više kaske šaj te verujnen. Ola tane but puti razočarime taro trgovsko sistem, taro političarija hem taro religiozna vodačija. But džene, isto agjaar, našti te verujnen pumare amalenge, komšienge pa čak ni pumare familijake. Akava na valjani te iznenadinel amen. Ki Biblija pišinela: „Ko posledna dive... o manuša nane te oven verna... ka oven klevetnikija... predavnikija“. Javere lafencar, o manuša ka oven sar o devel akale svetoskoro kaske so ni hari našti te verujnel pe (2. Tim. 3:1-4; 2. Kor. 4:4). Ama sar hristijanja džanaja kaj šaj te ovel amen celosno doverba upro Jehova (Erem. 17:7, 8). Siem uverime kaj ov mangela amen hem kaj „nikogaš nane te mukhel“ ple amalen (Ps. 9:10). Šaj isto agjaar te ovel amen doverba ko Isus soske ov dengja plo životo amenge (1. Pet. 3:18). Hem taro lično iskustvo džanaja kaj i Biblija dela amen vodstvo koleste so šaj te potprina amen (2. Tim. 3:16, 17; w22.09 2, pas. 1-2).

I čačutni radost nane samo šukar čuvstvo kova so sigate nakhela, nego šaj te trajnel celo životo. Soske vakeraja agjaar? O Isus objasningja akava ki pli Propoved ki gora. Ov vakergja: „Srekjna tane okola soj svesna kaj valjani lenge o Devel“ (Mat. 5:3). O Isus džanlja kaj o manuša tane agjaar stvorime te ovel len bari želba te pendžaren hem te obožavinen ple Stvoritele, e Jehova. Hem adaleske so o Jehova tano „radosno Devel“, okola so obožavinena le isto agjaar šaj te oven radosna (1. Tim. 1:11). Dali valjani te ovel amenge sa šukar ko životo te šaj te ova radosna? Na. Ki Propoved ki gora o Isus vakergja kaj čak „okola so tugujnena“ šaj te oven radosna. O Isus isto agjaar phengja okola da soj progonime šaj isto agjaar te oven radosna (Mat. 5:4, 10, 11). O Isus manglja te vakerel kaj i radost na zavisinela taro adava dali isi amen idealna uslovija ko životo, nego kaj ka ova čače radosna ako zadovolinaja amare duhovna potrebe hem ako ovaja paše e Devlea (Jak. 4:8; w22.10 6, pas. 1-3).

I razboritost ka pomožinel jekhe hristijaneske te džanel keda tano vreme „te čutinel pe hem vreme te kerel pe lafi“ (Prop. 3:7). Jekh izreka vakerela „te kerel pe lafi tano srebro, a te čutinel pe tano zlato“. Javere lafencar, ponekogaš tano pošukar te čutinel pe nego te kerel pe lafi. Te dikha jekh primer. Nesave starešine taro jekh sobranie zamolinena jekhe iskusno starešina taro javer sobranie te pomožinel len nesave problemencar taro sobranie. Jekh starešina baši leske vakerela: „Ov sekogaš pazinela te na vakerel nesave važna informacie taro javera sobranija“. O javera starešine taro leskoro sobranie poštujnena le soske ov tano razborito. Ola tane uverime kaj ov nikogaš nane te vakerel doverliva bukja e javerenge. I iskrenost isto agjaar šaj te pomožinel amenge te ova doverliva. Amen isi amen doverba ko jekh iskreno manuš soske džanaja kaj ov sekogaš ka vakerel o čačipe (Ef. 4:25; Evr. 13:18; w22.09 12, pas. 14-15).

But džene na šunena keda i čačutni mudrost „glasno vikinela ki ulica“ (Izr. 1:20). Sprema i Biblija isi trin grupe manuša so na šunena i mudrost: „O neiskusna“, „okola so asana e javerenge“ hem „o glupava“ (Izr. 1:22-25). „O neiskusna“ tane okola so verujnena ko sa ili lokhe šaj te hovave len (Izr. 14:15). Na primer, razmislin bašo milionja manuša soj tane hovavde taro religiozna ili politička vodačija. Nesavenge tano but pharo keda doznajnena kaj lengere vodačija hovavgje len. Ama okola soj spomnime ko Izreki 1:22, birinena te ačhoven neiskusna adaleske so agjaar mangena (Erem. 5:31). Ola na mangena te džanen so vakerela i Biblija ili te ikeren pe ko lakere merilija. Amen na mangaja te ova sar okola so namerno mangena te ačhoven neiskusna (Izr. 1:32; 27:12; w22.10 19, pas. 5-7).

E Devleskiri organizacija dela amen upatstvija te šaj te ova bezbedna. Redovno siem potsetime te da e starešinenge amare kontakt informacie te šaj lokheste te arakhen amen ako slučinela pe nešto itno. Šaj isto agjaar te dobina upatstvija bašo adava dali te ačhova khere ili te ikljova taro amare khera, sar te dobina pomoš ili sar hem keda te pomožina e javerenge. Ako na šunaja asavke upatstvija, šaj te čhiva amaro hem e starešinengoro životo ki opasnost kola so grižinena pe amenge (Evr. 13:17). But phralja hem phenja kola so mora sine te mukhen pumare khera baši nesavi prirodno katastrofa, baši vojna ili bašo gragjanska nemirija, kergje sa so šaj te prilagodinen pe ko ple neve okolnostija hem te keren poviše ki služba bašo Jehova. Slično sar o hristijanja taro prvo veko kola so sine progonime, o phralja da avdive ponadari vakerena „o haberi taro e Devleskoro lafi“ (Apo. 8:4). O propovedibe pomožinela lenge te koncentririnen pe ko Carstvo namesto ko pumare phare okolnostija. Adaleske šaj sine te ačhoven radosna hem te ovel len mir (w22.12 19, pas. 12-13).

Sekova jekh amendar vredinela anglo e Jehovaskere jakhja. Angleder o Isus te bičhalel ple apostolen te propovedinen, ov pomožingja lenge te na daran taro protivibe (Mat. 10:29-31). Ov kergja adava agjaar so spomningja e najobična čiriklen ko Izrael. Ko e Isuseskoro vreme ola na vredinena sine but, ama ov vakergja ple učenikonge: „Nijekh lendar na perela ki phuv bizo te džanel tumaro Dad“. Palo adava vakergja: „Tumen vredinena poviše taro but čiriklja“. Akale lafencar o Isus uveringja ple učenikon kaj sekova jekh lendar vredinela anglo e Jehovaskere jakhja hem adaleske na sine soske te daran taro progonstvo. Keda o učenikija sine ki služba ki diz ili ko gav hem dikhena sine čiriklja sigurno setinena pe sine ko e Isuseskere lafija. Sekogaš keda ka dikhe jekh tikni čirikli, setin tut kaj o Jehova ceninela tut lično, soske tu da vredinea poviše taro but čiriklja. Adaleske so o Jehova tano amencar nane soske te dara keda o javera protivinena pe amenge (w23.03 18, pas. 12).

Ponekogaš isi amen problemija soske protivinela pe amenge i familija ili ačhovaja bizi buti. Keda nesavo problemi trajnela poviše vreme, šaj te našava amari nadež hem te ova razočarime. O Satana iskoristinela asavke prilike te šaj te čhivel amen te sumnina amen ko e Jehovaskoro mangipe. Ov mangela te mislina kaj o Jehova ili leskiri organizacija tane kriva bašo amare muke. Nešto slično slučingja pe nesave Izraelconge ko Egipet. Ko početok ola verujngje kaj o Jehova bičhalgja e Mojsee hem e Arone te oslobodinel len taro ropstvo (2. Moj. 4:29-31). Ama pokasno keda o faraoni dengja len pophari buti, ola krivingje e Mojsee hem e Arone bašo pumare problemija (2. Moj. 5:19, 20). Ola krivingje e Devleskere verna slugen. Kobor žalno! Ako tute da poviše vreme isi tut problemija phrav tlo vilo e Jehovaske ki molitva hem rode lestar pomoš (w22.11 15, pas. 5-6).

Taro Jehova avela o životo hem le isi le i mokj te iranel e manušen ko životo. Ov dengja e prorokoske e Ilijaske mokj te voskresninel e udovicakere čhave tari Sarepta (1. Car. 17:21-23). Pokasno o Devel pomožingja e prorokoske e Eliseeske te voskresninel jekhe Sunamkakere čhave (2. Car. 4:18-20, 34-37). Akala hem javera voskresenija dokažinena kaj e Jehova isi le mokj te iranel e manušen ko životo. Džikote sine o Isus ki phuv ov sikavgja kaj leskoro Dad dengja le adaja mokj (Jovan 11:23-25, 43, 44). Akana tano ko nebo hem dendi leske „celi vlast... hem ko nebo hem ki phuv“. Adaleske šaj te ispolninel o vetuvanje kaj „sarine okola soj tane ko grobo“ ka ušten hem ka ovel len prilika te živinen večno (Mat. 28:18; Jovan 5:26-29; w22.12 5, pas. 10).

Adalea so odbingje e Ezekiele, ustvari o manuša odbingje e Jehova. O lafija taro avdisutno stiho uveringje e Ezekiele kaj adava so o manuša nane te mangen te šunen le, na značinela kaj nane uspešno ki pli zadača sar proroko. O Jehova isto agjaar uveringja le kaj keda ka ispolninel pe i osuda so objavingja la, o manuša „ka džanen kaj maškar lende sine proroko“ (Ezek. 2:5; 33:33). Sigurno akala utešna lafija dengje le i sila so valjani leske te kerel pli služba. Amen da dobinaja sila soske džanaja kaj o Jehova bičhalgja amen. Ov sikavela amenge čest adalea so vikinela amen ple „svedokija“ (Isa. 43:10). Adaja tani bari prednost! O Jehova amenge da phenela „ma daran“ isto sar so vakergja adava e Ezekieleske (Ezek. 2:6). Soske na valjani te dara taro amare protivnikija? Isto sar o Ezekiel, amen da siem bičhalde taro Jehova hem isi amen leskiri poddrška (Isa. 44:8; w22.11 3-4, pas. 4-5).

Amen but ceninaja amare starešinen hem e sluga-pomošnikon. Akala verna phralja grižinena pe amenge but šukar hem siem blagodarna e Jehovaske so dengja amen asavke phralja. A sar šaj amen te sikava kaj siem doverliva? Amen mangaja amare phralen hem phenjen hem adaleske mangaja te džana sar tane. Ama mora te poštujna lengiri privatnost. Nesave hristijanja taro prvo veko kerena sine e javerengoro lafi, mešinena pe sine ko e javerengere bukja hem vakerena sine bukja so na valjangje te vakeren (1. Tim. 5:13). Sigurno na mangaja te ova sar lende. Ama so ako nekoj vakerela tuke nešto lično pestar hem zamolinela tut te na vakere adava e javerenge. Na primer, jekh phen vakerela tuke kaj tani nasvali taro nešto ili kaj isi la nesavo problemi hem zamolinela tut te na vakere adava e javerenge. Tegani valjani te ikera amen ko adava (w22.09 10, pas. 7-8).

Valjani te kera nešto poviše nego samo nekobor šukar bukja. Mora te ispitina save manuša siem čače hem te kera o potrebna promene te šaj panda poviše te živina sprema e Jehovaskere merilija. A akava mora te kera le postojano. Keda ka ova sovršena ka šaj celosno te kera adava so mangela o Jehova. Ama dži tegani valjani postojano te trudina amen te kera adava. Primetin kaj ko Rimjanja 12:2 o Pavle vakerela kaj valjani te menina amaro način sar razmislinaja te šaj te džana koja tani e Devleskiri volja. Namesto te dozvolina o lošno sveto te vlijajnel upri amende, mora te ispitina amen te šaj te otkrina kobor dozvolinaja e Devleskoro razmisluvanje, a na e svetoskoro, te vlijajnel upro amare celija hem odluke (w23.01 8-9, pas. 3-4).

Dali o Jehova reagirinela ki sekoja lošno situacija so doživinaja la? Dali ov namerno mukhela te doživina nešto lošno te šaj te slučinel pe nešto šukar? Na, i Biblija na sikavela asavko nešto (Prop. 8:9; 9:11). Ama jekh buti džanaja: Keda nakhaja taro nesavo pharipa, o Jehova dikhela adava hem šunela keda molinaja le baši pomoš (Ps. 34:15; Isa. 59:1). Ov kerela panda nešto, pomožinela amen uspešno te istrajna ko phare situacie. Sar? Jekh način sar o Jehova pomožinela amen tano agjaar so but puti ko pravo vreme dela amen uteha hem ohrabruvanje (2. Kor. 1:3, 4). Šaj li te setine tut ki jekh situacija taro tlo životo keda o Jehova pomožingja tuke agjaar so utešingja tut hem ohrabringja tut baš keda najviše valjangja tuke? But puti haljovaja sar o Jehova pomožingja amenge otkeda nakhela i nevolja (w23.01 17-18, pas. 13-15).

Akava zvero ličinela skoro slično sar o zvero e efta šerencar, samo so akava tano lolo. Ov tano vikimo „o kipi e zveroskoro“ hem tano opišimo sar „o oftoto cari“ (Otk. 13:14, 15; 17:3, 8). Bašo akava cari vakerela pe kaj pojavingja pe, palo adava našavdilo hem pokasno palem pojavingja pe. Akava but šukar opišinela e organizacija taro Obedineta nacie kola so poddržinena e svetsko političko sisteme. Ko početok akaja organizacija vikinela pe sine Liga e narodongiri. Palo adava džikote trajnela sine i dujto svetsko vojna oj našavdili. Pokasno oj palem pojavingja pe ama akava puti sar Obedineta nacie. Preku pli propaganda, o zverija ili o vlade, pottikninena e manušen te protivinen pe e Jehovaske hem leskere narodoske. Ko simbolično način, ola khedena e caren taro celo sveto ki vojna Armagedon, javere lafencar bašo „baro dive e Semokjno Devleskoro“ (Otk. 16:13, 14, 16; w22.05 10, pas. 10-11).

Keda o Isus siklilo korkori te čitinel o sveta spisija ov na samo so šukar džanela sine o spisija, nego isto agjaar manglja adava so pišinela sine ki lende hem dozvolingja ola te vlijajnen upro leskere postapke. Na primer, razmislin bašo adava so slučingja pe ko hrami keda e Isuse sine le 12 berš. O učitelija kola so but šukar džanena sine e Mojseeskoro zakoni sine „vooduševime taro [e Isuseskoro] haljojbe hem odgovorija“ (Luka 2:46, 47, 52). Amen da šaj pošukar te zapoznajna hem te zamanga e Devleskoro Lafi keda redovno čitinaja i Biblija. Šaj te sikljova taro adava so vakergja o Isus okolenge so džanena o Zakoni, maškar kolende so sine o knižnikija, o fariseija hem o sadukeija. Akala religiozna vodačija čitinena sine but puti o spisija ama na sine len korist taro adava so čitingje. O Isus istakningja trin bukja kola so akala manuša valjani sine te keren te šaj te ovel len pobari korist taro spisija. Ki akaja statija ka dikha sar adava so vakergja lenge šaj te pomožinel amenge 1) te haljova adava so čitinaja, 2) te arakha skapocena pouke hem 3) te dozvolina e Devleskoro Lafi te oblikujnel amen (w23.02 8-9, pas. 2-3).

Nesave opasnostija so mora te izbegina len tane o flertujbe, o preterano pijbe, o preterano hajbe, te koristina lafija so povredinena, isto agjaar te dikha bukja kote so isi nasilstvo, pornografija hem slično (Ps. 101:3). O Beng rodela sekogaš prilike te ruminel amaro amalipe e Jehovaja (1. Pet. 5:8). Ako na pazinaja, ov šaj te „sadinel“ ki amari godi hem ko amaro vilo ljubomora, nečesnost, alčnost, omraza, gordost hem holi (Gal. 5:19-21). Ako odma na keraja nešto te šaj te ikala len korendan, ola ka prodolžinen te bajron sar jekh otrovno rastenie hem te keren amenge šteta (Jak. 1:14, 15). Jekh garavdi opasnost tani o lošno društvo. Na smejnaja te bistra kaj amaro društvo šaj but te vlijajnel upri amende (1. Kor. 15:33). Sar so pottikningja amen o Isus, ako pazinaja so keraja nane te družina amen okolencar so na živinena sprema e Jehovaskere merilija (Luka 21:34; 2. Kor. 6:15). Ka dikha i opasnost hem ka izbegina la (w23.02 16, pas. 7; 17, pas. 10-11).

Tlo mangipe sprema o Jehova barilo džikote sikljovea sine sa poviše baši leste. Sigurno mangea te ove lea sa popaše akana hem zasekogaš, hem tu šaj te kere adava. Ov ljubezno pottikninela tut te radujnkere leskoro vilo (Izr. 23:15, 16). Adava šaj te kere le na samo lafencar, nego hem postapkencar. O način sar živinea ka sikavel kaj čače mangea e Jehova. Akaja tani i najšukar cel so šaj te čhive tuke ko životo. Sar šaj te sikave tlo mangipe sprema o Jehova? Prvo, agjaar so ki jekh posebno molitva ka de lafi e Jehovaske kaj ka služine samo leske (Ps. 40:8). Tegani adava so vakergjan ki molitva ka sikave le javno agjaar so ka krstine tut. O krstibe tano jekh radosno hem but važno momenti ko tlo životo. Počminea jekh nevo životo, na živinea više tuke nego e Jehovaske (Rim. 14:8; 1. Pet. 4:1, 2). Akava šaj te izgledinel sar jekh bari odluka hem čače tano agjaar. Ama akaja odluka ka phravel tuke o udar bašo najšukar životo (w23.03 5-6, pas. 14-15).