Septemvri

Keda keraja lafi ko ispravno način, amen sikavaja e javerenge kaj služinaja e Jehovaske. Agjaar, ola šaj jasno te dikhen i razlika maškar okova so služinela e Devleske hem okova so na služinela leske (Mal. 3:18). Ko akava uveringja pe jekh phen koja so vikinela pe Kimberli. La sine la i zadača te kerel buti ko jekh proekti jekhe součeničkaja. Džikote kerena sine zaedno buti, oj primetingja kaj i Kimberli razlikujnela pe sine taro javera učenikija. Na ogovorinela sine e javeren, kerela sine ljubezno lafi hem na koristinela sine gruba lafija. Adava but pozitivno vlijajngja upri late hem adaleske palo nesavo vreme počmingja te proučinel i Biblija. O Jehova tano sigurno but bahtalo keda amaro način sar keraja lafi privlekujnela e manušen ko čačipe. Sarine amen mangaja te kera lafi ko jekh način kolea so ka ana slava e Jehovaske (w22.04 5-6, pas. 5-7).

O Isus oslobodingja e Marija Magdalena taro efta demonija. Lakiri blagodarnost pottikningja la te ovel leskoro sledbeniko hem te poddržinel le ki služba (Luka 8:1-3). Iako i Marija but ceninela sine o šukaripe so kergja lake o Isus, oj šaj na sine svesno kaj ki idnina ka kerel lake pobaro šukaripe. A adava tano kaj ka del plo životo „te šaj sekoj so verujnela ki leste“ večno te živinel (Jovan 3:16). Sepak i Marija sikavgja kaj tani blagodarno e Isuseske agjaar so sine verno. Džikote o Isus sine ko stubo mučibaske, i Marija sine adathe soske na manglja te mukhel le korkori hem manglja te utešinel e javeren so sine isto agjaar adathe (Jovan 19:25). Otkeda mulo o Isus, i Marija hem duj javera džuvlja angje mirislivo maslo bašo leskoro pogreb (Mar. 16:1, 2). E Marija sine la i prednost te dikhel e Isuse otkeda voskresningja hem te kerel lea lafi. Samo hari dženen sine len akaja prednost (Jovan 20:11-18; w23.01 27, pas. 4).

Amen na valjani te mislina kaj adaleske so angleder kergjem dovolno ki služba e Jehovaske akana na valjani više te trudina amen but ki služba. Iako šaj amare okolnostija meningje pe, valjani ponadari da te ačhova zafatime ki „buti e Gospodareske“, hem te ačhova džangavde dži ko krajo (1. Kor. 15:58; Mat. 24:13; Marko 13:33). Mora te ova revna hem te služina e Jehovaske celo vilea. E Isuseskiri poraka dži ko phralja tari Laodikija istakninela jekh javer problemi. Ola sine „mlaka“ ko lengoro obožavibe. Adaleske so sine ramnodušna, o Isus vakergja lenge kaj tane „žalibaske“. Valjani sine revno te služinen e Jehovaske (Otk. 3:16, 17, 19). Koja tani i pouka amenge? Ako našavgjem amari revnost, valjani te bajrara amaro cenenje bašo sa o šukar bukja so kerela len o Jehova hem leskiri organizacija (Otk. 3:18). Nikogaš na valjani te dozvolina i želba bašo udobno životo te čhinavel amen te čhiva o duhovna aktivnostija ko prvo than (w22.05 3-4, pas. 7-8).

Angleder nekobor milja berša, o Jehova počmingja te pišinel jekh posebno lil. Ko akava lil o Jehova pišinela anava hem o prvo anav soj tano pišimo ki leste tano e prvo verno svedokoskoro, e Aveleskoro (Luka 11:50, 51). Taro adava vreme, o Jehova čhivela javera da anava ko adava lil hem avdive isi milionja anava ki leste. Ki Biblija akava lil tano vikimo „lil e setibaskoro“, „lil e životoskoro“ hem „svitok e životoskoro“ (Mal. 3:16; Otk. 3:5; 17:8). Ko akava posebno lil tane pišime sa o anava okolengere so obožavinena e Jehova tari ispravno dar hem so ceninena leskoro anav. Len ka ovel len prilika te dobinen večno životo. Amare da anava šaj te oven pišime ko adava lil samo ako razvinaja paše amalipe e Jehovaja — amalipe kova so temelinela pe ki otkupno žrtva e Isuseskiri (Jovan 3:16, 36). Sarine amen mangaja amaro anav te ovel pišimo ko adava lil bizi razlika dali isi amen nadež te živina ko nebo ili ki phuv (w22.09 14, pas.1-2).

O lil Otkrovenie kerela lafi bašo jekh „baro zmej jagale bojakoro“ (Otk. 12:3). Akava zmej borinela pe protiv o Isus hem leskere angelija (Otk. 12:7-9). Ov napadinela e Devleskere narodo hem dela mokj e zveronge, javere lafencar e manušikane vladenge (Otk. 12:17; 13:4). Koj tano akava zmej? Adava tano o „najpurano sap, kova so vikinela pe Beng hem Satana“ (Otk. 12:9; 20:2). Ov kontrolirinela sa e Jehovaskere dušmanen. So ka slučinel pe e zmeeja? Ko Otkrovenie 20:1-3 pišinela kaj jekh angeli ka frdel e Satana ki bezdna, adava ka ovel leske sar zatvor. Keda ka ovel ki adaja bezdna, o Satana nane „te hovavel više e narodo džikote na nakhena 1.000 berša“. Ko krajo, o Satana hem leskere demonija ka oven frdime ko ezero „kote so isi jag hem sulfur“. Adava značinela kaj ola ka oven uništime zasekogaš! Šaj li te zamisline tuke jekh sveto bizo Satana hem leskere demonija? Kobor šukar vreme samo ka ovel adava! (w22.05 14, pas. 19-20).

O Isus sine but bukjarno. Angleder te počminel ple službaja, kerela sine buti sar stolari (Mar. 6:3). Sigurno leskere roditelija but ceninena sine so pomožinela len sine te grižinen pe pumare bare familijake. But džene mangena sine te kinen o bukja so kerela len sine o Isus soske ov kerela len sine sovršeno. O Isus sigurno uživinela sine ki pli buti. Iako kerela sine pli buti but šukar, ov odvojnela sine peske vreme bašo duhovna aktivnostija (Jovan 7:15). Pokasno sar polnovremeno propovedniko, ov sovetingja okolen so šunena le sine: „Ma keren buti bašo hajbe kova so rumingjovela, nego bašo hajbe so na rumingjovela hem anela večno životo“ (Jovan 6:27). Hem ki Propoved ki gora o Isus vakergja: „Kheden tumenge barvalipe ko nebo“ (Mat. 6:20). I mudrost so avela taro Devel pomožinela amenge te ovel amen uramnoteženo stavi baši amari buti. Sar hristijanja, pottiknime siem te kera vredno buti hem te kera „šukaripe amare vastencar“ (w22.05 22, pas. 9-10).

I Evnika sine šukar primer e Timoteeske. Ov šaj sine te dikhel kaj leskere dajakere postapke sine pottiknime taro lakoro baro mangipe sprema o Jehova hem kaj oj tani but radosno adaleske so služinela e Jehovaske. Slično sar late, but daja avdive uspejngje „bizo lafi“ te pomožinen pumare familienge te služinen e Jehovaske (1. Pet. 3:1, 2). Tu da šaj te kere o isto. Trudin tut o amalipe e Jehovaja te ovel tuke ko prvo than (5. Moj. 6:5, 6). Tu da isto sar o javera daja kerea but žrtve. Žrtvujnea tlo vreme, tle pare, tlo sojbe hem javera bukja te šaj te grižine tut bašo tle čhavengere fizička potrebe. Ama nikogaš na valjani te ove doborom zafatimi akale bukjencar, so nane te ovel tut vreme te kere pozoralo tlo amalipe e Jehovaja. Redovno odvojn tuke vreme te moline tut, te proučine i Biblija hem te ove prisutno ko sostanokija. Agjaar ka ove duhovno pozorali hem ka ove šukar primer na samo tle familijake, nego hem e javerenge (w22.04 16, pas. 1; 19, pas. 12-13).

Kobor siem radosna adaleske so džanaja kaj na valjani amen te odlučina sar valjani te sudinel pe e javeren. Sar Najbaro Sudija, o Jehova ka grižinel pe baši akaja but važno buti (Rim. 14:10-12). Šaj te ovel amen celosno doverba kaj ov sekogaš sudinela sprema ple sovršena merilija (1. Moj. 18:25). Adaleske, nikogaš nane te postapinel nepravedno! Edvaj adžikeraja o vreme keda o Jehova celosno ka cidel sa o lošna posledice tari manušikani nesovršenost hem grevo. Ko adava vreme ka sasljon sa amare fizička hem emocionalna rane (Ps. 72:12-14; Otk. 21:3, 4). Nikogaš nane više te setina amen ki lende. Džikote adžikeraja te avel adava vreme, but siem blagodarna e Jehovaske so dengja amen i sposobnost te prostina sar leste (w22.06 13, pas. 18-19).

Jekh šukar sudija valjani šukar te pendžarel o zakoni. Ov valjani te džanel soj tano ispravno a soj pogrešno. So javer valjani te šaj nekoj te ovel šukar sudija? Ov valjani te džanel sa o informacie bašo nesavo slučaj angleder te anel odluka. Sprema akava, o Jehova tano najšukar Sudija soske ov sekogaš džanela sa o informacie. Različno taro o manušikane sudie, o Jehova džanela sekogaš sa o informacie bašo sekova slučaj (1. Moj. 18:20, 21; Ps. 90:8). Ov na zavisinela taro adava so dikhena ili so šunena o manuša. O Jehova but šukar haljola kaj o osobine so nasledinaja len taro amare roditelija, o obrazovanie so isi amen, kotar avaja hem amari emocionalno hem psihičko sostojba vlijajnena upro amare postapke. O Jehova isto agjaar džanela so isi amen ko vilo. Ov dikhela save motivija, namere hem želbe isi sekole jekhe. Ništo našti te garava taro Jehova (Evr. 4:13). Znači, keda o Jehova prostinela nekaske ov kerela adava soske džanela sa o informacie baši adaja situacija (w22.06 4, pas. 8-9).

Valjani šukar te džana kola taktike koristingja o Satana bašo Jov soske ov koristinela slična taktike amenge da avdive. Ov manglja te vakerel kaj na mangaja čače e Jehova hem kaj ka cida amen lestar ako amaro životo tano ki opasnost. O Satana isto agjaar vakerela kaj o Devel na mangela amen hem kaj na primetinela adava so keraja baši leste. Adaleske so džanaja leskere taktike amen nane te verujna ko akala hovajba. Ko nevolje valjani te dikha sar prilika te sikljova nešto baši amende. O nevolje so doživingja o Jov pomožingje leske te otkrinel nesave slabostija ki peste hem te kerel buti ki lende. Na primer, ov halilo kaj valjani te ovel poponizno (Jov 42:3). Amen da šaj te sikljova but baši amende keda nakhaja tari nesavi nevolja. Keda ka otkrina nesave slabostija ki amende, valjani te kera buti ki lende (w22.06 23, pas. 13-14).

O Jehova uverinela amen kaj ka poddržinel amen. Na primer, angleder te vakerel: „Tumen sien mle Svedokija“, o Jehova vakergja: „Keda ka nakhe taro panja, me ka ovav tuja. Keda ka nakhe taro reke, nane te poplavinen tut. Keda ka phire preku i jag, nane te thabljove ni o plameno nane te tharel tut“ (Isa. 43:2). Džikote keraja amari služba ponekogaš ka oven amen predizvikija kola soj sar poplave hem ka soočina amen nevoljencar kola soj sar jag. Ama čak ko asavke situacie amen ponadari da propovedinaja soske o Jehova pomožinela amenge (Isa. 41:13). But džene odbinena ama adava na značinela kaj na propovedinaja šukar. Siem utešime hem ohrabrime adaleske so džanaja kaj o Jehova tano zadovolno keda ponadari da verno vakeraja o haberi. O Pavle vakergja: „Sekoj ka dobinel nagrada sprema plo trudo“ (1. Kor. 3:8; 4:1, 2; w22.11 4, pas. 5-6).

Avdive, dikhaja sar ispolninena pe o bibliska proroštvija! Manuša taro celo sveto sikljovena te keren lafi ki „čisto čhib“ e čačipaskiri (Zah. 8:23; Sof. 3:9). Poviše taro ofto milionja manuša ko 240 phuvja tane delo tari e Jehovaskiri organizacija, hem sekova berš poviše taro 100 milja krstinena pe! Ama soj panda považno taro brojke tane o duhovna osobine, „i nevi ličnost“, kola so razvinena akala neve učenikija (Kol. 3:8-10). But džene čhinavgje te živinen nemoralno, te oven nasilna, nane len više predrasude hem nane nacionalistija. O lafija taro Isaija 2:4, kote so pišinela kaj nane poviše te sikljoven te maren pe avdive ispolninena pe. Adalea so daja amendar sa te urava i nevi ličnost privlečinaja e javere manušen te aven ki e Devleskiri organizacija hem isto agjaar sikavaja kaj džaja palo amaro Nadgledniko, o Hristos Isus (Jovan 13:35). Ništo taro akava nane slučajno! O Isus pomožinela amen ko sa akava (w22.07 9, pas. 7-8).

Keda molinaja amen e Jehovaske valjani te pazina sar keraja lafi hem te sikava hor poštovanje. Razmislin bašo vizie so dikhle len o Isaija, o Ezekiel, o Daniel hem o Jovan. Sa ola opišingje e Jehova sar veličestveno Cari. O Isaija dikhlja „sar o Jehova bešela ko jekh učo hem vozvišeno prestol“ (Isa. 6:1-3). O Ezekiel dikhlja sar o Jehova bešela ki pli nebesno kočija hem okolu leste sine „bari svetlina... slično sar vinožito“ (Ezek. 1:26-28). O Daniel dikhlja „Okole so postojnela taro purane dive“, uravdo ko parne šeja hem taro leskoro prestol ikljola sine jag (Dan. 7:9, 10). Hem o Jovan dikhlja sar o Jehova bešela ko plo prestol hem okolu leste sine vinožito slično sar smaragd (Otk. 4:2-4). Džikote razmislinaja baši e Jehovaskiri bari slava, dikhaja koja bari prednost isi amen te molina amen leske hem kobor tano važno te sikava poštovanje džikote keraja adava (w22.07 20, pas. 3).

Ternalen, o Satana ka probinel te čhinavel tumen duhovno te napredujnen. Jekh način sar šaj te kerel adava tano agjaar so ka čhivel tut te sumnine tut ko nesave bukja so vakerela len i Biblija. Na primer, nesave šaj ka mangen te ubedinen tut te verujne ki evolucija. Keda sian sine poterno šaj na razmislingjan but baši akaja tema, ama akana keda bariljan šaj sikljovea baši akaja tema ki škola. Šaj izgledinela tuke logično adava so vakerena te nastavnikija baši evolucija. Ama ola šaj nikogaš na rodingje dokazija bašo adava dali isi Stvoriteli. Setin tut ko načelo so arakhljola ko Izreki 18:17: „Okova so prvo kerela lafi izgledinela kaj tano ko pravo, sa džikote na avela javer te rodel lestar te dokažinel adava so vakerela“. Namesto te verujne ko sa so šunea ki škola, valjani šukar te proučine adava so pišinela ko e Devleskoro Lafi hem ko amare publikacie (w22.08 2, pas. 2; 4, pas. 8).

Amen mangaja te haljova adava so čitinaja ko e Devleskoro Lafi, inače nane te ovel amen celosno korist taro čitibe. Na primer, te dikha e Isuseskoro razgovor so sine le jekhe manušea so džanela sine šukar o Zakoni (Luka 10:25-29). Keda adava manuš pučlja le so valjani te kerel te šaj te dobinel večno životo, o Isus pomožingja leske te arakhel o odgovor ko e Devleskoro Lafi agjaar so pučlja le: „Soj tano pišimo ko Zakoni? So čitinea athe?“ O manuš šaj sine točno te odgovorinel agjaar so citiringja o spisija bašo adava te mangel pe e Devle hem e pašutne (3. Moj. 19:18; 5. Moj. 6:5). Ama primetin so vakergja palo adava: „Koj tano čače mlo pašutno?“ Akalea sikavgja kaj na halilo so čače značinela adava so čitingja. Adaleske na džanlja sar te primeninel adala stihija ko ispravno način. Valjani amenge e Jehovaskiri pomoš te haljova i Biblija. Adaleske valjani te roda leskoro sveti duh te šaj te koncentririna amen, a palo adava rode te pomožinel tut te primenine adava so sikliljan (w23.02 9, pas. 4-5).

„Sar zapoznajngjan o čačipe?“ Sigurno but puti odgovoringjan ko akava pučibe. Akava tano jekh taro prva pučiba so pučena amen amare phralja hem phenja. Amen but mangaja te šuna sar amare phralja zapoznajngje hem zamangle e Jehova, hem amen da mangaja te vakera lenge kobor siem radosna so siem e Jehovaskere svedokija (Rim. 1:11). Asavke razgovorija pomožinena amenge panda poviše te cenina o čačipe. Isto agjaar, ovaja poodlučna te živina sprema o čačipe hem agjaar te kera e Jehovaskiri volja hem te dobina lestar blagoslov. Isi poviše pričine soske mangaja o čačipe. I najvažno tani adaja soske mangaja e Jehova, o izvor e čačipaskoro. Preku leskoro Lafi, i Biblija, amen zapoznajngjem le na samo sar Semokjno Stvoriteli so kergja o nebo hem i phuv, nego isto agjaar sar nebesno Dad so mangela amen hem grižinela pe amenge (1. Pet. 5:7; w22.08 14, pas. 1, 3).

O apostol Pavle ohrabringja pe phralen hem phenjen te sikaven mangipe agjaar so ka keren šukaripe (Evr. 10:24). Ov pomožingja e phralen hem e phenjen na samo lafencar nego isto agjaar hem postapkencar. Na primer, keda ki Judeja sine bokhalipe o Pavle dengja nesave bukja e phralenge so sine lenge potrebna (Apo. 11:27-30). Iako sine o Pavle zafatimo propovedibaja hem sikajbaja, ov sekogaš arakhela sine načinija te pomožinel okolenge kaske so valjani sine materijalno pomoš. Kerindor adava ov izgradingja pe phralen agjaar so uveringja len kaj o Jehova ka grižinel pe lenge. Avdive amen šaj isto agjaar te izgradina amare phralengiri vera agjaar so ka da amaro vreme, amaro trudo hem ka koristina amare veštine te šaj te pomožina len keda doživinena katastrofe. Šaj te kera o isto keda redovno daja dobrovolno prilog baši aktivnost so kerela pe ko celo sveto. Agjaar hem ko javera da načinija pomožinaja amare phralenge hem phenjenge te ovel len doverba kaj o Jehova nikogaš nane te mukhel len (w22.08 24, pas. 14).

Ki Biblija isi but proroštvija so ispolningje pe. Nesave lendar sine pišime vekoncar angleder te ispolninen pe. I istorija potvrdinela kaj akala proroštvija čače ispolningje pe. Akava na iznenadinela amen soske džanaja kaj sa o bibliska proroštvija avena taro Jehova. Te razmislina bašo proroštvija kolende so sine vakerdo kaj i purani diz Vavilon ka ovel uništimi. Ko 8 veko a.a.e., o Isaija sine vodimo te prorokujnel kaj i mokjno diz Vavilon ka ovel osvojmi. Ov čak prorokujngja kaj o manuš so ka osvojnel i diz ka vikinel pe Kir hem vakergja sar ka osvojnel la (Isa. 44:27 —45:2). O Isaija isto agjaar prorokujngja kaj o Vavilon ko krajo ka ovel uništimo hem kaj nikoj više nane te živinel ki adaja diz (Isa. 13:19, 20). Ko 539 berš a.a.e., o Medijcija hem o Persijcija osvojngje akaja diz hem avdive adava than nane naselimo (w23.01 4, pas. 10).

O Jehova biringja amen te ova delo tari leskiri familija soj ko celo sveto. Razmislin samo koja bari prednost isi amen hem kobor blagoslovija anela amenge adava! (Mar. 10:29, 30). Ko celo sveto, isi amen phralja hem phenja so mangena e Jehova isto sar amende hem kola so dena pestar sa te šaj te živinen sprema leskere merilija. Iako amari čhib, kultura hem o način sar uravaja amen razlikujnela pe lendar, sepak osetinaja amen paše lencar čak keda prvo puti dikhaja amen. Posebno uživinaja keda zaedno lencar slavinaja hem obožavinaja amare mangle Dade hem valjani te ačhova ko jekhipe lencar (Ps. 133:1). Ola ponekogaš pomožinena amenge te phirava amaro pharipe (Rim. 15:1; Gal. 6:2). Isto agjaar, ohrabrinena amen te ačhova aktivna ki služba hem ponadari da te ova duhovno zorale (Evr. 10:23-25). Razmislin samo so bi ovela sine amencar te na ovel amen sine o sobranie kova so pomožinela amen te borina amen protiv amare dušmanja — o Satana hem leskoro lošno sveto (w22.09 2-3, pas. 3-4).

Keda koristinaja socijalna mreže šaj ka ovel amenge pharo te ovel amen samokontrola. Ako na pazinaja, šaj anglo but manuša te širina doverliva bukja. Hem otkeda čhivaja nešto ko internet tegani nane amen kontrola upro adava sar o javera ka koristinen adala informacie ili savi šteta šaj te kerel pe. I samokontrola šaj isto agjaar te pomožinel amenge te čutina keda nesave protivnikija ka mangen te doznajnen informacie bašo amare phralja hem phenja. Adava šaj te slučinel pe keda ka ova ispitime tari policija ki phuv kote so amare aktivnostija tane zabranime ili ograničime. Ko asavke ili ko javera situacie šaj te primenina o načelo te kontrolirina amari čhib (Ps. 39:1). Bizi razlika dali ki amari familija, ko amaro društvo, amare phralencar hem phenjencar ili bilo kasaja javerea amen valjani te ova doverliva. A bašo adava valjani amenge samokontrola (w22.09 13, pas. 16).

Te šaj te ova čače srekjna mora te hranina amen ko duhovno pogled. Hem adava tano potrebno. Adaleske o Isus vakergja: „O manuš na valjani te živinel samo taro maro, nego taro sekova lafi so ikljola taro e Jehovaskoro muj“ (Mat. 4:4). Adaleske na valjani te dozvolina te nakhel nijekh dive bizo te čitina e Devleskoro skapoceno Lafi, i Biblija. Adaleske so o Jehova mangela amen ov mukhlja ki Biblija te oven pišime važna informacie bašo adava so valjani te kera te šaj te ovel amen srekjno životo. Ki late šaj te čitina koja tani leskiri namera amencar, doznajnaja sar šaj te ova lea paše hem so valjani te kera te šaj te prostinel amare grevija. Isto agjaar, doznajnaja baši but šuži nadež koja so vetingja la amenge (Ere. 29:11). Akala čačipa so sikljovaja len džikote proučinaja i Biblija kerena amen but radosna. Sekogaš keda sian razočarimo taro problemija odvojn tuke vreme poviše te čitine i Biblija hem razmislin bašo adava so čitinea (w22.10 7, pas. 4-6).

Isi šukar pričine soske i Biblija ohrabrinela amen te na ačhova neiskusna. Amen stekninaja šukar iskustvo keda primeninaja o bibliska načelija ko amaro životo. Ako keraja agjaar šaj te dikha sar i Biblija pomožinela amen te izbegina problemija hem te ana mudra odluke. Šukar tano te razmislina bašo odluke so angjem len angleder. Na primer, ako proučinea i Biblija hem džaja ko sostanokija, šaj te puče tut soske panda na kerea nešto te šaj te de lafi kaj ka služine e Jehovaske hem te krstine tut. A ako sian krstimo, dali trudinea tut te ove pošukar ko propovedibe hem sikajbe? Dali tle odlukencar sikavea kaj dozvolinea te vodinen tut o bibliska načelija? Dali ponašinea tut e javerencar sar o Isus so bi ponašinela pe sine? Ako dikhaja kaj valjani te kera promene, valjani hor te razmislina bašo e Jehovaskere pouke kola so kerena „mudro okole so nane iskusno“ (Ps. 19:7; w22.10 20, pas. 8).

O Ezekiel dikhlja kobor mokjno tano e Devleskoro duho. Ki jekh vizija, ov dikhlja sar o sveti duh dejstvujnela upro mokjna angelija hem sar pomožinela te dvižinen pe o bare trkalakija tari nebesno kočija (Ezek. 1:21). Sar reagiringja o Ezekiel? Ov pišingja: „Keda dikhljum adava frdingjum man ki phuv“. O Ezekiel sine doborom vooduševimo so pelo tele ki phuv (Ezek. 1:28). Sekogaš keda razmislinela sine baši adaja vizija sigurno ov sine but ohrabrimo hem uverimo kaj e Jehovaskere sveti duhoja šaj te kerel pli služba. O Jehova zapovedingja e Ezekieleske: „Manušikano čhavo, ušti ko pre te šaj te kerav tuja lafi“. Adaja zapoved hem e Devleskoro duho dengje leske i sila so valjangja leske te šaj te uštel (Ezek. 2:1, 2). Ki celi pli služba o Ezekiel sine vodimo taro e Jehovaskoro „vas“, javere lafencar leskoro sveti duh (Ezek. 3:22; 8:1; 33:22; 37:1; 40:1; w22.11 4, pas. 7-8).

O proroko o Isaija opišinela e Jehova sar vnimatelno učiteli kova so phirela palo ple učenikija hem sikavela lenge o drumo te šaj te vodinel len. Avdive šunaja e Devleskoro glaso palaldan. Sar? E Devleskere lafija sine pišime ki Biblija but vreme angleder, javere lafencar vreme soj pali amende. Znači, keda čitinaja i Biblija adava tano sar te phene amen šunaja e Devleskoro glaso pali amende (Isa. 51:4). Sar šaj te ovel amen celosno korist taro vodstvo so dela amen o Jehova? Primetin kaj o Isaija spomningja duj bukja. Prvo vakergja „adava tano o drumo“. Dujto „džan ki leste“. Nane dovolno samo te džana „o drumo“, valjani isto agjaar te dža ki leste. Preku e Jehovaskoro Lafi hem o način sar leskiri organizacija objasninela adava soj pišimo athe doznajnaja so rodela amendar o Jehova. Isto agjaar sikljovaja sar te primenina adava. Ako mangaja radosno te istrajna ki amari služba, valjani te kera o solduj bukja. Samo tegani ka šaj te ova sigurna kaj o Jehova ka nagradinel amen (w22.11 11, pas. 10-11).

Kratko otkeda poviše džene taro e Isuseskere apostolija mule, o hovavne hristijanja ule delo taro sobranie (Mat. 13:24-27, 37-39). Ola vakerena sine „hovavne sikajba te šaj te ciden pali peste e učenikon“ (Apo. 20:30). Jekh taro akala „hovavne sikajba“ kola so o hovavne hristijanja palo nesavo vreme počmingje te vakeren len sine kaj o Isus na dengja plo telo „jekh puti zasekogaš te šaj te lel o grevija bute dženengere“, nego ola vakergje kaj leskiri žrtva mora te del pe sekova puti (Evr. 9:27, 28). Avdive but manuša verujnena ko akava hovavno sikajba. Ola sekova kurko džana ki crkva, ponekogaš sekova dive, te šaj te setinen pe ki e Isuseskiri žrtva. Ola verujnena kaj džikote ikerena akava nastan o maro hem i mol ovena e Isuseskoro telo hem leskoro rat. Isto agjaar verujnena kaj e Isuseskoro telo hem o rat tane sekova puti žrtvujme keda nekoj učestvujnela ko akava nastan. O manuša taro javera religie poretko setinena pe ko e Isuseskoro meribe. But džene lendar na haljovena celosno so značinela e Isuseskiri žrtva (w23.01 21, pas. 5).

Džikote trajnena o milja berša kote so ka vladinel o Isus, ov ka voskresninel e mulen hem ka pomožinel okolenge soj poslušna e Jehovaske te oven sovršena. Okola kolende so o Jehova ka dikhel sar pravedna „ka nasledinen i phuv hem ka živinen večno ki late“ (Ps. 37:10, 11, 29). Tegani „sar posledno dušmani, o meribe ka ovel uništimo“ (1. Kor. 15:26). Amari nadež bašo večno životo temelinela pe ko e Devleskoro Lafi. Adaja nadež šaj te pomožinel amenge te ačhova verna ko akala phare posledna dive. Ama, te šaj te kera e Jehovaskiri volja nane dovolno samo te ovel amen želba bašo večno životo. I najvažno pričina soske ačhovaja verna e Jehovaske hem e Isuseske tani adaja so but mangaja len (2. Kor. 5:14, 15). Adava mangipe pottikninela amen te dža palo lengoro primer hem te vakera e javerenge i nadež so isi amen (Rim. 10:13-15). Ako sikljovaja te ova nesebična hem darežliva, tegani o Jehova ka mangel te ova leskere amala ki celi večnost (w22.12 6-7, pas. 15-16).

Keda siem progonime, našti slobodno te kera o bukja kola so pomožinena amenge te ačhova smirime. Tegani šaj te ova voznemirime hem te dara taro adava so šaj te slučinel pe. Asavke čuvstvija tane normalna ama valjani te pazina. O Isus vakergja kaj o progonstvo šaj te peravel leskere učenikon (Jovan 16:1, 2). Iako o Isus vakergja kaj ka ova progonime, ov isto agjaar uveringja amen kaj šaj te ačhova verna (Jovan 15:20; 16:33). Keda amare aktivnostija tane zabranime ili strogo ograničime, tegani i podružnica ili o starešine šaj ka den amen upatstvija. Asavke upatstvija dena pe te šaj te zaštitinen amen, te den amen duhovno hrana hem te pomožinen amenge te propovedina kobor so šaj ko neve okolnostija. Trudin tut te šune akala upatstvija (Jak. 3:17). Isto agjaar, nikogaš ma vaker informacie taro phralja hem phenja okolenge so nane len pravo te džanen (Prop. 3:7; w22.12 20-21, pas. 14-16).

Avdive o Isus ponadari da vodinela ple učenikon džikote propovedinena bašo e Devleskoro Carstvo ki celo phuv. Ov ikergja pe ko plo lafi. Preku e Jehovaskiri organizacija o Isus obučinela amen sar te propovedina hem dela amen sa so valjani amenge te šaj te završina adaja zadača (Mat. 28:18-20). Amen keraja amaro delo agjaar so daja amendar sa te propovedina hem te poučina e javeren hem agjaar so ačhovaja džangavde džikote adžikeraja o Jehova te anel o krajo akale svetoskoro. Ako primeninaja o sovet taro Evreija 6:11, 12, ka ikera amen cvrsto ki amari vera dži ko krajo e svetoskoro. O Jehova više odredingja dive hem saati keda ka anel o krajo e Satanaskere svetoske. Keda ka avel adava dive o Jehova sigurno ka ispolninel sa o proroštvija soj tane pišime ko leskoro Lafi. Ama ponekogaš šaj te mislina amenge kaj o krajo tano panda dur. Sepak, e Jehovaskoro dive „nane te kasninel“ (Avak. 2:3). Adaleske, te ova odlučna ponadari da te dikha ko Jehova agjaar so spremno ka adžikera e Devle so ka spasinel amen (Mih. 7:7; w23.02 19, pas. 15-16).

Jekhe planinareskiri cel tani te resel skroz upre ki planina. Ama džikote kerela adava, nekobor puti šaj ka ačhol te šaj te uživinel ko šužo pogled. Ko slično način, amen da valjani redovno te ačhova hem te razmislina bašo adava sar o Jehova dela amen uspeh te istrajna ko phare vremija. Ko krajo taro sekova dive puč tut: „Sar o Jehova nagradingja man avdive? Iako panda isi man problemi, sar o Jehova pomožinela mange te istrajnav?“ Tegani dikh dali avela tuke ki godi barem jekh buti kolaja so pomožingja tuke o Jehova. Tu sigurno molinea tut te šaj te završinen tle problemija (Fil. 4:6). Ama ma bistre o blagoslovija so isi tut akana. O Jehova vetinela kaj ka del tut sila hem ka pomožinel tuke te istrajne. Sekogaš ov blagodarno bašo adava so o Jehova poddržinela tut. Tegani šaj te dikhe sar o Jehova pomožinela tuke te ove uspešno, čak džikote trajnena o nevolje (1. Moj. 41:51, 52; w23.01 19, pas. 17-18).

Puč tut: „Dali mlo način sar živinava sikavela kaj haljovava kobor tano paše o krajo akale lošno svetoskoro? Dali mle odluke bašo adava savo obrazovanie ili savi buti ka birinav sikavena kaj i služba bašo Jehova tani mange najvažno ko životo? Dali isi man doverba kaj o Jehova ka grižinel pe mange hem mle familijake?“ Razmislin samo kobor radujnela pe o Jehova keda dikhela kaj trudinaja amen te kera leskiri volja ko sa (Mat. 6:25-27, 33; Fil. 4:12, 13). Amen valjani redovno te ispitina amaro način sar razmislinaja hem te kera o potrebna promene. O Pavle vakergja e phralenge taro Korint: „Ispitinen tumen dali sien ki vera, ispitinen tumen te šaj te proverinen save sien“ (2. Kor. 13:5). Adaleske valjani ponadari da te menina amaro način sar razmislinaja agjaar so ka čitina e Devleskoro Lafi, ka sikljova te razmislina sar ov so razmislinela hem palo adava ka kera sa soj potrebno te šaj te kera e Jehovaskiri volja (1. Kor. 2:14-16; w23.01 9, pas. 5-6).