Septemvri

O Devel dengja e Isuseske mokj te rešinel sa e manušengere problemija. Preku o čudija o Isus sikavgja kaj šaj te rešinel problemija kola so amen nikogaš našti te rešina len. Na primer, le isi le mokj te cidel korendan e manušengere problemija, agjaar so ka oslobodinel amen taro grevo hem leskere posledice sar soj o nasvalipe hem o meribe (Mat. 9:1-6; Rim. 5:12, 18, 19). Leskere čudija sikavgje kaj ov šaj te sasljarel sekova nasvalipe hem čak te vazdel e mulen (Mat. 4:23; Jovan 11:43, 44). Isto agjaar, le isi le mokj te kontrolirinel baro nevreme hem te oslobodinel e manušen taro demonija (Mar. 4:37-39; Luka 8:2). Kobor osetinaja amen sigurna adaleske so džanaja kaj o Jehova dengja asavki mokj ple Čhaveske. Šaj te ova celosno uverime kaj o idna bereketija taro e Devleskoro Carstvo ka ispolninen pe. O čudija so kergja len o Isus sikavena so ka kerel ki celi phuv sar cari ko e Devleskoro Carstvo (w23.04 3-4, pas. 5-7).

Ako sian ko jekh baro sobranie hem but puti o phral so vodinela na dikhel kaj tu da vazdea tlo vas, tu šaj nane te mange više te komentirine. Ama ma čhinav te probine te komentirine. Spremin poviše komentarija bašo sekova sostanok. Tegani ako na dena tut ko početok te komentirine, sepak ka oven tut panda prilike te komentirine džikote trajnela o sostanok. Keda spreminea tut bašo proučibe i Stražarsko kula razmislin bašo adava sar sekova pasus tano povrzimo e glavno temaja. Ako kerea adava, tegani šaj te de šukar spremime komentarija. Isto agjaar, šaj te spremine tut te komentirine ko pasusija so kerena lafi bašo pohor bibliska čačipa kola soj pophare objasnibaske. Soske? Adaleske so šaj nane te oven but džene kola so ka komentirinen ko adala pasusija. So ako palo nekobor sostanokija na sine tut prilika te komentirine? Angleder o sostanok šaj te vakere e phraleske so vodinela, ko kova pučibe mangea te komentirine (w23.04 21-22, pas. 9-10).

O Josif spremno primeningja e Jehovaskere upatstvija hem adava kergja te ovel pošukar rom. O Devel najhari ko trin prilike dengja le upatstvija povrzime leskere familijaja. Sekova puti spremno šungja adala upatstvija čak keda sine leske but pharo (Mat. 1:20; 2:13-15, 19-21). O Josif zaštitingja e Marija hem grižingja pe lake adaleske so šungja e Devleskere upatstvija. Sigurno e Josifeskere postapke kergje i Marija panda poviše te mangel le hem te poštujnel le. Tumen o roma šaj te džan palo primer e Josifeskoro agjaar so ka roden biblisko vodstvo keda grižinena tumen tumare familijake. Keda kerena adava, čak keda nane lokho, sikavena mangipe tumare romnjenge hem kerena pozoralo tumaro brako. Jekh phen taro Vanuati, koja soj ženimi poviše taro 20 berš, vakerela: „Keda mlo rom rodela vodstvo taro Jehova hem primeninela le, poviše poštujnava le. Osetinava man sigurno hem isi man doverba ko leskere odluke“ (w23.05 21, pas. 5).

O Evreija so irangje pe taro Vavilon valjani sine te oven „sveto narodo“ ple Devleske (5. Moj. 7:6). Ama adava na značinela sine kaj ola na valjani te keren promene te šaj te keren e Jehovaskiri volja. But Evreija bijandile ko Vavilon hem lele nesave stavija hem razmisluvanja taro Vaviloncija. Palo 69 berša otkeda o Evreija irangje pe ko Izrael, o Neemija sine iznenadimo keda doznajngja kaj o čhave so bijandile ko Izrael na siklile i hebrejsko čhib (5. Moj. 6:6, 7; Neem. 13:23, 24). Akala čhave našti sine te mangen hem te obožavinen e Jehova ako na haljovena sine i hebrejsko čhib, ki koja so pobaro delo taro e Devleskoro Lafi sine pišimo (Ezra 10:3, 44). Znači adala Evreija mora sine te keren bare promene. Ama sine lenge but polokho te keren adala promene soske živinena sine ko Izrael, kote so o čisto obožavibe pohari iranela pe sine (Neem. 8:8, 9; w23.05 15, pas. 6-7).

Ponekogaš šaj isi amen hem bari želba hem samokontrola, ama palem šaj te ovel amenge pharo te ispolnina amari cel. Na primer, „o bukja so našti te predvidinen pe“ šaj te len amaro vreme hem agjaar te na ovel amen but vreme te kera buti ki amari cel (Prop. 9:11). A šaj te oven amen problemija so ka razočarinen amen hem ka len amari sila (Izr. 24:10). Isto agjaar, adaleske so siem nesovršena šaj te kera nešto so ka kerel amenge panda popharo te ispolnina amari cel (Rim. 7:23). Ili šaj siem but umorna (Mat. 26:43). So ka pomožinel amenge ako peraja ili ednostavno na džala amenge? Ma bistre kaj ako perea adava na značinela kaj na uspejngjan. I Biblija vakerela kaj šaj često te oven amen problemija ili pharipa. Ama isto agjaar vakerela kaj amen šaj palem te ušta. Oja, ako ponadari da kerea buti ki tli cel, čak ko phare dive, tu sikavea e Jehovaske kaj mangea te kere leskiri volja. Ov sigurno kaj o Jehova tano but radosno keda dikhela sar tu ponadari da trudinea tut te ispolnine tli cel (w23.05 30, pas. 14-15).

I pionersko služba pomožinela jekhe terneske šukar te sorabotinel različna manušencar. Isto agjaar, adava pomožinela leske mudro te koristinel ple pare so zarabotinela len hem te na trošinel poviše taro adava so isi le (Fil. 4:11-13). Šukar temeli baši polnovremeno služba tani i pomošno pionersko služba. Adava pomožinela te spremine tut te služine sar opšto pioneri. I pionersko služba šaj te phravel tuke o udar bašo javera da vrste polnovremeno služba, sar soj te služine ki izgradba ili ko Betel. Sa o phralja valjani te trudinen pe te ispolninen o uslovija te služinen e phralenge hem e phenjenge sar starešine. I Biblija vakerela kaj okova so isi le asavki cel „mangela but šukar buti te kerel“ (1. Tim. 3:1). Prvo, jekh phral mora te ispolninel o uslovija te služinel sar sluga-pomošniko. O sluga-pomošnikija pomožinena e starešinenge ko but praktična načinija. A ola zaedno e starešinencar ponizno služinena e phralenge hem e phenjenge hem revnosno propovedinena o šukar haberi (w23.12 28, pas. 14-16).

E care e Josija sine le 16 berš keda počmingja te rodel e Jehova. Ov manglja te doznajnel nešto poviše bašo Jehova hem te kerel leskiri volja. Ama akale terne careskoro životo na sine lokho. Ko adava vreme but manuša obožavinena sine hovavne devlen, adaleske o Josija mora sine te ovel hrabro te šaj te čhinavel len te keren adava. Hem baš adava kergja! Angleder te pherel 20 berš, o Josija počmingja te čistinel e Izraelsko nacija taro hovavno obožavibe (2. Let. 34:1, 2). Čak ako sian but terno šaj te dža palo primer e Josijaskoro agjaar so ka sikljove nešto poviše bašo Jehova hem bašo leskere but šuže osobine. Ako kerea adava ka pottikninel tut te de lafi e Jehovaske kaj ka služine leske. Sar ka vlijajnel adava upro tlo životo? O Luka so krstingja pe ko 14 berš vakerela: „Taro akava momenti ka čhivav e Jehova ko prvo than ko mlo životo hem ka trudinav man te radujnkerav le“ (Mar. 12:30). Tute da ka ovel tut baro blagoslov ako mangea te kere o isto (w23.09 11, pas. 12-13).

Keda o apostol Pavle pišingja akava pismo, o sobranie ko Solun sine nevo soske postojnela sine pohari taro jekh berš. O imenujme phralja verojatno na sine iskusna hem šaj grešinena sine. Sepak, ola zaslužinena sine o javera te poštujnen len. Avdive, sar so avela popaše i bari nevolja šaj ka zavisina taro vodstvo e starešinengoro panda poviše taro akana. Šaj nane te ova ko kontakt e phralencar taro glavno sedište ili e podružnicaja. Adaleske važno tano panda avdive te sikljova te manga hem te poštujna amare starešinen. Bizi razlika so ka ovel, te ova trezvena hem ma te koncentririna amen ko lengere maane nego ko adava kaj o Jehova preku o Hristos vodinela akale verna manušen. Isto sar o šlemi so zaštitinela e vojnikoskoro šero, agjaar amari nadež bašo spasenie zaštitinela amare misle. Amen haljovaja kaj adava so nudinela amenge o sveto na vredinela ništo (Fil. 3:8). Amari nadež pomožinela amenge te ačhova smirime hem stabilna (w23.06 11-12, pas. 11-12).

Okola so šunena i pokana e glupavo džuvljakiri mora te odlučinen dali ka prifatinen la ili ka odbinen la. Isi but šukar pričine soske valjani te cida amen taro nemoralna postapke. I „glupavo džuvli“ vakerela: „O čordikane panja tane gudle“ (Izr. 9:17). Soj tane o „čordikane panja“? I Biblija sporedinela o seksualna odnosija maškar o rom hem i romni e svežo panjea (Izr. 5:15-18). Jekh murš hem džuvli kola soj zakonski ko brako šaj te uživinen ko seksualna odnosija maškar pumende. Ama porazlično tano e „čordikane panjencar“. Ola šaj te pretstavinen o seksualno nemoral soj tano zabranimo. Akava but puti slučinela pe garavindor, isto sar jekh čor kova so but puti čorela garavindor. O „čordikane panja“ šaj posebno te oven gudle okolenge so kergje nemoral hem mislinena kaj nikoj na dikhlja len. Ama ola korkori pes hovavena soske o Jehova dikhela sa. Na postojnela ništo soj tano pokjerko taro adava te našava e Jehovaskoro odobruvanje. Akava sikavela amenge kaj ko „čordikane panja“ nane nisavo „gudlipe“ (1. Kor. 6:9, 10; w23.06 22, pas. 7-9).

So valjani te kere ako primetinea kaj tle molitve ule mehanička, ili kaj na uživinea više ki služba sar so uživinea sine angleder? Ma mislin kaj nane tut e Jehovaskoro duho. Adaleske so siem nesovršena amare čuvstvija ponekogaš šaj te meninen pe. Ako tli revnost počminela te slabonel, razmislin bašo primer e apostol Pavleskoro. Iako trudinela pe sine te džal palo e Isuseskoro primer, ov džanlja kaj ponekogaš nane te ovel le bari želba te kerel adava so valjani. O Pavle sine odlučno te kerel pli služba bizi razlika sar osetinela pe sine ko momenti. Slično, ma mukh tle nesovršena čuvstvija te vlijajnen upro tle odluke. Ov odlučno te kere adava soj tano ispravno, čak ako na kerela pe tuke adava. Ako kerea ponadari da adava soj ispravno, sar so ka nakhel o vreme tle čuvstvija šaj ka meninen pe (1. Kor. 9:16; w24.03 11-12 pas. 12-13).

Amen šaj te sikava mangipe amare phralenge hem phenjenge agjaar so ka prifatina len ko amaro društvo (2. Kor. 6:11-13). But džene amendar tane ko sobranija kote so isi phralja hem phenja taro različna kulture hem phralja kolen so isi len različna karakterija. Ako koncentririnaja amen ko lengere šukar osobine, adava ka pomožinel amen panda poviše te manga len. Keda trudinaja amen te dikha ko javera sar o Jehova so dikhela ki lende tegani sikavaja kaj mangaja len. Ki bari nevolja ka ovel but važno te manga amare phralen hem phenjen. Keda ka počminel adaja nevolja, sar o Jehova ka zaštitinel amen? Te dikha so o Jehova vakergja ple narodoske te kerel keda o purano Vavilon sine napadimo. Ov vakergja: „Ajde, tumen so siem mlo narodo, khuven ko tumare sobe kote so ka oven ko sigurno hem phanden o udara pali tumende, garaven tumen hari džikote nakhela i holi“ (Isa. 26:20). Šaj amen da ka valjani te ova poslušna ko akala lafija e Jehovaskere keda ka avel i bari nevolja (w23.07 6-7, pas. 14-16).

Valjani te ova pendžarde maškar o javera sar razumna. Adaleske puč tut: „Dali o javera mislinena kaj sium razumno, tolerantno hem spremno te popuštinav? Ili mislinena kaj sium strogo, kruto ili tvrdoglavo? Ili sium spremno te šunav e javerengoro mislenje hem popuštinava ako i situacija dozvolinela adava?“ Kobor porazumna ka ova, doborom poslična ka ova sar o Jehova hem o Isus. Te ova razumna značinela te ova fleksibilna keda ka meninen pe amare okolnostija. Asavke promene šaj te keren amenge problemija kola so na očekujngjem len. Na primer, šaj taro jekh puti te astara nesavo pharo nasvalipe. Ako ko than kote so živinaja taro jekh puti meninela pe i ekonomsko ili političko situacija adava da šaj te meninel amaro životo (Prop. 9:11). Šaj čak te ovel amenge pharo ako i organizacija zamolinela amen te kera nesavi javer zadača ili te služina ko javer than. Šaj uspešno te prilagodina amen ko neve okolnostija ako sledinaja akala štar čekorija: 1) Prifatin i realnost, 2) dikh angle, 3) koncentririn tut ko pozitivna bukja hem 4) ker šukaripe e javerenge (w23.07 22, pas. 7-8).

O proroko o Daniel sine terno keda o Vaviloncija lele le sar robo hem ingargje le dur taro Erusalim. Ama iako o Daniel sine terno ov mukhlja baro vpečatok e vavilonsko službenikonge. Ola „dikhle adava so dikhela pe jakhencar“ — primetingje kaj o Daniel tano šužo hem kaj avela tari jekh važno familija (1. Sam. 16:7). Adaleske ola obučingje le te šaj ov pokasno te služinel ki palata (Dan. 1:3, 4, 6). O Jehova manglja e Daniele bašo adava savo manuš sine. Ustvari, keda o Jehova vakergja kaj o Daniel tano sar o Noe hem o Jov, le verojatno sine le okolu 20 berš. Znači, iako o Daniel sine but terno o Jehova ki leste dikhela sine isto doborom pravedno sar ko Noe hem ko Jov kola so beršencar verno služingje leske (1. Moj. 5:32; 6:9, 10; Jov 42:16, 17; Ezek. 14:14). O Jehova ponadari da mangela sine e Daniele ko celo leskoro životo (Dan. 10:11, 19; w23.08 2, pas. 1-2).

Ako mangea te kine jekh kher, tu ka dža te proverine sekova delo taro kher. Nešto slično šaj te kera keda čitinaja hem proučinaja i Biblija. Ako čitinea la sigate, tegani šaj te sikljove samo o osnovna bukja — „o osnovna sveta objave e Devleskere“ (Evr. 5:12). Namesto adava, isto sar so bi kerea sine e kherea „khuv andre“ te šaj te dikhe sa o detalija. Jekh but šukar način sar šaj te proučine i Biblija tano agjaar so ka dikhe sar o različna delija taro haberi tane povrzime jekh jekhea. Trudin tut te haljove na samo ko so verujnea nego hem soske verujnea ko adava. Te šaj te haljova e Devleskoro Lafi, amen valjani te proučina o hor bibliska čačipa. O apostol Pavle pottikningja e phralen hem e phenjen redovno hem temelno te proučinen e Devleskoro Lafi te šaj „celosno te haljoven kobor tano buvlo, dugačko, učo hem hor“ o čačipe. Adava ka pomožinel lenge sine lengiri vera te ovel la hor korenija hem te ovel zorali (Ef. 3:14-19). Amen da valjani te kera o isto (w23.10 18, pas. 1-3).

Ki Biblija isi but primerija taro manuša so sine strpliva. Šaj ko tlo lično proučibe te istražine baši lende. Na primer, iako o David sine but terno keda sine pomazimo sar idno cari upro Izrael, ov mora sine te adžikerel panda but berša angleder te ovel cari. O Simeon hem i Ana verno služingje e Jehovaske džikote adžikergje te avel o Mesija (Luka 2:25, 36-38). Džikote proučinea akala izveštaija, probin te arakhe o odgovorija ko akala pučiba: „So šaj pomožingja akale verno slugaske te sikavel strplivost? Sar koristingja leske adava so sine strplivo? Sar šaj te džav palo leskoro primer?“ Isto agjaar, šaj te ovel tut korist ako proučinea bašo okola so na sikavgje strplivost (1. Sam. 13:8-14). Šaj te puče tut: „So angja len dži ko adava te na oven strpliva? Kola sine o posledice taro adava?“ (w23.08 25, pas. 15).

O apostol Petar sine verno, ov na mukhlja ništo te čhinavel le te sledinel e Isuse. Ov sikavgja pli vernost ki jekh prilika keda o Isus vakergja nešto so leskere učenikija na halile (Jovan 6:68). But džene čhinavgje te sledinen e Isuse bizo te adžikeren nesavo objasnuvanje. Ama, o Petar na kergja adava. Ov halilo kaj samo ko Isus „tane o lafija bašo večno životo“. O Isus džanlja kaj o Petar hem o javera apostolija ka mukhen le. Sepak, o Isus sikavgja doverba ko Petar kaj ov ka ovel duhovno zoralo hem ka ačhol verno (Luka 22:31, 32). O Isus halilo kaj „o vilo tano spremno... ama o telo tano slabo“ (Mar. 14:38). Adaleske, čak keda o Petar vakergja kaj na pendžarela le, o Isus na otkažingja pe taro plo apostoli. Otkeda voskresningja o Isus, pojavingja pe e Petareske — verojatno keda sine korkori (Mar. 16:7; Luka 24:34; 1. Kor. 15:5). Akava sigurno but ohrabringja e Petare kova so sine razočarimo! (w23.09 22-23, pas. 9-10).

O Devel prostinela ili učharela o grevija okolengere so isi len vera ki leste. Ov celosno prostinela len hem nikogaš više na spomninela len (Ps. 32:1, 2). Ko asavke manuša dikhela sar nekoj so nane len greške hem tane pravedna adaleske so isi len vera. Iako o Avraam, o David hem javera verna sluge sine pravedna anglo Devel, sepak ola ponadari da sine nesovršena hem grešna. Ama adaleske so sine len vera, o Devel dikhela sine ki lende sar bizi greška, posebno keda sporedinela len sine okolencar so na sine len vera ki leste (Ef. 2:12). Sar o apostol Pavle so pišingja ko plo pismo, mora te ovel amen vera te šaj te ova paše e Devlea. Adava sine slučaj e Avraamea hem e Davidea, a šaj te ovel slučaj amencar da (w23.12 3, pas. 6-7).

Avdive sa e hristijanen isi len prednost te den žrtve e Jehovaske agjaar so koristinena pumaro vreme, sila hem materijalna sredstvija te šaj te služinen leske. Šaj te sikava e Jehovaske kobor siem leske blagodarna baši prednost so dengja amen te služina leske agjaar so ka da leske amare najšukar žrtve. O apostol Pavle pišingja kola bukja mora sekogaš te kera len te šaj te obožavina e Jehova (Evr. 10:22-25). Ki lende tano vklučimo te molina amen e Jehovaske, te propovedina, te dža ko amare sostanokija hem te ohrabrina amen jekh jekhea „so poviše kobor so dikhaja kaj avela popaše e Jehovaskoro dive“. Ko krajo taro lil Otkrovenie e Jehovaskoro angeli vakerela: „Obožavin e Devle!“ (Otk. 19:10; 22:9, fus.). Akava vakergja le duj puti te šaj te sikavel kobor tano adava važno. Nikogaš ma te bistra akala hor duhovna čačipa bašo e Jehovaskoro baro duhovno hrami hem i bari prednost so isi amen te služina amare najbare Devleske (w23.10 29, pas. 17-18).

Sarinen amen isi amen želba „te manga amen jekh jekhea“. Ama but tano važno te na bistra e Isuseskoro predupreduvanje kaj „bute dženengoro mangipe ka šudrol“ (Mat. 24:12). O Isus na manglja te vakerel kaj but taro leskere učenikija ka čhinaven te sikaven mangipe jekh jekheske. Ama valjani te pazina hem te na dozvolina te vlijajnel upri amende akava sveto koleste so isi sa pohari mangipe. Akale mislaja ki godi, te kera lafi bašo akava važno pučibe: So ka pomožinel amenge te džana dali amaro mangipe sprema o phralja hem o phenja tano silno? Jekh način sar šaj te dikha kobor tano silno amaro mangipe tano agjaar so ka ispitina sar reagirinaja ko nesave situacie (2. Kor. 8:8). O apostol Petar spomningja jekh asavki situacija: „Najangle, neka ovel tumen baro mangipe jekh jekheske, soske o mangipe učharela but grevija“ (1. Pet. 4:8). Znači, o slabostija hem i nesovršenost e javerengiri šaj te čhiven ko ispit amaro mangipe (w23.11 10-11, pas. 12-13).

Našti te ova poslušna ki e Isuseskiri zapoved bašo mangipe ako sikavaja mangipe samo nesavenge ko sobranie, a javerenge na. Džangjola pe, šaj nesavencar ka ova popaše nego javerencar isto sar so sine o Isus (Jovan 13:23; 20:2). Ama o apostol Petar setinkerela amen kaj valjani te manga sa e phralen soske ola tane delo tari amari familija (1. Pet. 2:17). O Petar pottikninela amen „te manga amen silno taro vilo“ (1. Pet. 1:22). Ko akava kontekst te mange silno značinela te mange nekas čak keda tano pharo te sikavel pe leske mangipe. Na primer, so ako jekh phral ko nesavo način vredžinela tut ili povredinela tut? Šaj prirodno avela amenge te irana leske namesto te sikava leske mangipe. Sepak, o Petar siklilo taro Isus kaj o Devel na mangela te iranel lošnipaja (Jovan 18:10, 11). Ov pišingja: „Ma iranen lošnipaja bašo lošnipe, ni vredžibaja bašo vredžibe, namesto adava, iranen šukaripaja“ (1. Pet. 3:9). Ako isi tut silno mangipe sprema o javera adava ka pottikninel tut te ove ljubezno hem obzirno (w23.09 28-29, pas. 9-11).

Čače tano čudno kobor sigate bajrovena o čhave hem ovena vozrasna. Sar ka phene o čhave taro jekh puti bajrovena. Ama, te šaj nekoj te ovel zrelo hristijani, mora te trudinel pe. Adava na ovela taro jekh puti (1. Kor. 13:11; Evr. 6:1). Te šaj te ispolnina adaja cel, valjani te ova paše amala e Jehovaja. Isto agjaar valjani amenge e Devleskiri sila te šaj te razvina osobine kola so svidžinena pe leske, te oven amen korisna veštine hem te spremina amen bašo odgovornostija so šaj ka oven amen ki idnina (Izr. 1:5). Keda o Jehova kergja e manušen ki phuv, ov kergja murš hem džuvli (1. Moj. 1:27). Jasno tano kaj o murša hem o džuvlja fizički razlikujnena pe, ama isi javera da razlike maškar lende. Na primer, o Jehova dengja e muršeske hem e džuvljake konkretna uloge hem adaleske valjani lenge osobine hem veštine kola so ka pomožinen lenge te ispolninen adala uloge (1. Moj. 2:18; w23.12 18, pas. 1-2).

Dali o Isus manglja o javera da te koristinen leskere Dadeskoro anav? Sigurno kaj oja. Nesave religiozna vodačija šaj mislinena sine kaj e Devleskoro anav tano but sveto te šaj te andinen le. Ama, o Isus nikogaš na dozvolingja asavke tradicie so nane bibliska te čhinaven le te falinel ple Dadeskoro anav. Razmislin bašo vreme keda o Isus sine ko gerasinsko regioni hem sasljargja jekhe manuše kole so sine le demonija. O manuša darandile hem molingje e Isuse te džal peske adathar hem adaleske ov na ačhilo ko adava than (Mar. 5:16, 17). Ama o Isus manglja adari da te vakerel pe e Jehovaskoro anav. Adaleske, e manušeske so sasljargja le vakergja te vakerel e javere manušenge bašo adava so o Jehova kergja baši leste, a na bašo adava so o Isus kergja leske (Mar. 5:19). O Isus mangela amen da avdive te kera o isto, te vakera leskere Dadeskoro anav ko celo sveto! (Mat. 24:14; 28:20). Keda keraja adava, amen radujnaja amare Care e Isuse (w24.02 10, pas. 10).

But baro blagoslov tano so siem delo tari e Jehovaskiri organizacija ko akala phare posledna dive. O životo ko akava sveto ovela sa popharo hem popharo, ama o Jehova dengja amen phralja hem phenja kola so šaj te pomožinen amen (Ps. 133:1). Isto agjaar, ov pomožinela amen te ovel amen srekjno familija (Ef. 5:33 — 6:1). Ama isto agjaar, dela amen mudrost koja so šaj te pomožinel amenge te ikljova ko krajo amare problemencar hem te osetina čačutno andruno mir. Sepak, amen mora but te trudina amen te šaj te ačhova verna e Jehovaske džikote služinaja leske. Soske? Adaleske so o javera but puti šaj te povredinen amen pumare lafencar ili postapkencar. Isto agjaar, šaj te obeshrabrina amen taro amare lična greške, posebno ako keraja poviše puti jekh isto greška. Amen ponadari da valjani te služina e Jehovaske čak keda 1) povredinena amen amare phralja hem phenja, 2) razočarinela amen amaro bračno partneri hem 3) razočarinaja amen korkori amendar (w24.03 14, pas. 1-2).

Nekogaš, ka šuna iskustvija taro phralja hem phenja kola so odlučingje te keren poviše ki služba bašo Jehova. Šaj sine ki Škola bašo polnovremena objavitelija ili selingje pe ko thana kote so isi pobari potreba. Ako tle okolnostija dozvolinena tuke, adaja tani but šuži cel so šaj tu da te čhive la tuke. E Jehovaskere sluge but mangena te keren poviše baši leste (Apo. 16:9). Ama, so ako ko momenti našti te kere adava? Ma mislin kaj pohari vredinea okolendar so šaj te keren adava. Sar hristijanja, amenge tano najvažno dži ko krajo te istrajna (Mat. 10:22). Ma bistre kaj o Jehova but radujnela pe keda služinea leske sprema tle sposobnostija hem okolnostija. Adava tano jekh važno način sar šaj ponadari da te dža palo Isus otkeda ka krstine tut (Ps. 26:1; w24.03 10, pas. 11).

Amaro nebesno Dad vetingja kaj ka prostinel amenge ako kainaja amen (Ps. 86:5). Znači, ako amenge čače žal bašo grevija so kergjem len, šaj te ovel amen doverba kaj o Jehova ka ačhol ko plo lafi hem ka prostinel amenge. Ma bistre kaj o Jehova nane kruto, ov tano razumno hem na očekujnela poviše taro adava so šaj te kera. Ov ceninela sa adava so keraja baši leste sa džikote daja leske amaro najšukar. Isto agjaar, razmislin bašo nesave ličnostija tari Biblija kola so služingje e Jehovaske celo vilea. Na primer, razmislin bašo apostol Pavle. Ov revno služinela sine beršencar, agjaar so patujnela sine but kilometre hem kerela sine but sobranija. Ama dali o Jehova na sine više lestar zadovolno keda leskere okolnostija meningje pe hem našti sine poviše te propovedinel sar angleder? Na. Ov ponadari da kerela sine adava so šaj hem o Jehova blagoslovingja le (Apo. 28:30, 31). Slično tano amencar da, kobor šaj te da e Jehovaske zavisinela taro amare okolnostija, a adava šaj te meninel pe. Ama leske tano najvažno taro savo motivi keraja adava (w24.03 27, pas. 7, 9).

Adalea so molingja pe e Jehovaske, o Isus dengja šukar primer ple sledbenikonge. Džikote trajnela sine leskiri služba, o Isus but puti molinela pe sine. Ov valjani sine te odvojnel peske vreme baši molitva soske sine but zafatimo hem retko sine korkori (Mar. 6:31, 45, 46). Adaleske uštela sine rano sabajle te šaj te ovel le vreme korkori te molinel pe e Jehovaske. Najhari ki jekh prilika, ov molingja pe celo rat angleder te anel važno odluka (Luka 6:12, 13). Hem i rat angleder te merel, o Isus but puti molingja pe te šaj te završinel o najpharo delo tari pli zadača ki phuv (Mat. 26:39, 42, 44). E Isuseskoro primer sikavela amenge kaj bizi razlika kobor siem zafatime, amen valjani te odvojna amenge vreme baši molitva. Isto sar o Isus, amen da šaj ka valjani te ušta rano sabajle ili te ačhova hari pokasno rakjate te šaj te molina amen. Ako keraja agjaar, ka sikava e Jehovaske kaj ceninaja akava skapoceno poklon (w23.05 3, pas. 4-5).

Primetin o lafi „phergja“ ko avdisutno stiho. Jekh biblisko rečniko sporedinela e Jehovaskoro mangipe jekhe rekaja kolate so celo vreme thavdela pani hem phergjola. Akaja sporedba jasno sikavela kobor but mangela o Jehova e pomazanikon. O pomazanikija džanena kaj o Devel mangela len (Juda 1). O apostol Jovan opišingja ple čuvstvija akale lafencar: „Dikhen savo mangipe dengja amen o Dad, te ova vikime e Devleskere čhave“ (1. Jov. 3:1). Dali o Jehova mangela samo e pomazanikon? Na, o Jehova sikavgja kaj mangela sarinen amen. Kova tano o najbaro dokaz bašo e Jehovaskoro mangipe? I otkupnina — o najbaro mangipe so šaj sine nekoj dži akana te sikavel (Jovan 3:16; Rim. 5:8; w24.01 28, pas. 9-10).

Akava stiho otkrinela so pomožingja e Davideske te pobedinel pli dar. Iako leskoro životo sine ki opasnost, ov razmislinela sine bašo adava so o Jehova panda hari ka kerel leske. O David džanlja kaj o Jehova ka spasinel le ko pravo vreme. Ustvari, o Jehova vakergja kaj o David ka ovel o sledno cari ko Izrael (1. Sam. 16:1, 13). Ko sekova vetuvanje taro Jehova, o David dikhela sine sar ka phene više ispolningja pe. So vetingja o Jehova tuke te kerel? Džangjola pe, amen na očekujnaja o Jehova te cidel sa amare problemija. Sepak, bizi razlika save problemea soočinaja amen ko akava sveto, o Jehova ka cidel sa adava ko nevo sveto (Isa. 25:7-9). Amaro Stvoriteli tano doborom silno so šaj te voskresninel e mulen, te sasljarel amen hem te cidel sa amare dušmanen (1. Jov. 4:4; w24.01 6, pas. 12-13).

Razmislin soske dengjan zavet e Jehovaske hem krstingjan tut. Tu kergjan akava soske mangljan te ove tari e Jehovaskiri strana. Setin tut so pomožingja tuke te ove uverimo kaj arakhljan o čačipe. Zapoznajngjan e Jehova hem počmingjan te poštujne le hem te mange le sar tlo nebesno Dad. Barili tli vera hem adaleske kaingjan tut. Tlo vilo pottikningja tut te čhinave e pogrešna postapkencar hem te počmine te živine agjaar sar so mangela o Devel. Lokhilo tuke keda haliljan kaj o Jehova prostingja tuke (Ps. 32:2). Počmingjan te dža ko sostanokija hem te vakere e javerenge bašo but šuže bukja so sikliljan. Akana sar krstimo Jehovaskoro svedoko tu phirea ko drumo so ingarela ko životo hem sian odlučno te phire ki leste ki celi večnost (Mat. 7:13, 14). Adaleske, ačhov cvrsto hem stabilno džikote služinea e Jehovaske hem sekogaš ov poslušno ko leskere zapovedija (w23.07 17, pas. 14; 19, pas. 19).

Adava so ka razmisline bašo zavet so dengjan e Jehovaske ki molitva, ka del tut sila te otfrline sekova iskušenie. Na primer, dali ka počmine te flertujne nekasaja soj ko brako? Džangjola pe kaj na. Tu više vetingjan e Jehovaske kaj nikogaš nane te kere asavko nešto. Ako na dozvolinea ki tute te razvinen pe pogrešna čuvstvija, pokasno nane te valjani te borine tut te cide len tutar. Adalea ka cide tut taro drumo e rumime manušengoro (Izr. 4:14, 15). Šaj but te pomožinel tuke adava so ka razmisline bašo e Isuseskoro primer, ov sine odlučno te radujnkerel ple Dade. Isto sar o Isus, sigate hem odlučno otfrlin sa so na svidžinela pe e Devleske koleske so dengjan lafi kaj ka služine (Mat. 4:10; Jovan 8:29). Džangjola pe kaj o nevolje hem o iskušenija dena tut prilika te sikave kaj sian odlučno ponadari da te dža palo Isus. Džikote kerea adava, šaj te ove sigurno kaj o Jehova ka pomožinel tuke (w24.03 9-10, pas. 8-10).