Oktomvri

Dali ponekogaš tuke pharo te ove poslušno? E careske e Davideske sine, adaleske molingja e Devle: „Bajrar ki mande želba te kerav tli volja“ (Ps. 51:12). O David mangela sine e Jehova. Sepak, ponekogaš sine leske pharo te ovel poslušno, adava tano slučaj amencar da. Soske? Jekh pričina tani adaja so nasledingjem i pogrešno želba te ova neposlušna. Dujto buti, o Satana celo vreme probinela te čhivel amen te bunina amen protiv o Devel, isto sar so kergja ov (2. Kor. 11:3). Hem trito, živinaja ko sveto kote so isi buntovno stavi, o „duho kova so akana vlijajnela ko neposlušna čhave“ (Ef. 2:2). Adaleske mora but te trudina amen na samo te borina amen protiv amare grešna želbe, nego hem protiv o pritisok taro Satana hem taro akava sveto so kerena le upri amende te šaj te ova neposlušna. Amen mora te trudina amen te ova poslušna e Jehovaske hem okolenge kaske so ov dengja avtoriteti (w23.10 6, pas. 1).

So šaj te sikljova taro čudo e Isuseskoro keda kergja o pani te ovel mol? Sikljovaja jekh pouka baši poniznost. O Isus na frdingja čalmi akale čudoja. Ustvari, ov nikogaš na falingja pe e bukjencar so kergja len. Namesto adava, ov ponizno sekova puti dela sine celo falba ple Dadeske (Jovan 5:19, 30; 8:28). Ako džaja palo primer e Isuseskoro agjaar so isi amen ponizno stavi, nane te frda čalmi e bukjencar so keraja len. Na valjani te falina korkori amen nego e Devle kaske so služinaja (Erem. 9:23, 24). Valjani te da le i čest koja so zaslužinela la, soske bizi e Jehovaskiri pomoš nijekh buti našti te kera la šukar (1. Kor. 1:26-31). Ako siem ponizna, tegani nane te očekujna o javera te falinen amen bašo šukar bukja so keraja e javerenge. Dovolno amenge adava so džanaja kaj o Jehova dikhela hem ceninela adava so keraja. (Sporedin Matej 6:2-4; Evr. 13:16.) Oja, amen radujnaja e Jehova keda siem ponizna sar o Isus (1. Pet. 5:6; w23.04 4-5, pas. 9; 5, pas. 11-12).

Vodimo tari e Devleskiri sila, o apostol Pavle ohrabringja e hristijanen te dikhen e javerenge te ovel šukar. Sar šaj ko sostanokija te primenina akava sovet? Agjaar so ka ovel amen ki godi kaj o javera da mangena te komentirinen. Razmislin bašo akava. Keda sian tle amalencar, dali našti te aven tutar ko lafi adaleske so samo tu vakerea nešto? Sigurno kaj na. Tu mangea ola da te keren lafi. Slično, ko sostanokija mangaja te mukha kobor so šaj poviše džene te komentirinen. Ustvari, jekh taro najšukar načinija sar šaj te ohrabrina amare phralen hem phenjen tano agjaar so ka da len prilika te sikaven pumari vera (1. Kor. 10:24). Adaleske, ponadari da te da kratka komentarija te šaj te ovel vreme poviše džene te komentirinen. Čak ako dea kratko komentari ma vaker but misle. Ako vakerea sa taro pasus, tegani nane te mukhe o javera te vakeren nešto (w23.04 22-23, pas. 11-13).

Na smejnaja te bistra kobor tano važno ponadari da te pomožina e javeren, posebno preku amari služba. Džikote siem ki služba valjani te ova fleksibilna. Amen propovedinaja manušenge so isi len različna veruvanja, stavija hem kultura. O apostol Pavle sine prilagodlivo ki pli služba hem amen šaj but te sikljova taro leskoro primer. O Isus bičhalgja e Pavle te ovel apostoli ko „javera narodija“ (Rim. 11:13). Adaleske o Pavle propovedingja e evreenge, e grkonge, školujme manušenge, obična manušenge, službenikonge hem carenge. Te šaj te resel ko vilo sa akale različna manušenge, o Pavle vakergja baši peste: „Sarinenge sium sine sa“ (1. Kor. 9:19-22). Ov prilagodingja plo način sar propovedinela sine agjaar so razmislinela sine baši e manušengiri kultura, kotar avena hem ko so verujnena. Amen da šaj te ova uspešna ki služba ako siem fleksibilna hem ako prilagodinaja amaro način sar propovedinaja sprema e manušengere potrebe (w23.07 23, pas. 11-12).

Ako nekoj tano krotko na značinela kaj tano slabo. Valjani te ova silna te šaj te ačhova smirime keda arakhljovaja ki jekh phari situacija. O sveti duh pomožinela amenge te na holjana sigate (Gal. 5:22, 23). Jekh oblik taro grčko lafi kova soj prevedimo sar „te na holjanel pe sigate“ ponekogaš koristinela pe sine te šaj te opišinel pe jekhe divo graste kova so sine dresirimo te ovel pitomo. Zamislin tuke sar jekh divo gras ovela pitomo hem krotko. Iako tano krotko, sepak tano silno. Sar amen šaj te ova krotka, a ko isto vreme silna? Našti korkori te kera adava. Valjani te molina e Devle preku pli sila te pomožinel amenge te razvina akaja but šuži osobina. But iskustvija sikavgje kaj šaj te ovel adava. Na primer, but phralja ačhile smirime keda nesave manuša probingje te provocirinen len. Adalea but džene isi len šukar mislenje bašo Svedokija (2. Tim. 2:24, 25; w23.09 15, pas. 3).

Ki jekh vizija, o apostol Jovan dikhlja 24 starešine ko nebo so obožavinena e Jehova. Ola falingje e Devle hem vakergje kaj ov zaslužinela i slava, i čest hem i mokj (Otk. 4:10, 11). Isto agjaar, e verna angelen da isi len but pričine te falinen e Jehova. Ola tane lea ko nebo hem pendžarena le but šukar. Taro bukja so kerela len o Jehova, ola šaj te dikhen save osobine isi le. E Jehovaskere postapke pottikninela len te falinen le (Jov 38:4-7). Amen da valjani te falina e Jehova ko amare molitve. Šaj te kera adava agjaar so ka vakera leske so mangaja hem so ceninaja ki leste. Džikote čitinaja hem proučinaja i Biblija, valjani te trudina amen te arakha e Jehovaskere osobine kola so posebno privlečinena amen ki leste (Jov 37:23; Rim. 11:33). Tegani, vaker adava e Jehovaske ki molitva. Isto agjaar, šaj te falina e Jehova bašo adava so pomožinela amenge hem sa amare phralenge hem phenjenge (1. Sam. 2:1, 2; w23.05 3-4, pas. 6-7).

Taro 1919 berš, o Baro Vavilon na sine le više vlijanie upro e Devleskoro narodo. Ko adava berš sine čhivdo o „verno hem mudro robo“ te šaj te pomožinel e iskrena manušenge te počminen te džan ko „Sveto Drumo“ kova samo so phravdilo (Mat. 24:45-47; Isa. 35:8). Adaleske so više angleder sine kerde podgotovke, but manuša šaj sine te džan ko adava drumo hem te doznajnen poviše bašo Jehova hem leskiri namera (Izr. 4:18). Ola isto agjaar šaj sine te počminen te živinen sprema e Jehovaskere merilija. O Jehova na očekujngja taro plo narodo te keren promene taro jekh puti. Namesto adava, sar so nakhela sine o vreme ov hari pohari pročistinela sine ple narodo. Sekova drumo valjani redovno te održinel pe. Slično, taro 1919 berš na čhinavgja pe te kerel pe buti ko „Sveto Drumo“ te šaj sa poviše manuša te ikljon taro Baro Vavilon (w23.05 17, pas. 15; 19, pas. 16).

Sekova členi taro Vodečko telo lično obučinela e pomošnikon taro različna odborija soj ko Vodečko telo. Ko momenti akala pomošnikija verno grižinena pe bašo but odgovornostija ki organizacija. Ola tane šukar spremime te šaj te prodolžinen te grižinen pe e Hristoseskere bakhrenge. Ko krajo tari bari nevolja keda o posledno da pomazaniko ka ovel lendo ko nebo, o Isus ponadari da ka vodinel e Jehovaskere narodo ki phuv hem ov ka prodolžinel verno te služinel e Jehovaske. Džanaja kaj ko adava vreme ka ova napadime taro Gog taro Magog, jekh koalicija taro sa o narodija koja so mrzinela amen (Ezek. 38:18-20). Ama adava napad kratko ka trajnel hem nane te ovel uspešno. Nane te čhinavel e Devleskere narodo te služinel e Jehovaske. O Devel sigurno ka spasinel ple narodo! Ki jekh vizija o apostol Jovan dikhlja jekh „baro mnoštvo“ taro e Hristoseskere javera bakhre. Leske sine vakerdo kaj adava „baro mnoštvo“ avela „tari bari nevolja“ (Otk. 7:9, 14). Znači, sigurna siem kaj o Jehova ka spasinel ple verna slugen! (w24.02 5-6, pas. 13-14).

So šaj te kera te šaj te dobina o sveti duh? Šaj te molina amen bašo adava, te proučina e Devleskoro Lafi hem te ova vklučime ko aktivnostija tari organizacija koja soj vodimi taro leskoro duho. Adava ka pomožinel amenge te razvina o „osobine so avena taro sveti duh“ (Gal. 5:22, 23). O Devel dela plo sveti duh samo okolenge so isi len čista misle hem postapke. Ov nane te del amen plo sveti duh ako na cidaja amendar o rumime misle hem postapinaja sprema lende (1. Sol. 4:7, 8). Te šaj ponadari da te dobina o sveti duh mora te šuna o biblisko sovet: „Ma potceninen o proroštvija“ (1. Sol. 5:20). Ko akava stiho e lafea „proroštvija“ mislinela pe ko porake so dela amen o Jehova preku plo duho. Ki lende tane vklučime o porake bašo e Jehovaskoro dive hem bašo vreme koleste so amen živinaja. Amen na mislinaja kaj o Armagedon nane te avel ko amaro vreme. Namesto adava ikeraja le ki godi agjaar so siem zafatime bukjencar kolencar so ugodinaja e Devleske (2. Pet. 3:11, 12; w23.06 12, pas. 13-14).

So valjani sar hristijanja te kera ako ikljola amenge pornografsko slika ko amare elektronska uredija? Valjani odma te cida amare jakhja latar! Ka ovel amenge polokho te kera adava ako na bistraja kaj na postojnela ništo poskapoceno taro amaro amalipe e Jehovaja. Ama, čak o slike kolenge so mislinela pe kaj nane pornografska šaj seksualno te vozbudinen amen. Soske valjani asavke da slike te izbegina te dikha? Adaleske so na mangaja te kera ni o najtikno čekori so ka čhivel amen te kera preljuba ko amaro vilo (Mat. 5:28, 29). O Dejvid, jekh starešina taro Tajland, vakerela: „Pučava man, čak ako o slike nane pornografska, dali o Jehova ka radujnel pe ako prodolžinava te dikhav len? Keda razmislinava agjaar adava pomožinela man te postapinav mudro“. I ispravno dar pomožinela amenge te postapina mudro hem te na kera nešto kolea so ka povredina e Jehova. I dar taro Devel tani „početok“ ili temeli baši mudrost (w23.06 23, pas. 12-13).

Akala „sobe“ šaj te pretstavinen amare sobranija. Džikote trajnela i bari nevolja o Jehova vetinela amenge kaj ka zaštitinel amen ako ponadari da ačhovaja ko jekhipe amare phralencar hem phenjencar. Adaleske, panda akana valjani te da sa amendar te manga amare phralen hem phenjen, a na samo te trudina amen te ova lencar šukar. Amaro životo šaj te zavisinel taro adava! „O baro dive e Jehovaskoro“ ka ovel but pharo periodi sa e manušenge (Sof. 1:14, 15). Adava značinela kaj e Jehovaskere narodoske da nane te ovel lokho. Ama ako spreminaja amen panda akana ka šaj te ačhova smirime hem te pomožina e javerenge. Agjaar ka istrajna ko sa o problemija so ka oven amen. Hem keda amare phralen ka ovel len nesavo pharipe, ka da amendar sa te pomožina len agjaar so ka sikava lenge sočuvstvo hem ka da len adava so valjani lenge. Ako panda akana sikljovaja te manga amare phralen hem phenjen, nane te ovel amenge pharo te sikava lenge mangipe ki idnina. Tegani o Jehova ka del amen večno životo hem nikogaš više nane te setina amen ko sa o katastrofe hem nevolje so sine amen ko akava sveto (Isa. 65:17; w23.07 7, pas. 16-17).

E Devleskoro Lafi but puti opišinela e verna manušen sar silna. Ama čak o najsilna maškar lende na osetingje pe sekogaš silna. Na primer, ki jekh prilika o cari o David vakergja kaj o Jehova dengja le hrabrost hem sila (Ps. 138:3). Ama ko javera prilike darandilo (Ps. 55:5). Iako e Samsone sine le posebno bari sila koja so avela sine taro e Devleskoro duho, sepak ov sine svesno kaj adaja sila avela taro Devel hem kaj bizi late ov ka ovel „sar sa o javera manuša“ (Sud. 14:5, 6; 16:17). Taro akava jasno dikhela pe kaj akala verna manuša sine zorale samo adaleske so o Jehova dengja len sila. O apostol Pavle isto agjaar priznajngja kaj valjani leske sila taro Jehova (2. Kor. 12:9, 10). Le sine le problemija sastipaja (Gal. 4:13, 14). Ponekogaš sine leske pharo te kerel adava soj ispravno (Rim. 7:18, 19). A ponekogaš sine but sekirimo hem darala sine so ka slučinel pe lea (2. Kor. 1:8, 9). Sepak keda o Pavle sine slabo, ov sine silno. Sar? O Jehova dengja le i sila so valjani leske te šaj te istrajnel ko nevolje (w23.10 12, pas. 1-2).

Ako ponekogaš mislinaja kaj na vredinaja, šukar tano te setina amen kaj korkori o Jehova privlečingja amen ki peste (Jovan 6:44). Ov dikhela o šukar bukja ki amende kola so šaj amen korkori na dikhaja len hem ov džanela so čače isi amen ko vilo (2. Let. 6:30). Adaleske, šaj te verujna le keda ov vakerela amenge kaj siem skapocena (1. Jov. 3:19, 20). Angleder te doznajnen o čačipe, nesave amendar kergje bukja baši kolende so šaj panda osetinena pe kriva (1. Pet. 4:3). Javera kola so verno služinena e Jehovaske šaj panda borinena pe pogrešna želbencar. Sar tano tuja, dali tlo vilo osudinela tut bašo nešto? Ako oja, šaj te utešinel tut adava so ka džane kaj javera da verna sluge e Jehovaskere borinena pe sine slična čuvstvoncar. Na primer, o apostol Pavle sine but razočarimo keda razmislinela sine bašo ple slabostija (Rim. 7:24). Džangjola pe, o Pavle kaingja pe bašo ple grevija hem krstingja pe. Sepak, baši peste vakergja kaj tano „najtikno taro apostolija“ hem kaj tano najbaro grešniko (1. Kor. 15:9; 1. Tim. 1:15; w24.03 27, pas. 5-6).

Jekh pouka so šaj te sikljova tari lošno odluka so angja la o cari o Joas tano adava kaj valjani te birina amala kola so šukar ka vlijajnen upri amende — amala kola so mangena e Jehova hem kola so mangena te radujnkeren le. Na valjani te družina amen samo okolencar soj ki amari vozrast. Ma bistre, o Joas sine but poterno taro plo amal o Jodaj. Keda birinea amala, puč tut: „Dali pomožinena man te bajrarav mli vera ko Jehova? Dali pottikninena man te živinav sprema e Devleskere merilija? Dali kerena lafi bašo Jehova hem bašo adava so sikljovena tari Biblija? Dali poštujnena e Devleskere merilija? Dali vakerena mange samo adava so mangava te šunav, ili isi len hrabrost te isprajnen man keda valjani?“ (Izr. 27:5, 6, 17). Iskreno, na valjani tuke amala so na mangena e Jehova. Ama ako tle amala mangena e Jehova, ma cide tut lendar ola sekogaš ka pomožinen tuke (Izr. 13:20; w23.09 9-10, pas. 6-7).

I bukva alfa tani i prvo bukva tari grčko azbuka, a omega i posledno. Adalea so koristinela o bukve alfa hem omega, o Jehova pomožinela amen te haljova kaj keda počminela nešto, ov sigurno ka završinel adava. Otkeda o Jehova stvoringja e Adame hem e Eva, ov vakergja lenge: ’Te ovel tumen pherdo čhave hem te oven but džene, pheren i phuv hem vladinen upri late‘“ (1. Moj. 1:28). Keda o prvo puti vakergja pli namera, o Jehova sar te phene vakergja „alfa“. Ka avel vreme keda e Adameskere hem e Evakere poslušna hem sovršena potomcija ka pheren i phuv hem ka keren la raj. Tegani o Jehova sar te phene ka vakerel „omega“. Otkeda završingja stvoribaja o nebo hem i phuv hem sa soj ki lende, o Jehova vakergja nešto soj sar garancija. Ov posvetingja o eftato dive te šaj te ispolninel pli namera e manušencar hem e phuvjaja. Leskiri namera celosno ka ispolninel pe dži ko krajo taro adava dive (1. Moj. 2:1-3; w23.11 5-6, pas. 13-14).

O doslovno patujbe taro Vavilon dži ko Izrael sine pharo hem šaj sine te trajnel okolu štar masek. Ama o Jehova vetingja lenge kaj ka cidel sekoja prečka so šaj sine te čhinavel len ko adava drumo. O verna Evreija džanle kaj o blagoslovija taro adava so ka iranen pe ko Izrael sine but pobare tari bilo koja žrtva so valjani sine te keren la. I najbari nagrada sine lenge adaja so šaj sine te obožavinen e Jehova ko čisto način. Ko Vavilon na sine nijekh hrami bašo Jehova. Adari na sine žrtveniko kote so o Izraelcija šaj sine te den pumare žrtve sprema e Mojseeskoro zakoni hem na sine organizirime sveštenikija kola so šaj sine te den adala žrtve. Isto agjaar, ki adaja diz o manuša obožavinena sine hovavne devlen hem na poštujnena sine ni hari e Jehova ili leskere merilija. Adaleske o Evreija kola so mangena sine e Jehova edvaj adžikerena sine te iranen pe ki pumari phuv kote so šaj palem te obožavinen le ko čisto način (w23.05 15, pas. 3-4).

Valjani amenge pomoš tari e Devleskiri sila te šaj ponadari da te ponašina amen sar „čhave e svetlinakere“. Soske? Adaleske so ni hari nane lokho te ačhova čista ko akava nemoralno sveto (1. Sol. 4:3-5, 7, 8). E Devleskiri sila šaj te pomožinel amen te borina amen te šaj te na razmislina sar o manuša taro akava sveto, kote soj tane vklučime lengere filozofie hem stavija kola so nane sprema e Devleskoro način sar razmislinela. Isto agjaar, e Devleskiri sila šaj te pomožinel amen te sikava sekova šukaripe hem pravednost (Ef. 5:9). Jekh način sar šaj te dobina e Devleskiri sila tano agjaar so ka molina amen baši late. O Isus vakergja kaj o Jehova „ka del pli sila okolenge so rodena lestar“ (Luka 11:13). Isto agjaar, e Devleskiri sila dobinaja la keda zaedno amare phralencar hem phenjencar falinaja e Jehova ko amare sostanokija (Ef. 5:19, 20). Adava so e Devleskiri sila vlijajnela šukar upri amende ka pomožinel amen te živina agjaar sar so mangela o Devel (w24.03 23-24, pas. 13-15).

Dali valjani tuke poviše strplivost? Ako oja, molin tut bašo adava. I strplivost tani osobina so avela taro sveti duh (Gal. 5:22, 23). Adaleske, šaj te molina amen e Jehovaske bašo sveti duh te šaj te pomožinel amen te razvina akaja osobina. Ako arakhljovaja ki nesavi situacija kote so ka ovel amenge pharo te sikava strplivost, tegani šaj te molina amen bašo leskoro duho te šaj te ova strpliva (Luka 11:13). Isto agjaar, šaj te roda pomoš taro Jehova te dikha ko bukja sar so dikhela ov. Osven so ka molina amen, valjani te da amendar sa te šaj te ova strpliva sekova dive. Znači, ako ponadari da molinaja amen baši strplivost hem trudinaja amen te sikava akaja osobina, o Jehova ka pomožinel amenge te ova strpliva iako angleder šaj na siem sine asavke. Isto agjaar, razmislin bašo bibliska primerija. Ki Biblija isi but primerija taro manuša kola so sine strpliva. Ako razmislinaja baši lende, ka šaj te sikljova ko kola načinija šaj te ova strpliva (w23.08 22, pas. 10-11).

O Isus uveringja e apostol Petare kaj o Jehova ka grižinel pe leske. Otkeda voskresningja o Isus panda jekh puti pomožingja e Petare hem e javere apostolen čudoja te astaren mačhe (Jovan 21:4-6). Akava čudo uveringja e Petare kaj o Jehova but lokheste šaj te pomožinel e Petare te grižinel pe bašo leskere materijalna potrebe. Šaj ki adaja prilika o Petar setingja pe ko e Isuseskere lafija keda manglja te vakerel kaj o Jehova ka grižinel pe okolenge so „najangle rodena o Carstvo“ (Mat. 6:33). Sa akava pomožingja e Petareske te čhivel i služba ko prvo than, a na te astaren pe mačhe. Ov hrabro propovedingja ki Pedesetnica 33-to berš a.e. hem pomožingja poviše milja manušenge te prifatinen o šukar haberi (Apo. 2:14, 37-41). Palo adava pomožingja e Samarjanenge hem okolenge so na sine Evreija te prifatinen e Isuse (Apo. 8:14-17; 10:44-48). O Jehova sigurno koristingja e Petare te pomožinel manušenge taro različna nacie te aven ko sobranie (w23.09 20, pas. 1; 23, pas. 11).

Okolu duj berš otkeda o Vaviloncija uništingje o Erusalim. O vavilonsko cari o Navuhodonosor dikhlja jekh strašno suno bašo jekh baro kipi. Ov zakaningja pe kaj ka mudarel sa e mudra manušen, maškar kolende so sine hem o Daniel, ako na vakerena leske savo suno dikhlja hem so značinela adava (Dan. 2:3-5). O Daniel mora sine te kerel nešto odma inače ka oven sine mudarde but manuša. Ov gelo ko cari hem molingja le te del le vreme te šaj te vakerel leske so značinela o suno (Dan. 2:16). A bašo adava valjangja leske hrabrost hem vera. Soske? Ki Biblija nigde na pišinela kaj o Daniel angleder objasningja so značinela nesavo suno. Ov zamolingja ple amalen „te molinen baši milost e Devle soj ko nebo baši adaja tajna“ (Dan. 2:18). O Jehova odgovoringja ko lengere molitve. Adaleske so o Jehova pomožingja e Danieleske, ov šaj sine te objasninel e careskoro suno hem agjaar o Daniel hem leskere amala ačhile dživde (w23.08 3, pas. 4).

Razmislin soske tano korisno te ove strplivo. Keda siem strpliva, tegani siem poradosna hem posmirime. Znači i strplivost šaj te pomožinel amenge te ova emocionalno hem fizičko saste. Keda siem strpliva e javerencar tegani nakhaja pošukar lencar. Agjaar ko amaro sobranie ka ovel jekhipe. Ako nekoj nervirinela amen, adava so nane te holjana sigate ka pomožinel amenge te na kera panda pološno i situacija (Ps. 37:8; Izr. 14:29). Ama najvažno taro sa, keda siem strpliva amen džaja palo primer amare nebesno Dadeskoro hem ovaja lea popaše. Čače, i strplivost tani but šuži osobina koja so koristinela sarinenge. Iako nane lokho sekogaš te ova strpliva, adaleske so o Jehova pomožinela amenge šaj ponadari da te razvina akaja osobina. Hem džikote strplivo adžikeraja o nevo sveto, šaj te ova uverime kaj „e Jehovaskere jakhja tane upro okola so darana lestar, upro okolende so adžikerena leskoro verno mangipe“ (Ps. 33:18). Adaleske ponadari da te sikava strplivost (w23.08 22, pas. 7; 25, pas. 16-17).

O Jakov objasningja kaj jekh manuš šaj te vakerel kaj isi le vera, ama leskere postapke na sikavena adava (Jak. 2:1-5, 9). O Jakov isto agjaar kergja lafi bašo jekh manuš kova so dikhlja kaj leskoro phral ili phen nane len so te uraven ili so te han a na kerela ništo te šaj te pomožinel len. Čak ako adava manuš vakerela kaj isi le vera, leskere postapke na sikavena adava. Adaleske, leskiri vera na vredinela (Jak. 2:14-16). O Jakov vakergja kaj i Raav tani šukar primer koja so ple postapkencar sikavgja kaj isi la vera (Jak. 2:25, 26). Oj šungja bašo Jehova hem halili kaj ov pomožinela e Izraelcon (Is. Nav. 2:9-11). Lakere postapke sikavgje kaj isi la vera agjaar so zaštitingja duje izraelsko špionen keda lengoro životo sine ki opasnost. Adaleske, baši akaja nesovršeno džuvli koja so na sine Izraelka vakerela pe kaj sine pravedno isto sar o Avraam. Taro lakoro primer sikljovaja kobor tano važno amare postapkencar te sikava kaj isi amen vera (w23.12 5-6, pas. 12-13).

Sar hristijanja na mangaja te haljova samo o osnovna bibliska sikljojba. Mangaja te sikljova „čak e Devleskere hor bukja“ hem adava šaj te kera le soske pomožinela amen e Devleskiri sila (1. Kor. 2:9, 10). Ko tlo lično proučibe šaj te proučine podetalno nesavi tema te šaj te ove paše e Jehovaja. Na primer, šaj te istražine sar o Jehova sikavgja plo mangipe ple slugenge taro purano vreme hem sar adava uverinela tut kaj tute da mangela tut. Isto agjaar šaj te proučine bašo adava sar o Jehova organiziringja e Izraelcon te obožavinen le hem te sporedine adalea sar o Jehova avdive mangela te obožavina le. Ili šaj te proučine ko detalija sekova proroštvo so ispolningja le o Isus džikote sine tele ki phuv. Šaj te uživine džikote čitinea asavke teme ako koristinea o Priračniko istražibaske e Jehovaskere svedokongoro. Ako proučinea hor i Biblija adava šaj te zojrakerel tli vera hem te pomožinel tut „šukar te pendžare e Devle“ (Izr. 2:4, 5; w23.10 18-19, pas. 3-5).

O apostol Pavle pišinela: „Neka ovel tumen baro mangipe“. O dujto delo taro stiho objasninela ko so pottikninela amen o baro mangipe. Pottikninela amen te učhara o grevija amare phralengere hem phenjengere. Akava šaj te sporedina le jekhe primerea: Zamislin tuke astali kole so isi le but fleke hem tano grbimo. Šaj te la jekh čaršafi hem te phrava le upro astali te šaj te učhara na samo jekh ili duj fleke, ili grbime thana, nego poviše. Slično, ako isi amen baro mangipe sprema amare phralja hem phenja ka šaj te učhara, javere lafencar te prostina, na samo jekh ili duj slabostija nego „but grevija“. Amaro mangipe valjani te ovel doborom silno so ka prostina e javerengere greške — čak keda adava nane lokho (Kol. 3:13). Keda prostinaja e javerenge, amen sikavaja kaj amaro mangipe tano silno hem kaj mangaja te radujnkera e Jehova (w23.11 10-12, pas. 13-15).

Keda e care e Josija sine le 26 berš, ov počmingja te obnovinel o hrami. Džikote kerena sine buti ko hrami, arakhle „o lil e Jehovaskere zakoneskoro, so sine dendo preku o Mojsej“. Keda o cari šungja so sine pišimo, ov odma kergja promene te šaj te ovel poslušno ko adava so sine pišimo (2. Let. 34:14, 19-21). Šaj trudinea tut redovno te čitine i Biblija. Dali uživinea ko adava? Dali pišinea tuke stihija kola so šaj te pomožinen tuke lično? Keda e Josija sine le 39 berš, ov kergja greška kolaja so našavgja plo životo. Namesto te pučel e Jehova bašo vodstvo, le sine le doverba korkori peste (2. Let. 35:20-25). Taro akava šaj te sikljova nešto. Bizi razlika kobor berš isi amen ili kobor vreme više proučinaja i Biblija, mora ponadari da te roda e Jehova. Ko adava tano vklučimo redovno te molina amen bašo vodstvo, te proučina leskoro Lafi hem te primenina o sovetija so dobinaja len taro zrela hristijanja. Agjaar, verojatno nane te kera bare greške hem ka ova panda poradosna (Jak. 1:25; w23.09 12, pas. 15-16).

Ki Biblija tane spomnime but džuvlja kola so mangle e Jehova hem služingje leske. Ola tane šukar primer sarinenge amenge. Ola sine „uramnotežena“ hem „verna ko sa“ (1. Tim. 3:11). Osven adava, o phenja šaj te arakhen zrela hristijanke ko pumaro sobranie kolengoro so primer vredinela te sledinen. Terne phenjalen, razmislinen kole zrela phenjengoro primer šaj te sledinen. Primetinen kola šuže osobine isi len. Palo adava razmislinen sar šaj tumen da te sikaven o ista osobine. I poniznost tani važno osobina so valjani te ovel e zrelo hristijanen. Ako jekh džuvli tani ponizno, ka ovel la šukar amalipe e Jehovaja hem e javerencar. Na primer, jekh romni so mangela e Jehova ponizno birinela te prifatinel o načelo bašo poglavarstvo kova so dengja le lakoro nebesno Dad (1. Kor. 11:3). Akava načelo šaj ko različna načinija te primeninel pe hem ko sobranie hem ki familija (w23.12 18-19, pas. 3-5).

O Jehova očekujnela e romestar te mangel ple romnja hem te grižinel pe bašo lakere fizička, emocionalna hem duhovna potrebe. Valjani te razvine i sposobnost te procenine, te ovel tut poštovanje sprema o džuvlja hem te ove doverlivo. Otkeda ka ženine tut, šaj ka ove dad. So šaj te sikljove taro Jehova bašo adava sar te ove šukar dad? (Ef. 6:4). O Jehova vakergja ple čhaveske kaj mangela le hem kaj kerela le radosno, ov na garavgja lestar adava (Mat. 3:17). Ako ovea dad, redovno uverin tle čhaven kaj mangea len. Spremno pofalin len bašo šukar bukja so kerena. O dada kola so džana palo e Jehovaskoro primer pomožinena pumare čhavenge te oven zrela hristijanja. Šaj panda akana te spremine tut baši akaja uloga agjaar so mangipaja ka grižine tut e javerenge tari tli familija hem taro tlo sobranie hem agjaar so ka sikave kaj mangea len hem ceninea len (Jovan 15:9; w23.12 28-29, pas. 17-18).

Iako verno služinaja e Jehovaske, amen da doživinaja pharipa hem nasvaljovaja, isto sar sa o javera manuša. Osven adava, šaj ka valjani te doživina protivibe ili progonstvo okolendar so mrzinena e Devleskere narodo. Iako o Jehova na zaštitinela amen taro akala pharipa, ov vetinela kaj ka pomožinel amenge (Isa. 41:10). Keda ov pomožinela amen, šaj te ačhova radosna, te ana šukar odluke hem te ačhova leske verna čak keda nakhaja taro najphare situacie. O Jehova vetinela amenge kaj ka del amen plo mir (Fil. 4:6, 7). Keda isi amen mir taro Devel, tegani amare misle hem amaro vilo tane rahati hem osetinaja amen smirime adaleske so siem paše amala lea. Akava mir tano „upreder sekoja misla“. Akava čuvstvo tano but pošukar nego adava so šaj amen te mislina amenge. Dali slučingja pe tuke nekogaš taro jekh puti te osetine tut smirimo otkeda taro vilo molingjan tut e Jehovaske? Asavko čuvstvo ustvari tano o mir taro Devel (w24.01 20, pas. 2; 21, pas. 4).

Okola so mangena e Devle pottiknime tane te falinen leskoro anav celo vilea. O cari o David džanlja kaj keda falinaja e Jehovaskoro anav, adalea falinaja e Devle. Keda šunaja o anav Jehova, odma so avela amenge ki godi tano adava savi ličnost tano ov, leskere šukar osobine hem sa adava so ov stvoringja. O David manglja te falinel o anav ple nebesno Dadeskoro, adaleske so ki leste dikhela sine sar nešto soj sveto. Ov manglja te kerel adava celo ple vilea. Slično, o levitija da falinena sine e Jehova agjaar so predvodinena sine ko giljajbe. Ola ponizno priznajngje kaj e Jehovaskoro sveto anav zaslužinela but pobari falba tari adaja so ola dena la pumare lafencar (Neem. 9:5). Sigurno kaj asavki ponizno falba taro vilo but radujnkergja e Jehova (w24.02 9, pas. 6).

O Jehova nane te dikhel ki tute sar neuspešno ako na ispolningjan tli cel koja so nane realno sprema tle okolnostija (2. Kor. 8:12). Sikljov taro phare situacie. Ma bistre so uspejngjan te kere dži akana. I Biblija vakerela: „O Devel nane nepravedno, pa te bistrel adava so kergjen“ (Evr. 6:10). Adaleske na valjani ni tu da te bistre adava so kergjan. Razmislin bašo celija so više ispolningjan len, sar na primer te ove paše amal e Jehovaja, te kere e javerencar lafi baši leste ili te krstine tut. Isto sar so napredujngjan hem ispolningjan tle celija so sine tut angleder, agjaar tu šaj ponadari da te napredujne hem te uspejne te ispolnine tle celija so isi tut akana. Keda o Jehova pomožinela tut, tu šaj te rese ki tli cel. Džikote trudinea tut te ispolnine tli cel, ma bistre te uživine hem te dikhe sar o Jehova pomožinela tut hem blagoslovinela tut džikote kerea adava (2. Kor. 4:7). Ako na otkažinea tut, ka dobine panda pobare blagoslovija (Gal. 6:9; w23.05 31, pas. 16-18).

O Jehova rodela načinija te šaj te sikavel ple slugenge kaj mangela len hem kaj tano zadovolno lendar. Ki Biblija tane pišime duj situacie keda o Jehova vakergja e Isuseske kaj mangela le hem kaj kerela le radosno (Mat. 3:17; 17:5). Dali mangea te šune e Jehova sar vakerela tuke kaj tano zadovolno tutar? Amen našti doslovno te šuna e Jehovaskoro glaso, ama ov kerela amencar lafi preku i Biblija. Amen šaj te „šuna“ sar o Jehova vakerela amenge kaj tano zadovolno amendar keda čitinaja o lafija e Isuseskere soj pišime ko evangelija. O Isus sovršeno sikavela sine o osobine ple Dadeskere. Adaleske keda čitinaja sar o Isus vakerela ple učenikonge kaj mangela len hem ceninela len, šaj te zamislina amenge sar o Jehova vakerela adala lafija amenge (Jovan 15:9, 15). Ako isi amen nevolje adava na značinela kaj o Devel nane više zadovolno amendar. Namesto adava, ola dena amen prilika te sikava kobor but mangaja e Devle hem kobor bari doverba isi amen ki leste (Jak. 1:12; w24.03 28, pas. 10-11).