Noemvri

Ako sian roditeli, pomožin tle čhavenge te spreminen komentarija so odgovorinena lengere beršenge. Ponekogaš ko sostanokija proučinena pe seriozna teme, sar soj bračna problemija ili moralna merilija. Adaleske verojatno ka oven samo jekh ili duj pasusija kote so jekh čhavo šaj te komentirinel. Isto agjaar, pomožin tle čhavenge te haljoven soske nane te den len te komentirinen sekova puti keda ka vazden pumaro vas. Ako objasninea lenge akava, nane te oven razočarime keda e javerenge ka den te komentirinen namesto lenge (1. Tim. 6:18). Sarine amen šaj te spremina ohrabruvačka komentarija kola so ka slavinen e Jehova hem ka ohrabrinen amare phralen (Izr. 25:11). Ako isi amen prilika te vakera amaro kratko iskustvo, na valjani te vakera but baši amende (Izr. 27:2; 2. Kor. 10:18). Namesto adava, valjani te trudina amen te vakera poviše bašo Jehova, bašo leskoro Lafi hem bašo leskoro narodo (Otk. 4:11; w23.04 24-25, pas. 17-18).

O mangipe tano važno te šaj te ačhova džangavde hem trezvena (Mat. 22:37-39). O mangipe sprema o Devel pomožinela amen te istrajna ko propovedibe iako šaj ka oven amen problemija (2. Tim. 1:7, 8). Isto agjaar, adaleske so mangaja e manušen so na služinena e Jehovaske amen ponadari da propovedinaja, čak svedočinaja preku telefoni hem pismija. Amen ponadari da nadinaja amen kaj jekh dive o manuša ka meninen pe hem ka počminen te keren adava soj ispravno (Ezek. 18:27, 28). Amen isto agjaar mangaja amare phralen hem phenjen. Sikavaja asavko mangipe agjaar so ohrabrinaja amen maškar amende hem izgradinaja jekh jekhe (1. Sol. 5:11). Isto sar so o vojnikija zaštitinena pe keda tane jekh uzo jekh ki borba, agjaar amen ohrabrinaja amen jekh jekhea. Amen nane nikogaš namerno te povredina amare phralen hem phenjen ili te irana bašo lošnipe lošnipaja (1. Sol. 5:13, 15). Amaro mangipe isto agjaar sikavaja le agjaar so poštujnaja e phralen kola so predvodinena ko sobranie (1. Sol. 5:12; w23.06 10, pas. 6; 11, pas. 10-11).

Jekh način sar šaj te bajrara amari vera tano ako hor razmislinaja baši otkupnina. I otkupnina tani garancija kaj e Devleskere vetuvanja ka ispolninen pe. Keda šukar razmislinaja bašo adava soske sine dendi i otkupnina hem koja bari žrtva kergja o Jehova, tegani bajraraja amari vera kaj sigurno ka ispolninel pe e Devleskoro vetuvanje bašo večno životo ko pošukar sveto. Soske šaj te vakera akava? Te razmislina hari bašo adava so mora sine te keren o Jehova hem o Isus baši otkupnina. O Jehova taro nebo bičhalgja ple mangle prvobijame Čhave kolea so sine najpaše, te bijangjovel ki phuv sar sovršeno manuš. Ki phuv o Isus doživingja razna pharipa. Palo adava sine mučimo hem mulo bare dukhencar. Akaja sine but bari cena so platingja la o Jehova. Amaro manglo Devel nikogaš na bi dozvolinela sine leskoro Čhavo te ovel mučimo hem te merel te šaj samo jekh kratko vreme te uživina ko životo (Jovan 3:16; 1. Pet. 1:18, 19). Adaleske so o Jehova platingja bari cena, ov ka kerel sa te šaj te ovel amen prilika večno te živina ko nevo sveto (w23.04 27, pas. 8-9).

Dali e Jehova isi le želba te voskresninel e mulen? Sigurno kaj isi le. Ov vodingja nekobore bibliska pisatelen te pišinen leskoro vetuvanje bašo voskresenie so ka ovel ki idnina (Isa. 26:19; Otk. 20:11-13). Keda o Jehova dela lafi bašo nešto, ov sekogaš ikerela pe ko adava (Is. Nav. 23:14). Ustvari, o Jehova edvaj adžikerela te voskresninel e mulen. Razmislin bašo adava so vakergja o Jov. Ov sine sigurno kaj čak ako merela, e Jehova ka ovel le bari želba te dikhel le palem dživdo (Jov 14:14, 15). E Jehova isi le i isto želba sa ple slugenge so mule. Ov edvaj adžikerela te iranel len ko životo hem sarine te oven saste hem radosna. A so ka ovel e milijarde manušencar kola so mule bizo te ovel len prilika te doznajnen o čačipe bašo Jehova? Amaro manglo Devel mangela len da te voskresninel (Apo. 24:15). Ov mangela te del len prilika te oven leskere amala hem te živinen zasekogaš ki phuv (Jovan 3:16; w23.04 9, pas. 5-6).

Sar šaj te bajrare tli nadež? Na primer, ako isi tut nadež te živine večno ki phuv, čitin sar i Biblija opišinela o raj hem razmislin bašo adava (Isa. 25:8; 32:16-18). Razmislin savo ka ovel o životo ko nevo sveto. Zamislin tuke kaj sian adathe. Ako isi amen ki godi i nadež bašo nevo sveto, amare problemija ka oven „momentalna hem lokhe“ (2. Kor. 4:17). I nadež so dengja tut o Jehova ka kerel tut silno. Ov više obezbedingja adava so valjani tuke te šaj te dobine sila. Adaleske, keda valjani tuke pomoš te šaj te ispolnine nesavi zadača, te istrajne ki nesavi nevolja ili te ačhove radosno, molin tut taro vilo e Jehovaske hem rode lestar vodstvo agjaar so ka proučine. Isto agjaar prifatin o ohrabruvanje taro tle phralja hem odvojn tuke vreme redovno te razmisline baši nadež. Tegani ka dobine „sila tari e [Devleskiri] slavno mokj“ te šaj strplivo hem radosno te istrajne ko sa (Kol. 1:11; w23.10 17, pas. 19-20).

Isi amen but pričine soske šaj te blagodarina amen e Jehovaske ki molitva. Šaj te blagodarina amen leske baši sekoja šukar buti so isi amen, ustvari sekova šukar poklon avela lestar (Jak. 1:17). Na primer, šaj te sikava amaro cenenje e Jehovaske baši amari šuži phuv hem bašo čudesna bukja so kergja len. Isto agjaar, šaj te vakera leske kobor siem blagodarna bašo amaro životo, amari familija, amare amala hem i nadež so isi amen. Hem šaj te blagodarina e Jehovaske bašo adava so šaj te ova lea amala. Šaj ka valjani but te trudina amen te razmislina taro kola pričine amen lično valjani te ova blagodarna e Jehovaske. Živinaja ko sveto kote so o manuša ni hari nane blagodarna. But puti o manuša koncentririnena pe ko adava so mangena te ovel len, namesto ko adava so više isi len. Ako mukhaja asavko stavi te vlijajnel upri amende tegani ka molina amen e Jehovaske samo keda ka valjani te roda lestar nešto. Te šaj te na slučinel pe adava valjani te prodolžina te bajrara hem te sikava amaro cenenje bašo sa so kerela amenge o Jehova (Luka 6:45; w23.05 4, pas. 8-9).

Adaleske so but mangela amen, o Jehova na mangela te dikhel sar mučinaja amen (Isa. 63:9). Sepak ov nane te cidel sa amare problemija kola so šaj te sporedinen pe rekaja ili jagaja (Isa. 43:2). Ama ov vetinela kaj ka pomožinel amen te „nakha preku“ lende. Isto agjaar nane te dozvolinel o problemija so isi amen te keren amenge trajno šteta. O Jehova preku pli sila ka pomožinel amenge te istrajna (Luka 11:13; Fil. 4:13). Agjaar, ka ova uverime kaj ov sekogaš ka del amen baš adava so valjani amenge te šaj te istrajna hem te ačhova leske verna. O Jehova očekujnela amendar te ovel amen doverba ki leste (Evr. 11:6). Ponekogaš amare problemija šaj te oven amenge doborom phare so našti te izdržina len. Šaj čak te počmina te sumnina amen dali o Jehova čače ka pomožinel amen. Ama i Biblija uverinela amen kaj e Devleskere silaja ka šaj „zidija te uklja“ (Ps. 18:29). Adaleske, namesto te mukha o sumnje te bajron ki amende, valjani te molina amen veraja e Jehovaske hem te ovel amen doverba kaj ov ka odgovorinel amenge (Jak. 1:6, 7; w23.11 22, pas. 8-9).

Kobor šuže lafencar tano opišimo o čačutno mangipe ko brako. Akala lafija tane but ohrabruvačka soske sikavena kaj tumen šaj te ovel tumen mangipe so na čhinavgjovela. Dali ko jekh brako ka ovel mangipe so ka trajnel celo životo but zavisinela taro rom hem tari romni. Te vakera jekh primer. Jekh jag šaj te thabljol sa džikote nekoj čhivela kašta ki late. Ako nikoj na kerela adava, i jag ka ačhol. Slično, o mangipe maškar o rom hem i romni šaj te ovel silno samo ako kerena nešto bašo pumaro brako. Ponekogaš šaj te slučinel pe o mangipe te šudrol, posebno keda isi len finansiska problemija, problemija sastipaja ili keda bajrarena čhaven. Znači, te šaj te na ačhol i „jag so dela la o Jah“, hem o rom hem i romni valjani te keren buti ko plo amalipe e Jehovaja (w23.05 20-21, pas. 1-3).

So valjani te kera te šaj te ova hrabra? Amare roditelija šaj te pottikninen amen te ova hrabra, ama ola našti te prenesinen amenge akaja osobina sar ka phene tani nesavo familijarno nasledstvo. Keda trudinaja amen te razvina hrabrost, adava tano sar ka phene sikljovaja nevi veština. Jekh način sar šaj te ove šukar ki nesavi veština tano agjaar so vnimatelno ka dikhe so kerela o majstori hem palo adava tu da ka probine te kere o isto. Slično, amen sikljovaja te ova hrabra agjaar so vnimatelno dikhaja sar o javera sikavena akaja osobina hem palo adava trudinaja amen te kera o isto. Isto sar o Daniel, amen da valjani šukar te pendžara e Devleskoro Lafi. Amen valjani te ova paše e Jehovaja agjaar so ka molina amen leske često hem ka vakera leske sar osetinaja amen. Isto agjaar, valjani te ovel amen doverba ki leste agjaar so ka ova uverime kaj ov sekogaš ka ovel uzi amende. Tegani keda amari vera ka ovel ispitimi, ka ova hrabra. O javera but puti poštujnena okolen so sikavena hrabrost. Isto agjaar, ola šaj te pomožinen okolenge soj iskrena te zapoznajnen e Jehova. Znači, isi amen šukar pričine soske valjani te razvina hrabrost (w23.08 2, pas. 2; 4, pas. 8-9).

O grčko lafi soj prevedimo sar „ispitinen“, koristinela pe sine te šaj te opišinel pe o način sar o manuša proverinena sine dali nesave metalija, sar soj zlato hem srebro, tane has. Amen da valjani te ispitina ili te proverina adava so šunaja ili so čitinaja te šaj te dikha dali tano točno. Akava tano but považno amen te kera soske i bari nevolja tani paše. Namesto te verujna ko sa so vakerena o javera, amen koristinaja amari godi te šaj te sporedina adava so čitinaja ili adava so šunaja adalea so vakerela i Biblija hem e Jehovaskiri organizacija. Ako keraja agjaar nane te ova hovavde tari nisavi demonsko propaganda (Izr. 14:15; 1. Tim. 4:1). Sar grupa, e Devleskoro narodo ka preživinel i bari nevolja. Ama sar poedincija na džanaja so ka ovel amencar tajsa (Jak. 4:14). Sepak, bizi razlika dali ka preživina i bari nevolja ili ka mera angleder te avel, ako ačhilem verna ka dobina večno životo. Adaleske te koncentririna amen ki amari but šuži nadež hem te ačhova spremna bašo e Jehovaskoro dive! (w23.06 13, pas. 15-16).

Amen na džanaja sar nesave bibliska proroštvija ka ispolninen pe (Dan. 12:8, 9). Ama, samo adaleske so na džanaja celosno sar nesavo proroštvo ka ispolninel pe na značinela kaj nane te ispolninel pe. Šaj te ova sigurna kaj o Jehova ko pravo vreme ka otkrinel amenge adava so mora te džana sar so kergja adava ko purano vreme. Panda hari ka objavinel pe „mir hem sigurnost“ (1. Sol. 5:3). Odma palo adava o politička sile ka napadinen e hovavne religija hem ka uništinen la (Otk. 17:16, 17). Tegani ka napadinen e Devleskere narodo (Ezek. 38:18, 19). Akala nastanija direktno ka ingaren dži ki vojna Armagedon (Otk. 16:14, 16). Šaj te ova sigurna kaj akala nastanija ka slučinen pe panda hari. Dži tegani, ponadari da te sikava cenenje amare nebesno Dadeske agjaar so vnimatelno ka dikha sar ispolninena pe o bibliska proroštvija hem ka pomožina e javerenge te keren o isto (w23.08 13, pas. 19-20).

Keda o apostol Pavle kergja lafi baši vera, nadež hem mangipe, ov vakergja kaj i najbari osobina taro akala trin tano o mangipe (1. Kor. 13:13). Soske vakergja adava o Pavle? Ki idnina nane više te valjanel amenge vera ko e Devleskere vetuvanja bašo nevo sveto, a ni nadež kaj adala vetuvanja ka ispolninen pe adaleske so više ka oven ispolnime. Ama sekogaš ka valjani te ovel amen mangipe sprema o Jehova hem o manuša. Ustvari, amaro mangipe sprema lende ka bajrol sa poviše ki celi večnost. Isto, adalea so sikavaja mangipe amare phralenge, amen dokažinaja kaj siem čačutne hristijanja. O Isus vakergja ple apostolenge: „Agjaar sarine ka džanen kaj sien mle učenikija, ako isi tumen mangipe maškar tumende“ (Jovan 13:35). O mangipe isto agjaar pomožinela amen te ova ko jekhipe. O Pavle vakergja kaj o mangipe „sovršeno povrzinela“ (Kol. 3:14). O apostol Jovan pišingja ple phralenge: „Okova so mangela e Devle, valjani te mangel hem ple phrale“ (1. Jov. 4:21). Ustvari, keda sikavaja mangipe jekh jekheske, amen sikavaja kaj mangaja e Devle (w23.11 8, pas. 1, 3).

I Biblija sporedinela amaro hristijansko životo jekhe trkaja. Okola so uspešno prastana ki akaja trka ka dobinen večno životo (2. Tim. 4:7, 8). Valjani te da amendar sa te šaj ponadari da te prasta, posebno adaleske so džanaja kaj o krajo akale trkakoro tano paše sar nikogaš angleder. O apostol Pavle vakergja amenge so šaj te pomožinel amenge te šaj te pobedina. Ov pottikningja amen „te frda amendar sekova tovar... hem te prasta istrajno ki trka koja soj angli amende“. Dali o Pavle adalea mislingja kaj jekh hristijani na valjani te phiravel nisavo tovar? Na. Namesto adava, ov manglja te vakerel amenge kaj valjani te cida sekova nepotrebno tovar. Asavko tovar šaj te umorinel amen hem te kerel amenge pharo te prasta. Te šaj te istrajna, mora sigate te otkrina asavko nepotrebno tovar hem te frda le amendar. Ama tari javer strana, na mangaja te oslobodina amen taro tovar so mora te phirava le, soske agjaar nane te ikera amen ko pravilija hem ka našti te ačhova ki trka (2. Tim. 2:5; w23.08 26, pas. 1-2).

I razumnost pomožinela amen te poštujna e javerengoro stavi. Na primer, nesave phenja mangena te šminkinen pe, a javera na. Nesave hristijanja mangena umereno te pien alkohol, a javera odlučinena ič te na pien. Ili, sa o hristijanja mangena te oven saste, ama na birinena sarine ko isto način te lečinen pe. Ako sekogaš mislinaja kaj amen siem ko pravo hem ako probinaja te ubedina amare phralen te keren o bukja sar amen so keraja len, o javera šaj te sopkinen pe hem adava te anel podelbe (1. Kor. 8:9; 10:23, 24). O Jehova na čhivgja stroga pravilija bašo adava sar te urava amen, nego dengja amen načelija kola so valjani te sledina len. Amare urajbaja valjani te falina e Devle hem agjaar te sikava kaj siem razumna, skromna hem razborita (1. Tim. 2:9, 10). Adaleske, na mangaja amare urajbaja te privlečina nepotrebno vnimanie. Isto agjaar, o bibliska načelija šaj te pomožinen e starešinenge te na čhiven pumare lična pravilija bašo adava so te urava hem sar te izgledina (w23.07 23-24, pas. 13-14).

O Jehova sikavela amenge sar šaj te ovel amen šuži idnina. Okolenge so prifatinena i pokana e „glupavo džuvljakiri“, najvažno lenge te uživinen ko „gudlipe“ taro garavdo zadovolstvo. Lengere postapke ingarena len „hor ko grobo“ (Izr. 9:13, 17, 18). Okola so prifatinena i pokana tari „čačutni mudrost“ ka ovel len pojaver idnina (Izr. 9:1). Amen sikljovaja te manga adava so o Jehova mangela hem te mrzina ov so mrzinela (Ps. 97:10). Hem radosna siem so šaj te kanina e javeren da te sikljoven tari „čačutni mudrost“. Amen siem sar o sluginke kola so vikinena taro najučo than tari diz: „Koj tano neiskusno neka avel akari“. Amen hem okola so prifatinena akaja pokana nane te ovel amen korist samo akana, nego isto agjaar ka ovel amen prilika te živina večno džikote „phiraja ko drumo e haljojbaskoro“ (Izr. 9:3, 4, 6; w23.06 24-25, pas. 17-18).

Sar osetinea tut keda tlo kolega ili tlo součeniko pučela tut nešto bašo tle veruvanja? Dali isi tut trema? Poviše dženen amendar isi len. Ama asavko pučibe šaj te otkrinel bašo so nekoj razmislinela ili ko so verujnela hem te del amen prilika te vakera leske o šukar haberi. Ama ponekogaš, šaj nekoj te pučel amen pučiba adaleske so na soglasinela pe amencar ili mangela te rasprajnel pe. Adava na valjani te iznenadinel amen soske nesave manuša šungje pogrešna informacie bašo amare veruvanja (Apo. 28:22). Osven adava živinaja ko „posledna dive“, ko vreme kote so but džene „nane te oven spremna bašo bilo savo dogovor“ pa čak tane „surova“ (2. Tim. 3:1, 3). Šaj pučea tut: „Sar šaj te ačhovav ljubezno hem taktično keda dikhava kaj nekoj mangela te rasprajnel pe mancar bašo adava ko so verujnava? Jekh buti so šaj te pomožinel tuke, tani i krotkost. O krotko manuš na holjanela sigate hem ačhola smirimo keda nekoj provocirinela le ili keda nane sigurno sar te odgovorinel ki nesavi situacija (w23.09 14, pas. 1-2).

Ponekogaš tari amari organizacija dobinaja sovetija kola so zaštitinena amen. Na primer, dobinaja sovetija bašo materijalizam hem bašo javera bukja kola so šaj te čhiven amen te phaga e Jehovaskere zakonija. Ako džaja palo vodstvo e Jehovaskoro ko akala da bukja, adava ka ovel bašo amaro šukaripe (Isa. 48:17, 18; 1. Tim. 6:9, 10). Šaj te ova sigurna kaj o Jehova ponadari da ka koristinel manušen te šaj te vodinel amen ki bari nevolja hem džikote trajnena o milja berša kote so ka vladinel o Isus. Dali ponadari da ka dža palo adava vodstvo? Adava but ka zavisinel taro adava sar avdive reagirinaja ko vodstvo so dela amen o Jehova. Adaleske sekogaš te dža palo e Jehovaskoro vodstvo, kote soj vklučimo o vodstvo taro manuša kolen so o Jehova čhivgja len te grižinen pe amenge (Isa. 32:1, 2; Evr. 13:17). Džikote keraja adava, te ovel amen celosno doverba ko amaro vodači o Jehova, kova so pomožinela amen te izbegina sa adava so šaj te ruminel amaro amalipe lea hem kova so ingarela amen ki amari cel — o večno životo ko nevo sveto (w24.02 25, pas. 17-18).

O apostol Pavle uživinela sine ki služba bašo Jehova, sepak na sine leske lokho. O Pavle but puti mora sine te patujnel ko dur thana, a o patujbe ko adava vreme na sine lokho. Džikote patujnela sine, o Pavle ponekogaš sine „ki opasnost taro reke“ hem „ki opasnost taro čora“. Isto agjaar ponekogaš o protivnikija margje le (2. Kor. 11:23-27). A o phralja na ceninea sine sekogaš o žrtve so kerela len sine te šaj te pomožinel lenge (2. Kor. 10:10; Fil. 4:15). So pomožingja e Pavleske te prodolžinel te služinel e Jehovaske? Ov but siklilo bašo Jehova taro spisija hem taro ple lična iskustvija. Adava uveringja le kaj o Jehova mangela le (Rim. 8:38, 39; Ef. 2:4, 5). Hem ov da zamanglja but e Jehova. O Pavle sikavgja plo mangipe sprema o Jehova „agjaar so služingja adalenge soj sveta“ hem prodolžingja te služinel lenge (Evr. 6:10; w23.07 9, pas. 5-6).

But džene priznajnena kaj tano šukar so isi svetovna vlade hem kaj valjani te šuna barem nesave zakonija so dena adala vlade. Ama, adala ista manuša na mangena te šunen o zakonija so na svidžinena pe lenge ili kola so mislinena kaj nane pravedna. I Biblija vakerela kaj o manušikane vlade anena muke, kaj o Satana vladinela lencar hem kaj panda hari ka oven uništime (Ps. 110:5, 6; Prop. 8:9; Luka 4:5, 6). Isto agjaar, vakerela amenge kaj „okova so protivinela pe baši nesavi vlast protivinela pe bašo adava so o Devel dozvolingja“. Akanaske, o Jehova dozvolinela te postojnen o manušikane vlade te šaj te ovel redo hem očekujnela amendar te šuna len. Adaleske mora te šuna i biblisko zapoved: „Sekaske den adava so pripadinela lenge“, kote soj vklučime o danokija, o poštovanje hem i poslušnost (Rim. 13:1-7). Šaj te mislina amenge kaj nesavo zakoni nane praktično, nane fer hem kaj ka koštinel amen but ako siem poslušna. Ama, amen šunaja e vlasten soske o Jehova rodela te šuna len sa džikote na rodena te kera nešto protiv leskere zapovedija (Apo. 5:29; w23.10 8, pas. 9-10).

Keda bijandilo o Samson, o Filistejcija but mučinena sine e Izraelcon (Sud. 13:1). Adaleske so o Filistejcija vladinena sine ko jekh but lošno način, e izraelconge na sine ni hari lokho. O Jehova biringja e Samsone „te predvodinel ko spasibe e Izraelcon taro vasta e filistejcongere“ (Sud. 13:5). Akaja sine but phari zadača! Te šaj uspešno te završinel akaja zadača, e Samsone valjani sine te ovel le doverba ko Jehova. Ki jekh prilika i filistejsko vojska ali te astarel e Samsone ko Lehi, verojatno jekh than kova so sine ki Juda. Adaleske so o manuša tari Juda darandile, ola odlučingje te predajnen e Samsone e dušmanenge. Ola phanle e Samsoneskere vasta duje neve šelencar hem agjaar leskoro narodo predajngja le e Filistejconge (Sud. 15:9-13). Ama „e Jehovaskoro duho alo upro Samson“ hem ov oslobodingja pe agjaar so čhingja o šele. Tegani ov „arakhlja svežo hereskiri vilica“, lelja la hem laja mudargja 1.000 Filistejcon (Sud. 15:14-16; w23.09 2, pas. 3-4).

Blagodarna siem e Jehovaske so hari pohari ki Biblija otkringja pli večno namera. O Jehova šaj te birinel različna načinija te šaj te ispolninel pli namera hem ov sekogaš uspejnela ko adava soske „kergja sa te šaj te služinel baši leskiri namera“ (Izr. 16:4). Osven adava, sa so kerela o Jehova trajnela zasekogaš. Koja tani e Jehovaskiri namera hem kola promene kergja te šaj te ispolninel la? O Devel vakergja e prvo manušenge koja tani leskiri namera lencar. Ola valjangje te „pheren i phuv manušencar hem te vladinen upro... sa o suštestvija ki phuv“ (1. Moj. 1:28). Keda o Adam hem i Eva buningje pe hem o manuša ule grešna, adava ni najhari na meningja e Jehovaskiri namera. Ov samo promeningja o način sar ka ispolninel pli namera. Ov odma odlučingja te kerel Carstvo ko nebo kova so ka ispolninel leskiri namera so sine le ko početok e manušencar hem e phuvjaja (Mat. 25:34; w23.10 19-20, pas. 6-7).

O Jehova šaj te pomožinel amen te na otkažina amen. Šaj nane sekogaš te ovel amenge lokho, posebno ako poviše vreme borinaja amen te nakhava nesavi slabost. Ponekogaš, amare slabostija šaj te dikhjon amenge pophare taro adala so sine e apostol Petare. Ama o Jehova šaj te del amen sila te na otkažina amen (Ps. 94:18, 19). Na primer, jekh phral živinela sine sar homoseksualco poviše berša angleder te doznajnel o čačipe. Ov celosno kergja promene ko plo životo hem počmingja te živinel sprema o bibliska merilija. Sepak, ponekogaš borinela pe sine pogrešna želbencar. So pomožingja leske te na otkažinel pe? Ov vakerela: „O Jehova dela man sila. Leskere duhoja sikliljum kaj šaj te živinav sprema o bibliska merilija. O Jehova dozvolinela mange te služinav ki leskiri organizacija, hem iako sium nesovršeno ov ponadari da dela man sila“ (w23.09 23, pas. 12).

Terne phraljalen, nane taro jekh puti te oven zrela hristijanja. Valjani te birinen šukar primerija pali kolende so ka džan, te razvinen sposobnost te proceninen, te oven doverliva, te sikljoven korisna veštine hem te spreminen tumen bašo odgovornostija so ka oven tumen ki idnina. Keda razmislinena bašo adava ko so sa valjani te keren buti šaj mislinena kaj adava tumenge but pharo. Ama tumen šaj te uspejnen. Ma bistren kaj o Jehova but mangela te pomožinel tumen (Isa. 41:10, 13). Džangjola pe, isto agjaar o phralja hem o phenja da taro sobranie ka pomožinen tumenge. Keda ka ispolninen tumari cel te oven zrela hristijanja, ka ovel tumen šužo hem srekjno životo. Terne phraljalen, but mangaja tumen! Dži tegani, džikote kerena buti te oven zrela hristijanja o Jehova neka blagoslovinel tumen (w23.12 29, pas. 19-20).

Zamislin kaj sian ki jekh zabava e phralencar hem e phenjencar, nakhena tumenge šukar hem kerea jekh grupno slika. Ustvari, kerea panda duj slike ako slučajno i prvo na ikljola šukar. Akana isi tut trin slike. Ama primetinea kaj ki jekh lendar jekh phral na iklilo šukar. Adaleske ka brišine la soske isi tut panda duj javera kote so sarine asana. Obično pamtinaja o šukar bukja so nakhavgjem len e phralencar hem e phenjencar. Ama šaj ko jekh taro adala prilike, nesavo phral ili phen kergja ili vakergja nešto so na sine ljubezno. Dali valjani te pamtina asavke situacie? Valjani te trudina amen te brišina adava tari amari godi isto sar so bi brišinaja jekh taro adala slike (Ef. 4:32). Šaj te kera adava adaleske so setinaja amen ko but javera šukar momentija so nakhavgjem len zaedno. Mangaja te pamtina hem te cenina samo asavke šukar momentija (w23.11 12-13, pas. 16-17).

O grčka lafija kola so o Pavle koristinela akate sikavena kaj jekh hristijanka valjani sekogaš te uravel pe pristojno hem te ovel obzirno sprema e javerengere čuvstvija hem mislenje. Amen but ceninaja amare mangle phenjen kola so uravena pe skromno! I razboritost tani panda jekh osobina koja so valjani te sikaven sa o zrela hristijanke. Soj tani i razboritost? Oj tani sposobnost šukar te procenine o bukja, te razlikujne o ispravno taro pogrešno hem palo adava te ane mudro odluka. Razmislin baši Avigeja. Lakoro rom angja pogrešno odluka koja so lošno ka vlijajnel sine upro sekova jekh taro leskoro kher. I Avigeja odma kergja nešto. Adaleske so sine razborito, oj spasingja životija (1. Sam. 25:14-23, 32-35). I razboritost isto agjaar pomožinela amen te džana keda te kera lafi, a keda te čutina. A pomožinela amen te ova uramnotežena keda sikavaja lično interes e javerenge te šaj te na ana len ki nezgodno situacija (1. Sol. 4:11; w23.12 20, pas. 8-9).

O apostol Pavle pišingja akala lafija e sobranieske ko Rim. O phralja hem o phenja adari zapoznajngje e Jehova hem e Isuse, sikavgje vera hem ule hristijanja. Adaleske so sine len vera, o Devel dikhlja ki lende sar pravedna hem pomazingja len ple duhoja (Rim. 5:1). Agjaar, ola dobingje but šuži nadež kolake so šaj sine te oven sigurna kaj ka ispolninel pe. O Pavle pokasno pišingja e pomazime hristijanenge taro Efes baši nadež koja so o Devel dengja len. Ki adaja nadež sine vklučimo te dobinen „o nasledstvo bašo sveta“ (Ef. 1:18). Isto agjaar, o Pavle vakergja e Kološanenge kote ka ispolninel pe lengiri nadež. Ov vikingja la „nadež koja soj garavdi tumenge ko nebo“ (Kol. 1:4, 5). Znači, e pomazime hristijanen isi len nadež te voskresninen bašo večno životo ko nebo, kote so ka vladinen zaedno e Hristosea (1. Sol. 4:13-17; Otk. 20:6; w23.12 9, pas. 4-5).

O lafi soj prevedimo sar „ka arakhel“ ki grčko čhib koristinela pe sine sar voeno izraz hem lea opišinela pe sine jekh grupa vojnikija kola so zaštitinena jekh diz hem ikerena la sine bezbedno taro napadija. O manuša tari adaja diz šaj sine mirno te soven soske džanena sine kaj o vojnikija tergjona anglo porte. Slično, keda o mir taro Devel arakhela amare vile hem amare misle, tegani siem smirime soske džanaja kaj siem zaštitime (Ps. 4:8). Isto sar ko slučaj e Anakoro, čak ako amari situacija na meninela pe odma, sepak amen šaj dži negde te osetina amen smirime (1. Sam. 1:16-18). A keda siem smirime, but puti tano amenge polokho te razmislina jasno hem te ana mudra odluke. So šaj amen te kera? Keda na sian smirimo vikin e „čuvare“ ki nesavi smisla. Sar? Agjaar so ka moline tut sa džikote na osetinea o mir taro Devel (Luka 11:9; 1. Sol. 5:17). Ako nakhea taro pharo periodi, ma čhinav te moline tut hem ka osetine sar e Jehovaskoro mir arakhela tlo vilo hem tle misle (Rim. 12:12; w24.01 21, pas. 5-6).

Te šaj te falinel ple Dadeskoro anav, o Isus trpingja te ovel mučimo ko različna načinija, te ovel vredžimo hem te vakeren hovajba protiv leste. Ov na sine sostar te ladžal soske džanlja kaj ko sa sine poslušno ple Dadeske (Evr. 12:2). Ov isto agjaar, džanlja kaj adala napadija so sine le ko adava pharo vreme, direktno avena sine taro Satana (Luka 22:2-4; 23:33, 34). O Satana sigurno nadinela pe sine kaj ka uspejnel te čhivel e Isuse te na ovel verno e Jehovaske, ama ov ni hari na uspejngja ko adava. O Isus dengja najbaro dokaz kaj o Satana tano lošno hem hovavela hem kaj e Jehova isi le sluge kola so ačhovena leske verna čak ko najphare ispitija! Dali mangea te radujne tle care e Isuse? Prodolžin te faline e Jehovaskoro anav, agjaar so ka pomožine e javerenge te doznajnen kobor šuže osobine isi amare Devle. Agjaar ka dža palo primer e Isuseskoro (1. Pet. 2:21). Isto sar o Isus, ka radujnkere e Jehova hem ka dokažine kaj leskoro dušmani o Satana bizi ladž hovavela! (w24.02 11-12, pas. 11-13).

Ko posledna pandž berš, poviše taro jekh milioni manuša krstingje pe hem ule e Jehovaskere svedokija. Keda dea lafi e Jehovaske kaj ka služine leske, tu birinea te ove učeniko e Isus Hristoseskoro hem odlučinea e Devleskiri volja te ovel tuke najvažno ko životo. So ka rodel pe tutar ako dea akava zavet? O Isus vakergja: „Ako nekoj mangela te džal pali mande, neka otkažinel pe pestar“ (Mat. 16:24). I grčko fraza soj prevedimi sar „neka otkažinel pe pestar“, šaj isto agjaar te prevedinel pe sar „mora korkori peske te vakerel na“. Keda dea lafi e Jehovaske, ka valjani te vakere na bašo sa adava so na svidžinela pe leske (2. Kor. 5:14, 15). Ko adava tano vklučimo te vakere na hem bašo „postapke e grešno teloskere“, sar soj o seksualno nemoral (Gal. 5:19-21; 1. Kor. 6:18). Dali adava so ka šune akala zapovedija ka keren tlo životo pharo? Ako mangea e Jehova hem ako sian uverimo kaj leskere zakonija tane bašo tlo šukaripe, nane te ovel tuke pharo (Ps. 119:97; Isa. 48:17, 18; w24.03 2, pas. 1; 3, pas. 4).

O Jehova dela plo sveti duh okolenge kastar soj zadovolno (Mat. 12:18). Šaj te puča amen: „Dali sikavava nesave osobine so avena taro sveti duh ko mlo životo?“ Dali primetingjan kaj akana sian postrplivo nego angleder te pendžare e Jehova? Ustvari, kobor poviše sikljovea te sikave o osobine taro sveti duh, doborom pouverimo ka ove kaj o Jehova tano zadovolno tutar. O Jehova pomožinela okolenge kastar soj zadovolno te ovel len korist tari otkupnina (1. Tim. 2:5, 6). Ama, so ako amaro vilo panda nane uverimo kaj o Jehova tano zadovolno amendar, iako isi amen vera ki otkupnina hem krstingjem amen? Ma bistre, našti sekogaš te ovel amen doverba ko amare čuvstvija, ama šaj te ovel amen doverba ko Jehova. Okola so isi len vera ki otkupnina tane pravedna anglo leskere jakhja hem ov vetinela kaj ka blagoslovinel len (Ps. 5:12; Rim. 3:26; w24.03 30, pas. 15; 31, pas. 17).