Sar te sikava mangipe e javerenge

Sa o manuša avena taro prvo manuš, o Ademi (Adam). Adaleske sarine amen siem jekh familija. Iako ki familija valjani te sikava mangipe jekh jekheske, avdive tano retko adava. Amaro Devel, soj pherdo mangipaja, na sine le namera te ovel agjaar.

SO VAKERELA E DEVLESKORO LAFI BAŠO MANGIPE

„Mang te pašutne sar korkori tut“ (3. MOJSEEVA 19:18).

„Mangen tumare dušmanen“ (MATEJ 5:44).

SO ZNAČINELA TE MANGA E JAVEREN

Primetin sar o Devel opišingja o mangipe ko plo Lafi, ko 1. Korinkjanite 13:4-7:

O mangipe tano „strplivo hem ljubezno“.

Razmislin: Sar osetinea tut keda o javera tane tuja strpliva, ljubezna hem na reagirinena grubo keda grešinea?

O mangipe „nane ljubomorno“.

Razmislin: Sar osetinea tut keda o javera tane ljubomorna tuke?

O mangipe „na rodela pli korist“.

Razmislin: Sar osetinea tut keda o javera poštujnena tlo mislenje hem na mangena sekogaš te ovel palo lengoro?

O mangipe „na pamtinela o lošnipe“.

Razmislin: O Devel spremno prostinela okolenge so kainena pe bašo ple grevija. Ko e Devleskoro Lafi baši leste pišinela: „Nane večno te pamtinel o greške, ni nane te ovel holjamo zasekogaš“ (Psalm 103:9). Amen ceninaja keda nekoj so vredžingjem le prostinela amenge. Adaleske amen da valjani spremno te prostina keda o javera vredžinena amen (Psalm 86:5).

O mangipe „nane bahtalo baši nepravda“.

Razmislin: Keda ka slučinel pe amenge nešto lošno, amen na mangaja o javera te oven bahtale adaleske so isi amen muke. Adaleske, ni amen na siem bahtale keda e javeren isi len muke, čak ako na ponašinena pe sine amencar šukar.

Ako mangaja te dobina bereketija taro Devel, mora te manga e javeren bizi razlika kobor berš isi len, koja nacionalnost tane ili ko so verujnena. Jekh način sar šaj te sikava mangipe tano agjaar so ka pomožina adalenge so valjanela lenge pomoš.