4 | I Biblija dela praktična sovetija

So značinela akava

I Biblija nane medicinsko priračniko, ama oj dela praktična hem korisna sovetija. Lakere sovetija šaj te pomožinen okolenge so isi len emocionalna problemija. Te dikha nesave primerija.

Sar šaj akava te pomožinel amenge

„E saste manušenge na valjani doktori, nego e nasvalenge“(MATEJ 9:12).

I Biblija vakerela kaj nekogaš šaj ka valjani amenge pomoš taro doktorija. Bute dženen so isi len psihička problemija, pomožingja lenge but so rodingje medicinsko pomoš hem agjaar doznajngje točna informacie bašo plo nasvalipe.

„O telesno vežbibe isi le nesavi korist“ (1. TIMOTEJ 4:8).

Adava so ka odvojne vreme hem ka trudine tut te oven tut šukar navike, ka pomožinen tuke te ovel tut pošukar emocionalno sastipe. Ko adava tano vklučimo te vežbine redovno, te ha zdravo hem dovolno te sove.

„O radosno vilo tano šukar iljači, a o phago vilo lela i sila e manušeskiri“(IZREKI 17:22).

Adava so ka čitine ohrabruvačka bibliska stihija hem ka čhive tuke razumna celija kola so šaj te ispolnine len, šaj te pomožinen tut te ove srekjno. Ako koncentririnea tut ko šukar bukja ko životo hem nadinea tut kaj o bukja ka oven pošukar ki idnina, adava ka pomožinel tut te ačhove emocionalno stabilno džikote borinea tut tle psihičko nasvalipaja.

„I mudrost tani okolende soj skromna“(IZREKI 11:2).

Šaj ka haljove kaj našti te uspejne korkori te kere sa so mangea, adaleske spremno prifatin pomoš taro javera. Tle amala hem tli familija verojatno mangena te pomožinen tuke ama šaj na džanena sar. Vaker lenge so konkretno šaj te pomožinel tut. Ma očekujn te keren but bukja baši tuke hem sekogaš ov blagodarno bašo adava so pomožinena tut.

Sar pomožinena o praktična sovetija tari Biblija

„Osetingjum nešto kaj nane mancar šukar hem adaleske geljum ko doktori. O doktori vakergja soj mange. Adava pomožingja man pošukar te haljovav mli situacija hem te doznajnav so valjani te kerav te šaj pošukar te grižinav man bašo mlo sastipe“ (Nikol,a kola so isi la bipolarno rastrojstvo).

„Haliljum kaj adava so redovno čitinava i Biblija me romnjaja, pomožinela man sekova dive te počminav pozitivna mislencar kola so izgradinena. But puti, ko dive keda mange pharo, nesavo konkretno stiho ohrabrinela man“ (Piter, kole so isi le depresija).

„Na sine mange lokho te vakerav e javerenge solea borinava man soske but ladžava sine. Jekh sočuvstvitelno paše amalin vnimatelno šungja man hem probingja te haljovel sar osetinava man. Oj čače pomožingja man te osetinav man pošukar hem te džanav kaj na valjani te borinav man korkori akalea“ (Dži ju, kola so isi la problemi hajbaja).

„I Biblija pomožinela man te ovav uramnoteženo hem razumno keda kerela pe lafi baši buti hem bašo odmor. Lakiri mudrost pomožinela man te ikljovav ko krajo e emocionalno problemencar kolencar so borinava man“ (Timoti, kole so isi le problemi mislencar kola so kerena te ovel but voznemirimo).