3 | Sar šaj te pomožinen amen o primerija tari Biblija
KI BIBLIJA PIŠINELA BAŠO... Verna murša hem džuvlja kola so sine len „ista čuvstvija sar amen“ (JAKOV 5:17, fusnota.)
So značinela akava
Ki Biblija tane pišime čačutne iskustvija taro murša hem džuvlja kola so borinena pe sine različna čuvstvoncar. Džikote čitinaja akala iskustvija, šaj ka dikha kaj nekoj lendar sine le ista čuvstvija sar amende.
Sar šaj akava te pomožinel amenge
Sarine isi amen potreba o javera te haljoven sar osetinaja amen. Ama, akava tano posebno važno keda isi amen problemija amare emocionalno sastipaja. Džikote čitinaja i Biblija doznajnaja kaj javera da razmislinena sine hem osetinena pe sine isto sar amende. Haljovaja kaj ola da borinena pe sine ista problemencar, a adava kerela te na osetina amen korkori keda borinaja amen negativno čuvstvoncar kola so voznemirinena amen.
Ki Biblija tane pišime but izjave taro manuša kola so osetingje pe korkori hem razočarime. Dali nekogaš vakergjan tuke: „Našti više te izdržinav?“ O Mojsej, o Ilija hem o David agjaar osetingje pe (4. Mojseeva 11:14; 1. Carevite 19:4; Psalm 55:4).
Ki Biblija pišinela baši jekh džuvli koja so vikinela pe sine Ana. Oj sine but razočarimi adaleske so našti sine te oven la čhave. A isto agjaar, mora sine te trpinel ple romeskere dujto romnja koja so vredžinela la sine hem asala lake sine bašo lakoro problemi (1. Samoilova 1:6, 10).
I Biblija kerela lafi bašo jekh manuš kova so vikinela pe sine Jov. Iako sine le silno vera ko Devel, le sine le bari emocionalno dukh so čak vakergja: „Bktingjum taro mlo životo, na mangava više te živinav“ (Jov 7:16).
Adalea so ka doznajna sar akala ličnostija uspešno boringje pe akale negativno mislencar, ka del amen i potrebno sila amen da te borina amen amare problemencar.