Tu sian skapoceno e Jehovaske!

1-2. So šaj te pomožinel amen te uverina amen kaj siem skapocena anglo e Devleskere jakhja?

O JEHOVA ko ple sluge dikhela sar skapocena. Ama nesave lendar osetinena pe kaj na vredinena. Ola šaj osetinena pe agjaar adaleske so nekoj ponašingja pe but lošno lencar. Dali tu da osetinea tut agjaar? Ako oja, so šaj te pomožinel tute te uverine tut kaj tut sian skapoceno anglo e Jehovaskere jakhja?

² Jekh buti koja so šaj te pomožinel tuke tani ako razmislinea bašo bibliska izveštaija kola so sikavena sar o Jehova mangela te dikha ko manuša hem sar te ponašina amen lencar. Leskoro Čhavo, o Isus, poštujnela sine e manušengoro dostoinstvo hem sine ljubezno lencar. Adalea sikavgja kaj leske hem leskere Dadeske tane but skapocena okola so mislinena kaj na vredinena but (Jovan 5:19; Evr. 1:3). Ki akaja statija ka dikha: 1) sar o Isus pomožingja e manušenge te haljon kobor vredinena hem 2) sar šaj te uverina korkori amen kaj čače siem skapocena anglo e Devleskere jakhja (Agej 2:7).

SAR O ISUS POMOŽINGJA E MANUŠENGE TE HALJOVEN KOBOR VREDINENA

3. Sar o Isus ponašingja pe e manušencar tari Galileja kola so ale ki leste te pomožinel len?

³ Džikote o Isus o trito puti propovedinela sine ki Galileja, but manuša ale te šunen le hem ov te sasljarel len. O Isus dikhlja kaj ola sine „mučime hem otfrlime sar bakhre bizo pastiri“ (Mat. 9:36). Lengere verska vodačija dikhena sine ki lende sar potele pestar, pa čak vikinena len sine narodo kova soj „dendo arman“ (Jovan 7:47-49). Ama o Isus ponašinela pe sine lencar ljubezno hem poštujnela len sine agjaar so odvojnela lenge sine vreme te sikavel len hem te sasljarel len taro lenge nasvalipa (Mat. 9:35). Osven adava, te šaj te pomožinel poviše manušenge, ov sikavgja ple apostolen te propovedinen hem dengja len vlast te sasljaren e nasvalen (Mat. 10:5-8).

4. So sikljovaja taro adava sar o Isus ponašingja pe e manušencar kola so sine otfrlime taro javera?

⁴ Adalea so o Isus ponašinela pe sine ljubezno e manušencar hem poštujnela len sine, sikavgja kaj ov hem leskoro Dad dikhena sar skapoceno okolende kas so obično o javera otfrlinena. Ako služinea e Jehovaske, ama borinea tut e čuvstvoja kaj na vredinea, razmislin bašo adava kobor vnimanie sikavgja o Isus e ponizna manušenge kola so mangena sine te sikljon lestar. Adava ka pomožinel tuke te haljove kobor sian skapoceno e Jehovaske ko jakhja.

5. Vaker ko save okolnostija arakhljola sine jekh džuvli tari Galileja kola so arakhlja la o Isus.

⁵ O Isus na sikavela sine samo e manušen ko grupe nego hem sikavela sine vnimanie nesave dženenge lično da. Na primer, džikote propovedinela sine ki Galileja, ov dikhlja jekhe džuvlja koja so 12 berš krvarinela sine (Mar. 5:25). Adaleske so sprema o Zakoni oj sine nečisto, sekoj so ka pipinel la sine ovela nečisto. Adaleske, oj na smejnela sine te ovel paše uzo javera manuša hem verojatno počesto sine korkori. Osven adava, našti sine te obožavinel e Jehova zaedno e javerencar ki sinagoga ili keda sine praznikija (3. Moj. 15:19, 25). Sigurno adaja džuvli cidingja but muke hem ko fizičko hem ko emocionalno pogled (Mar. 5:26).

6. So kergja i džuvli koja so krvarinela sine te šaj ovel sasljardi?

⁶ Adaja mučimi džuvli manglja o Isus te sasljarela la. Ama, na rodingja lestar direktno adava. Soske? Šaj ladžala sine tari pli situacija. Ili šaj darala sine kaj o Isus ka krivinel la adaleske so sine nečisto hem na valjani sine te mešinel pe e manušencar. Adaleske samo pipingja leskiri nametka soske sine uverimi kaj adava ka sasljarel la (Mar. 5:27, 28). Adaleske so sikavgja vera, oj sastili. Palo adava, o Isus pučlja koj pipingja le, hem i džuvli priznajngja kaj oj kergja adava. Sar ponašingja pe laja o Isus?

7. Sar ponašingja pe o Isus e džuvljaja kola so sine la bare muke? (Marko 5:34).

⁷ O Isus ponašingja pe ljubezno e džuvljaja hem sikavgja kaj poštujnela la. Ov dikhlja kaj oj „tresinela sine tari dar“ (Mar. 5:33). Adaleske so džanela sine sar oj osetinela pe, ov utešingja la ple lafencar, čak vakergja lake „mi čhaj“. Adalea na samo so sikavgja lake poštovanje nego sine laja obzirno hem sikavgja lake mangipe. (Čitin Marko 5:34.) Akava tano o edinstveno than ki Biblija kote so o Isus vakergja nesave džuvljake „mi čhaj“. O Isus verojatno koristingja akava ljubezno lafi ki adaja situacija adaleske so dikhlja kaj i džuvli but darala sine. Zamislin kobor lokhilo lake. Te na utešinel la sine o Isus ple lafencar oj šaj sine ka džal peske sasljardi ko fizičko pogled, ama ko emocionalno pogled ka ovel lake sine but pharo adaleske so ka mučinel la sine o čuvstvo kaj kergja greška adaleske so pipingja e Isuseskiri nametka hem so sine maškar ko manuša. Namesto adava, o Isus pomožingja lake te dikhel ki peste agjaar sar so čače tani — skapoceno čhaj ple nebesno Dadeske kova soj pherdo mangipe.

8. Save pharipa sine jekhe phenja taro Brazil?

⁸ Avdive da nesaven taro e Devleskere slugen isi len problemija sastipaja hem adaleske šaj te obeshrabrinen pe hem te mislinen kaj na vredinena. I Marija,a jekh phen taro Brazil, koja so služinela sar opšto pioneri, bijandili bizo duj pre hem bizo levo vas. Oj vakerela: „Ki škola lena man sine ki hajgara adaleske so sium sakati. Čhivena mange sine anava kola so vredžinena man. Pa čak hem tari mli familija sium sine ponižimi“.

9. So pomožingja e Marijake te haljol kaj oj tani skapoceno e Jehovaske?

⁹ So pomožingja e Marijake? Keda uli e Jehovaskoro svedoko, o phralja hem o phenja utešingje la hem pomožingje lake te dikhel ki peste agjaar sar so dikhela o Jehova ki late. Oj vakerela: „Ko mlo tefteri nane man doborom strane te šaj te pišinav sarinengere anava kola so pomožingje man. Blagodarno sium e Jehovaske hor taro mlo vilo adaleske so dengja man doborom šukar duhovno familija“. O phralja hem o phenja pomožingje e Marijake te haljol kaj oj tani but skapoceno e Jehovaske ko jakhja.

10. Savo problemi sine e Marija Magdalena? (Dikh hem o slike.)

¹⁰ Te dikha sar o Isus pomožingja jekhe javere džuvljake — i Marija Magdalena, kola so sine la efta demonija (Luka 8:2). Oj verojatno ponašinela pe sine čudno adaleske so sine demonizirimi hem bašo adava šaj o javera izbeginena la sine. Ko adava pharo periodi taro lakoro životo, oj sigurno but darala sine hem mislinela sine kaj nikoj na mangela la hem nikoj našti te pomožinel lake. Najverojatno, o Isus cidingja latar e demonen so mučinena la sine hem oj uli leskoro verno sledbeniko. Ko savo javer način o Isus pomožingja e Marija Magdalenake te haljovel kaj tani skapoceno e Devleske?

11. Sar o Isus sikavgja e Marija Magdalenake kaj tani skapoceno e Devleske? (Dikh hem o slike.)

¹¹ O Isus vikingja e Marija Magdalena te džal lea hem leskere apostolencar džikote propovedinena sine taro gav ko gav.b Agjaar ka šaj sine te šunel džikote ov sikavela e javeren. Isto agjaar o Isus pojavingja pe lake o isto dive otkeda voskresningja. Oj sine jekh taro prva učenikija kolencar so o Isus kergja lafi adava dive. Čak dengja la zadača te vakerel leskere apostolenge kaj ov voskresningja. Adalea o Isus pomožingja la te haljovel kaj oj čače tani skapoceno e Jehovaske! (Jovan 20:11-18).

12. Objasnin soske i Lidija osetinela pe sine otfrlimi.

¹² Isto sar i Marija Magdalena, but džene avdive da osetinena pe otfrlime taro javera. Jekh phen, tari Španija so vikinela pe Lidija, vakerela kaj angleder te bijangjovel lakiri daj razmislinela sine te kerel abortus. Oj setinela pe kaj panda džikote sine but tikni, i daj lakiri na grižinela pe sine lake hem vakerela sine lake but phare lafija. I Lidija vakerela: „Adaleske so mi daj na sikavela sine mange mangipe, but mangava sine o javera te prifatinen man hem te mangen man. Darava sine kaj nikogaš nane te zaslužinav asavko mangipe soske mi daj kergja te mislinav kaj sium lošno manuš“.

13. So pomožingja e Lidijake te haljol kaj tani skapoceno e Jehovaske?

¹³ Keda i Lidija počmingja te proučinel i Biblija, o bukja menisalile. Adava so molinela pe sine e Jehovaske, čitinela sine i Biblija ama hem o ljubezna lafija hem postapke e phralengere hem e phenjengere pomožingje la te haljol kaj oj tani skapoceno ko e Devleskere jakhja. I Lidija vakerela: „Mo rom često vakerela mange kobor but mangela man. Ov sekogaš setinkerela man ko mle šukar osobine. Ama javera da paše amala kerena o isto“. Šaj li te setine tut nekaste so valjani leske pomoš te šaj te haljovel kobor tano skapoceno ko e Jehovaskere jakhja?

SO KA POMOŽINEL AMEN TE DIKHA KI AMENDE SAR SO DIKHELA O JEHOVA

14. Sar i 1. Samoilova 16:7 pomožinela amen te dikha ki amende sar so dikhela o Jehova? (Dikh hem i ramka „Soske e Jehovaske tano skapoceno leskoro narodo?“)

¹⁴ Ma bistre kaj o Jehova na dikhela ki tute sar so dikhena o manuša ko sveto. (Čitin 1. Samoilova 16:7.) Ov na dikhela kobor tu vredinea sprema adava sar izgledinea, kobor pare isi tut ili kobor bari škola isi tut (Isa. 55:8, 9). Adaleske, ma merin tli vrednost sprema o merilija e svetoskere, nego sprema e Jehovaskere merilija. Šaj te čitine bibliska izveštaija kolendar so dikhjola kaj o Jehova ceninela okolen so ponekogaš osetinena pe kaj na vredinena, sar na primer o Ilija, i Noemina hem i Ana. Isto agjaar, šaj te pišine nesave situacie taro tlo životo kola so sikavena kaj o Jehova čače mangela tut hem ceninela tut. Osven adava, šaj te istražine ko amare publikacie bašo teme sar na primer sar te poštujne poviše korkori tut hem bašo čuvstvo kaj na vredinea.c

15. Soske o Daniel sine skapoceno e Jehovaske? (Daniel 9:23).

¹⁵ Redovno setinker tut ko adava kaj tu sian skapoceno e Jehovaske adaleske so sian verno. Ki jekh prilika, keda e Daniele najverojatno sine le skoro šel berš, osetingja pe but umorno hem obeshrabrimo (Dan. 9:20, 21). Sar o Jehova ohrabringja le? Ov bičhalgja e angele e Gabriele te setinkerel e Daniele kaj ov tano „but manglo e Devleske“, javere lafencar kaj ov tano skapoceno e Devleske hem kaj o Devel šungja leskere molitve. (Čitin Daniel 9:23.) Soske o Daniel sine but skapoceno e Devleske? Adaleske so e Daniele sine le šuže osobine, sar na primer ov sine pravedno hem verno (Ezek. 14:14). O Jehova mukhlja te ovel pišimo akava izveštaj ko plo Lafi te šaj te utešinel amen (Rim. 15:4). O Jehova šunela tle da molitve hem adaleske so kerea adava soj tano ispravno hem sian verno, tu sian leske skapoceno (Mih. 6:8; Evr. 6:10).

16. So šaj te pomožinel tuke te dikhe ko Jehova sar Dad kova so but mangela tut?

¹⁶ Dikh ko Jehova sar Dad kova so mangela tut. Ov mangela te pomožinel tuke, a na te arakhel tuke greške (Ps. 130:3; Mat. 7:11; Luka 12:6, 7). Adava so razmislingje bašo akava pomožingja butenge kola so borinena pe mislencar kaj na vredinena. Na primer, razmislin baši jekh phen tari Španija koja so vikinela pe Mišel. Oj osetinela pe sine otfrlimi hem kaj nane korisno adaleske so beršencar lakoro rom vakerela lake sine phare lafija kola so dukhavena la. Oj vakerela: „Sekogaš keda osetinava man sine kaj na sium korisno, trudinava man sine te zamislinav mange e Jehova sar lela man ki pli angali, sikavela mange mangipe hem zaštitinela man“ (Ps. 28:9). I Loren, jekh phen tari Južnoafrikansko Republika, setinela pe: „Štom o Jehova ljubezno angja man ki peste hem pomožingja mange te ačhovav paše lea sa akala berša, čak koristinela man te sikavav e javeren, tegani ov sigurno dikhela ki mande kaj sium skapoceno hem korisno“ (Jovan 6:44).

17. So šaj te pomožinel tuke te uverine tut kaj o Jehova odobrinela tut? (Psalm 5:12; dikh hem i slika.)

¹⁷ Ov uverimo kaj o Jehova odobrinela tut. (Čitin Psalm 5:12.) O David sporedingja e Jehovaskoro odobruvanje jekhe „bare štitea“ kova so zaštitinela e pravedna manušen. Adava so džanea kaj isi tut e Jehovaskoro odobruvanje hem ov poddržinela tut šaj te ovel tuke sar štiti keda ka počmine te napadine korkori tut negativna mislencar kaj tu na vredinea. Sar šaj te džane kaj o Jehova odobrinela tut? Sar so više dikhlem o Jehova dengja amen i Biblija te šaj te vakerel amenge sar ov dikhela ki amende. Osven adava ov koristinela e starešinen, amare paše amalen hem e javere manušen te šaj te setinkerel amen kaj amen siem skapocena leske ko jakhja. Sar valjani te reagirine keda nekoj ohrabrinela tut?

18. Soske valjani te prifatina o pofalbe taro javera?

¹⁸ Ma otfrlin o iskrena pofalbe taro okola so pendžarena tut hem mangena tut. Ma bistre kaj šaj o Jehova koristinela len te šaj te pomožinel tuke te uverine tut kaj isi tut leskoro odobruvanje. I Mišel, koja so spomningjem la angleder, vakerela: „Hari po hari, sikljovava te prifatinav o šuže lafija so vakerena len mange o javera. Pharo mange te verujnav kaj o šukar bukja so vakerena len baši mange tane čače, ama džanava kaj o Jehova mangela te verujnav ko adava“. Isto agjaar, o starešine ljubezno pomožingje lake te dikhel kaj o Jehova mangela la. Akana oj služinela sar pioneri hem pomožinela ko Betel.

19. Soske šaj te ove uverimo kaj tu sian skapoceno e Devleske ko jakhja?

¹⁹ O Isus ljubezno setinkerela amen kaj siem but važna amare nebesno Dadeske (Luka 12:24). Adaleske šaj te ova uverime kaj amen siem skapocena e Jehovaske. Nikogaš na valjani te bistra akava. Hem te da sa amendar te šaj te pomožina e javerenge te dikhen kobor ola tane skapocena e Devleske ko jakhja.