Soske i politika odvojnela e manušen — So vakerela i Biblija?

I politika odvojnela e manušen ko celo sveto. Sprema jekh anketa koja so sine kerdi ko 2022 berš, „65% taro vozrasna manuša taro 19 phuvja kote so sine kerde ankete vakergje kaj ki lengiri phuv isi bare ili but bare nesoglasuvanja maškar o manuša so poddržinena različna politička partie“ (Pew Research Center).

Dali tu da primetingjan kaj isi sa pobare politička podelbe ki phuv kote so živinea? Soske tano agjaar? Dali isi nesavo rešenie? Dikh so vakerela i Biblija.

Stavija so odvojnena

I Biblija prorokujngja kaj ko amaro vreme, soj opišimo sar „posledna dive“, nane te ovel jekhipe soske e manušen ka oven len različna stavija.

• „Ko posledna dive ka ovel but pharo vreme. Soske o manuša ka mangen korkori pes... nane te oven spremna bašo bilo savo dogovor“ (2. Timotej 3:1-3).

Iako o manuša but trudinena pe te šaj o vlade šukar te funkcionirinen, sepak dži akana na uspejngje ko adava. Adaleske so o manuša isi len različno mislenje but lenge pharo, čak nevozmožno zaedno te sorabotinen te šaj te rešinen o problemija. Akala bukja dokažinena kaj adava soj pišimo ki Biblija angleder but vreme, tano točno.

• „O manuš vladinela upro manuš ki leskiri šteta“ (Propovednik 8:9).

Ama i Biblija sikavela kaj isi rešenie — jekh vlada soj vodimi nekastar so šaj te cidel sa o problemija so mučinena e manušen.

Jekh sposobno vodači so grižinela pe

I Biblija kerela lafi bašo jekh sovršeno vodači kova so šaj te rešinel akala problemija — o Isus Hristos. Le isi le mokj, vlast hem želba te anel jekhipe hem mir maškar o manuša.

• „Ko dive keda ov ka vladinel o pravedniko ka cutinel hem ka ovel baro mir“ (Psalm 72:7).

• „Sa o nacie ka služinen leske“ (Psalm 72:11).

O Isus tano najšukar vladeteli soske grižinela pe e manušenge hem mangela te pomožinel lenge, posebno okolenge so doživingje bari nepravda taro javera.

• „Soske ka spasinel e čorole so rovela baši pomoš, okole so cidela muke hem sekas so nane le koj te pomožinel le. Ka perel leske žal e bedno manušeske hem e čoroleske, hem ka arakhel o životo e čorolengoro. Ka spasinel len taro maltretiribe hem nasilstvo“ (Psalm 72:12-14).

Pottikninaja tut te doznajne nešto poviše bašo e Devleskoro Carstvo — i nebesno vlada koja so vodinela la o Isus. Isto agjaar doznajn sar šaj te poddržine akale vlada hem sar adava lično tuke ka ovel korisno.

• Dikh o videoklipi Soj e Devleskoro Carstvo?

• Čitin i statija „Božjeto Carstvo — nekorumpirana vlada“.