SAJ SKUPO — SAR TE IKLJOVE KO KRAJO

Ov zadovolno adalea so isi tut

O manuša soj tane zadovolna adalea so isi len, zadovolna da tane taro pumaro životo. Keda lengere okolnostija meninena pe, ola prilagodinena pe hem na trošinena poviše pare taro adava so zarabotinena.

SOSKE TANO VAŽNO

O psihologo Džesika Keler primetingja kaj o zadovolna manuša obično tane popozitvna. Isto agjaar, oj vakerela kaj ola pohari zavidinena e javerenge. Adaleske na čudinela amen so o manuša soj zadovolna obično tane posrekjna hem isi len pohari stres. Ustvari, nesave taro najsrekjna manuša nane len but pare. Akava posebno važinela bašo okola so but ceninena o bukja kola so našti te kinen pe parencar, sar soj i radost so osetinaja la keda nakhavaja vreme amare familijaja hem amalencar.

„Ako isi amen hajbaske hem urajbaske, te ova zadovolna akale bukjencar“ (1. Timotej 6:8).

SO ŠAJ TE KERE

Ma sporedin tut e javerencar. Ako sporedinea kobor hari bukja isi tut, a kobor bukja isi e javeren, agjaar šaj te na ove zadovolno, pa čak te počmine te zavidine lenge. Osven adava, ako kerea asavke sporedbe adava šaj te na sikavel sar tani čače i situacija. Nesaven so isi len but bukja, ustvari šaj tane batime ko borčija. I Nikol koja so živinela ko Senegal vakerela: „Na valjani mange but bukja te šaj te ovav srekjno. Ako sium zadovolno, šaj te ovav srekjno čak keda e javeren isi len poviše mandar“.

Predlog: Izbegin te dikhe reklame ili objave ko socijalna mreže kola so istakninena o barvalipe hem o luksuzno životo e javerengoro.

„Čak keda nekas isi le but, leskoro životo na avela taro adava so isi le“ (Luka 12:15).

Ov blagodarno. Pobare tane o šanse nekoj te ovel zadovolno ako tano blagodarno. O manuša soj tane blagodarna, obično na mislinena kaj valjani lenge ili kaj zaslužinena nešto poviše. O Roberton, taro Haiti, vakerela: „Odvojnava mange vreme te razmislinav bašo šukar bukja so o javera kergje mange hem me familijake. Palo adava, vakerava lenge kobor ceninava adava so ola kergje. Isto agjaar sikavava me čhave kole isi le ofto berš te vakerel fala bašo sa so dobinela“.

Predlog: Sekova dive pišin bašo kola bukja sian blagodarno. Adava šaj te ovel o šukar sastipe, i familija, o čačutne amala, pa čak o but šuže boe keda perela o kham.

„Kas isi radosno vilo, sekova dive tano ko hajbe hem ko pijbe“ (Izreki 15:15).

Ponekogaš, sarinenge amenge tano pharo te ova zadovolna adalea so isi amen. Ama amaro trudo ka isplatinel pe! Keda birinaja te ova zadovolna, amen birinaja te ova srekjna — nešto so našti te kinel pe parencar.