Taro Jehova avela amari radost

1-2. a) Sar osetinena pe but manuša avdive? b) So ka dikha ki akaja statija?

O MANUŠA avdive probinena samo te šaj te oven srekjna. Ama kobor hem te probinen, palem nane srekjna. But džene tane razočarime hem mislinena kaj lengoro životo nikogaš nane te ovel pošukar. E Jehovaskere sluge šaj isto te osetinen pe agjaar. Adaleske so živinaja „ko posledna dive“ amen očekujnaja te oven amen problemija hem te ovel amenge „pharo“ (2. Tim. 3:1).

² Ki akaja statija ka dikha kola bukja šaj te čoren amari radost hem sar šaj te irana la ako našavgjem la. Ama, najangle te dikha kotar avela i čačutni radost.

KOTAR AVELA I ČAČUTNI RADOST

3. So sikljovaja bašo Jehova taro bukja so stvoringja len? (Dikh hem o slike.)

³ O Jehova otsekogaš sine srekjno. A mangela hem amen da te ova srekjna. Adaleske ov kergja but bukja so kerena amen srekjna, sar na primer, siem srekjna keda dikhaja amari šuži planeta pherdi bute različna boencar, uživinaja keda dikhaja sar o životne khelena peske hem siem radosna džikote haja razno vrsta vkusno hajbe. O Devel čače mangela amen hem mangela te uživina ko životo!

Tikno sloni: Image © Romi Gamit/Shutterstock; tikne pingvinja: Vladimir Seliverstov/500px via Getty Images; tikne buznja : Rita Kochmarjova/stock.adobe.com; duj delfinija : georgeclerk/E+ via Getty Images

4. a) Soske o Jehova ačhola radosno iako dikhela o muke ko sveto? b) So dela amen o Jehova? (Psalm 16:11).

⁴ Iako tano „srekjno Devel“, o Jehova tano svesno baši dukh hem bašo muke so isi ko akava sveto (1. Tim. 1:11). Ama ov na mukhela adava te lel leskiri radost. Ov džanela kaj o muke tane privremena — korkori ov čhivgja roko kobor ka trajnen. Hem strplivo istrajnela sa dži ko dive keda zasekogaš ka cidel sa i dukh hem o muke. Dži tegani o Jehova haljola taro so nakhaja hem mangela te pomožinel amenge. Sar kerela adava? Jekh način tano agjaar so dela amen i radost. (Čitin Psalm 16:11.) Te dikha sar dengja radost ple Čhaveske, e Isuseske.

5-6. Soske o Isus tano radosno?

⁵ Taro sa o bukja so stvoringja o Jehova, o Isus tano i najsrekjno ličnost. Soske? Ake nekobor pričine: 1) Ov tano isto sar po Dad, i Biblija vakerela kaj ov „sikavela amenge savo tano o Devel kole so našti dikhaja le“, javere lafencar, ov sovršeno sikavela ple Dadeskiri ličnost (Kol. 1:15; 1. Tim. 6:15). 2) O Isus nakhavgja najviše vreme pe Dadea, kolestar so avela i srekja.

⁶ Osven adava, o Isus sekogaš tano radosno soske kerela adava so rodela lestar leskoro Dad (Izr. 8:30, 31; Jovan 8:29). Adaleske soj tano verno, o Jehova dičinela pe lea (Mat. 3:17).

7. Sar šaj te arakha čačutni radost?

⁷ Amen da šaj te arakha čačutni radost ako ovaja sa popaše e Jehovaja, kolestar so avela i srekja. Kobor poviše zapoznajnaja e Jehova hem džaja palo leskoro primer, doborom posrekjna ka ova. A ka ova radosna hem keda keraja adava so o Devel rodela hem keda džanaja kaj ov tano zadovolno amendara (Ps. 33:12). Ama, so ako ponekogaš, ili čak celo vreme na osetinaja radost? Dali adava značinela kaj o Devel nane zadovolno amendar? Na! Amen sien nesovršena hem ponekogaš osetinaja dukh, siem tažna ili isi amen depresija. O Jehova haljola adava (Ps. 103:14). Te dikha kola bukja šaj te čoren amari radost hem sar šaj te irana la.

MA MUKH NIŠTO TE ČOREL TLI RADOST

8. Sar o problemija ko životo šaj te vlijajnen upri amende?

⁸ Prvo čor: O problemija ko životo. Dali tuke pharo adaleske so isi tut progonstvo, doživingjan prirodno katastrofa, ili borinea tut čorolipaja, nasvalipaja ili phuripaja? Keda isi amen asavke problemija, lokheste šaj te našava i radost, posebno keda našti keraja ništo te šaj te menina i situacija. I Biblija jasno vakerela kaj „i dukh ko vilo peravela manuše“ (Izr. 15:13). O Babis, jekh starešina kolestar so štare beršenge mule hem o phral hem o roditelija, vakerela: „Osetinava man sine korkori hem kaj nikoj našti te pomožinel mange. Ponekogaš osetinava man sine optovarimo soske sine man but obvrske hem našti sine te nakhavav doborom vreme kobor so bi mangava sine me roditelencar hem me phralea džikote sine dživde“. O problemija ko životo šaj čače te peraven amen hem ko fizičko hem ko emocionalno pogled.

9. So šaj te pomožinel amenge te irana amari radost? (Eremija 29:4-7, 10).

⁹ So šaj te pomožinel amenge te irana amari radost? Šaj te ova palem radosna ako dikhaja realno ko bukja hem ako siem blagodarna. O sveto širinela i ideja kaj valjani te ovel amen idealno životo te šaj te ova srekjna. Ama adava nane točno. Na primer, o Jehova dengja upatstvija e Evreenge so sine ingarde ko Vavilon te prifatinen i nevi realnost kaj tane zarobime ki tugjo phuv hem te den pumaro najšukar ko adala phare okolnostija. (Čitin Eremija 29:4-7, 10.) So sikljovaja taro akava? Trudin tut te prifatine tle okolnostija hem ov blagodarno bašo šukar bukja ko životo. Ma bistre kaj o Jehova celo vreme ka pomožinel tuke (Ps. 63:7; 146:5). I Efi, koja so doživingja phari povreda hem ačhili paralizirimi, vakerela: „O Jehova, mli familija hem o sobranie but pomožingje man. Adaleske, nane te ovel šukar sprema lende ako otkažinava man. Mangava te sikavav kaj sium blagodarno e Jehovaske hem e phralenge hem e phenjenge adaleske so but pomožinena man“.

10. Soske šaj te ova radosna čak keda isi amen problemija?

¹⁰ Čak ako amaro životo nane agjaar sar amen so bi mangaja te ovel, ili keda amenge ili amare familijake slučinena pe strašna bukja, sepak šaj te ova radosnab (Ps. 126:5). Soske? Adaleske so amari radost na zavisinela taro amare okolnostija. Jekh pionerka, so vikinela pe Marija, vakerela: „Keda ačhovea radosno iako isi tut problemija, adava na značinela kaj ič nane tuke pharo ili kaj na mangea te sikave sar osetinea tut. Nego adava značinela kaj na bistergjan e Jehovaskere vetuvanja. Amaro Dad ka pomožinel amenge te ačhova radosna“. Ma bistre, kobor hem te ovel pharo akana, sa amare problemija tane momentalna — sar stapke ki plaža pesokoja. Panda hari celosno ka našavgjoven.

11. Sar ohrabrinela tut e Pavleskoro primer?

¹¹ So ako počminaja te mislina kaj amare problemija sikavena kaj o Jehova nane više zadovolno amendar? Šaj te pomožinel amenge ako razmislinaja bašo javera verna sluge e Jehovaskere kolen so sine len phare situacie. Razmislin bašo e apostol Pavleskoro primer. O Isus sine adava so biringja le te propovedinel o šukar haberi „e manušenge taro javera nacie, e carenge hem e Izraelconge“ (Apo. 9:15). Kobor bari čest sine le! Ama, e Pavleskoro životo na sine bizo problemija (2. Kor. 11:23-27). Iako e Pavleskoro životo na sine lokho, sine jasno kaj o Jehova sine lestar zadovolno. Ustvari, o Pavle šaj sine te izdržinel ko problemija samo adaleske so o Jehova sine lea (Rim. 5:3-5). Akana razmislin baši tli situacija. Iako isi tut nevolje, tu verno istrajnea. Adaleske šaj te ove uverimo kaj o Jehova tano zadovolno tutar.

12. So šaj te slučinel pe keda našti te kera o bukja so bi mangaja te kera len?

¹² Dujto čor: Ako našti keraja adava so bi mangaja te kera (Izr. 13:12). O mangipe hem i blagodarnost sprema o Jehova pottikninena amen te čhiva amenge celija ki služba baši leste. Ama, ako čhivaja amenge celija so nane realna, šaj te razočarina amen (Izr. 17:22). Jekh pionerka, so vikinela pe Holi, vakerela: „Mangljum te džav ki Škola bašo polnovremena objavitelija, te služinav ki javer phuv ili te kerav buti ko gradežno proekti ko Ramapo. Ama mle okolnostija meningje pe hem našti sine te ispolninav adala celija. But razočaringjum man. Sium sine but obeshrabrimi soske pharo tano keda našti te kere o bukja so bi mangea te kere len“. But džene osetinena pe agjaar.

13. Ako o okolnostija na dozvolinena amenge te kera adava so bi mangaja, kola realna celija šaj te čhiva amenge?

¹³ So šaj te pomožinel amenge te irana amari radost? Ma bistre kaj o Jehova na očekujnela amendar poviše taro adava so šaj te kera, a ni palem na odredinela amari vrednost sprema adava so šaj te kera ki služba baši leste. Ov mangela skromno hem verno te služina leske (Mih. 6:8; 1. Kor. 4:2). E Jehovaske tano važno save siem andral, čak hem keda našti te kera ki služba baši leste adava so amen bi mangaja te kera. Tegani, dali ka ovel razumno te očekujna amendar poviše taro adava so o Jehova očekujnela?c Džangjola pe kaj na! Adaleske, ako tle okolnostija na dozvolinena tuke te kere adava so mangea ki služba bašo Jehova, trudin tut te koncentririne tut ko adava so šaj te kere. Na primer, šaj li te obučine e poternen ili te ohrabrine e pophuren? Šaj li te čhive tuke cel te ohrabrine nekas agjaar so ka dža leste, ka javine tut leske ko telefoni ili ka pišine leske poraka? O Jehova radujnela pe keda čhivea tuke celija soj realna hem adaleske ka nagradinel tut agjaar so ka pomožinel tuke te ove radosno. Hem ma bistre kaj panda hari, ko nevo sveto, ka oven amen but prilike te služina e Jehovaske ko načinija kola so ni našti zamislinaja len amenge! I Holi koja so spomningjem la angleder, vakergja: „Ponekogaš bešava hem razmislinava: ’Angli mande tani i večnost. Adaleske so o Jehova ka pomožinel man, ko nevo sveto ka šaj te ispolninav nesave taro mle celija‘“.

14. So javer šaj te čorel amari radost?

¹⁴ Trito čor: Ako o zadovolstvija amenge ko prvo than ko životo. Nesave koristinena o socijalna mreže te šaj te širinen o stavi kaj ka ova čače srekjna ako ugodinaja korkori amenge. Ola pottikninena e manušen te koncentririnen pe ko bukja sar soj o hobi, o šoping hem o patujbe. Nane pogrešno te uživina ko akala bukja. O Jehova mangela te uživina ko šuže bukja kola so stvoringja len. Ama, but džene halile kaj o bukja so mislingje kaj ka keren len radosna, ustvari lele lengiri radost. I Eva, koja so služinela sar pioneri, vakerela: „Ako ko prvo than ko životo tano tuke te zadovoline tle želbe, ništo nane te ovel tuke dovolno“. Ako prastaja palo zadovolstvija, ki krajka nane te ova radosna hem šaj te ova razočarime.

15. So šaj te sikljova taro cari o Solomon?

¹⁵ O primer e careskoro e Solomoneskoro sikavela kaj o prastajbe palo zadovolstvija šaj te čorel amari radost. Ov probingja te arakhel radost adalea so zadovolinela sine ple želbe. Na primer, uživinela sine ko šukar hajbe, ki šuži muzika hem ko sa o šuže bukja so ko leskoro vreme šaj sine te kinen pe parencar. Ama, adava na kergja le radosno. Ov vakergja: „I jakh nikogaš nane čali taro dikhibe, a ni o kan nane pherdo taro šunibe“ (Prop. 1:8; 2:1-11). O idee so širinela akava sveto bašo adava so čače šaj te kerel amen srekjna tane sar falc pare. Iako dikhjona sar te phene isi len nesavi vrednost, lencar našti te kinel pe ništo.

16. Sar adava so ka kera šukaripe e javerenge ka pomožinel amen palem te ova radosna? (Dikh hem o slike.)

¹⁶ So ka pomožinel amenge te irana amari radost? O Isus sikavgja amen kaj „poviše radost isi keda dela pe, nego keda lela pe“ (Apo. 20:35). Jekh starešina so vikinela pe Alekos, vakerela: „Trudinava man te kerav tikne bukja te šaj te pomožinav e javerenge. So poviše dava e javerenge, doborom pohari koncentririnava man ki mande, a adava kerela man radosno“. So šaj te kere tu e javerenge? Ako primetinea kaj tano pharo nekaske, probin te ohrabrine le. Šaj nane te uspejne te rešine leskere problemija, ama šaj te utešine le agjaar so šukar ka šune le, ka sikave sočuvstvo hem ka setinkere le te frdel plo pharipe e Jehovaske (Ps. 55:22; 68:19). Isto agjaar, šaj te uverine le kaj o Jehova na mukhlja le (Ps. 37:28; Isa. 59:1). Šaj čak te pomožine leske praktično, na primer agjaar so ka spremine leske nesavo hajbe ili ka ikljoven zaedno te phiren. Vikin le te džan zaedno ki služba, adava ka pomožinel leske te osetinel pe pošukar. Dozvolin o Jehova preku tute te ohrabrinel e javeren. Adava so ka koncentririne tut ko javera namesto ki tute, ka anel tuke čačutni radost (Izr. 11:25).

17. Sar amari radost tani povrzimi e Jehovaja? (Psalm 43:4).

¹⁷ Šaj te ova čače srekjna ako ponadari da ovaja sa popaše amare nebesno Dadea. I Biblija uverinela amen kaj o Jehova tano amari najbari radost. (Čitin Psalm 43:4.) Čak keda isi amen problemija na valjani te ova sekirime ili te dara. Adaleske, ponadari da te koncentririna amen ko Jehova kolestar so avela amari radost! (Ps. 144:15).