23. ČLANKO PROUČIBASE
ĐILI 2 Jehova tano toklo anav
Kobor tano tuće važno e Jehovaso anav?
Tumen hijen me svedokija, phenela o Jehova (IS. 43:10)
SO KA SIKLJOVA?
Ka dikha sar šaj amen te posvetina hem te opravdina e Jehovaso anav.
1-2. Sar đanaja soj tano e Jehovaso anav važno e Isusese?
E JEHOVASO anav tano but važno e Isusese. Niko poviše olestar na trudinđa pe te objavini e Devleso anav. Sar so dikhljam ko prethodno članko, o Isus čak hine spremno te del po životi aso odova anav hem te mothovi so o Jehova tano pravedno (Mar 14:36; Jevr. 10:7-9). Ked ka završini pe i Hiljadaberšengi vladavina, o Isus spremno ka irini o Kraljevstvo pe Dadese sose mangela sa i slava te pripadini olese (1. Kor. 15:26-28). Sa odova so o Isus ćerđa mothovi kobor ov mangela pe Dade.
2 O Isus alo ki phuv ko pe Dadeso anav (Jov. 5:43; 12:13). Ov objavinđa oleso anav pe učenikonenđe (Jov. 17:6, 26). Sikavđa len ando Jehovaso anav hem ćerđa but čudija ko odova anav (Jov. 10:25). Ked molinđa pe e Jehovase te arakhi olese učenikonen, ov phenđa lese te ćerel odova sebepi po anav (Jov. 17:11). Odolese, ako e Isusese hine odobor važno e Jehovaso anav, tegani sar šaj neko te phenel soj tano e Hristeso učeniko, a te na đanel ja te na koristini olese Dadeso anav?
3. Sostar ka vaćera ko akava članko?
3 Odolese so hijam ćaćutne hrišćanija, amen oponašinaja e Isuse ađahar so mangaja hem poštujinaja e Jehovaso anav (1. Petr. 2:21). Ko akava članko ka dikha, sose o Jehova dinđa okolenđe kola propovedinena i „šukar vest“ te akharen oleso anav (Mat. 24:14). Isto ađahar, ka dikha kobor svakonese amendar valjani te ovel važno e Jehovaso anav.
„NARODO KOVA AKHARI OLESO ANAV“
4. (a) Kova zadatko o Isus dinđa pe učenikonenđe hari angleder te đal ko nebo? (b) Kotar kova pućibe akana ka vaćera?
4 Hari angleder te irini pe ko nebo, o Isus phenđa pe učenikonenđe: „Ama ked o sveti duh ka avel upro tumende ka dobinen nevi snaga hem ka svedočinen mandar ko Jerusalim, ki celo Judeja hem ki Samarija hem sa đi o najdur thana ki phuv“ (Dela 1:8). E Isusese učenikija valjanđe te vaćeren i šukar vest ko sa o thana, a na samo ko Izrael. O manuša kotar celo sveto ka ovel len prilika te oven e Isusese učenikija (Mat. 28:19, 20). Ama, o Isus phenđa: „Ka svedočinen mandar.“ Da li okola so ulje e Isusese učenikija valjanđe te svedočinen samo olestar ili valjanđe te đanen hem e Jehovaso anav hem te svedočinen olestar? Odova so pisini ko 15. poglavlje ko Dela apostolska ka del amen odgovor ko odova pućibe.
5. Sar o apostolija hem o starešine ko Jerusalim mothovđe so sa o manuša valjani te đanen e Jehovaso anav? (Dikh i slika.)
5 Ko 49. berš ki nevi era, o apostolija hem o starešine ćedinđe pe ko Jerusalim te vaćeren ando odova da li okola kola na hine Jevreja valjani te oven obrezime te šaj te oven hrišćanija. Ko krajo ando odova sastanko, o Jakov e Isuseso phral, phenđa: „O [Petar] detaljno vaćerđa sar o Devel prvo puti obratinđa pažnja upro manuša ando avera narodija te šaj olendar te stvorini narodo kova ka akhari oleso anav.“ Ko kaso anav o Jakov mislinđa? Ov citirinđa e proroko e Amose hem phenđa: „Te šaj o manuša kola ka aćhon celone vileja te roden e Jehova, zajedno e manušencar ando sa o narodija okolencar so akharena mo anav, phenela o Jehova“ (Dela 15:14-18). O neve učenikija na samo so valjanđe te sikljon ando Jehova, nego hem valjanđe te akharen oleso anav. Odova značinđa so valjanđe te objavinen averenđe e Jehovaso anav hem so ka oven penđarutne premalo odova anav.
Ko sastanko ando vodeće telo ko prvo veko, o apostolija hem o starešine jasno haljilje so o hrišćanija valjani te oven narodo aso Devleso anav (Dikh o 5. odlomko)
6-7. (a) Sose o Isus alo ki phuv? (b) Kova hine považno razlog sose o Isus alo ki phuv?
6 E Isuseso anav značini „o Jehova tano spasenje“. O Jehova prekalo Isus phravđa o drumo te šaj o manuša kola mothovena vera te oven spasime. O Isus alo ki phuv te del po životi e manušenđe (Mat. 20:28). Odolese so platinđa i otkupnina, amare o grehija šaj te oven oprostime hem šaj te ovel amen večno životi (Jov. 3:16).
7 Ama, sose valjanđa e manušenđe i otkupnina? Sebepi odova so desinđa pe ko edensko vrt. Sar so pominđam ko prethodno članko, o Adam hem i Eva pobuninđe pe protiv o Jehova hem ađahar našalđe i prilika te živinen večno (Post. 3:6, 24). Ama, o Isus na alo ki phuv samo te spasini e Adamese hem e Evake potomkonen. Hine jekh považno razlog, e Jehovaso anav hine lađaćerdo (Post. 3:4, 5). Odolese, o manuša valjanđe te đanen so o Jehova na ćerđa ništa lošno hem so ov but mangela amen. O Isus odova najšukar dokažinđa odolese so predstavinđa e Jehova hem savršeno ćerđa odova so ov rodinđa lestar.
Sar šaj neko te phenel soj tano e Isuseso učeniko, a te na đanel ja te na koristini olese Dadeso anav?
8. So sa e Isusese učenikija valjanđe te haljon?
8 Sare kola ka mothoven vera ko Isus, bizo obzir da li hine Jevreja ja na, valjanđe te haljon so olengo spasenje avela ando Isuseso Dad, o Jehova (Jov. 17:3). Uzo odova, sar o Isus, hem on valjanđe te oven penđarde sar neko ko akhari e Devleso anav. Isto ađahar, valjanđe te haljon kobor tano važno te posvetinen e Jehovaso anav. Olengo spasenje zavisinđa ando odova (Dela 2:21, 22). Odolese, sa e Isusese verna učenikija morandilje te sikljon ando Jehova hem ando Isus. Nane ni čudo sose o Isus i molitva ko Jovan 17. poglavlje završinđa ađahar so phenđa: „Me objavinđum lenđe to anav hem ponodri ka objavinav le, te šaj o mangipe kova tu mothovđan maje on te mothoven avere manušenđe hem te šaj te ovav ko jekhipe olencar“ (Jov. 17:26).
„TUMEN HIJEN ME SVEDOKIJA“
9. Sar šaj te mothova so e Jehovaso anav tano amenđe najvažno?
9 Sar so dikhljam đi akana, te šaj te sledina e Isuse, amen valjani te posvetina e Jehovaso anav (Mat. 6:9, 10). Oleso anav valjani te ovel amenđe diso najvažno ko životi hem odova valjani te mothova ko amare delija. Ama, so valjani te ćera te šaj te posvetina e Jehovaso anav hem te mothova so o Satana hovavi?
10. Ando kova simbolično sudsko slučaj vaćeri pe ko Isaija kotar 42. đi o 44. poglavlje? (Isaija 43:9; 44:7-9; dikh i slika.)
10 Ko Isaija kotar 42. đi o 44. poglavlje pisini so valjani te ćera te šaj te posvetina e Jehovaso anav. Ko odola poglavlja vaćeri pe ando jekh simbolično sudsko slučaj kuri o Jehova pućela e manušen kola na služinena lese te dokažinen so olenge devela ćaće postojinena. Sar soj tano običaj ko sudo, odothe o Jehova pućela da li isi disavo svedoko kova šaj te dokažini odova. Ama na hine nijekh. (Čitin Isaija 43:9; 44:7-9.)
Amen svedočinaja ando Jehova ko but načinija (Dikh o 10. hem o 11. odlomko)
11. So o Jehova phenela pe narodose ko Isaija 43:10-12?
11 Čitin Isaija 43:10-12. O Jehova pe narodose phenđa: „Tumen hijen me svedokija [. . .] a me hijum o Devel.“ O Jehova pućlja len te odgovorinen ko akava pućibe: „Isi li Devel osim mande?“ (Is. 44:8). Amen isi amen bari čast te odgovorina ko odova pućibe. Amare lafencar hem amare deloncar, amen mothovaja so samo o Jehova tano ćaćutno Devel. Oleso anav tano najbaro. Amare životoja dokažinaja so ćaće mangaja e Jehova hem so hijam lese verna bizo obzir save pharipa o Satana ćerela amenđe. Ko asavko način amen pomožinaja te svetini pe e Jehovaso anav.
12. Sar ispuninđa pe o proročanstvo ando Isaija 40:3, 5?
12 Isto ađahar, o Isaija prorekninđa so neko ka čistini ili ka pripremini o drumo e Jehovase (Is. 40:3). Sar ispuninđe pe akala lafija? O Jovan Krstitelj pripreminđa o drumo aso Isus kova alo ko Jehovaso anav hem vaćerđa ando odova anav (Mat. 3:3; Mar. 1:2-4; Luka 3:3-6). Odova isto proročanstvo phenela: „Ka otkrijini pe e Jehovasi slava“ (Is. 40:5). Sar odova hine? Ked o Isus alo ki phuv, ov odobor savršeno predstavinđa e Jehova so ka phene o Jehova hine ki phuv (Jov. 12:45).
13. Sar šaj te oponašina e Isuse?
13 Ked braninaja e Jehovaso anav, amen oponašinaja e Isuse. Amen akharaja oleso anav hem sarinenđe vaćeraja ando olese čudesna delija. Te šaj odova te ćera ko jekh šukar način, amen valjani te sikava e manušen hem ando odova so o Isus ćerđa te šaj te posvetini pe e Jehovaso anav (Dela 1:8). Niko na svedočinđa e Jehovastar pošukar ando Isus hem amen oponašinaja oleso primer (Otkr. 1:5). Ama, sar šaj te mothova soj tano amenđe važno e Jehovaso anav?
SAR ŠAJ TE MOTHOVA SOJ TANO AMENĐE VAŽNO E JEHOVASO ANAV?
14. Sar so pisini ko Psalam 105:3, so osetinaja sebepi e Jehovaso anav?
14 Amen hijam ponosna sebepi e Jehovaso anav. (Čitin Psalam 105:3.) O Jehova tano but bahtalo ked hvalinaja amen olese anaveja (Jer. 9:23, 24; 1. Kor. 1:31; 2. Kor. 10:17). Te hvalina amen e Jehovaja značini so hijam ponosna soj tano ov amaro Devel. Amenđe tani čast te hvalina oleso anav hem te phena averenđe so sa so ćerela tano pravedno. Niked na valjani te lađa te vaćera amare kolegenđe, amalenđe ki škola, komšijenđe hem averenđe so hijam e Jehovase svedokija! O Beng mangela te ćhinavi amen te vaćera ando Jehovaso anav averenđe (Jer. 11:21; Otkr. 12:17). U stvari, ov hem okola so širinena hovajbe mangena o manuša te bistren e Jehovaso anav (Jer. 23:26, 27). Ama, odolese so mangaja e Jehovaso anav, amen mangaja te hvalina le svako puti ked isi amen prilika aso odova (Ps. 5:11; 89:16).
15. So značini te vićina e Jehovaso anav?
15 Amen hem ponodri vićinaja e Jehovaso anav (Joilo 2:32; Rimlj. 10:13, 14). Te šaj te ćera odova, nane dovoljno samo te đana e Devleso anav hem te koristina le. Valjani te upoznajina e Devle, te ovel amen poverenje upro leste hem te roda lestar pomoć hem vođstvo (Ps. 20:7; 99:6; 116:4; 145:18). Isto ađahar, amen objavinaja oleso anav e manušenđe, vaćeraja lenđe save osobine isi le hem pomožinaja len te meninen po životi te šaj te ugodinen lese hem te oven spasime (Is. 12:4; Dela 2:21, 38).
16. Sar šaj te mothova so o Beng hovavi?
16 Amen hijam spremna te patina sebepi e Jehovaso anav (Jak. 5:10, 11). Ked ko pharipa aćhovaja verna e Jehovase, amen mothovaja so o Satana hovavi. Ko vreme ked o Jov živinđa, o Satana optužinđa okolen kola služinena e Jehovase. Ov phenđa: „Sa so isi le o manuš ka del aso po životi“ (Jov 2:4). O Satana phenđa so amen ka služina e Jehovase samo ked tano amenđe lokho hem so ka aćhava le ked ka oven amen pharipa. O verno manuš o Jov mothovđa so akija optužba nane tačno. Amen isi amen čast te dokažina so bizo obzir kola pharipa o Beng ćerela amenđe, amen niked na ka irina amaro dumo e Jehovase. Šaj te ova potpuno sigurna so o Jehova ka arakhi amen sebepi po anav (Jov. 17:11).
17. Sar so pisini ki 1. Petrova 2:12, sar šaj te proslavina e Jehovaso anav?
17 Amen trudinaja amen te proslavina e Jehovaso anav (Posl. 30:9; Jer. 7:8-11). Odolese so o manuša đanena so svedočinaja ando Jehova, amen šaj ili te proslavina le ili te lađaćera le. (Čitin 1. Petrova 2:12.) Sebepi odova, amen mangaja te da sa amendar te hvalina e Jehova amare lafencar hem deloncar. Tegani, iako hijam nesavršena, amen šaj te mothova čast e Jehovase anavese.
18. Sar šaj pana te mothova soj tano amenđe važno e Jehovaso anav? (Dikh i fusnota.)
18 Amen mothovaja poštovanje e Jehovase anavese bizo obzir so o manuša mislinena amendar (Ps. 138:2). Sose tano odova važno? Odolese so ked amen ćereja o buća kola tane ugodna e Jehovase, but putija odova na sviđini pe e manušenđe hem šaj te phenen but lošna buća amendar.a Ked o Isus mulo, o manuša upro leste dikhlje sar kriminalco. Ama, o Isus hine spremno te merel ko asavko način te šaj o Jehova te proslavini pe. Ov „na marinđa asi lađ“ sose na brininđa pe ando odova so o manuša mislinđe olestar (Jevr. 12:2-4). Olese hine najvažno te ćerel e Jehovasi volja (Mat. 26:39).
19. So osetineja premalo Jehovaso anav hem sose?
19 Amen hijam ponosna so služinaja e Jehovase hem isi amen bari čast so hijam vićime e Jehovase svedokija. Sebepi odova, spremna hijam te trpina ked avera marena amenđe muj. E Jehovaso anav tano amenđe považno čak hem ando odova so o manuša mislinena amendar. Odolese, valjani ponodri te ova odlučna te slavina e Jehovaso anav bizo obzir sar o Satana ka probini te ćhinavi amen. Ko asavko način, amen ka mothova so hem amenđe sar e Isusese e Jehovaso anav tano najvažno.
ĐILI 10 Hvalin e Jehova, amare Devle
a Čak hem o verno manuš o Jov počminđa previše te brinini pe ando odova so o manuša mislinena olestar ked napadinđe le olese trin amala. Ked našalđa pe ćhaven hem sa so hine le, o Jov „na grešinđa niti phenđa diso lošno e Devlestar“ (Jov 1:22; 2:10). Ama, ked optužinđe le so ćerela diso lošno, ov počminđa te vaćeri bizo te razmislini. Ki odija situacija, oleso ugled hine lese považno ando odova te posvetini e Jehovaso anav (Jov 6:3; 13:4, 5; 32:2; 34:5).