«Во дэл зор кодэлэсти, ко цыеля»

1. Саво амэндэ может тэ авэл ԥаримос и васо лэ Иеговастэ драго по ди, кала лэстирэ служителя на парашэн тэ кандэн лэс? (Диқэн и картинка англа статья.)

ВСАВОРЭ ӷанэн, кай и жизня андэ кадэва миро, фартэ ԥари. Кажнонэстэ кай ԥрала и ԥэя анда собрания пэско ԥаримос. Ай кадяжэ бутэндэ исин ԥаро насвалимос. Дэсавэнди трэбуй тэ диқэн пала пэско родо, саво уже ԥуро, хоть вонэ и екжэнэ най фартэ тэрнэ. Исин кодэла, ко бут терэн бути, кай лэндирэ ерестэ тэ авэл хоть кода, со трэбуй важ и жизня. Дэсавэндэ най ек ԥаримос, ай сразу бут кацаво ԥаримос! Кода, кай о мануш тэ виритярэл кадэва ԥаримос, во трэбуй тэ стол бут время и зор, ай кадяжэ ловэ. Даже, кала тумэндэ исин кацаво ԥаримос, тумэ всаек патян, кай о Иегова поможыя тумэнди. Тумэ ӷанэн, кай англэ авэла вся драго, важ кода кай о Иегова дя алав пала када. Лэ Иеговастэ фартэ драго по ди, кала тумэ андэ када патян!

2. Сар амэн подритярэн и алава анда Исаия 40:29, но со амэ можем тэ гиндосарас най кадя?

² Дэкала тумэ гиндон, кай о ԥаримос, саво исин тумэндэ, фартэ ԥарэс тэ пэрэандярэн. Сэрэн, кай о ԥаримос, саво исин тумэндэ, исин и аврэндэ. Анда Библия амэ уӷанас, кай дэлмут лэ манушэндэ, савэ служинас лэ Дэвлэсти, сас кацаво же по ди (1 Цар. 19:4; Иов 7:7). Но вонэ на умэкэнас и вас, ай мангэнас лэ Иеговас, кай во лэнди тэ поможый. И када на сас евья, важ кода кай о Иегова «дэл зор кодэлэсти, ко цыеля» (Ис. 40:29). Андэ амарэ деса дэсавэ, ко служин лэ Иеговасти гиндон, кай фэдэр пока тэ парашэн тэ служин лэсти. Васо? Кай тэ пэрэандярэн о ԥаримос, саво исин андэ лэндири жизня. Кабута тэ авэс христианино, када най радость, ай ԥаримос. Вонэ лэн тэ терэн вся кадя, сар камэл о Сатана! Кадэла ԥрала и ԥэя парашэн тэ адинон лэ Дэвлэско Алав, тэ ԥирэн пэ собрании и тэ росԥэнэн важ о Дэл.

3. а) Со амэнди трэбуй тэ терас, кай о Сатана тэ на залэл амэндар о зор? б) Пала со амэ подаса дума андэ кадэя статья?

³ О Сатана ӷанэн, кала амэ терас лэ Иеговастири дила, када дэл амэнди зор. Но во на камэл, кай амэ тэ авас зоралэ. Важ када, кала тумэ фартэ цыелэ и тумэндэ нинай зор и лэ ԥаримастар ашэл ԥарэс по ди, никала на оджан лэ Иеговастар. Ай пашон каринг лэстэ и во «дэла тумэнди зор и стерэла, кай тумэ тэ авэн састэстэ» (1 Пет. 5:10; Иак. 4:8). Андэ кадэя статья амэ подаса дума пала ԥаримос, через саво амэ можем тэ парашас тэ служисарас лэ Иеговасти кадя, сар спэрва. Кадяжэ диқаса, сар и алава анда Библия поможына амэнди тэ пэрэандярас о ԥаримос. Но май англал уӷанаса, со ԥэнэнпэ андэ Исаия 40:26—31 пала кода, сар о Иегова может тэ дэл амэнди зор.

«КОДЭЛА, КО АШТЯРЭН ЛЭ ИЕГОВАСТАР О ЛАШИМОС, УПАЛЭ ЛЭНА ЗОР»

4. Сости амэн сытярэн и алава анда Исаия 40:26?

⁴ Адиносар Исаия 40:26a. Нико нэ может тэ проадиной всаворэ звёзды, савэ исин андэ люма. Сар ԥэнэн и учёни, вокруг амэндэ 400 миллиардоря звёзды. О Иегова приԥэндя алав кажнона звёздочкати. Сости амэн када сытярэл? Если о Дэл шол сама пэ звёзды, погиндон, сар во шол сама пэр тумэндэ! Важ кода кай тумэ служин лэсти, кай любин, ай най, кай пэр тумэндэ варико тасавэл (Пс. 19:1, 3, 14). Амаро небесно Дад фартэ драго ӷанэн амэн. Андэ Матфея 10:30 ԥэнэнпэ, кай «во ӷанэн, скати бал амэндэ по шэро». Ай андэ Псалом 37:18 амэ адиносарас: «Иегова ӷанэн деса кодэлэн, ко андэ вся кандэн лэс». Када сыкавэл, кай во диқэл, саво ԥаримос амэндэ исин и во дэла амэнди зор, кай тэ пэрэандярас о ԥаримос.

5. Васо амэ патяс, кай о Иегова дэла амэнди зор?

⁵ Адиносар Исаия 40:28b. О Иегова кодэва, ко дэл фартэ бут зор. Погиндон, скати зор жал лэ қамэстар. О мануш, савэс ақарэн Дэвид Бонданис, саво вимэкля ашунглэ книжки, пистросардя, кай кажно секунда лэ қамэстар жал кацаво зор, саво может тэ авэл, кала зорвинпэ миллиардоря бомб, савэндар на ашэлпэ нисо. Ай авэр учёно виадиносардя, кай важ ек секунда лэ қамэстар вижал кадя бут зор, саво хутилдоп лэ манушэнди пэ двести тысяч бэрш. Када сыкавэл, кай кодэва, ко «дя яг» о қам, дэла и амэнди зор, кай амэ тэ пэрэандярас любо ԥаримос.

6. Васо можно тэ ԥэнас, кай лэ Иисусоско ӷамо найԥаро? Кала амэ када ӷанас, со амэ камас тэ терас?

⁶ Адиносар Исаия 40:29c. Кала амэ служисарас лэ Иеговасти, тоди амэ бахталэ. Кала о Иисусо дэлас дума пэстирэ учениконэнца, во ԥэндя: «Лэн пэр пэстэ мэрно ӷамо... и тумэнди авэла май вушэро по ди. Важ кода кай мэрно ӷамо вушэро и мэрно ԥаримос найԥаро» (Матф. 11:28—30). И када па чачимастэ кадя! Дэкала амэндэ нинай зор, кала жас пэ собрания или росԥэнас важ о Дэл. Но, со амэндэ по ди, кала амэ рисавас цэрэ? Амэнди ашэл май фэдэр и амэндэ май бут зор тэ пэрэандярас амаро ԥаримос. Чаче, лэ Иисусоско ӷамо найԥаро!

7. Росԥэнэн, сар кода, со сас ла ԥэяса, сжалпэ кодэлэса, со ԥэндя о Иисусо андэ Матфея 11:28—30.

⁷ Еқа ԥэятэ, ԥэнаса ла ақарэн Соня, исин насвалимос, савэстар вой вся время цыени. Латэ депрессия, ай кадяжэ латэ часто фартэ дуқал о шэро. И важ када лати дэкала ԥарэс тэ жал пэ собрания. Акэ, со вой пистросардя после кода, кала через о зор вой жыля пэ собрания: «И речь сас пала кода, кала о мануш умэкэл и вас. О ԥрал дэлас дума ковлэс и сыкавэлас, кай во полэл кацавэ манушэн. Мэ на виритярдэм и заровдэм. Мэ инке еқвар полэм важ пэстэ, манди фартэ трэбуй тэ авав пэ собрании». Сар же радо сас и Соня, кала через о зор вой всаек жыля пэ собрания!

8, 9. Со сыкавэн лэ Павлостирэ алава: «Кала мандэ на хутилэл зор, тоди мэ зорало»?

⁸ Адиносар Исаия 40:30d. Всаворэнди амэнди трэбуй тэ полас акэ со. Со бы амэндэ драго тэ на вижал, всаек исин кода, со амэ нэ можем тэ терас пэстирэ зорэса. Када поля и о апостоло Павло. Хоть лэстэ и драго бут со вижалас, во всаек нэ мог тэ терэл кода, скати во камэлас. Кала во росԥэндя лэ Дэвлэсти пала со во фартэ загиндойпэ, о Дэл лэсти ԥэндя: «Мэрно зор май драго дицол, кала кай о мануш лэс на хутилэл». О Павло драго поля, со ԥэндя лэсти о Иегова. Важ када о Павло ԥэндя: «Кала мандэ на хутилэл зор, тоди мэ зорало» (2 Кор. 12:7—10). Со сыкавэнас кадэла алава?

⁹ О Павло полэлас, кай пэстирэ зорэса во мог тэ стерэл кати набут. Кай тэ стерэл варисо май бут, лэсти трэбуй сас, кай о Дэл лэсти тэ поможый. Кала о Павло сас цыено, через пэско свынто духо о Дэл дэлас лэсти зор. Кадэлэ зорэса о Павло мог тэ терэл кода, со во никала на стердоп екжэно. Када поджал и каринг амэндэ. Амэ па чачимастэ зоралэ тоди, кала о Иегова дэл амэнди пэско свынто духо!

10. Сар о Иегова поможыяс лэ Давидости тэ пэрэандярэл о ԥаримос?

¹⁰ О Давидо, саво пистросардя о Псалом, най еқвар андэ пэсти жизня диқэлас, кай лэ Дэвлэско свынто духо, када фартэ баро зор. О Давидо пистросардя: «Туса, мэ винашава против кодэлэн, кас бут и савэ чорэн, мэрнэ Дэвлэса ваздавапэ пэ стина» (Пс. 18:29). Исин «стины», пэ савэ амэ екжэнэ нэ можем тэ заӷуляс. Кадяжэ исин ԥаримос, андэ саво амэ екжэнэ нисо на стераса. Важ када амэнди трэбуй о Иегова.

11. Сар о свынто духо поможый амэнди тэ пэрэандярас о ԥаримос?

¹¹ Адиносар Исаия 40:31e. И орлоря, кала вурян баро дром, терэн када най кати пэстирэ зорэса. Вонэ ваздэнпэ вучес и астарэн о тато воздухо. И тоди лэндэ жал най кадя бут зор пэ када. Важ када, кала тумэнди дэн ԥари дила, погиндон пала орлоря. Мангэн лэ Иеговас, кай во «тэ ваздэл тумэн вучес», тэ дэл кода, со поможыя, пэско свынто духо (Иоан. 14:26). Амэ можем тэ мангас, кай о Иегова тэ дэл амэнди пэско свынто духо андэ любо время, о дес и рят. Инке амэнди фартэ трэбуй лэ Дэвлэстири помощь, кала амэ на дополям ек аврэс андэ собрания. Но васо амэндэ можем када тэ авэл?

12, 13. а) Васо дэкала андэ собрания амэ можем тэ холявас ек пэ еқэстэ? б) Со амэ уӷанас пала Иегова анда кода, со стердяпэ лэ Иосифоса?

¹² Амэ всаворэ грешни мануша, важ када можем тэ на дополас ек еқэс. Дэкала и алава, савэ ԥэнэн амарэ ԥрала и ԥэя, савэ анда собрания, могут амэн тэ холярэн. Кадяжэ вонэ могут амэн тэ холярэн кодэлэса, сар вонэ пэс андярэн. Но кацаво может тэ авэл и амаря ригатар. О Иегова домэкэл када кадяжэ, сар во домэкэл и авэр ԥаримос, через саво дицол, сави амэндэ вера. О Дэл любий лэ ԥралэн и лэ ԥэян анда собрания и на диқэл пэ кода, со вонэ най кадя терэн. Амэ сытювас тэ терас вся, кай тэ ладисарас лэнца. Када ек, соса амэ можем тэ сыкавас, кай на ашавас лэ Иеговас!

¹³ О Иегова на улэл о ԥаримос пэстирэ служителёнэндар. Када драго сыкавэл, со сас лэ Иосифоса. Кала во сас инке тэрно мануш, лэстирэ чаче ԥрала битиндэ лэс андо рабство андо Египто (Быт. 37:28). Кай о Иегова дуқалас оди, кала во диқля, кай лэстирэ другоса лэ Иосифоса, саво лэс кандэлас, обжылэпэ фартэ найдраго. Но о Дэл на уля лэстар кадэва ԥаримос. Инке сас ек ԥаримос, саво о Иегова на уля лэ Иосифостар. Када сас, кала по Иосифо хохадэ, кай во камля нахально тэ пэрэсовэл лэ Патифаростиря хулаяса. Через када лэс стодэ андо бар. Можно тэ ԥэнас, кай о Дэл ашадя лэ Иосифос? Андэ Библия ԥэнэнпэ: «О Иегова терэлас кадя, кай лэстэ вся тэ вижал драго» (Быт. 39:21—23).

14. Саво лашимос анэн, кала о мануш на холявэл?

¹⁴ Подаса дума пала инке ек мануш, пала Давидо. Лэса обжылэпэ фартэ найдраго. Най кажнонэ манушэса сас кацаво, сар лэса. Но лэстэ сас фартэ лащи дружба лэ Дэвлэса. Во на домэкля, кай андэ лэско ди тэ авэл бари холи. Во пистросардя: «Ашав и холи и фартэ бари холи отшу. На холяв, кай тэ на стерэс вэрыто» (Пс. 37:8). Амэ на холявас, важ кода кай камас тэ терас кадя, сар о Иегова. Во «на рий амэнди кода, со амэ затердям через амарэ грехоря» (Пс. 103:10). Кадяжэ, кала амэ на холявас, амэ можем тэ диқас, состар фэрисавас. Через и холи о мануш может тэ занасвавэл и лэстэ может тэ авэл давления. Кадяжэ лэстэ может тэ авэл насвалимос андэ лёгки, андо кырло, андо нак. Ай инке может тэ римой и печень и поджелудочно. И через када может нэправильно тэ терэл о желудко. Кала о мануш холявэл, через када во драго на гиндой. О мануш может еқвар тэ холявэл и через када лэсти по ди может тэ авэл найдраго бут время. Авелоп фэдэр тэ на холявэс. Андэ Библия ԥэнэнпэ: «кадэлэстар, кай андо ди нинай холи, кай о мануш исин зор» (Прит. 14:30). Сар пэс тэ андярэс, кала тути стердэ найдраго по ди? Со поможыя тэ простис лэ ԥралэн и лэ ԥэян? Андэ када май драго поможыя и Библия.

АМЭН ВАРИКО АНДА СОБРАНИЯ ХОЛЯРДЯ

15, 16. Со можно тэ терэс, кала тут холярдя варико анда собрания?

¹⁵ Адиносар Эфесянам 4:26f. Амэ на дас наздив, кала амэнца и мануша, савэ най свидетеля, обжанпэ найдраго. Но, кала анда собрания ԥрал или ԥэй, или варико анда ери, ԥэнэн или терэн кода, со амэн холярэл, када может пэ долгонэстэ тэ залэл амэндар о зор. Ԥэнаса, амэнди ԥарэс тэ вишас анда шэро кода, со стердяпэ. Ашэлапэ амэндэ кадэя холи по мануш пэ бут бэрша? Или амэ тераса кадя, сар ԥэнэнпэ андэ Библия? Май йто стерэн, кай машкар тумэндэ тэ авэл драго. Со май фартэ амэ цырдас и время, кай тэ дас дума кодэлэ манушэса, со май ԥарэс авэла, кай машкар амэндэ тэ авэл драго.

¹⁶ Ԥэнаса, тут холярдя о ԥрал анда собрания и ту нэ можешь када тэ ашавэс вся кадя. Со тэ терэс, кай машкар тумэндэ тэ авэл драго? Май англал, анда вся оди росԥэн лэ Иеговасти кода, состар тутэ по ди ԥарэс. Манг лэстар, кай во тути тэ поможый, кай ту драго тэ подэс дума кодэлэса, ко тут холярдя. Сэр, кай во лэ Иеговаско друго (Пс. 25:14). О Дэл лэс любий. О Иегова ковлэс и драго обжалпэ пэстирэ другонэнца. Во камэл, кай амэ кадяжэ тэ терас (Прит. 15:23; Матф. 7:12; Кол. 4:6). Драго погиндосар, со ту камэс тэ ԥэнэс. На гиндосар, кай тиро ԥрал камля тэ стерэл тути найдраго. Погиндосар пала кода, кай может тумэ ек аврэс на полинэ. Кадяжэ погиндосар, кай андэ кода, со стердяпэ, дошало и ту. Ту можешь тэ залэс и дума кадя: «Может мэ фартэ йто прилав каринг оди, но арати, сар амэ дям дума, манди здяпэ...» На умэк и вас, кала тутэ на вижыля важ ек разо тэ стерэс, кай машкар тумэндэ тэ авэл драго. Мангпэ пала кодэва ԥрал. Манг лэ Иеговас, кай во тэ дэл лэсти лашимос, ай кадяжэ тэ поможый тути тэ диқэс, со андэр лэстэ исин лашо. Со бы тэ на авэл, ӷан, кай лэ Иеговастэ драго по ди, кала диқэл, кай ту анда вся оди терэс, кай тэ ладис кодэлэса, ко лэсти друго и тути ԥрал.

ДУҚАЛ ОДИ, КАЙ ВАРИКАЛА СТЕРДЯ НАЙ КАДЯ

17. Сар о Иегова поможый кодэлэнди, ко стердя баро бэзэх, и васо трэбуй тэ прилэс лэстири помощь?

¹⁷ Дэсавэ христианоря, савэ стердэ баро бэзэх, гиндон, кай вонэ на ашэн, кай упалэ тэ служин лэ Иеговасти. Кала о мануш дошалярэл пэс и лэсти лажаво, када залэл лэстар о зор, радость и о миро анда оди. Акэ, со ԥэндя о царё Давидо, кала лэско ди дошалярэлас лэс: «Кала мэ ашавас мулком, мэрнэ кокаля вишутелэ кодэлэстар, саво ԥаримос мандэ сас кажно дес, важ кода кай о дес и рят тиро вас тасавэлас пэр мандэ». Драго, кай о Давидо виарақля андэр пэстэ зор, кай тэ кандэл лэ Иеговас. Во пистросардя: «И акэ, мэ росԥэндэм тути пала пэско бэзэх... [...] И ту улян мандар мэрни дош пала мэрно бэзэх» (Пс. 32:3—5). Если ту стердян баро бэзэх, ӷан, кай о Иегова камэл тэ простий тут и тэ поможый тути. Но тути трэбуй тэ прилэс и помощь, сави во дэл через и старейшиноря (Прит. 24:16; Иак. 5:13—15). Тэ цырдэс и время нащи. Важ кода кай кадэлэстар дицола, жувэса ту вечно чи най! Но, со тэ терэс, кала о Иегова тут уже простисардя, ай тутэ всаек ԥарэс по ди, важ кода кай тиро ди тут дошалярэл?

18. Сар кода, со сас лэ Павлоса поможыя кодэлэнди, ко гиндой, кай во на ашэл тэ служий лэ Иеговасти?

¹⁸ Сас время, кала о Павло фартэ загиндояспэ, со во стердя най кадя. Во пистросардя: «Мэ само найбаро анда апостолоря и на ашав, кай пэр мандэ тэ ԥэнэн, кай мэ апостоло, важ кода кай мэ ӷонисаравас лэ Дэвлэстири собрания». Май англэ во ԥэндя: «Но о Дэл дя манди лашимос, саво мэ на затердэм, мэ кодэва, со мэ исин» (1 Кор. 15:9, 10). О Иегова полэлас, кай о Павло сас, сар всаворэ грешни мануша. Но о Иегова всаек гиндояс, кай о Павло ашэл тэ авэл апостоло. О Иегова камэлас, кай во када тэ полэл. Кала ту анда вся оди каиспэ и росԥэнэс лэ Иеговасти и лэ старейшинонэнди пала пэско бэзэх, кала када трэбуй, ӷан, кай о Иегова жалуий анда вся оди. Фартэ патя, кай о Дэл простисардя тут! (Ис. 55:6, 7).

19. Саво стихо витидэ по 2018 бэрш и васо во фартэ поджал андэ амарэ деса?

¹⁹ Важ кода кай пашол и время, кай о Дэл тэ улэл кадэва найлашо миро, амэндэ авэла андэ жизня ԥаримос инке май бут. Но на бистрэн. О Иегова терэл кадя, кай о мануш, савэстэ нинай зор и саво цыёл, тэ авэл састо. И када сыкавэл, кай о Дэл может тэ поможый и амэнди (Ис. 40:29; Пс. 55:22; 68:19). Амэ пала када ласа вся время тэ сэрас, кала андо 2018 бэрш ласа тэ авас пэ собрании андо зало, кай тидэнпэ лэ Иеговастирэ свидетеля. Важ кода кай англа амарэ яқа авэна алава анда стихо, саво пэ вся о бэрш: «Кодэла, ко аштярэн лэ Иеговастар о лашимос, упалэ лэна зор» (Ис. 40:31).