О Иегова дэла зор амэнди

1, 2. Саво ԥаримос исин кай лэ Дэвлэстирэ служытеля?

О ПАВЛО най кати лэ Тимофеёсти, но и всаворэ христианонэнди ԥэнэнас тэ служын лэ Дэвлэсти анда вся оди (2 Тим. 4:5). Важ када амэ всаворэ пристас бут зор, кай тэ приашундювас каринг кадэва совето. Но дэкала када фартэ найвушэро. Почти всаворэ ԥралэнди и ԥэянди трэбуй тэ авэн смили, кай тэ росԥэнэн пала Дэл (2 Тим. 4:2). Например, исин страны, андэ савэ амари дила заԥандадэ или на дэн спокойно тэ служын. И тоди лэн дажэ моӷут тэ бэшарэн андо баруно!

² Кай лэ Иеговастирэ служытеля фартэ бут ԥаримос андэ жызня, через саво лэндэ умэкэнпэ и вас. Дэкасти трэбуй тэ терэн бут бути, кай тэ проправарэн лэ ерес. И ужэ потом лэндэ на хутилэл зор пэ служэния. Аврэндэ исин насвалимос, саво бут бэрша на виличийпэ. Или бэрша, через савэ вонэ нащи бут служын лэ Дэвлэсти. Дэко совсем нэ можэт тэ вижал анда цэр. Ай дэсавэнди ԥарэс кодэлэстар, кай вонэ гиндон, кай нисо на ашэн. И ԥэй Раяb ԥэнэн, кай латэ именно кацавэ гиндоря. Лати ашэл кадя ԥарэс лэндар, кай вой ашэл нисави, и тоди латэ на ашэлпэ зор тэ жал андэ служэния. Ай кадэлэстар вой лэл инке май фартэ пэс тэ дошалярэл.

3. Пала со амэ подаса дума андэ кадэя статья?

³ О Иегова поможый и дэл зор амэнди, кай амэ тэ на парашас тэ служысарас лэсти, саво бы ԥаримос амэндэ тэ на авэл. Но англа кода, сар тэ подас дума, сар о Иегова поможый амэнди, уӷанаса, сар во подритярэлас лэ Павлос и лэ Тимофеёс, кай вонэ тэ на парашэн тэ служын дажэ андо ԥаримос.

О ИЕГОВА ДЭЛ ЗОР, КАЙ ТЭ РОСԤЭНАС ПАЛА ЛЭСТЭ

4. Саво ԥаримос сас кай о Павло?

⁴ Кай о Павло сас бут ԥаримос. Лэс марэнас, бэшарэнас андо бар и камэнас тэ умарэн (2 Кор. 11:23—25). Лэстэ сас найлашэ гиндоря пала пэстэ (Рим. 7:18, 19, 24). Ай инке лэсти сас фартэ ԥарэс кодэлэстар, кай лэстэ сас найлашо зор, и во дажэ мангэлас лэ Иеговас, кай лэстэ кадэва насвалимос тэ на авэл (2 Кор. 12:7, 8).

5. Со о Павло терэлас, хоть лэстэ и сас ԥаримос?

⁵ О Иегова придэлас зор лэ Павлости, кай во тэ на парашэл тэ служый лэсти, дажэ андо ԥаримос. Например, кала о Павло сас андо Римо, лэс бэшардэ тала барунарицко охрана и лэсти нащи сас тэ вижал цэрал. Но во всаек всаворэ одеса на парашэлас тэ росԥэнэн пала Дэл лэ барэ манушэнди, савэндэ сас власть (Деян. 28:17; Флп. 4:21, 22). И инке во росԥэнэнас пала Дэл лэ римсконэ охраниконэнди и «всаворэнди, ко каринг лэстэ авэлас» (Деян. 28:30, 31; Флп. 1:13). Андэ кодэя время о Павло пистросардя письморя, савэ идоси подритярэн лэ христианонэн. Инке лэско примеро придя зор лэ ԥралэнди и лэ ԥэянди андо Римо. Кодэла ԥрала «инке май смило и би дарако линэ тэ росԥэнэн лэ Дэвлэстирэ алава» (Флп. 1:14). Хоть кай о Павло дэкала на сас возможность май бут тэ терэл андэ служэния лэ Дэвлэсти, но во терэлас вся, со моӷ. Во поможысардя, кай «лащи весть тэ ашундёл май дур» (Флп. 1:12).

6. Со, сар пистромэ андэ 2 Коринфянам 12:9, 10, поможысардя лэ Павлости тэ стерэл лэ Дэвлэстири дила?

⁶ О Павло полэлас, кай вся, со во терэл, када блаӷодаря лэ Дэвлэстирэ зорэсти. Во ԥэнэнас, кай лэ Дэвлэско зор «дицол тоди, кала во слабо». (Адиносар 2 Коринфянам 12:9, 10.) Через пэско свынто духо о Иегова дэлас лэ Павлости зор, кай во тэ стерэл лэстири дила и тэ на диқэл по ԥаримос, саво лэстэ исин.

7. Саво ԥаримос прижаласпэ тэ пэрэандярэл лэ Тимофеёсти андэ служэния?

⁷ О Тимофеё сас лэ Павлоса андэ служэния и никала на ашавэлас лэс. Во трэбуй сас тэ патял кай о Иегова пэстирэ зорэса поможыя лэнди. О Тимофеё сас лэ Павлоса андэ най ек мисианерско служэния. Инке о Павло ԥэндясас лэ Тимофеёсти, кай во тэ подритярэл лэ ԥралэн и лэ ԥэян андэ собрании и тэ поможый лэнди (1 Кор. 4:17). Можэт, о Тимофеё дэкала гиндояс, кай во на поджал, кай тэ терэл кадэя дила. Важ када лэсти о Павло и ԥэндясас: «Мэк нико на шол сама, кай ту тэрно» (1 Тим. 4:12). И инке андэ кодэя время о Тимофеё «часто насвавэлас» (1 Тим. 5:23). Но во полэлас, кай би лэ Иеговастирэ зорэско лэстэ на вижала тэ росԥэнэн пала Дэл и тэ поможый лэ ԥралэнди и лэ ԥэянди (2 Тим. 1:7).

О ИЕГОВА ДЭЛ ЗОР ТЭ КАНДАС ЛЭС ДАЖЭ АНДО ԤАРИМОС

8. Сар о Иегова подритярэл акана пэстирэ служытелёнэн?

⁸ И акана о Иегова дэл пэстирэ служытелёнэнди зор, саво май баро обычнонэстар, кай вонэ тэ на парашэн тэ служын лэсти (2 Кор. 4:7). Уӷанаса, сар о Иегова подритярэл амэн, кай амэ тэ на парашас лэс тэ кандас, через и молитва, через и Библия, через амарэ ԥрала и ԥэя и через и служэния.

9. Сар амэнди поможый и молитва?

⁹ Молитва. Андэ Эфесянам 6:18 о Павло ԥэнэн, кай трэбуй вся и время тэ мангаспэ, со бы тэ на авэл. И о Иегова через и молитва дэл амэнди пэско зор. О Джонни жувэл андэ Боливия и лэстэ сас бут ԥаримос. Лэстири хулаи и родителя андэ ек время фартэ занасвайлэ. Во заботияспэ пала лэндэ и лэсти сас найвушэро када тэ терэл. Но прожыля время и лэстири дэй всаек муля. Ай лэстири хулаяти и лэстирэ дадэсти инке трэбуй сас бут время кай тэ виличинпэ. И о Джонни ԥэнэн, кай андэ кодэва маменто лэсти сас фартэ ԥарэс и во мангэласпэ каринг о Иегова пала кода, со именно лэсти сас трэбуй. Када придэлас лэсти зор. О Иегова поможыяс лэсти, кай во вся тэ виритярэл. Ай о Роналд, старейшына анда Боливия уӷангля, кай лэстиря датэ виарақлэ найлашо насвалимос. И через шонэстэ вой муля. Со поможысардя кадэлэ ԥралэсти тэ пэрэандярэл кадэя бида. Во росԥэнэн, кай мангэласпэ лэ Иеговасти и росԥэнэнас вся, со лэстэ по ди. Во ӷанэнас, кай нико май драго лэ Иеговастар на полэла лэс. Кадяжэ и амэнди дэкала можэт тэ здэлпэ, кай амэ нэ сможэм тэ виритярас о ԥаримос, саво амэндэ исин. И дажэ дэкала на ӷанас, пала со тэ мангаспэ лэ Иеговасти. Но о Иегова камэл и мангэл амэн, кай амэ тэ росԥэнас лэсти вся андэ молитва, дажэ если амэнди ԥарэс тэ пэрэдас алавэнца, со амэндэ по ди (Рим. 8:26, 27).

10. Васо, сар пистромэ андэ Евреям 4:12, амэнди важно тэ адиносарас и Библия и тэ гиндосарас, пала со адиносардям?

¹⁰ Библия. Сар и о Павло, амэ можэм тэ лас зор, кала адиносарас и Свынто Писания (Рим. 15:4). Кала амэ адиносарас и Библия, и гиндосарас пала кода, со адиносардям, о Иегова дэл пэско свынто духо, кай амэ май драго тэ полас и тэ прилас када андэ пэсти жызня. (Адиносар Евреям 4:12.) О ԥрал Роналд ԥэнэн, кай лэсти фартэ дэл зор кода, кай во присытеля тэ адиной и Библия кажно вэчэро. Во бут гиндой пала кода, саво о Иегова, и сар дэ фартэ во любий и заботийпэ пала пэстирэ служытеля.

11. Сар и алава анда Библия поможысардэ ла ԥьяти, сави хасардя лэ хулас?

¹¹ Кала амэ гиндосарас пала кода, со адиносарас андэ Библия, када поможыя амэнди тэ пэрэандярас о ԥаримос, саво амэндэ исин андэ жызня. И алава анда Библия поможысардэ еқа ԥьяти, савятэ най дэлмут муля о хулай. О старейшына, кай тэ поможый лати дя кацаво совето, тэ проадиной андэ Библия пала Иов. Кала вой адинояс пала лэстэ, вой гиндояс, кай о Иово диқэлас андэ пэстири жызня ек о найлашимос. Но потом вой поля, кай латэ кацавэ жэ гиндоря сар и лэстэ. Лэско примеро поможысардя лати, тэ парувэл пэстирэ гиндоря и тэ полэл, кай андэ пэстири жызня трэбуй тэ шол сама и па варисо лашо. Вой ля май бут тэ гиндой пала Иегова и пала лашимос, саво авэла англэ. Када вся дя лати зор тэ пэрэандярэл кадэя бида.

12. Сар о Иегова поможый через и ԥрала и ԥэя анда собрания?

¹² И ԥрала и ԥэя анда собрания. О Иегова кадяжэ дэл зор амэнди через ԥрала и ԥэя. О Павло пистросардя лэ ԥралэнди и лэ ԥэянди андэ собрания: «Мэ фартэ камлэм тэ диқав тумэн... кай через пэстири вера тумэ тэ подритярэн ман, ай мэ через пэстири вера, тэ подритярав тумэн» (Рим. 1:11, 12). И ԥэй Рая, пала сави амэ дям дума май англэ, росԥэнэн, кай лати фартэ куч и дружба лэ ԥралэнца и лэ ԥэянца андэ собрания. Вой росԥэнэн, кай о Иегова ла подритярэл через лэндэ, и дэкала вонэ дажэ екжэнэ на ӷанэн пала када. Вонэ моӷут лати тэ бишалэн открытка или тэ ԥэнэн лашо алав тоди, кала када лати фартэ трэбуй. Ай инке вой дэл дума лэ ԥэянца, савэндэ кацаво жэ ԥаримос, сар и латэ, и вой роспушэл лэндар, со лэнди поможысардя. Инке и старейшыноря вся и время шон сама ла и ԥэнэн, кай вой куч андэ собрания.

13. Сар амэ можэм тэ подритярас ек еқэс пэ собрании?

¹³ Ай кай инке амэ можэм тэ лас зор, кай тэ подритярас ек еқэс? Пэ собрания. Посли собрания можэм тэ ԥэнас варикасти анда ԥрала и ԥэя, кай вонэ куч амэнди, кай амэ лэн любисарас и цэнисарас вся, со вонэ терэн. Ек старейшына ԥэндя ла ԥьяти, савятэ хулай най лэ Иеговаско свидетелё и савятэ шов бэяцэ: «Кадя драго кай ту авелян пэ собрания. Тирэ бэяцэ всегда драго и вужорэс утидэ. Вонэ всегда дэн каминтарии пэ собрании». И ԥэй ԥэнэн, кай латэ ԥэрделэ ясвэнца и яқа, лати фартэ трэбуй сас кодэва дес тэ ашунэл кадэла алава. Вой сас фартэ блаӷодарно лэ ԥралэсти!

14. Сар поможый и служэния?

¹⁴ Служэния. Ашунэн амэн андэ служэния и мануша чи на ашунэн, всаек и служэния придэл зор (Прит. 11:25). Пала када ԥэндя и ԥэй Стейси. Кала латирэ чаче манушэс исключисардэ анда собрания, вой фартэ пэрэжывала. Вой вся и время гиндояс, вся вой стердя, кай тэ поможый кодэлэ манушэсти тэ на отжал лэ Иеговастар. Вой нэ моӷла ни пала со авэр тэ гиндой. Но лати поможысардя и служэния. Кала вой росԥэнэнас лэ манушэнди пала Дэл, вой на гиндояс пала пэстэ. Вой гиндояс, сар тэ поможый лэ манушэнди. Андэ кодэя время вой заля тэ изучает и Библия еқа манушняса, сави сразу кода, со уӷанэнас анда Библия, прилэлас каринг пэстэ. Кадэя изучения сас важ латэ фартэ лашо подарко лэ Иеговастар. И вой ԥэндя, кай би ла служэнияко вой на ӷанэн, со бы вой тердоп!

15. Сости тумэ сытён анда кода, со росԥэндя и Рая?

¹⁵ Дэсавэ ԥрала и ԥэя нэ моӷут бут тэ служын лэ Иеговасти. Если тутэ кадя, тоди ӷан, кай важ о Иегова важно най скати ту терэс андэ служэния, ай кай ту терэс вся, со па тиро зор. И Рая, пала сави амэ дям дума, пэрэлагля андэ авэр ҭан. Котэ и мануша дэн дума пэ авэр шыб. Тоди латэ появисайля кацаво гиндо, кай андэ служэния акана латар мало толку. Вой най фартэ ӷанэнас кодэя шыб, важ кода вой моӷла кати тэ дэл най баро каминтариё пэ собрания или тэ заадиной о стихо анда Библия. Ай андэ служэния вой моӷла кати тэ дэл буклеторя. Вой ля тэ сыстой пэс аврэнца и лати сас ԥарэс кодэлэстар, кай вой на ӷанэнас драго кодэя шыб. Но прожыля время, и вой поля, кай о Иегова можэт тэ поможый лэ манушэнди тэ уӷанэн о чачимос анда Библия, дажэ если о вазвещятелё най фартэ драго ӷанэн тэ дэл дума пэ авэр шыб. Кадяжэ вой поля, кай кода, со пистромэ андэ Библия найԥарэс тэ росԥэнэс аврэнди, и лэ манушэс можэт тэ парувэл кати о чачимос анда Библия.

16. Со можэт тэ придэл зор кодэлэнди, ко нэ можэт через о насвалимос тэ вижал анда цэр?

¹⁶ Варикастэ можэт найлашо зор и во нэ можэт через када тэ вижал анда цэр. Но о Иегова диқэл, кай кадэва мануш фартэ камэл тэ служый лэсти и цэний када. О Иегова дэла возможность, кай во тэ росԥэнэн кодэлэнди, ко авэл каринг лэстэ, например, лэ врачонэнди. Если вонэ лэна тэ сыстон, сар вонэ варикала служынас и сар акана, тоди вонэ моӷут тэ умэкэн и вас. Но если вонэ лэна тэ шон сама, сар о Иегова лэн подритярэл акана, лэндэ авэла зор, кай тэ виритярэн любо ԥаримос и тэ на парашэн тэ лошавэн.

17. Сар запистромэ андэ Экклезиаст 11:6, васо амэнди трэбуй тэ на парашас тэ служысарас, дажэ если здэлпэ, кай амэн нико на ашунэн?

¹⁷ Кала амэ росԥэнас пала Дэл, амэ на ӷанас, ко анда мануша ашунэна амэн, и ко прилэла о чачимос анда Библия. Када, сар о зэрно, пала саво росԥэнэнпэ андэ Библия, саво садис и на ӷанэс, кай во вибарёла. (Адиносар Экклезиаст 11:6.) Ек ԥэй, савяти 80 бэрш, савя ақарэн Барбара росԥэнэн, кай вой всегда служый па телефоно и пистрой письморя. Еқвар, вой пистросардя письмо и дэзначай бишалдя лэ ерести, саво сас исключоно анда собрания. Ай андо конверто вой стодясас о журнало «Сторожэво башня» пала 1 марто 2014 бэрш, андэ саво сас статья «Со важ тутэ стердя о Дэл?». О хулай и хулаи най еқвар проадинонас кодэва журнало. И кай о хулай по ди сас, кабута лэса екжэно о Иегова дэл дума. Вонэ вмести ла хулаяса линэ тэ ԥирэн пэ собрании хоть и на ԥирэнас ужэ 27 бэрш! Акана вонэ упалэ служын лэ Иеговасти. Кати погиндон, сави дэ лошали сас и ԥэй Барбара, кала поля, сар ек письмо можэт тэ поможый. Када лати фартэ придя зор!

18. Со амэнди трэбуй тэ терас, кай о Иегова тэ подритярэл амэн?

¹⁸ Андэ кадэя статья амэ уӷанглям, сар о Иегова поможый амэнди. Во када терэл через и молитва, через и Библия, через и ԥрала и ԥэя и через и служэния. Если амэ прилас кадэя помощь лэ Иеговастар, тоди амэ сыкавас, кай патяс, кай во камэл и можэт тэ поможый андэ любо ԥаримос. Давайте вся и время тэ патяс лэ Иеговасти, саво лошало «тэ сыкавэл пэско зор, кай тэ авэл драго кодэлэнди, ко всаворэ одеса лэса» (2 Лет. 16:9).