Шон сама, со по ди аврэндэ

1. Васо, сар пистромэ андэ 1 Петра 3:8, амэнди чалёл, кала аврэнди най всаек, со амэнца терэлпэ?

АМЭНДИ чалёл, кала аврэ манушэнди най всаек, со амэнца терэлпэ. Вонэ старыинпэ тэ полэн, со амэндэ по ди, пала со гиндосарас и со амэнди трэбуй. Вонэ камэн тэ поможын, хоть амэ лэн инке на манглям. Амэ фартэ цэнисарас кодэлэн, ко полэн, со амэндэ по диb. (Адиносар 1 Петра 3:8c.)

2. Васо амэнди най вся и время вижал тэ полас, со по ди аврэндэ?

² Сар и христианоря, амэ камас тэ полас, со по ди аврэндэ. Кати най всаворэндэ када драго вижал. Васо? Пэрво, када кай амэ найсовершэни (Римлянам 3:23). И важ када амэ май бут гиндосарас пала пэстэ. Дуйто, амэнди ԥарэс тэ полас, со аврэндэ по ди, важ кода кай сар амэ барелям и со амэнди прижыляпэ тэ пэрэжувас андэ пэстири жызня. Трито, када паша кастэ амэ жувас и со лэндар сытелям. Андэ кадэла послидни деса бутэнди всаек, со терэлпэ аврэндэ. Андэ Библия пала кацавэ мануша пистромэ, кай вонэ «любин кати корко пэс» (2 Тимофею 3:1, 2). Со поможыя амэнди тэ улас када и тэ сытювас тэ полас, со по ди аврэндэ.

3. а) Со поможыя амэнди май бут тэ полас, со кай о мануш по ди? б) Пала со подаса дума андэ кадэя статья?

³ Кай май бут тэ полас, со по ди аврэндэ, трэбуй тэ сытювас кай о Иегова и кай лэско Шаво, о Иисус Христос. О Иегова Дэл, саво любий и во май драго всаворэндар полэл, со аврэндэ по ди и со май драго сытярэл амэн тэ полас аврэн (1 Иоанна 4:8). О Иисусо терэлас вся, сар лэско Дад о Иегова (Иоанна 14:9). Кала о Иисусо жувэлас пэ ԥув, во сыкадя, кай промэкэлас и дук аврэнди через пэско ди. Андэ кадэя статья амэ подаса дума, сар о Иегова и о Иисусо полэнас, со по ди лэ манушэндэ. Потом подаса дума пала кода, сар тэ терас, сар вонэ.

СЫТЁН КАЙ О ИЕГОВА, САР ТЭ ПОЛЭН АВРЭН

4. Сар дицол анда Исаия 63:9, кай о Иегова полэл, со по ди кай лэско народо?

⁴ Сар дицол анда Библия, лэ Иеговасти най всаек, со по ди кай лэстирэ служытеля. Погиндон, со сас кай о Иегова по ди, кала кай и израильтяноря сас ԥаримос. Андэ Библия ԥэнэнпэ: «Кажно разо, кала лэнди сас фартэ ԥарэс, кадэлэстар и лэсти ашэлас ԥарэс». (Адиносар Исаия 63:9d; Исаия 63:7, 8). Ай через о пророко Захария о Иегова ԥэндя пэстирэ служытелёнэнди: «Ко лэлпэ каринг тумэндэ, кодэва лэлпэ каринг о зрачко кай мэрни як» (Захария 2:8). Кадэлэ алавэнца во сыкадя, кала лэстирэ народоса обжанпэ фартэ найдраго, када, ԥэнэса, лэса кадя обжанпэ. Сар дэ драго пистромэ пала кода, сар о Иегова заботийпэ пала пэско народо!

5. Сар о Иегова поможыяс пэстирэ служытелёнэнди, кала вонэ попэрэнас андэ бида?

⁵ О Иегова най просто полэлас пэстирэ служытелёнэн, савэ попэрэнас андэ бида, но во и поможыяс лэнди. Кала израильтяноря слинэ андо рабство андо Египто, о Иегова полэлас, сар лэнди сас ԥарэс и камэлас тэ улэл лэндар о ԥаримос. Акэ, со во ԥэндя лэ Моисеёсти: «Мэ додиқлэм и биды мэрнэ народости... и ашундэм, кай вонэ ровэн... Мэ ӷанав, сар лэнди дэ ԥарэс и мэ жав тэ вилав лэн анда вас кай и египтяноря» (Исход 3:7, 8). Важ кода кай во лэн полэлас и жалуияс, во виля лэн анда рабство. Ай со тердя о Иегова, кала и вороӷоря динэ пэ израильтяноря, кала вонэ сас пэ Ханаанско ԥув? Во «жалуияс лэн, кала ашунэлас, кай вонэ лэ ԥаримастар цыпин через кодэла, ко лэн тасавэн и кодэлэндар, ко лэнди на дэнас жызня всаворэ ригэндар». О Иегова полэлас, со по ди кай лэско народо и дэлас лэнди помощь. Во столас лэ сындомарен, савэ спасынас лэ израильтянонэн лэ вороӷонэндар (Судей 2:16, 18).

6. Через саво мануш о Иегова сыкадя, кай во полэл, пала со пэрэжывают лэстирэ служытеля, дажэ кала вонэ дошалэ?

⁶ О Иегова полэлас, со по ди кай лэстирэ служытеля, дажэ кала вонэ сас дошалэ. Уӷанаса пала о Иона. О Дэл бишалдя кадэлэ пророкос андэ Ниневия тэ росԥэнэн кодэлэнди, ко котэ жувэл, кай лэн о Дэл умарэла. Кала ниневитяноря каисайлэ, о Дэл ришыл лэн тэ на умарэл. Но лэ Ионости када на чалеля. Во заԥабеля холятар, важ кода кай во росԥэнэнас пала пророчество, кай всаворэ помэрэна, ай када кадя на ашэля. Но о Иегова на грабисайля тэ холявэл по Иона и поможысардя лэсти правильно пэ када тэ диқэл (Иона 3:10—4:11). О Иона поля, со о Иегова лэсти росԥэндя, и дажэ запистросардя кадэя история важ амэндэ (Римлянам 15:4)e.

7. Андэр со амэ май фартэ патяс, кала ӷанас, сар о Иегова полэл пэстирэ народос?

⁷ Кода, сар о Иегова полэлас пэстирэ народос, сыкавэл амэнди, кай о Иегова пэрэжывает вмести пэстирэ народоса. Во диқэл, саво ԥаримос пэрэандярэл кажно андар мэндэ. О Иегова ӷанэн, «со кай и мануша андо ди» (2 Летопись 6:30). Во ӷанэн всаворэ амарэ гиндоря и полэл амэн. Во ӷанэн, со па амаро зор, ай со най, и «во на домэкэла ԥаримос, саво май бут... [амарэ] зорэстар» (1 Коринфянам 10:13). Сар жэ амэн подритярэн кадэла алава!

СЫТЁН КАЙ О ИИСУСО, САР ТЭ ПОЛЭН АВРЭН

8—10. Со поможысардя лэ Иисусости май фартэ тэ шол сама лэ манушэн?

⁸ Кала о Иисусо жувэлас пэ ԥув, во фартэ шолас сама аврэн. Со лэсти андэ када поможыяс? Пэрво, сар ԥэнэнаспэ май англал, о Иисусо терэлас вся, сар лэско небесно Дад. Во кадяжэ любияс лэ манушэн. Во радуияспэ, кала диқэлас, со о Иегова вмести лэса создавал. Но май бут во радуияспэ «лэ манушэндирэ шавэнца» (Притчи 8:31). О Иисусо любияс лэ манушэн и важ када во гиндояс, со лэндэ по ди.

⁹ Дуйто, сар и о Иегова, о Иисусо кадяжэ ӷанэнас, со по ди кай и мануша и кала вонэ камэнас варисо тэ терэн (Матфея 9:4; Иоанна 13:10, 11). Важ када, кала о Иисусо диқэлас, кай лэ манушэнди фартэ ԥарэс, во пэрэжывал пала лэндэ и подритярэлас лэн (Исаия 61:1, 2; Луки 4:17—21).

¹⁰ Трито, о Иисусо кадяжэ пэрэжудя дэсаво ԥаримос, саво сас кай и мануша. Во барёлас андо чороро ери. О Иисусо поможыяс пэстирэ най чаче дадэсти лэ Иосифости и ӷанэнас, со када ԥари бути (Матфея 13:55; Марка 6:3). Здэлпэ, кай о Иосифо муля жы каринг кода, кала о Иисусо ля тэ служый. Дицол, кай о Иисусо пэрэжудя ԥаримос, кала муля чачо мануш. Инке во полэлас, сар тэ жувэс андо ери, андэ саво най всаворэ патян, сар во (Иоанна 7:5). Кала во прожыля кадэва и авэр ԥаримос, во ля май драго тэ полэл, со по ди кай и прости мануша.

11. Кала драго дицэля, кай о Иисусо полэл лэ манушэн? Росԥэнэн (Диқэн и картинка пэ обложка.)

¹¹ Кадэлэстар, кай о Иисусо терэлас чудеса, драго дицэля, кай во полэлас, со кай и мануша по ди. Во терэлас чудеса, най важ кода кай трэбуй сас, ай важ кода кай жалуияс кодэлэн, касти сас ԥарэс (Матфея 20:29—34; Марка 1:40—42). Погиндон, васо о Иисусо отжыля лэ кашукэ манушэса «андэ риг, кай на сас бут мануша» и виличисардя лэс, ай кадяжэ жундярдя единственонэ шавэс ла ԥивля манушняти (Марка 7:32—35; Луки 7:12—15). О Иисусо пэрэжывал кадэлэ манушэнца и важ када камэлас лэнди тэ поможый.

12. Сар кода, со пистромэ андэ Иоанна 11:32—35, о Иисусо поля, со по ди кай и Марфа и Мария?

¹² О Иисусо поля, со по ди кай и Марфа и кай и Мария, кала диқля, сар вонэ ровэн пала пэско ԥрал Лазарё. Андэ Библия пистромэ, кай «лэ Иисусостэ линэ тэ питян и ясва». (Адиносар Иоанна 11:32—35f.) Во заровдя, най важ кода кай нинай ло, лэско друӷо, во ӷанэнас, кай лэс жундярэла. И ясва кай о Иисусо сас, важ кода кай лэстэ дуқалас оди. Кадяжэ во диқля, саво ԥаримос андя лэ Лазарёстири смэрть лэстирэ друӷонэнди.

13. Сар амэнди дэл зор кода, кай о Иисусо полэл, со амэндэ по ди?

¹³ Кала гиндосарас, сар о Иисусо анда вся оди полэлас лэ манушэн, кадэлэстар лас зор. Амэнди фартэ куч, кай во полэл аврэн и важ када любисарас лэс (1 Петра 1:8). Амэ лошалэ кодэлэстар, кай ӷанас, кай акана во правий андэ лэ Дэвлэско Царство. Йто во улэла вся о ԥаримос. Важ кода кай о Иисусо варикала кадяжэ сас мануш, кати во можэт тэ поможый и тэ састярэл и дук, сави андя лэ манушэнди лэ Сатанастири правления. Сар дэ драго, кай амаро правителё «промэкэл через пэско ди амаро ԥаримос»! (Евреям 2:17, 18; 4:15, 16).

СЫТЁН КАЙ О ИЕГОВА И КАЙ О ИИСУСО

14. Каринг со амэн сытярэн о Иегова и о Иисусо, и сар када дицол анда Эфесянам 5:1, 2?

¹⁴ Кала амэ гиндосарас пала кода, со стердя о Иегова и о Иисусо, амэ камас инке май фартэ тэ полас, со по ди аврэндэ. (Адиносар Эфесянам 5:1, 2g.) Канешно, амэ на ӷанас, со андо ди кай и мануша. Но амэ можэм тэ старысавас тэ полас лэн и тэ полас, со лэнди трэбуй (2 Коринфянам 11:29). Амэ най сар и мануша, савэ на полэн лэ Иеговас и савэ гиндон кати пала пэстэ. Амэ камас, кай тэ авэл «драго най кати важ пэстэ, ай и важ авэр» (Филиппийцам 2:4).

15. Касти трэбуй тэ полэн, со по ди аврэндэ?

¹⁵ Тэ полэн, со по ди аврэндэ, трэбуй лэ старейшынонэнди. Важ кода кай вонэ отвечают англа Иегова пала бакрорэ, савэн во лэнди ашадя тэ диқэн (Евреям 13:17). Кай тэ поможын лэ ԥралэнди и лэ ԥэянди, лэ старейшынонэнди трэбуй тэ полэн, со лэндэ по ди. Сар вонэ моӷут тэ сыкавэн, кай полэн аврэн?

16. Со терэл о старейшына, саво полэл, со по ди аврэндэ, и васо када трэбуй?

¹⁶ О старейшына, саво полэл, со по ди аврэндэ, виарақэл время, кай тэ подэл дума лэнца. Во задэл лэнди вопросоря, ай тоди драго виашунэл и на пэрэмарэл и дума. Када фартэ трэбуй, кала варико камэл тэ росԥэнэн, со лэстэ по ди, но нащи виарақэл и алава, савэ трэбуй (Притчи 20:5). Кала о старейшына на жалуий пэстири время, кадэлэстар и ԥрала и ԥэя андэ собрания май фартэ лэн тэ патян лэсти, тэ полэн и тэ любин лэс (Деяния 20:37).

17. Со май фартэ цэнин и ԥрала и ԥэя андэ старейшыноря? Росԥэнэн пала кода, со лэндэ сас.

¹⁷ Бут ԥрала и ԥэя ԥэнэн, кай вонэ фартэ цэнин андэ старейшыноря кода, кала вонэ драго виашунэн и полэн, со по ди аврэндэ. Васо? Акэ, со росԥэнэн ек ԥэй, савя ақарэн Аделейд: «Тэ поджас и тэ подэс дума лэнца май вушэро, кала ӷанэс, кай тут полэна». Вой инке росԥэнэн: «Пар лэндэ можно тэ полэс, кай вонэ полэн, со тутэ по ди». Ай акэ инке ек ԥрал росԥэнэн анда вся оди пала кода, кала во дэлас дума лэ старейшынаса: «Кала мэ росԥэндэм лэсти мэрни ситуацыя, лэстэ ԥэрделэ и яқа ясвэнца. Мэ када никала на бистрава» (Римлянам 12:15).

18. Сар амэ можэм май фартэ тэ сыкавас, кай полас, со по ди аврэндэ?

¹⁸ Тэ полэн аврэн трэбуй най кати и старейшыноря. Амэ всаворэ можэм инке май фартэ тэ шас сама и тэ полас, со по ди аврэндэ. Но сар? Старыинпэ тэ полэн, саво ԥаримос исин андэ тумаро ери, ай кадяжэ кай и ԥрала и ԥэя андэ собрании. Шон сама лэ тэрнэ манушэн, лэ ԥурэн, кодэлэн, ко насвало лэ зорэса, и кодэлэн, кастэ варико муля. Роспушэн, сар лэндэ и дила, драго виашунэн лэн, кала вонэ росԥэнэн, саво лэндэ ԥаримос. Мэк лэндэ андо ди авэла кацаво, кай тумэ полэн лэн. Кала тумэ кадя терэн, тумэ пэ дила сыкавэн, кай любин лэн (1 Иоанна 3:18).

19. Васо, кала амэ поможысарас лэ манушэнди, трэбуй тэ шас сама кажнонэс?

¹⁹ Кала амэ поможысарас лэ манушэнди, трэбуй тэ шас сама кажнонэс. Васо? Важ кода кай о ԥаримос кажно пэрэандярэл па пэстирятэ. Ек камэл тэ росԥэнэн вся, со лэстэ по ди, ай авэр никасти нисо на росԥэнэн. Кала камас тэ поможысарас лэ манушэнди, на трэбуй тэ задас кацавэ вопросоря, савэ сыкавэна, кай ӷуляс андэ лично жызня (1 Фессалоникийцам 4:11). Ай инке, кала о мануш росԥэнэн вся, со лэстэ по ди, во можэт тэ ԥэнэн кода, соса амэ най соӷласни. Андэ кацаво маменто на бистрэн, када лэско гиндо. На грабин тэ дэн дума и драго виашунэн лэ манушэс (Матфея 7:1; Иакова 1:19).

20. Пала со подаса дума андэ авэр статья?

²⁰ Амэ камас тэ полас, со по ди най кати кай и ԥрала и ԥэя андэ собрания, но и лэ манушэндэ, касти росԥэнас важ о Дэл. Сар када тэ терас? Пала када подаса дума андэ авэр статья.