Лошав всаворэсти, со ту можэш тэ терэс важ о Иегова

1. Со камэн тэ терэн бут ԥрала и ԥэя?

КАДЭЯ люма ӥто на авэла. Важ када андэ лэ Иеговастири арӷанизацыя щяс фартэ бут дила (Матф. 24:14; Луки 10:2; 1 Пет. 5:2). Всаворэ амэ камас май бут тэ служысарас лэ Иеговасти. Варико закамля тэ служый пианероса, ай варико тэ служый андо Вефилё или тэ строий варисавэ здании андэ лэ Дэвлэстири арӷанизацыя. Бут ԥрала камэн тэ служын, сар служэбни помошникоря и старейшыноря (1 Тим. 3:1, 8). О Иегова фартэ лошавэл, кала лэско народо камэл тэ терэл варисави дила важ лэстэ андэ лэстири арӷанизацыя! (Пс. 110:3; Ис. 6:8).

2. Со амэндэ можэт тэ авэл по ди, если амэндэ на вижал тэ стерас важ о Иегова кода, со камас?

² Дэкала исин кацаво, кай и время жал, ай амэ всаек нащи стерас важ о Иегова кода, со загиндосардям. Ай дэсавэ ԥрала и ԥэя через пэстирэ бэрша или авэр варисо ужэ нэ моӷут тэ терэн важ о Иегова кода, со вонэ камэн. Кадэлэстар лэнди можэт тэ авэл ԥарэс по ди (Прит. 13:12). Например, и ԥэй Мелиссаb фартэ камэл тэ служый андо Вефилё или тэ сытёл андэ Школа блаӷовесников Царства, но латэ ужэ най кодэла бэрша и най кодэва зор. И через када лати ԥарэс по ди.

3. Со трэбуй тэ терэн кодэла, ко камэн, кай лэндэ тэ авэл инке варисави дила андэ собрания?

³ Но кай и тэрнэ ԥрала и ԥэя тэ стерэн май бут варисо андэ служэния лэ Иеговасти, лэнди спэрва трэбуй бут сости тэ сытён. Еқа ригатар, вонэ трэбуй тэ авэн годявэрнэ, тэ на даран, тэ лэн тэ терэн любо дила андэ собрания, важ кода кай лэндэ исин бут зор. Ай авря ригатар лэнди можэт тэ на хутилэлмудрость, и вонэ моӷут тэ авэн най терпеливи. Вонэ трэбуй тэ сытён тэ стон патив пэ авэр. И если вонэ кадя терэна, тоди можэт и старейшыноря дэна лэнди инке варисави дила андэ собрания. Када можэт тэ авэл тоди, кала вонэ на аштярэн када. О ԥрал Коля ԥэнэн, кай кала лэсти сас 20 бэрш, во фартэ пэрэжывал, кай во идоси най служэбно помошнико. Во нащи полэлас, со во терэлас най кадя. Но во всаек на парашэлас анда вся оди тэ служый лэ Иеговасти и тэ терэл любо дила, сави лэсти дэнас андэ собрания. Акана о Коля служый андо камитето филиало.

4. Пала со амэ подаса андэ кадэя статья?

⁴ Ай тути ԥарэс по ди кодэлэстар, кай ту пока нэ можэш тэ терэс важ о Иегова кода, со загиндосардян? Тоди росԥэн пала када лэ Иеговасти (Пс. 37:5—7). Кадяжэ ту можэш тэ пушэс кай и ԥрала и ԥэя андэ собрания, савэ бут со андэ жызня полэн и савэ моӷут тэ подԥэнэн тути, андэр со трэбуй тэ парудёс, ай потом тер кадя, сар вонэ тути подԥэндэ. Кадя тутэ можэт тэ вижал тэ домардёс важ о Иегова кода, со ту загиндосардян. Но можэт и тэ на авэл кадя. Сар тоди тэ на парашэс тэ лошавэс? Подаса дума, состар ту можэш тэ лошавэс? Сар тэ авэс инке май бахтало? И со инке ту можэш тэ стерэс важ о Иегова, кай када тэ анэн тути радость?

СОСТАР ТУ МОЖЭШ ТЭ ЛОШАВЭС?

5. Состар ту можэш тэ авэс бахтало? (Экклезиаст 6:9).

⁵ Пала када состар о мануш авэла бахтало, ԥэнэнпэ андэ Экклезиаст 6:9 (адиносар). О мануш, саво лошавэл кодэлэсти, со диқэн и яқа, во довольно кодэлэса, со лэстэ исин. И наоборот, о мануш, саво вся и время камэл, со лэстэ нэ можэт тэ авэл, гиндой кай во най бахтало. Вижал, кай тэ авэс довольно и радосно пэстиря жызняти, тути трэбуй тэ цэнис вся, со тутэ исин, ай кадяжэ тэ домардёс кода, со па тиро зор.

6. Пала сави притча амэ подаса дума и пэр со май бут шаса сама?

⁶ Кажнонэ манушэсти камэлпэ варисо нэво андэ жызня. Но сар тоди о мануш тэ цэний кода, со исин андэ лэстири жызня и дажэ тэ лошавэл кадэлэсти? Со поможыя андэ када? Пала када дэлпэ дума андэ лэ Иисусостири притча пала таланторя (Матф. 25:14—30). Андэ кадэя статья амэ май бут шаса сама, сар амэ тэ авас инке май бахталэ кодэлэстар, со амэндэ ужэ исин.

САР ТЭ АВЭС ИНКЕ МАЙ БАХТАЛО?

7. Росԥэнэн пала со ԥэнэнпэ андэ лэ Иисусостири притча?

⁷ О Иисусо андэ пэстири притча росԥэнэн пала мурш, саво тидяпэ тэ ладэл андо баро дром. И во роздя пэстирэ рабонэнди ловэ, пэ савэ ԥэнэнас таланторяc и ԥэндя, кай вонэ тэ терэн варисави дила пэр лэндэ. Во полэлас, со можэт тэ стерэл кажно кадэва рабо. Важ када еқэ рабости во дя панч таланторя. Аврэ рабости во дя дуй таланторя, ай лэ тритонэсти дя ек таланто. Пэрви дуй раборя линэ драго тэ терэн и дила, сави во лэнди дя. Ай о трито рабо дажэ на ля нисо тэ терэл кадэлэ ловэнца. И важ када лэско ӷосподино фартэ пэр лэстэ росхоляйля.

8. Состар моӷ тэ лошавэл о пэрво рабо?

⁸ О пэрво рабо фартэ обрадосайля кодэлэсти, кай лэско ӷосподино дя лэсти панч таланторя. Када сас фартэ барэ ловэ! Вижал, важ о ӷосподино во сас надёжно мануш. Ай о дуйто рабо моӷ тэ холявэл, кай лэсти динэ май набут ловэ. Но сар во андярдя пэс?

9. Со на ля тэ терэл о дуйто рабо? (Матфея 25:22, 23).

⁹ Адиносар Матфея 25:22, 23. Андэ притча ни еқвар на ԥэнэнпэ, кай о дуйто рабо холяйля, кай лэсти динэ май набут ловэ и ля тэ гиндой кадя: «И када вся со манди динэ?! Ай васо лэ пэрвонэсти динэ панч таланторя, ай манди кати дуй? Соса мэ хужэ? Но раз о ӷосподино на цэний ман, тоди мэ кадэла ловэ ӷаравава и авава тэ терав пэстири дила».

10. Со стердя о дуйто рабо лэ ловэнца, савэ лэсти дя лэско ӷосподино?

¹⁰ Сар и о пэрво рабо, о дуйто фартэ драго стердя пэстири дила, сави дя лэсти лэско ӷосподино. Во пристодя бут зор и лэстэ вижыля тэ затерэл дувар май бут ловэ. Важ када лэско ӷосподино най кати похвалисардя лэс, но и дя лэсти тэ терэл инке май бари дила.

11. Со поможыя тути тэ авэс инке май лошало?

¹¹ Кадяжэ и амэ аваса май бахталэ, кала и служэния лэ Иеговасти важ амэндэ авэла со май ӷлавно. Важ када трэбуй «анда вся оди» тэ служыс лэ Иеговасти и тэ терэс май бут дила андэ собрания (Деян. 18:5; Евр. 10:24, 25). Драго ӷотовься каринг кажно собрания, кай тирэ атветоря тэ дэн зор лэ ԥралэнди и лэ ԥэянди. Если тути и ԥрала динэ пэ собрания тэ стерэс речь или тэ сыкавэс, сар можно тэ задэс дума лэ манушэса пала Дэл или тэ адинос анда Библия, тоди драго стер када. Ай если вонэ тут манглэ тэ стерэс авэр дила, тоди сыкав, кай пэр тутэ можно тэ надеиспэ, и стер вся каринг кодэя время, каринг сави трэбуй. Никала на гиндосар, кай вся, со ту терэс важ о Иегова, када вся евья. Наоборот, старысав варисости тэ сытёс (Прит. 22:29). Со май бут ту пристоса зор андэ служэния лэ Иеговасти, со май лащи дружба тутэ авэла лэса. Кадя ту авэса инке май лошало (Гал. 6:4). И кадяжэ тути авэла май вушэро тэ радуиспэ важ авэр ԥрала и ԥэя, кала лэнди дэн тэ терэн андэ собрания дила, сави ту камлян тэ терэс (Рим. 12:15; Гал. 5:26).

12. Со стердя и Мелисса и о Коля, кай тэ авэн инке май бахталэ?

¹² Упалэ сгиндосарам пала ԥэй Мелисса. Вой полэлас, кай тэ служый андо Вефилё или тэ сытёл андэ Школа блаӷовесников Царства латэ на вижала. Но вой всаек ԥэнэн, кай служый пианероса и терэл када анда вся оди. Инке вой старыийпэ тэ служый по разному. И вой кадэлэстар фартэ бахтали. Ай со лэ Колясти поможыяс тэ на пэрэжывает, кай во идоси най служэбно помошнико? Во старыияспэ тэ полэл, со во можэт тэ стерэл. Во ԥирэлас андэ служэния и придэлас зор лэ ԥралэнди и лэ ԥэянди, кала дэлас лашэ каминтарии пэ собрания. Ай инке во пистросардя заявления, кай тэ служый андо Вефилё и ужэ через бэршэстэ, лэс ақардэ тэ служый.

13. Со амэндэ по ди, кала амэ старысавас тэ терас и дила, сави амэндэ исин? (Экклезиаст 2:24).

¹³ Если ту анда вся оди терэс любо дила андэ собрания, тоди тути моӷут тэ дэн инке май бари дила. Но дажэ если кадя на авэла, ту всаек авэса бахтало, кала лэса анда вся оди тэ терэс и дила, сави тутэ ужэ исин. (Адиносар Экклезиаст 2:24.) И инке амэ па чачимастэ бахталэ, кала ӷанас, кай кадя уӷодисарас амарэ ӷосподиности лэ Иисусости.

КАЛА ТУ ТЕРЭС ВАЖ О ИЕГОВА КОДА, СО ПА ТИРО ЗОР, КАДА АНЭН РАДОСТЬ

14. Пала со амэнди трэбуй тэ сэрас, кала камас тэ стерас варисо важ о Иегова?

¹⁴ Если амэ цэнисарас и дила, сави амэндэ ужэ исин андэ собрания, када на сыкавэл, кай амэ на камас май бут тэ терас андэ служэния лэ Иеговасти. Амэ най просто камас тэ терас важ о Дэл кода, со па амаро зор. Но амэнди трэбуй тэ домардювас тэ стерас важ о Иегова кода, со загиндосардям. Например, када амэнди поможыя май драго тэ росԥэнас лэ манушэнди пала Дэл и тэ поможысарас лэ ԥралэнди и лэ ԥэянди. И важно, тэ на бистрас, кай най вся па амаро зор, тэ гиндосарас пала авэр май бут, чем пала пэстэ и тэ авас мудри. Тоди амэндэ вижала тэ стерас и дила, сави амэ загиндосардям важ о Иегова (Прит. 11:2; Деян. 20:35).

15. Со можэш тэ стерэс важ о Иегова и кадэлэстар тэ авэс инке май бахтало?

¹⁵ Со ту можэш тэ стерэс важ о Дэл? Манг кай о Иегова, кай во тэ поможый тути тэ диқэс, со ту можэш тэ стерэс, ай со нэ сможэш (Прит. 16:3; Иак. 1:5). И тути андэ када моӷут тэ поможын дэсавэ гиндоря анда пэрво абзацо. Када например ту можэш тэ лэс подсобно пианерско, или тэ авэс общё пианеро или тэ служыс андо Вефилё чи тэ строис варисавэ здании андэ лэ Дэвлэстири арӷанизацыя. Ай можэш тэ сытёс авэр шыб, кай потом тэ дэс дума андэ служэния аврэ манушэнца или тэ пэрэладас кордэ, кай дэн дума пэ кадэя шыб. Пала кода, сар ту можэш май бут тэ служыс, можно тэ уӷанэс андэ 10 ӷлава андэ книӷа «Организованы, чтобы исполнять волю Иеговы» или тэ подэс дума пала када лэ старейшынонэнца анда тири собранияd. Кала ту домардёс кода, со камэс тэ стерэс важ о Иегова, када дицола аврэнди, ай ту ашэс инке май бахтало.

16. Со тэ терэс, если ту нэ можэш тэ стерэс важ о Иегова кода со камэс?

¹⁶ Но со, если ту нэ можэш тэ стерэс важ о Иегова нисо анда кода, пала со амэ щяс дям дума? Тоди ту можэш тэ стерэс важ о Иегова акэ со.

17. Со, сар ԥэнэнпэ андэ 1 Тимофею 4:13, 15, поможыя лэ ԥралэсти тэ авэл инке май лашо учителё?

¹⁷ Адиносар 1 Тимофею 4:13, 15. Если ту ԥрал и болделян, старысав драго тэ сытёс тэ ԥэнэс и речи и тэ сытярэс аврэн. Мэк када авэл важ тутэ фартэ важно. Тоди кода, со ту адинос, дэс дума и сытярэс, лэла тэ дожал лэ манушэнди андо ди. Старысав драго тэ полэс и брашура «Сытю май драго тэ адинос и тэ сытярэс». Но на лэпэ тэ розлэспэ сразу андэ всаворэ урокоря. Адиносар по ек. Котэ исин и советоря, савэ поможына тути, кала ту ӷотовишся каринг пэстири речь. Манг помощь кай и старейшыноря. Особенно кай кодэва ԥрал, саво дэл советоря посли речьe (1 Тим. 5:17). И инке ту трэбуй най просто шукарнэс тэ дэс дума, но и кай тири дума тэ поможый лэ манушэнди май фартэ тэ патян андо Иегова и кай вонэ тэ прилэн кода, со ашунэн пэ собрания. Када анэна май бари бах тути и кодэлэнди, ко тут ашунэн.

18. Со поможыя, кай амэ тэ сытювас инке май драго тэ росԥэнас пала Дэл и тэ проандярас и изучения лэ манушэнца?

¹⁸ Амэндэ кажнонэстэ исин фартэ важно дила. Када тэ росԥэнас лэ манушэнди пала Дэл и тэ проандярас лэнца и изучения Библии (Матф. 28:19, 20; Рим. 10:14). Камлоп ту тэ сытёс май драго тэ терэс кадэя дила? Тути андэ када упалэ поможыя и брашура «Сытю май драго тэ адинос и тэ сытярэс». Кала ту розлэс варисаво уроко андар латэ, тоди старысав тэ прилэс и советоря, савэ котэ пистромэ. Инке бут со можно тэ виарақэс андэ тетрадка «Амаро христианско дром и служэния». Кадяжэ пэ амаро сайто исин бут видеоря, сар тэ дас дума лэ манушэнца, савэ амэ диқас пэ собрания. Со май бут ту лэса тэ пользуешся кодэлэса, со исин андэ амари арӷанизацыя, со май драго ту полэса, со поджал именно тути. Тоди ту авэса лашо учителё, саво сытярэл лэ Дэвлэстирэ алавэнди. Кадэлэстар ту авэса бахтало (2 Тим. 4:5).

19. Со поможыя тути тэ авэс кацавэ манушэса, саво уӷодий лэ Дэвлэсти?

¹⁹ Кала ту камэс тэ стерэс варисо важ о Иегова, на бистэр, кай важно кода, кай тэ старыиспэ тэ авэс кацавэ манушэса, саво уӷодий лэ Дэвлэсти (Гал. 5:22, 23; Кол. 3:12; 2 Пет. 1:5—8). Сар када тэ стерэс? Например, ту камэс тэ патяс май фартэ лэ Иеговасти. Тоди ту можэш тэ породэс андэ амари литература и советоря, савэ поможына тути. Кадяжэ ту можэш тэ диқэс о Бродкастинӷо, андэ саво росԥэнэнпэ пала ԥрала и ԥэя, савэ на парашэнас тэ патян лэ Иеговасти андо ԥаримос. Погиндосар, сости ту можэш лэндар тэ сытёс. Кала ту пала лэндэ май бут уӷанэса, када анэна тути бут лашимос.

20. Со трэбуй тэ терас, кай тэ авас май бахталэ и май набут тэ пэрэжываем?

²⁰ Чаче, кажно андар мэндэ камэл тэ терэл важ о Иегова инке май бут, чем можэт щяс. Андо раё пэ ԥув амэ сможэм када тэ стерас. Ай пока на авеля кодэя время, амэ трэбуй тэ цэнисарас вся, со амэ можэм тэ стерас андэ служэния лэ Иеговасти адес. Тоди кажно андар мэндэ авэла май бахтало и на лэла пэрэжывать, кай варисо нэ сможэт тэ стерэл важ о Иегова. И со май важно, сар амэ служысарас анда вся оди, кадя амэ прослависарас лэ Иеговас, амарэ «бахталэ Дэвлэс» (1 Тим. 1:11). И тоди амэ ласа тэ лошавас всаворэсти, со амэ можэм тэ терас важ о Иегова!