Поможын лэ изучающёнэнди тэ стон лэ Иеговас по пэрво ҭан

1, 2. а) Со можэт тэ тердярэл лэ манушэс тэ ашэл лэ Иеговаско свидетелё? б) Пала со амэ подаса дума андэ кадэя статья?

КАЛА туса изучали и Библия, ту сразу закамлянас тэ авэс лэ Иеговаско свидетелё или тут варисо тердярэлас? Можэт, ту дарасас, кай тиро родо, друӷоря или авэр мануша парашэна туса тэ общаюца. Или тутэ сас гиндо, кай тэ жувэс па Библия фартэ ԥарэс и тутэ нисо на вижала. Тоди ту полэс кодэлэн, ко изучает и Библия, но пока дарал тэ ашэл лэ Иеговаско свидетелё.

² О Иисусо ӷанэнас, кай через кацавэ гиндоря лэ манушэсти можэт тэ авэл ԥарэс тэ барёл духовно (Матф. 13:20—22). Но дажэ если лэ манушэнди варисо на дэлас тэ жувэн, сар во, о Иисусо на гиндояс, кай лэндэ никала нисо на вижала. Во поможыяс лэнди: 1) тэ полэн, со на дэл лэнди тэ барён духовно, 2) май фартэ тэ полюбин лэ Иеговас, 3) тэ стон лэ Иеговас по пэрво ҭан андэ жызня и 4) тэ виритярэн, кала пэр лэндэ тасавэн. О Иисусо сас со май лашо учителё, и амэ камас тэ сытювас лэстар. Давайте уӷанаса, сар па книжка «Жувэн вечно пэ бахтатэ!» амэ можэм тэ дас зор амарэ изучающёнэсти тэ залэл лэ Иеговастири риг.

ПОМОЖЫН ЛЭ ИЗУЧАЮЩЁНЭСТИ ТЭ ПОЛЭЛ, СО НА ДЭЛ ЛЭСТИ ТЭ БАРЁЛ ДУХОВНО

3. Со, можэт, на дэлас лэ Никодимости тэ ашэл лэ Христоско ученико?

³ О Никодимо сас сындомари андо баро иудейско сындо. Прожыля всего полӷода, сар о Иисусо заля тэ служый, ай о Никодимо ужэ полэлас, кай кадэлэ манушэс бишалдя о Дэл (Иоан. 3:1, 2). Но всаек «через и дар англа иудеёря» во закамля тэ диқэлпэ лэ Иисусоса чоралэс (Иоан. 7:13; 12:42). Варисо мешыияс лэ Никодимости тэ ашэл лэ Христоско ученико. Возможно, во даралас, кай через када во бут со хасарэла, например, и власть и ловэa.

4. Сар о Иисусо поможысардя лэ Никодимости тэ полэл, со лэстар аштярэл о Дэл?

⁴ О Никодимо ӷанэнас лэ Моисеёско законо, но на полэлас, со лично лэстар аштярэл о Иегова. Сар о Иисусо лэсти поможысардя? Во сас ӷотово тэ витидэл важ лэстэ время и дажэ диқляпэ лэса и рят. О Иисусо ворта ԥэндя лэ Никодимости, со лэсти трэбуй тэ стерэл, кай тэ ашэл лэско ученико: лэсти трэбуй сас тэ каийпэ андэ пэско бэзэх, тэ болдёл андо паи и тэ сыкавэл пэ дила, кай патял андэ лэ Дэвлэско шаво (Иоан. 3:5, 14—21).

5. Сар тэ поможын лэ манушэсти тэ полэл, со на дэл лэсти тэ барёл духовно?

⁵ Дажэ если о изучающё драго ӷанэн и Библия, во можэт тэ на дополэл, со на дэл лэсти тэ барёл духовно. Можэт, и бути одлэл лэстар бут время или лэско ери мешыий лэсти тэ ашэл свидетелё. Проандярэн время пэстирэ изучающёнэса. Ақарэн лэс варикай тэ побэшэн вместе или тэ прожанпэ. Кадя лэсти авэла май вушэро тэ росԥэнэн пала пэстэ и пала пэстирэ трудности. Поможын, кай о изучающё тэ полэл, андэр со лэсти трэбуй тэ парудёл, ай кадяжэ ԥэнэн лэсти, кай во терэл када най важ тумэндэ, ай кай тэ радуий лэ Иеговас.

6. Сар тэ поможысарас лэ манушэсти тэ терэл кадя, сар уӷанэн анда Библия? (1 Каринфо 16:13).

⁶ Если о изучающё патял, кай о Иегова поможыя лэсти тэ терэл правильно, лэстэ авэла май бут зор тэ терэл кадя, сар уӷанэн. (Проадинон 1 Каринфо 16:13.) Ай со трэбуй тэ терэн тумэ? Можно тэ ԥэнэс, тумэ сар учителё андэ школа. Лашо учителё най кати сытярэл, но и терпеливо поможый лэ ученикости тэ патял, кай лэстэ вся вижала. Точно кадя жэ и амэ камас тэ авас лашэ учителёря, кала сытярас лэ Дэвлэстирэ Алавэсти. Амэ най кати росԥэнас о чачимос анда Библия, но и поможысарас лэ манушэнди тэ патян, кай лэ Иеговастирэ зорэса лэндэ вижала тэ жувэн па лэстирэ законоря. Сар тэ ашас кацавэ лашэ учителёря?

ПОМОЖЫН ЛЭ ИЗУЧАЮЩЁНЭСТИ МАЙ ФАРТЭ ТЭ ПОЛЮБИЙ ЛЭ ИЕГОВАС

7. Сар о Иисусо поможыяс лэ манушэнди инке май фартэ тэ полюбин лэ Иеговас?

⁷ О Иисусо ӷанэнас, кай лэстирэ ученикоря фартэ закамэна тэ жувэн па Свынто Писания, если лэна тэ любин лэ Дэвлэс. Часто во призындярэлас примероря, савэ поможынас лэстирэ учениконэнди инке май фартэ тэ полюбин лэндирэ небеснонэ Дадэс. Например, во сыстосардя лэ Иеговас лэ манушэса, саво дарий пэстирэ бэятонэнди лашэ подаркоря (Матф. 7:9—11). Можэт, дэсавэ манушэндэ, савэ ашунэнас лэ Иисусос, никала на сас кацаво любящё дад. Представьте, со лэндэ сас по ди, кала во росԥэндя о примеро пала дад, саво анда ди простисардя пэстирэ шавэс и мэкля лэс палпалэ цэрэ. О Иисусо поможыяс лэ манушэнди тэ полэн, сар дэ фартэ о Иегова лэн любий и жалуий (Лука 15:20—24).

8. Сар тэ поможын лэ изучающёнэсти инке май фартэ тэ полюбий лэ Иеговас?

⁸ Ай сар тумэ можэте тэ поможын лэ изучающёнэсти инке май фартэ тэ полюбий лэ Иеговас? Май часто дэн дума лэса пала лэ Дэвлэстирэ райканэ качестворя. Пэ кажно изучения поможын лэсти тэ додикэл, андэр со дицол лэ Иеговастири любовь. Например, тумэ дэн дума лэса пала лэ Иисусостири жэртва. Важно, кай во тэ полэл, кай о Иегова отдя лэ Иисусос най кати важ всаворэ мануша, но и лично важ лэстэ (Римо 5:8; 1 Иоан. 4:10). Лэ манушэстэ появияпэ бари любовь каринг о Иегова тоди, кала во полэла, сар дэ фартэ о Дэл лэс любий (Гал. 2:20).

9. Васо о Майкло закамля тэ парувэл пэстири жызня и тэ ашэл лэ Иеговаско служытелё?

⁹ Акэ со сас кай о Майкло анда Индонезия. Во бареля андо ери кай и свидетеля, но екжэно кадя и на болделя. Кала лэсти сас 18 лет, о Майкло лагля андэ авэр страна, кай котэ тэ затерэл. Ӷэт май интя во рисайля, жэнисайля и упалэ лагля палпалэ пэ бутятэ. Пока во сас котэ, лэстири хулаи и щей линэ тэ изучают и Библия. Кала кай о Майкло муля лэстири дэй, во рисайля цэрэ, кай тэ заботийпэ пала пэско дад, и тожэ ля тэ изучает. Кала во прожалас и 27 ӷлава анда книжка «Жувэн вечно пэ бахтатэ!», лэс фартэ линэ лэ одестар и гиндоря анда часть «Уӷанам май бут». О Майкло розровьяпэ, кала представил, сар росшындёлас лэ Иеговаско ди, кала мучияспэ лэско шаво. Во поля, сар дэ фартэ о Иегова и о Иисусо лэс любин. И кай тэ сыкавэл пэстири блаӷодарность важ када, во парудя пэстири жызня и болделя.

ПОМОЖЫН ЛЭ ИЗУЧАЮЩЁНЭСТИ ТЭ СТОЛ ЛЭ ИЕГОВАС ПО ПЭРВО ҬАН АНДЭ ЖЫЗНЯ

10. Сар о Иисусо поможысардя лэ учениконэнди тэ стон по пэрво ҭан лэ Иеговас? (Лука 5:5—11). (Кадяжэ диқэн и картинка.)

¹⁰ Андо пэрво вико дэсавэ лэ Иисусостирэ ученикоря сразу полинэ, кай во о Христос, саво трэбуй сас тэ авэл. Кадяжэ лэнди трэбуй сас тэ росԥэнэн и лащи новость, но када вонэ полинэ най сразу. Например, кала о Иисусо ақардя лэ Петрос и лэ Андреёс всегда тэ авэн паша лэстэ, вонэ ужэ дэсави время сас лэстирэ ученикоря (Матф. 4:18, 19). Лэ Иаковоса и лэ Иоаноса вонэ астарэнас мащё и драго па када затерэнас (Мар. 1:16—20). Кала о Пётро и о Андрей «ашадэ и сетки», вонэ линэ па аврятэ тэ затерэн важ пэско ери. Васо кадэла мурша парудэ пэстири жызня и стодэ по пэрво ҭан най о затеримос, ай лэ Иеговас? Андэ лащи новость лэ Лукастар ԥэнэнпэ, кай о Иисусо стердя важ лэндэ чуда и кадя поможысардя лэнди май фартэ тэ патян лэ Дэвлэсти. Вонэ полинэ, кай о Иегова всегда лэла тэ заботийпэ пала лэндэ, если вонэ стона лэс по пэрво ҭан андэ пэстири жызня. (Проадинон Лука 5:5—11.)

11. Пала со амэ можэм тэ росԥэнас лэ изучающёнэсти, кай лэстири вера тэ авэл май састи?

¹¹ Амэ не можэм тэ терас чуда, сар о Иисусо. Но амэ можэм тэ росԥэнас лэ изучающёнэнди, сар о Иегова заботийпэ пала кодэла, ко стол лэс по пэрво ҭан андэ пэстири жызня. Например, вспомните, сар о Иегова поможыяс тумэнди, кала тумэ кати линэ тэ ԥирэн пэ собрании. Можэт, тумэнди прижыляпэ тэ доԥэндён пэ бути и тэ росԥэнэн, кай тумэ будэр не сможэте тэ терэн андэ кодэя время, кала прожал и собрания. Росԥэнэн лэ изучающёнэсти, сар о Иегова блаӷословияс тумэн, кала тумэ стонас лэ Иеговас по пэрво ҭан андэ пэстири жызня, и сар через када тумари вера ашэля май састи.

12. а) Васо важно тэ ақарас пэ изучения разнонэ ԥралэн и ԥэян? б) Сар и видеоря моӷут тэ поможын пэ изучения? Росԥэнэн о примеро.

¹² Авэр христианоря тожэ моӷут тэ росԥэнэн лэ изучающёнэсти бут со интересно пала пэстири жызня. Важ када ақарэн пэ изучения разнонэ ԥралэн и ԥэян. Мангэн лэн тэ росԥэнэн, сар вонэ линэ тэ изучают и Библия и со дя лэнди зор тэ стон лэ Иеговас по пэрво ҭан андэ пэстири жызня. Кадяжэ, кала изучаете па книжка «Жувэн вечно пэ бахтатэ!», диқэн вместе и видеоря анда часть «Уӷанам май бут» и, если трэбуй, анда часть «Дик инке». Например, андэ 37 ӷлава диқэн о видео «О Иегова позаботияпэ пала кода, со амэнди трэбуй важ и жызня». Поможын лэ изучающёнэсти тэ полэл, кай если во стола лэ Иеговас по пэрво ҭан, тоди о Дэл пала лэстэ позаботияпэ.

ПОМОЖЫН ЛЭ ИЗУЧАЮЩЁНЭСТИ ТЭ ВИРИТЯРЭЛ, КАЛА АВЭР ТАСАВЭН ПЭР ЛЭСТЭ

13. Сар о Иисусо поможысардя лэ учениконэнди тэ авэн ӷотови, кала пэр лэндэ лэна тэ тасавэн?

¹³ О Иисусо най еқвар ԥэнэнас пэстирэ учениконэнди, кай авэр мануша, и дажэ о родо, лэна тэ тасавэн пэр лэндэ (Матф. 5:11; 10:22, 36). Англа пэстири смэрть во ԥэндя лэ учениконэнди, кай дэсавэн андар лэндэ умарэна (Матф. 24:9; Иоан. 15:20; 16:2). О Иисусо ԥэндя, кай вонэ тэ авэн осторожни андэ служэния. Например, во дя лэнди совето никаса тэ на споринпэ пала кода, андэр со вонэ патян. Кадяжэ во ԥэндя лэнди тэ авэн осторожни андэ кода, со вонэ ԥэнэн и терэн. Кадя вонэ моӷли бы и дальшэ тэ росԥэнэн пала Дэл.

14. Сар тэ поможын лэ изучающёнэсти тэ авэл ӷотово, кала пэр лэстэ лэна тэ тасавэн? (2 Тимафеё 3:12).

¹⁴ Сар тэ поможын лэ изучающёнэсти тэ авэл ӷотово, кала пэр лэстэ лэна тэ тасавэн? Росԥэнэн лэсти, со можэт тэ ԥэнэн лэско родо, друӷоря или и мануша па бути, кала уӷанэна, кай во изучает и Библия. (Проадинон 2 Тимафеё 3:12.) Через када варико можэт тэ подасалпэ лэстар. Ай авэр мануша, дажэ лэстирэ чаче, моӷут тэ ԥэнэн, кай во неправильно полэл лэ Дэвлэс. Лэ манушэсти авэла май вушэро, если амэ май данглал подаса дума лэса пала вся када. Во ӷанэна, сар пэс тэ андярэл и со тэ ԥэнэн андэ кацавэ ситуацыи.

15. Со поможыя лэ изучающёнэсти тэ виритярэл, кала пэр лэстэ тасавэн лэстирэ чаче?

¹⁵ Если лэ манушэстирэ чаченди на чалёл, кай во изучает и Библия, поможын лэсти тэ погиндой, васо кадя. Можэт, вонэ даран, кай лэсти просто замарэн о шэро. Или вонэ гиндон, кай лэ Иеговастирэ свидетеля — найлашэ мануша. Дажэ лэ Иисусостирэ чаченди на чалёлас кода, со во терэлас (Мар. 3:21; Иоан. 7:5). Важ када сытярэн лэ изучающёнэс тэ авэл терпеливо и пативалэс тэ дэл дума всаворэнца, и пэстирэ чаченца тожэ.

16. Сар май фэдэр о изучающё тэ росԥэнэн пала кода, андэр со во патял?

¹⁶ Лэ манушэстирэ чаче моӷут тэ пушэн лэстар варисо пала Библия. Но лэсти на трэбуй сразу тэ росԥэнэн вся, со во ӷанэн. А то кадя лэндэ можэт тэ затирёл о шэро и пэ авэр разо вонэ ужэ нисо на закамэна тэ пушэн. Ԥэнэн лэ изучающёнэсти тэ дэл дума просто. Кадя пэ авэр разо лэстирэ чаче закамэна тэ ашунэн инке варисо пала Библия (Клс. 4:6). Например, во можэт тэ сыкавэл лэнди о сайто jw.org. Тоди вонэ смоӷут екжэнэ тэ витидэн, кала, скати и со тэ адинон пала лэ Иеговастирэ свидетеля.

17. Сар тэ поможын лэ изучающёнэсти тэ росԥэнэн пала лэ Иеговастирэ свидетеля? (Кадяжэ диқэн и картинка.)

¹⁷ Пэ амаро сайто исин раздело «Кода, со май бут пушэн пала лэ Иеговастирэ свидетеля». И статьи анда кадэва раздело поможына, кай о изучающё тэ ӷанэн, со тэ ԥэнэн, кала лэстирэ чаче или и мануша па бути задэн варисавэ вопросоря (2 Тим. 2:24, 25). Кадяжэ на бистрэн пала рамка «Тути варико можэт тэ ԥэнэн», сави исин андэ кажно ӷлава андэ книжка «Жувэн вечно пэ бахтатэ!». Мэк о изучающё росԥэнэн, андэр со во патял, и дэл дума пэстирэ алавэнца. Если трэбуй, подԥэнэн лэсти, со во моӷ бы тэ подлашарэл. На жалуин пэстири время, кай о изучающё тэ сытёл. Тоди во сможэт драго тэ зашолпэ пала пэстири вера.

18. Сар тэ поможын лэ изучающёнэсти тэ росԥэнэн пала Дэл ла собранияса? (Матфеё 10:27).

¹⁸ О Иисусо приԥэндя пэстирэ учениконэнди тэ росԥэнэн и лащи новость всаворэ манушэнди. (Проадинон Матфеё 10:27.) Со май ӥто о изучающё лэла тэ росԥэнэн пала Дэл ла собранияса, со май ӥто во сытёла тэ патял лэ Иеговасти. Сар тумэ можэте тэ поможын лэсти андэ када? Кала андэ тумари собрания авэла объявления пала кампания, подԥэнэн лэ изучающёнэсти тэ ашэл некрещёно вазвещателё. Ԥэнэн лэсти, кай обычно май вушэро тэ лэл тэ росԥэнэн пала Дэл имено пэ кацавэ кампании. Инке ек лащи цэль важ о изучающё — тэ терэл задании пэ собрании. Када поможыя лэсти май драго тэ росԥэнэн, андэр со во патял.

МЭК О ИЗУЧАЮЩЁ ДИҚЭЛ, КАЙ ТУМЭ ПАТЯН, КАЙ ЛЭСТЭ ВСЯ ВИЖАЛА

19. Сар о Иисусо сыкавэлас, кай не сомневаеца андэ пэстирэ ученикоря, и сар амэ можэм тэ сытювас лэстар?

¹⁹ Англа пэстири смэрть о Иисусо ԥэндя лэ учениконэнди, кай авэла дес, кала вонэ упалэ авэна вместе. Вонэ на полинэ, кай во камля тэ лэл лэн по небо. Но о Иисусо шолас бари сама най пэ кода, кай вонэ сомневаюца. Важ лэстэ сас май важно, кай вонэ камэнас всегда тэ авэн паша лэстэ (Иоан. 14:1—5, 8). Во ӷанэнас, кай лэнди трэбуй время, кай дэсо тэ полэн, например, кай и апосталоря лэна тэ жувэн по небо (Иоан. 16:12). Амарэ изучающи тожэ камэн тэ радуин лэ Иеговас. И амэ камас тэ сыкавас лэнди, кай не сомневаемся андэ када.

20. Сар ек ԥэй андэ Малави сыкадя, кай не сомневаеца андэ пэстири изучающё?

²⁰ Амэ не сомневаемся, кай амарэ изучающи камэн тэ андярэн пэс правильно. Андэ Малави амари ԥэй ля тэ изучает и Библия па книжка «Жувэн вечно пэ бахтатэ» ла манушняса, савятэ католическо вера. Кала вонэ прожылэ и 14 ӷлава, и ԥэй пушля, со и манушни гиндой пала масхаря. Лати фартэ на чалеля кадэва вопросо, и вой ԥэндя, кай када кати латири дила. И ԥэй погиндосардя, кай ӥто и манушни мэкэла и изучения. Но всаек на парашэля терпеливо тэ изучает ласа, важ кода кай надеияспэ, кай ӥто вой вся полэла. Через дэсавэ шона, кала вонэ прожанас и 34 ӷлава, и ԥэй задя вопросо анда 6 пункто: «Саво лашымос тутэ исин ужэ акана, кай ту изучаеш и Библия и кай ту уӷанглян пала чачуно Дэл Иегова?» И ԥэй ԥэнэн: «Вой кадя бут росԥэндя! Ай инке ԥэндя, кай и свидетеля никала на терэн кода, со па Библия нащи». Ӥто посли када и изучающё парашэля тэ полэл и масхаря и болделя.

21. Сар тэ поможысарас лэ изучающёнэсти тэ залэл лэ Иеговастири риг?

²¹ Хоть и ӷлавно дила терэл о Иегова, амэ тожэ поможысарас, кай о изучающё тэ барёл духовно (1 Кр. 3:7). Амэ най просто росԥэнас лэ манушэсти, со лэстар камэл о Дэл. Амэ дас лэсти зор май фартэ тэ полюбий лэ Иеговас. Кадяжэ амэ поможысарас лэсти тэ стол лэ Иеговас по пэрво ҭан андэ пэстири жызня. Ай инке амэ сытярас лэ изучающёнэс тэ надеийпэ по Иегова и тэ патял, кай о Дэл дэла лэсти зор, кала пэр лэстэ лэна тэ тасавэн авэр мануша. Кала амэ не сомневаемся андэ амаро изучающё и сыкавас лэсти када, амэ поможысарас лэсти тэ патял, кай лэстэ вижала тэ залэл лэ Иеговастири риг.