И алава анда Библия дэна зор тумэнди тэ виритярэн о ԥаримос

1. Саво ԥаримос можэт тэ авэл кай лэ Иеговастирэ служытеля?

МОЖЭТ акана андэ тумари жызня фартэ бут ԥаримос. Можэт варико холярдя тумэн андэ собрания (Иак. 3:2). Или можэт тумэндар подасанпэ андэ школа или пэ бути, важ кода кай тумэ служын лэ Иеговасти (1 Пет. 4:3, 4). Или о родо тасавэл, кай тумэ тэ парашэн тэ служын лэ Иеговасти (Матф. 10:35, 36). Если тумэндэ исин кацаво, тумэ можэте тэ гиндон, кай фэдэр ужэ тэ ашавэн лэ Иеговас и тэ на служын лэсти. Но сэрэн, кай о Иегова ӷанэн пала тумаро ԥаримос, и во дэла тумэнди зор и мудрость, сар пэс тэ андярэн, кай тэ виритярэн када.

2. Сар амэнди поможына и алава анда Библия, сар пистромэ андэ Римлянам 15:4?

² О Иегова стердя кадя, кай андэ Библия тэ авэл запистромэ пала мануша, савэндэ сас ԥаримос и савэндар амэ можэм тэ сытювас. И кала амэ адиносараса пала кадэла мануша, амэндэ по ди авэла май драго, и амэ ласа всаворэ одеса тэ аштярас о лашимос, саво авэла англэ. Именно пала када и ԥэнэнпэ андэ Римлянам 15:4 (адиносар). Но если амэ просто ласа тэ адиносарас и Библия, када на хутила. Трэбуй кай и алава андар латэ тэ парувэн амарэ гиндоря и кода, со амэндэ андо ди. Ай со если тутэ варисаво ԥаримос андэ жызня и тути трэбуй совето, сар пэс тэ андярэс? Тоди лэ и Библия, и спэрва мангпэ англа кода, сар тэ адинос. Ай потом представляй пэсти, со адинос, гиндосар пала када и тер кадя, сар уӷанглян. Диқам, сар када тэ терасb. Ай потом диқаса, сости амэ можэм тэ сытювас кай о царё Давид и кай о апостоло Павло.

3. Со трэбуй тэ терэс англа кода, сар тэ адинос и Библия и васо?

³ 1. Мангпэ. Англа кода, сар тэ адинос и Библия, мангпэ, кай май драго тэ полэс, сар кадэла алава поможына тути. Например, кала тути трэбуй совето, манг лэ Иеговас тэ виарақэс кодэва совето, саво поможыя тэ прилэс правильно ришэния (Флп. 4:6, 7; Иак. 1:5).

4. Со поможыя май драго тэ полэс кода, пала со адинос анда Библия?

⁴ 2. Представляй. О Иегова дя амэнди розлашо подарко. Амэ можэм представлять пэсти кода, пала со адиносарас, кабута амэ котэ. Кала адинос и Библия, представь, со по ди кодэлэ манушэстэ, пала кастэ адинос андэ Библия. Сто пэс по лэ манушэско ҭан. Дик пэ вся лэстирэ яқэнца и погиндосар, со тутэ авелоп по ди андэ кодэва маменто.

5. Савэ вопросоря амэнди поможына тэ полас, пала со проадиносардям?

⁵ 3. Гиндосар. Тэ гиндос, пала со адинос андэ Библия, када тэ полэс, сар када поджал именно каринг тутэ. Кала амэ гиндосарас, када поможыя амэнди тэ полас о гиндо, пала со проадиносардям. Ай если амэ кадя на терас, тоди када шолпэ пэ мозайка, сави най стиди. Но кай тэ авэл цыло картина, амэнди трэбуй тэ стидас всаворэ латирэ части. Кадя и амэнди трэбуй тэ стидас андо шэро вся и картина, кай тэ полас кода, пала со проадиносардям. Ай со амэнди поможыя май драго тэ полас, со пистромэ андэ Библия? Амэ можэм тэ пушас пэстар: «Сар о мануш, пала саво мэ проадиносардэм андэ Библия, пэрэандярдя о ԥаримос андэ пэстири жызня? Сар лэсти поможысардя о Иегова? И сости мэ сытював, сар тэ виритярас о ԥаримос?»

6. Васо амэнди трэбуй тэ прилас кода, пала со уӷанас анда Библия?

⁶ 4. Тер кадя, сар уӷанглян. Сар ԥэндя о Иисусо, если амэ на прилас андэ пэстири жызня, пала со уӷанас анда Библия, тоди амэ шаспэ по мануш, саво строисардя пэско цэр по писко. Васо во кадя ԥэндя? Важ кода кай кодэва мануш столас бут зор, кай тэ строий, но када вся сас евья, важ кода кай кала жыля брышын, дя о паи, вазгляпэ и балвал и вся када дя пэ кодэва цэр, во пэля и лэстар нисо на ашэляпэ (Матф. 7:24—27). Кадя и амэ, если мангаспэ, представляем пэс по лэ манушэско ҭан, гиндосарас пала со адиносардям, но на терас кадя, сар уӷанас, тоди амэ евья хасарас и время. Кала амэндэ авэла ԥаримос или варисави ԥари ситуацыя, тоди амэ нэ сможэм тэ виритярас, важ кода кай тоди амэ када на прилям андэ пэстири жызня. Амэ дажэ можэм тэ хасарас амари дружба лэ Иеговаса и тэ парашас тэ патяс андэр лэстэ. Ай кала прилас андэ пэстири жызня, вся, со уӷанас анда Библия, тоди амэ приласа лашэ ришэнии и амэнди авэла драго по ди и амари дружба лэ Иеговаса авэла инке май лащи (Ис. 48:17, 18). Амэ уӷанглям, сар трэбуй тэ адиносарас и Библия. Ай акана подаса дума сости амэ можэм тэ сытювас кай о Давид.

СОСТИ АМЭ СЫТЮВАС КАЙ О ЦАРЁ ДАВИД?

7. Саво ԥаримос сас кай о Давид?

⁷ Ай со если варико анда ери или анда тумарэ друӷоря стердэ, кай тумэнди тэ авэл фартэ ԥарэс по ди? Тоди тумэнди поможыя кода, со андэ Библия пистромэ пала Давид. Лэско шаво о Авессаломо придя лэс и камля тэ авэл царё вместо лэстэ (2 Сам. 15:5—14, 31; 18:6—14).

8. Пала со ту можэш тэ мангэс кай о Иегова андэ молитва?

⁸ 1. Мангпэ. Англа кода, сар тэ проадинос пала Давид, спэрва росԥэн лэ Иеговасти пала вся, со тутэ по ди и сар туса обжылэпэ авэр (Пс. 6:6—9). Тоди манг, кай о Иегова тэ поможый тути тэ виарақэс кацаво совето анда Библия, саво поджала именно тути андэ кадэва маменто.

9. Сар андярдя пэс о Авессаломо пэстирэ дадэса?

⁹ 2. Представляй. Погиндосар, со сас андэ жызня кай о Давид. Най ек бэрш лэско шаво о Авессаломо терэлас вся, кай о народо тэ прижанэн лэс царёса, важ кода кай во фартэ камэлас тэ авэл царё (2 Сам. 15:7). И кала во поля, кай поджыля и время, кай тэ залэл пэстирэ дадэстар и власть, во чоралэс бишалдя па вся Израилё пэстирэ манушэн. Кадя во подвазгля, кай лэс о народо тэ прилэл, сар царёс. Кадяжэ во пэрэцырдя пэ пэстири риг лэ манушэс, саво сас пашутно друӷо и советнико лэ Давидости, када о Ахитофело. Тоди о Авессаломо ԥэндя всаворэнди, кай во акана царё и закамля тэ умарэл пэстирэ дадэс, саво андэ кодэя время фартэ занасвайля (Пс. 41:1—9). О Давид уӷангля, со загиндосардя лэско шаво, и важ када занашля андо Иерусалимо. Прожыля время, лэ Давидоско войско и лэ Авессаломоско войско марэнаспэ. Кодэла, ко жалас против о Давид процэлдэ, и лэ Авессаломос умардэ.

10. Сар о Давид моӷ тэ андярэл пэс андэ кодэва маменто?

¹⁰ Акана погиндосар, со сас по ди кай о Давид андэ кодэя время. Во фартэ любияс пэстирэ шавэс и фартэ цэнияс пэстирэ друӷос лэ Ахитофелос. Но кадэла мануша лэс придинэ. Лэсти сас фартэ ԥарэс по ди кадэлэстар, и инке май ԥарэс сас кодэлэстар, кай вонэ камэнас лэс тэ умарэн. О Давид моӷ бы тэ парашэл тэ патял пэстирэ аврэ друӷонэнди и тэ гиндой, кай вонэ тожэ моӷут лэс тэ придэн. Во моӷ тэ гиндой, кай ашэляпэ екжэно и тэ надеийпэ трэбуй кати пэр пэстэ. Или во моӷ бы совсем тэ умэкэл и вас через када. Но со поможысардя лэ Давидости тэ пэрэандярэл кадэва ԥаримос?

11. Сар на андярдя пэс о Давид, хоть лэсти сас фартэ ԥарэс?

¹¹ 3. Гиндосар. Акана погиндосар, сости ту можэш тэ сытёс анда кода, сар андярдя пэс о Давид. Еқа ригатар во на ля тэ нервичий и на ля тэ грабийпэ, кай тэ прилэл ришэнии. Ай авря ригатар во на пэрэдарайля и на ля тэ отстол пэ долӷонэстэ пэстирэ ришэнии. О Давид мангэлас помощь кай о Иегова и кай пэстирэ друӷоря. Во сразу терэлас кадя, сар приля ришэния. Через кода, со пэрэжудя о Давид, лэсти сас фартэ ԥарэс по ди, но во на ля ни пэр кастэ тэ холявэл и на парашэля тэ патял лэ Иеговасти и пэстирэ друӷонэнди.

12. Сар о Иегова поможыяс лэ Давидости?

¹² Ай сар о Иегова поможысардя лэ Давидости андэ кодэва ԥаримос? Андэ Библия амэ можэм тэ уӷанас, кай о Иегова дэлас лэсти зор вся када тэ виритярэл (Пс. 3, кода, со пистромэ англа пэрво стихо; 3:1—8). Инке о Иегова блаӷословияс кодэла ришэнии, савэ прилэлас о Давид. Кадяжэ о Иегова придэлас зор лэстирэ друӷонэнди, кай вонэ тэ жан тэ марэнпэ пэ война, кай тэ фэрин пэстирэ царёс.

13. Со ту можэш тэ терэс, сар о Давид, кала через варикастэ тути ԥарэс по ди? (Матфея 18:15—17).

¹³ 4. Тер кадя, сар уӷанглян. Пуш пэстар: «Сости мэ сытював кай о Давид?» Если тут холярдэ и тути ашэля ԥарэс по ди, сразу тер варисо, кай тэ на ашэлпэ и холи. Если тутэ исин кацаво ԥаримос, ту можэш тэ стерэс точно кадяжэ, сар запистромэ андэ 18 ӷлава Матфея или тэ стерэс чуть па аврятэ. Ӷлавно, кай тэ поладис кодэлэ манушэса, саво тут холярдя. (Адиносар Матфея 18:15—17.) Но никала на грабийпэ тэ прилэс ришэнии, кала холинако, или кала тути ԥарэс по ди. Манг лэ Иеговас, кай тэ поможый тути тэ полэс, со тэ терэс. На параш тэ патяс пэстирэ друӷонэнди и тэ прилэс лэндар помощь (Прит. 17:17). Ай со май важно, тер вся кадя, сар сытярэл о Иегова через и Библия (Прит. 3:5, 6).

СОСТИ АМЭ СЫТЮВАС, КАЙ О АПОСТОЛО ПАВЛО?

14. Кала тути моӷут тэ поможын и алава анда Библия, савэ запистромэ андэ 2 Тимофею 1:12—16 и 4:6—11, 17—22?

¹⁴ Если тиро родо на дэл тути тэ служыс лэ Иеговасти, или можэт котэ, кай ту жувэс амари дила заԥандадэ или тути на дэн спокойно тэ служыс, тоди тути поможына и алава, савэ запистромэ андэ 2 Тимофею 1:12—16 и 4:6—11, 17—22c. Лэн о Павло пистросардя, кала бэшэлас андо баруно.

15. Со ту можэш тэ мангэс кай о Иегова?

¹⁵ 1. Мангпэ. Англа кода, сар тэ адинос кадэла стихоря, спэрва подэ дума лэ Иеговаса и росԥэн, со тутэ по ди, пала со ту пэрэжываеш. И манг, кай во тути тэ поможый тэ виарақэс андэ лэ Павлостирэ алава совето, сар пэс тэ андярэс, кала тутэ кацаво ԥаримос.

16. Саво ԥаримос сас кай о Павло?

¹⁶ 2. Представляй. Представь, со сас по ди, кай о Павло. Во андо Римо, андо баруно, пэр лэстэ барунарицки цэпоря. Во ужэ най еқвар бэшэлас андо бар, но кадэва разо во ӷанэнас, кай лэс точно умарэна. Дэсавэ ԥрала, савэ лэс раньшэ подритярэнас, акана ашадэ лэс и во сас совсем би зорэско (2 Тим. 1:15).

17. Сар на ля тэ гиндой о Павло, кала лэсти сас ԥарэс?

¹⁷ О Павло на гиндояс вся и время, со сас варикала андэ лэстири жызня. И на гиндояс, кай если во тоди тэ прилиноп авэр ришэния, во на бэшлоп андо баруно. Или во моӷ бы тэ холявэл пэ ԥрала, савэ ашадэ лэс и тэ парашэл тэ патял аврэ пэстирэ друӷонэнди. Но во кадя на тердя. Васо о Павло на парашэлас тэ патял пэстирэ друӷонэнди, кай вонэ лэс на ашавэна и кай о Иегова лэс обязательно блаӷословия?

18. Со о Павло терэлас, кала лэсти сас ԥарэс?

¹⁸ 3. Гиндосар. Можно тэ задэс пэсти вопросо: «Со о Павло терэлас, кай тэ виритярэл о ԥаримос?» Лэ Павлости сас фартэ ԥарэс, и лэс трэбуй сас тэ умарэн. Но во всаек сэрэлас, кай со май важно важ лэстэ, када тэ прославляет лэ Иеговас. Кадяжэ во на парашэлас тэ подритярэл аврэн. Во патялас лэ Иеговасти и вся и время мангэласпэ лэсти (2 Тим. 1:3). О Павло на ля фартэ тэ пэрэжывает пала кода, кай дэсавэ ԥрала лэс ашадэ. И во сас блаӷодарно кодэлэ ԥралэнди и ԥэянди, савэ пэ дила поможынас и савэ на ашадэ лэс. Инке во на парашэлас тэ адиной и Свынто Писания (2 Тим. 3:16, 17; 4:13). Ай со май важно, во фартэ патялас, кай о Иегова и о Иисусо любин лэс и на одбанделэ лэстар. Во ӷанэнас, кай вонэ блаӷословина лэс, кай во на парашэлас тэ служый.

19. Сар о Иегова поможыяс лэ Павлости?

¹⁹ Сар о Иегова подритярдя лэ Павлос? Во ԥэндя, кай о Павло трэбуй тэ ӷанэн, кай и мануша лэна лэс тэ вэрыцын, важ кода кай во ля тэ патял андо Иисусо (Деян. 21:11—13). О Иегова на парашэлас тэ ашунэл лэстирэ молитвы и вся и время дэлас лэсти зор (2 Тим. 4:17). Кадяжэ о Иегова ԥэндя, кай лэ Павлостэ авэла лашимос, саво о Павло кадя фартэ аштярэлас. И инке о Иегова терэлас кадя, кай лэ Павлостирэ друӷоря тэ на парашэн лэсти тэ поможын и тэ на ашавэн лэс.

20. Если тэ шас сама пэ Римлянам 8:38, 39, сости амэ сытювас лэ Павлостар?

²⁰ 4. Тер кадя, сар уӷанглян. Пуш пэстар: «Сости мэ моӷу тэ сытював лэ Павлостар?» Амэ полас, кай амэн лэна тэ вэрыцын, кай амэ служысарас лэ Иеговасти (Мар. 10:29, 30). Но кай тэ на парашас тэ кандас лэ Иеговас, хоть амэндэ можэт тэ авэл ԥаримос андэ жызня, амэнди трэбуй тэ патяс лэсти и вся и время тэ мангаспэ. Кадяжэ важно тэ на промэкас тэ проандярас лично изучения, и со май ӷлавно, амэнди трэбуй никала тэ на бистрас, кай важ амэндэ важно тэ прославляем лэ Иеговас. Кадяжэ амэ точно ӷанас, кай о Иегова амэн никала на ашавэла, и нисо нэ можэт тэ стерэл кадя, кай о Дэл тэ на любий амэн. (Адиносар Римлянам 8:38, 39; Евр. 13:5, 6.)

АВЭР ЛЭ ДЭВЛЭСТИРЭ СЛУЖЫТЕЛЯ АНДА БИБЛИЯ, САВЭНДАР МОЖНО ТЭ СЫТЮВАС

21. Со дя зор еқэ ԥралэсти и еқа ԥэяти тэ пэрэандярэн о ԥаримос?

²¹ Саво бы ԥаримос амэндэ тэ на авэл, амэ можэм тэ лас зор, кала адиносарас андэ Библия пала авэр служытеля. Кода, со сас андэ жызня кай о Иона, поможысардя еқа амаря ԥьяти, сави служый сар пианерка, андэ Япония. Вой даралас тэ росԥэнэн лэ манушэнди пала Дэл котэ, кай сас бут мануша. Ай кода, со сас андэ жызня кай и Руфь, поможысардя еқэ тэрнэ ԥралэсти анда Индонезия. Лэско дад и дэй на патян андо Иегова и на подритярэн лэс андэ када. Но во на парашэл тэ уӷанэн май бут пала Иегова и тэ служый лэсти.

22. Со тути трэбуй тэ терэс, кай кода, со дэл амэнди и арӷанизацыя, тэ анэн май бут лашимос?

²² Если ту лэса тэ диқэс видео, кай интересно адинон и Библия, ай кадяжэ тэ адинос и статьи пэ ек тема «Терэн кадя, кай тумари вера тэ авэл, сар лэндэ»d, тоди ту сможэш май бут тэ уӷанэс пала мануша, пала савэ пистромэ андэ Библия. Вонэ моӷут тэ поможын тути май фартэ тэ патяс лэ Иеговасти и май драго тэ представляеш, со пистромэ андэ Библия. Но спэрва, трэбуй тэ мангэспэ лэ Иеговасти, кай во тэ поможый тути тэ виарақэс и важни гиндоря, савэ поможына именно тути. Кадяжэ трэбуй тэ представляеш пэс вместо мануш, пала саво адинос. Инке трэбуй тэ гиндосарэс, со терэнас лэ Иеговастирэ служытеля, савэ на парашэнас лэс тэ кандэн. И сар о Иегова лэнди поможыяс тэ пэрэандярэн о ԥаримос. И тоди, када поможыя тути тэ терэс кадя сар уӷанглян. Вся и время ав блаӷодарно лэ Иеговасти, кай во ужэ акана дэл помощь тути, ай кадяжэ на параш тэ подритярэс аврэн.

23. Пала со амэнди о Иегова дя алав, сар запистромэ андэ Исаия 41:10, 13?

²³ Тэ жувас андэ кадэя люма фартэ ԥарэс, важ кода кай ласа правий о Сатана. И дэкала о мануш на ӷанэн, со тэ терэл (2 Тим. 3:1). Но амэ на трэбуй тэ пэрэжываем и тэ дарас. О Иегова диқэл и полэл, саво ԥаримос амэнди прижалпэ тэ пэрэандярас. Во дя амэнди алав, кай на ашавэла амэн и лэла тэ ритярэл амэн пэстирэ зоралэ правонэ вастэса. (Адиносар Исаия 41:10, 13.) И амэ точно ӷанас, кай и алава, савэ запистромэ андэ Библия, поможына амэнди тэ виритярас любо ԥаримос.