Augusto

Ande cado psalmo arachas dui bare sicaimata: 1) vi le manușa orta nachen prin pharimata, 2) o Iehova hastravel-len andal pharimata. Sar? Vo ajutil amen te hachiaras că i viața ande cadai lumea nasul si phari hai ci daisaras te ajucăras numai lașe buchia. O Iehova promitil amenghe că va avasa fericime ando timpo so slujisaras lesche, tha ci phenel amenghe că ci va avela te nachas prin pharimata acana. (Is. 66:14) Vo zuriarel amen te dichas pherde pachiamos caring o viitorii, cana va avela te bucurisaras amen catar i ciaci viața anda sea o timpo. (2 Cor. 4:16-18) Ji atunci vo ajutil amen ande fiesavo ghies te na mechas amen. (Plâng. 3:22-24) So daisaras te sichioas catar chichiva slujitori le Iehovasche andal puraimata, tha vi de aghies? Amen daisaras te nachas prin pharimata neajucărde. Tha dacă șioas amaro pachiamos ando Iehova, vo va avela pașa amende sea o timpo. (Ps. 55:22) w23.04 14, 15 ¶3, 4

Daisaras te sichioas catar o Iosif hai i Maria, cai sas-le gata te așunen catar le autorități mai bare, vi cana sas lenghe pharo te cheren cadaia. (Luca 2:1-6) Cana i Maria sas phari ando enia-to șion hai sas-li pașă te năștil, voi hai o Iosif sas-le șiute angla iech testo cai avelas te sicavel dacă așunen catar le autorități. Ande codo timpo, o împărato romano August poruncisardea ca fiesavo manuș te jial ando foro cai cărdilea caște avel înregistrime. O Iosif hai i Maria trebunas te jian ji co Betleemo, iech drom lungo de 150 km cai nachelas prin thana bute plainența. Cado drom ci sas ușoro, vi mai but anda i Maria. Daștil-pe că von daranas anda o sastimos la Mariaco hai le șiavesco cai încă ci năștisardea-pe. So avenas te cheren dacă astarenas-la le ducha po drom? Ji la urmă, voi phiravelas ande pesco păr chiar codoles cai avelas te avel o Mesia. Daștinas te pachian că lenghi situația ci mechelas-len te așunen catar le autorități? O Iosif hai i Maria ci mechle ca cadal daraimata te cheren-len te na așunen catar i legea. O Iehova dea-len but miștimata anda codoia că sas-le gata te așunen. Cadea, i Maria arăslea mișto co Betleemo, năștisardea iech șiavorro sastevesto hai ajutisardea te pherdiol-pe iech profeția biblico! (Mica 5:2) w23.10 8 ¶9; 9 ¶11, 12

Vi numai o gândo că trebul te des iech răspunso ca le întruniri cherel tut te izdras? So daștil te ajutil tut si te pregătis tut mișto. (Prov. 21:5) Chichi prinjianes mai mișto o materialo, cadichi mai ușoro va avela tuche te des răspunsuri. Sa cadea, de răspunsuri harne. (Prov. 15:23; 17:27) Cana des iech răspunso harno, chio ilo ci va mai marela cadea de zurales. Cana folosis che dumes caște des iech răspunso harno, cadaia va sicavela că san mișto pregătime hai că hachiardean ciaces o materialo. Tha so daștis te cheres dacă lean tut pala cadal sfaturi hai vi cadea si tuche pharo te des mai but sar iech sau dui răspunsuri? Daștis te pachias anda ilo că anda o Iehova san zurales cuci cana dichel că des sea chi zor. (Luca 21:1-4) Te des sea so si tut mai lașio ci însemnol te șios pe chio dumo iech pharimos cai ci daștis te îngăres-les. (Filip. 4:5) Rode te diches so daștis te cheres, de chi zor te cheres cadaia hai mang le Iehovas te del tut iech ilo liniștime. Mai anglal, daștis te șios tuche andi goghi te des iech răspunso harno. w23.04 21 ¶6-8

O apostolo Pavel phenel că sam sar le soldați cai sile sea o timpo le iachența pâtărde hai hureade anda o marimos. Catar iech soldato ajucărel-pe te avel sea o timpo gata te marel-pe. Sa cadai buchi ajucărel-pe vi amendar. Daisaras te avas pregătime anda o ghies le Iehovasco dacă las pe amende i platoșa le pachiamaschi hai la iubireachi, hai vi o coifo la speranțaco. Cadea sar iech platoșa ferilas o ilo ieche soldatosco, sa cadea o pachiamos hai i iubirea ferin amaro ilo simbolico. Cadala va ajutina amen te slujisaras mai dur le Devlesche hai te jias pala o Isus. Cana amaro pachiamos silo zuralo, daisaras te jianas ciaces că o Iehova va pochinela amen, anda codoia că rodas-les anda sea o ilo. (Evr. 11:6) O pachiamos va ajutila amen vi te așias loialo pașa amaro Rai, o Isus, vi cana nachas prin pharimata. Sar daisaras te zuriaras vi mai but amaro pachiamos? Sar exemplo, cana dichas sar amare phrala hai pheia așile zurale cana nachle prin persecuții hai pharimata le lovența. Hai o exemplo codolengo cai alosarde te îngăren iech viața mai simplo caște cheren mai but anda o Iehova, daștil te feril vi amen catar o athaimos te phiras pala le love. w23.06 10 ¶8, 9

Te încăras amen parpale însemnol te încăras tela controlo so si ande amaro ilo hai o modo sar phiravas amen. Cadaia ajutil amen cana camas te cheras so șiuteam ande amari goghi, vi mai but cana iech buchi si phari sau cana ci țârdel amen o ilo. Te na bâstras că o fapto te încăras amen parpale cherel partea anda o rodo le spiritosco sfânto. Cadea că, te mangas le Iehovas te del amen spirito sfânto te bariaras cadai calitatea șucar. (Luca 11:13; Gal. 5:22, 23) Na ajucăr ca chi situația te avel perfecto. Ande cadai lumea, ci va avela amen niciechdata iech situația perfecto. Dacă ajucăras-la, daștil-pe că niciechdata ci va avela te cheras so șiuteam amenghe andi goghi. Daștil-pe te na mai țârdel amen o ilo te cheras chanci, dacă si prea pharo so șiuteam amenghe andi goghi te cheras. Dacă vi anda tute si sa cadea, so daștis te cheres? Daștis te astares te cheres buchia mai țâne. Sar exemplo, dacă cames te bariares iech calitatea, mai anglal de chi zor te sicaves-la ande țâne buchia. Dacă cames te citis sea i Biblia, daștis te astares țâra po țâra ande fiesavo ghies. w23.05 29 ¶11-13

Andel ghiesa de palal, o Iehova del amen sea o timpo haben spiritualo prin peschi organizația caște ajutil amen te așias po „Drom Sfânto”. (Is. 38:8; 48:17; 60:17) Daisaras te phenas că cana varecon astarel iech studio biblico cherel le dintune pași po „Drom Sfânto”. Chichiva jene jian numai iech țâra pe cado drom hai pala codoia mechen-les. Aver sile hotărâme te phiren pe leste ji cana arăsăn ando than cai trebul. Tha savo si cado than? Anda codola machle, „o Drom Sfânto” îngărel ca o „paradiso le Devlesco”, ando cerii. (Rev. 2:7) Hai anda codola cai silen i speranța te train pi phuv, vo îngărel ca i perfecțiunea, cai va avela te arăsăn cana va nachena le 1 000 bărș. Dacă san vi tu pe cado drom, na dich palal hai na mech-les ji cana ci arăsăs andi lumea nevi! w23.05 17 ¶15; 19 ¶16-18

Alosares te des chi viața le Iehovasche anda codoia că diches cuci sea so cărdea o Iehova anda tute. (Psalmo 116:12-14) I Biblia phenel că „orisavi buchi lași hai orisavo daro perfecto” aven le Iehovastar. (Iac. 1:17) Gândisar tut so bari buchi cărdea o Iehova anda tute! Dea pesche cuci Șiaves, le Isusos, te merel anda amende. Anda codoia că sanas chindo parpale anda o păcato prin i răscumpărarea, daștis te aves lesco amal hai te trais anda sea o timpo. (1 Ioan 4:9, 10) Cana des chi viața le Devlesche, sicaves că anda tute si cuci i bari iubirea cai vo sicadea-la tuche hai sea le miștimata cai del-len tuche vo. (Deut. 16:17; 2 Cor. 5:15) w24.03 5 ¶8

Cana dichas chichi de rimosarde moralo sile le manușa de aghies, daisaras te simțosaras amen cadea sar o Lot. Vo „sas-lo zurales perado catar o phiraimos lajiavuno le manușengo nasul”, anda codoia că jianelas că amaro Dad cerisco urâl cado phiraimos neujo. (2 Pet. 2:7, 8) I dar le Devlestar hai leschi iubirea anda Leste ajutisarde le Lotos te așel dur catar o phiraimos imoralo le manușengo de pașa leste. Vi amen traisaras ando mașcar le manușengo cai ci sicaven pachiv caring le norme moralo le Iehovasche. Cu sea cadala, daisaras te așias uje moralo dacă încăras zurali amari iubirea anda o Del hai bariaras iech dar lași anda leste. (Prov. 14:2) Caște ajutil amen te cheras cadaia, pherdo iubirea o Iehova del amen pesco vast hai zuriarel amen prin o lil Proverbe. Sea le creștini, murșa hai jiuvlea, tărne hai phure, daștin te țârden miștimata anda le lașe sfaturi cai arachas-len ande cado lil. Cana daras le Iehovastar, las sama te na beșas pașa codola savengo phiraimos si neujo. w23.06 20 ¶1, 2; 21 ¶5

Daștil-pe că chi familia așilea tuche contra sau mechlean palal vareso cai anelas tuche love caște șios o Regato po iechto than ande chi viața. (Mat. 6:33) Daștis te pachias anda sea o ilo că o Iehova dichel sea cadal buchia. (Evr. 6:10) Mai but, le dumes cai phendea-len o Isus sile vi anda tute: „Na-i chonic cai mechlea chăr sau phrala sau pheia sau dei sau dad sau șiave sau phuvea anda mande hai anda i vestea lași hai te na primil 100 var mai but acana, ande cado timpo – chăra hai phrala hai pheia hai deia, șiave hai phuvea, ande iech than persecuțiența – , hai ando sistemo cai avel, viața veșnico”. (Mar. 10:29, 30) Si ciaces, le miștimata cai si tut acana sile but mai bare sar orisavi buchi cai mechlean-la palal. (Ps. 37:4) w24.03 9 ¶5

Cana le creștini anda Iudeea nachle prin iech baro bochalimos, le phrala andai Antiohia „alosarde te bișialen ajutoarea le phralenghe cai beșenas andi Iudeea, fiesavo pala so daștilas”. (Fap. 11:27-30) Chiar cana le phrala cai nachenas prin cado bochalimos beșenas dur lendar, le creștini andai Antiohia dine sea penghi zor caște ajutin-len. (1 Ioan 3:17, 18) Vi amen daisaras te sicavas mila caring le phrala cai nachen prin iech dezastro naturalo sau aver pharimata. Cana așunas anda cadala, cheras sigo vareso – sar exemplo, phenas le phralenghe că camas te das amaro vast te ajutisaras, cheras donații sau mangas amen anda codola cai nachen prin pharimata. Daștil-pe că bute phralen hai pheian ci va mai avela-len so trebul lenghe caște train. Amen camas ca, atunci cana amaro Rege, o Cristos Isus, va avela te cherel peschi cris, te arachel amen că sicavas mila hai te phenel amenghe: „Aven, . . . hai moștenin o Regato”. (Mat. 25:34-40) w23.07 4 ¶9, 10; 6 ¶12

Cadea sar pesco Dad vi o Isus sicadea că jianel te mechel pestar. Sar exemplo, vo sas-lo bișialdo pi phuv „ca le bacrea hasarde anda o chăr le Israelosco”. Cu sea cadala, ande peschi buchi vo sicadea că jianel te mechel pestar. Iech data, iech jiuvli neisraelito manglea-les zurales te sastiarel laca șeia, cai ‘sas-la iech beng ande late hai sas-li zurales duchadi’. Pherdo mila, o Isus mechlea pestar hai sastiardea laca șeia. (Mat. 15:21-28) Te dichas iech aver data cana o Isus sicadea că jianel te mechel pestar. O Isus phendea: „Dacă varecon phenel că ci prinjianel man, . . . nici me ci va avela te prinjianav-les”. (Mat. 10:33) Tha duriardea-pe o Isus catar o Petru, cai phendea trin-var că ci prinjianel-les? Nici. O Isus dichlea o baro pachiamos cai sas le Petros hai so pharo falas-les anda so cărdea. Pala so uștilea andal mule, o Isus sicadea-pe lesche hai phendea lesche so but iubil-les hai că iertisardea-les. (Luca 24:33, 34) Vi o Iehova hai vi o Isus jianen te mechen pendar. Tha so daisaras te phenas anda amende? O Iehova camel ca vi amen te cheras sa cadea. w23.07 21 ¶6, 7

So daisaras te phenas codolenghe cai ci pachian că o Del va cherela i phuv iech paradiso? Ando iechto than, chiar o Iehova cherel cadai promisiunea. Ando lil Revelația phenel-pe: „Codo cai beșelas po trono phendea: «Ita! Me cherav sea le buchia neve!»”. Le Iehovas siles o goghiaverimos, o zuralimos hai vi camel anda sea o ilo, te pherel peschi promisiunea. Ando duito than, leschi promisiunea si cadea de ciaci că ande lesche iacha si sar cana pherdilea-pe deja. Anda codoia vo phenel: „Cadal dumes sile demno pachiamasche hai ciace . . . Pherdile-pe!”. Ando trinto than, cana o Iehova phenel le dumes „Me som o Alfa hai o Omega”, vo sicavel că cana astarel te cherel iech buchi vo vi terminil-la. (Rev. 21:6) Ji la urmă, o Iehova va sicavela că o Satan si iech hohamno hai că ci daisardea te așiavel-les te pherel Pesco scopo. Cadea că, so va avela te cheras cana citisaras i promisiunea anda Revelația 21:4, hai varecon va phenela că si prea șucar caște avel ciaces? Va avela te citisaras le versetea 5 hai 6 hai va avela te sicavas lenghe că o Iehova zuriardea cadai promisunea sar cana dea peschi semnătura. (Is. 65:16) w23.11 7 ¶18, 19

O Iehova cărdea cadai promisiunea le Avraamosche cana sas-les 75 bărșa. Dichlea o Avraam sar pherdilea-pe cadai promisiunea? Numai pe dipaș. Pala so nachlea i len Eufrat hai ajucărdea 25 bărșa, vo dichlea sar prin iech miracolo năștisailea lesco șiavo o Isaac, hai pala aver 60 bărșa, năștisai-le lesche nepoți o Esau hai o Iacob. (Evr. 6:15) Tha, o Avraam ci arăslea te dichel sar lesco neamo cărdilea iech bari națiunea, casche sas dini sar moștenirea o Them Promiso. Cu sea cadala, les sas-les i bari bucuria te avel amal le Iehovasa, lesco Del. (Iac. 2:23) Cana va avela uștiado andal mule, o Avraam va avela ciaces voime te așunel că lesco pachiamos hai răbdarea andine but miștimata anda sea le națiuni. (Gen. 22:18) So sichioas catar? Daștil-pe că amen ci va avela te arăsas te dichas acana sar pheren-pe sea le promisiuni cai cărdea-len o Iehova. Tha, cadea sar o Avraam, daisaras te pachias ciaces că dacă sicavas răbdarea o Iehova va pochinel amen acana, hai vi mai but andi lumea nevi cai va avela. (Mar. 10:29, 30) w23.08 24 ¶14

Cana sas-lo tărno, o rege Ozia sas-lo umilo. Vo sichilea „te daral le ciace Devlestar”. O Ozia traisardea 68 bărșa hai, ande i mai bari partea lesca viațachi, o Iehova dea-les but miștimata. (2 Cron. 26:1-4) O Ozia mardea bute dușmanen cai avenas contra o poporo hai cărdea but buchia ca o foro Ierusalim te avel mișto ferime. (2 Cron. 26:6-15) Vo chiar sas-lo ciaces voime anda so ajutisardea-les o Iehova te cherel. (Ecl. 3:12, 13) O rege Ozia sas-lo sicado te phenel le coaverenghe so te cheren. Arăslea vo te pachial că daștilas te cherel oriso camelas? Ci jianas, tha i Biblia sicavel că, ande iech ghies, o Ozia gălea ando templo hai, puchiardo barimastar, camlea te thabarel tămâia po altarii, buchi cai daștinas te cheren-la numai le rașaia. (2 Cron. 26:16-18) Cana o Azaria, o baro rașai, camlea te ortosarel-les, o Ozia holiardea-pe zurales. So nasul sas, că vo rimosardea pesco lașio anav sar slujitoro loialo hai o Iehova cărdea te avel opral leste i lepra. (2 Cron. 26:19-21) Leschi viața avileas but mai șucar dacă așileas umilo! w23.09 10 ¶9, 10

Vi pala so sas-lo machlo spiritosa sfânto, o apostolo Petru trebuisardea te marel-pe mai dur contra pesche covlimata. Ando bărș 36 a.e., o Del bișaldea le Petros ca iech murș neevreo, po anav Corneliu. Cado murș sas-lo machlo spiritosa sfânto hai cadaia sicadea că „o Del nai-lo părtinitorii” hai că le manușa anda le națiuni daștinas te cheren partea anda i congregația creștino. (Fap. 10:34, 44, 45) Pala codoia, o Petru astardea te hal codolența cai ci sas-le evrei, buchi cai mai anglal ci avelas te cherel-la niciechdata. Cu sea cadala, chichiva creștini evrei pachianas că le evrei hai le manușa andal națiuni ci trebunas te han ande iech than. Cana chichiva evrei cai pachianas cadaia, avile andi Antiohia, o Petru ci mai halea pesche phralența andal națiuni, daștil-pe că daratar te na holiarel le creștinen evrei. O apostolo Pavel dichlea so cărdea o Petru hai ortosardea-les angla le coaver. (Gal. 2:13, 14) Chiar cana cărdea cadai greșeala, o Petru ci mechlea-pe hai slujisardea mai dur le Iehovasche. w23.09 22 ¶8

Cana des chi zor te diches sincero sar san, daștis te araches chichiva buchia cai trebul te lașiares-len. Tha na av perado! „O Rai silo lașio” hai va ajutila tut te cheres le paruimata cai cames-len. (1 Pet. 2:3) O apostolo Petru zuriarel amen: „[O Del] va avela te îngărel sfârșitoste tumari formarea. Vo va cherela tumen fermi”. Mai anglal, o Petru pachialas că ci meritil te beșel pașa o Șiav le Devlesco. (Luca 5:8) Tha, le ajutorosa pherdo iubirea catar o Iehova hai o Isus, o Petru ci mechlea-pe hai gălea mai dur pala o Cristos. Cadea, o Iehova mechlea le Petros te jial andre „ando Regato veșnico amare Raiesco hai Salvatoresco, o Isus Cristos”. (2 Pet. 1:11) So șucar pochinimos! Dacă, cadea sar o Petru va avela te așes zuralo ando pachiamos hai va avela te meches le Iehovas te sfârșil chi formarea, vi tu va avela te primis o pochinimos anda i viața veșnico. Va avela te ‘arăsăs ca o miștimos cai anel-les chio pachiamos, chi salvarea’. (1 Pet. 1:9) w23.09 31 ¶16, 17

Co tabernacolo andel puraimata sas iech bar, iech than pâtărdo împrejmuime, cai le rașaia cherenas penghi buchi ando servicio le Devlesco. Code, sas o baro altarii anda harcum anda i ofranda thabardi, hai vi iech ligheano anda harcum pherdo pai, ande savo le rașaia halavenas-pe mai anglal te astaren penghi buchi sfânto. (Ex. 30:17-20; 40:6-8) Aghies le creștini machle cai sile încă pi phuv slujin andi bar de andral anda o templo spiritualo. O baro ligheano paiesa anel lenghe andi goghi, hai vi le creștinenghe cai va traina pi phuv chichi de importanto si te așias uje moralo hai spiritualo. Tha cai anen închinarea le Iehovasche codola anda „i bari mulțimea”? O apostolo Ioan dichel-len ando timpo so beșen ande pânrănde „angla o trono le Devlesco” – adică pi phuv, andi bar de avreal anda o templo spiritualo – „ghies hai riat hai anen lesche iech servicio sacro ande lesco templo”. (Rev. 7:9, 13-15) So but mulțumisaras le Iehovasche că dea amen o șucar privilegio te avel amen iech than ande cado baro templo spiritualo, cai daisaras te anas lesche iech închinarea uji! w23.10 28 ¶15, 16

O Iehova daștil te zuriarel amen vi prin le phure de congregație. (Is. 32:1, 2) Cadea că, cana san perado phen lenghe le pharimata prin save naches. Hai cana von camen te ajutin tut, te na încăres tut parpale te primis lengo ajutorii. Prin lende o Iehova daștil te cherel tut zuralo. Le promisuni andai Biblia anda i șucar speranța te traisaras anda sea o timpo ande iech paradiso pi phuv sau ando Regato cerisco daștin te den amen speranța (Rom. 4:3, 18-20) Cadai speranța del amen zuralimos te nachas prin pharimata, te das duma andai vestea lași hai te cheras amari buchi andi congregația. (1 Tes. 1:3) Cadai speranța dea zuralimos vi le apostolos Pavel.Vo phendea anda peste că sas sar iech vaso anda luto covlo. Vo sas-lo „zurales spidime”, „ando pharimos”, „persecutime” hai ‘șiudino ca i phuv’. Poiechdata vo sas-lo pașă chiar te hasarel peschi viața. (2 Cor. 4:8-10) O Pavel sas-lo zuriardo anda codoia că încărdea pesco dichimos caring i speranța cai sas-les. (2 Cor. 4:16-18) O Pavel dichelas caring angle. Anda i viața veșnico ando cerii vo sas-lo gata te nachel prin orisavo zumaimos. Cana gândilas-pe ca peschi speranța o Pavel ‘neviarelas-pe ghies pe ghieseste’. w23.10 15, 16 ¶14-17

Cana manghes tut, dich dacă acana si o timpo ca o Iehova te del tut so manglean lestar. Poiechdata daisaras te pachias că trebul amenghe iech răspunso chichi mai sigo ca amare manglimata. Tha, o Iehova jianel mai mișto cana si o mai lașio timpo caște ajutil amen. (Evr. 4:16) Cana ci primisaras sigo so mangleam, daisaras te pachias că o răspunso le Iehovasco si „Nici”. Tha, daștil-pe că o răspunso si „Na acana”. Te gândisaras amen ca iech tărno phral cai manglea le Iehovas te sastiarel-les catar lesco pharo nasfalimos. Dacă o Iehova avelas te sastariales-les prin iech miracolo, o Satan daștilas te phenel că o phral sluijisardea mai dur le Devlesche numai anda codoia ca sas-lo sastiardo. (Iov 1:9-11; 2:4) Mai but, o Iehova alosardea deja iech ghies cana va chosela sea le nasfalimata. (Is. 33:24; Rev. 21:3, 4) Ji atunci, ci daisaras te ajucăras amen te avas sastiarde prin miracolea. Cadea că, o phral daștilas te manghel le Iehovas te del-les zuralimos hai pacea ando ilo caște nachel părdal o nasfalimos hai te slujil mai dur le Devlesche pherdo pachiamos. w23.11 24 ¶13

Chiar cana cărdea iech bari greșeala, o Samson slujisardea vi mai dur le Iehovasche. Vo folosisardea-pe catar cadai situația caște mudarel le filistenen. (Jud. 16:28-30) Cadea că, o Samson manglea le Iehovas: „mech man te risarav parpale o nasulimos cai cărde-les manghe le filisteni”. O ciacio Del așundea lesco manglimos hai dea-les parpale o baro zuralimos cai sas-les. Cadea că, ande codo ghies o Samson mudardea mai bute filistenen sar ande sea peschi viața. Vi cana nachlea prin bare pharimata anda le buchia nasul cai cărdea-len, o Samson dea vi mai dur peschi zor te cherel i voința le Iehovaschi. Sa cadea, vi amen chiar cana samas ortosarde sau hasardeam iech privilegio anda codoia că cărdeam iech greșeala, ci trebul te mechas amen. Te na bâstras că o Iehova ci mechel amen. (Ps. 103:8, 9) Vo daștil te del amen zuralimos caște slujisaras lesche mai dur, cadea sar dea vi le Samsonos. w23.09 6 ¶15, 16

Cana așias zurale si amen i aprobarea le Devleschi. Cadaia ci însemnol că o Iehova bucuril-pe cana nachas prin zumaimata sau prin pharimata. Tha vo silo bucurime anda codoia că dichel că așias zurale pherde pachiamos. Zuriarel amen but te jianas că dacă cheras cadaia, o ilo le Iehovasco bariol bucuriatar. (Ps. 5:12) O Avraam așilea zuralo andel pharimata hai bucurisardea-pe catar i aprobarea le Iehovaschi. O Del arachlea-les sar iech manuș orta hai phendea că si lesco amal. (Gen. 15:6; Rom. 4:13, 22) Sa cadea, așen le buchia vi aghies. I aprobarea le Iehovaschi ci încărel catar le privilegii cai si amen sau catar chichi de but cheras ande leschi buchi tha, voi încărel catar o fapto te așias zurale ando pachiamos. Cado sicaimos zuriarel amen anda codoia că savore daisaras te așias zurale bi te mechas amen indiferento le bărșendar cai si amen, amara situațiatar sau le buchiandar cai jianas te cheras-len. Naches chiar acana pherdo pachiamos prin iech pharimos? Dacă da, gândisar tut că si tut i aprobarea le Iehovaschi. Cana das amari sama că o Iehova dichel amen lașe iachența, amari speranța cărdiol sea mai zurali. w23.12 11 ¶13, 14

Anda iech murș spiritualo si importanto te sichiol te del duma șucar. Cana varecon așunel atento, sicavel că hachiarel so simțosaren hai gândin le coaver. (Prov. 20:5) Vo daștil te hachiarel so phenel iech manuș prin o tono la voceaco, prin so sicavel lesco mui hai prin le gesturi cai cherel-len. Caște sichios te așunes atento hai te des duma șucar trebul te cheres tuche timpo te beșes le coaverența. Va avela tuche mai pharo te cheres cadaia dacă folosis mai but le dispozitivea electronico caște des duma che amalența, sar exemplo prin le mesajea scriime. Cadea că, rode te des duma lența personalo. (2 Ioan 12) Iech murș spiritualo trebul vi te lel sama pe peste hai pe peschi familia. (1 Tim. 5:8) Si importanto te sichios te cheres vareso cai va ajutila tut te araches tuche iech than buchiaco. (Fap. 18:2, 3; 20:34; Ef. 4:28) Av prinjiando sar iech manuș cai cherel buchi phares hai cai ci mechel so si lesche dino ji cana ci terminil. Cadea, va avela tuche mai ușoro te araches tuche iech than buchiaco hai te încăres tut lestar. w23.12 27 ¶12, 13

Cana i Biblia del duma anda „o ghies le Iehovasco”, camel te phenel că si o timpo cana o Iehova va anela i cris opral pesche dușmani hai va hastravela pesche manușen. Andel puraimata, o Iehova andea peschi cris opral chichiva națiuni. (Is. 13:1, 6; Ezec. 13:5; Țef. 1:8) Ande amare ghiesa, „o ghies le Iehovasco” va astarela cana le conducători politici va avena contra o Babilono o baro hai va phandavela-pe co Armaghedono. Caște așias jiuvinde ande codo „ghies”, trebul te pregătisaras amen încă de acanara. O Isus sicadea amen că ci arăsăl numai te pregătisaras amen anda ‘o baro necazo’ tha trebul te avas sea o timpo gata anda leste. (Mat. 24:21; Luca 12:40) Ande lesco dintuno lil caring le tesaloniceni, o apostolo Pavel cărdea mai but comparații caște ajutil le creștinen te pregătin-pe anda o baro ghies le Iehovasco, ande savo va anela peschi cris. O Pavel jianelas că cado ghies ci avelas te avel ande codo timpo. (2 Tes. 2:1-3) Cu sea cadala, vo zuriardea pesche phralen te pregătin-pe anda leste, sar cana avelas tehara. Vi amen daisaras te cheras sa cadea. w23.06 8 ¶1, 2

Ando bărș 1978, iech clădirea zurales uci de 60 etajea astardea te vazdel-pe ando Tokyo (Japonia). Le manușa pușenas-pe sar avelas te așel ande pânrende pala le but izdraimata phuveache anda cado foro. Sar sas vazdini cadai clădirea? Le ingineri cărde ca i clădirea te avel vi zurali, tha ande sa codo timpo, vi te daștil te mișchil-pe locăs bi te perel. Vi le creștini sile sar cadai clădirea zurales uci. Sar? Iech creștino trebul te jianel sar te avel vi zuralo hai vi sar te mechel pestar. Vo trebul te avel sea o timpo hotărâme te așunel catar le legi hai principii le Iehovasche. Vo silo „gata te așunel” hai ci bichinel pesco pachiamos anda niciech buchi. Tha, cana daștil-pe sau chiar manghel i situația, vo trebul te jianel te „mechel pestar”. (Iac. 3:17) Iech creștino cai sichilea te cherel cadaia ci va avela nici prea stricto hai nici ci va mechela prea but pestar. w23.07 14 ¶1, 2

O Isus trebuisardea te așel contra le athaimata le Satanosche, cai camlea te cherel-les te na mai așel loialo le Devlesche. (Mat. 4:1-11) O Satan dea sea peschi zor te cherel le Isusos te păcătuil, caște na mai daștil te pochinel i răscumpărarea. Cana cărdea peschi buchi pi phuv, o Isus nachlea vi prin aver pharimata. Vo nachlea prin persecuții hai butivar lesche dușmani rodenas te mudaren-les. (Luca 4:28, 29; 13:31) Sa cadea, vo trebuisardea te suportil le covlimata pesche continuatorenghe. (Mar. 9:33, 34) Cana sas lesche cărdi i cris, vo sas-lo mardo hai prasado. Pala codoia, vo nachlea prin bare ducha hai sas-lo mudardo sar iech criminalo. (Evr. 12:1-3) Cana sas-lo po stâlpo de tortură vo trebuisardea te nachel corcoro părdal cado pharimos bi te avel ferime le Iehovastar. (Mat. 27:46) Hachiaras ciaces că o prețo pochindo le Isusostar caște chinel amen parpale anda o păcato sas zurales baro. Cana gândisaras amen so bari buchi sas-lo gata o Isus te cherel anda amende, amari iubirea anda leste bariol vi mai but. w24.01 10, 11 ¶7-9

Trebul amenghe răbdarea caște hachiaras amen mișto le coaverența. Sar exemplo, i răbdarea ajutil amen te așunas atento cana le coaver den duma amența. (Iac. 1:19) Sa cadea, cana sam răbdători rodas te avas andi pacea savorența. Cana si amen but buchia po șăro, voi ajutil amen te na sighiaras te cheras sau te phenas vareso cai daștilas te duchavel averen. Cana sam răbdători ci va avela te astaras amen holiatar chiar cana varecon duchavel amen. Ando than te risaras parpale o nasulimos, ‘va avela te suportisaras amen mai dur iech averes hai te iertisaras amen anda sea o ilo iech averes’. (Col. 3:12, 13) I răbdarea daștil te ajutil amen te alosaras mișto so te cheras. Ando than te sighiaras te cheras vareso, va avela te las amenghe timpo caște rodas te dichas so si mai mișto anda amende te alosaras. Sar exemplo, dacă rodas amenghe iech buchi, daisaras te simțosaras amen spidime te jias ca i iechto buchi cai si amenghe dini, chiar cana cadaia ci mai mechel amen te jias ca sea le întruniri sau te cheras cadea de but andi predicarea. Tha, dacă si amen răbdarea, va avela te cheras amenghe timpo te gândisaras amen chichi de dur si i buchi, hai sode trebul te beșas ca i buchi. Cadea că, cana si amen răbdarea, ci va avela te alosaras nasul. w23.08 22 ¶8, 9

Dacă simțosares tut perado anda che covlimata, beș hai gândisar tut ca o solaharimos cai cărdean-les cana dean chi viața le Iehovasche, hai cadea va avela te astares zuralimos caște așes contra o păcato. Sar? Cana iech manuș del peschi viața le Iehovasche, vo ci mai trail anda peste. (Mat. 16:24) Cadaia însemnol că, cana avel tuche te cheres vareso cai si nasul andel iacha le Iehovasche, va avela te phenes „na”. Cadea că, cana chio pachiamos va avela zumado, ci va avela te gândis tut prea but ca so trebul te cheres, anda codoia că tu jianes că trebul te cheres iech corcori buchi, te așes loialo le Devlesche. Chio ilo va avela hotărâme te cherel so si mișto andel iacha le Iehovasche. Hai chio pachiamos va avela sar le Iovosco, cai, chiar cana nachlea prin bare pharimata, phendea hotărâme: „Ci va avela te mechav mânro pachiamos!”. (Iov 27:5) w24.03 9 ¶6, 7

O Iehova, „o Del la iubireaco” silo amența. (2 Cor. 13:11) Vo lel sama fiesavestar mașcar amende. Cadea sar sicavel-pe ando Psalmo 32:10, sam „înconjurime catar leschi iubirea loialo”. Cana gândisaras amen sar sicadea amenghe o Iehova iubirea, vo va avela vi mai ciacio ande amare iacha hai va avela amen iech amalimos sea mai chidino lesa. Daisaras te pașioas lestar ando manglimos hai te phenas lesche so but si amen nevoia lesca iubireatar. Te das duma lesa anda sea amare phare gânduri, hai te pachias anda sea o ilo că vo hachiarel amen hai că camel te ajutil amen. (Ps. 145:19) I bari iubirea le Iehovaschi tachiarel amare ile hai țârdel amen leste cadea sar iech iag țârdel amen peste hai tachiarel amen ande iech ghies șilalo. I iubirea le Iehovaschi si na numai zurali tha vi gugli. Cadea că, mech ca i iubirea le Iehovaschi te pherel chi viața hai sicav lesche vi tu parpale iubirea cadea sar o psalmisto, cai scriisardea: „Iubisarav le Iehovas”. (Ps. 116:1) w24.01 31 ¶19, 20

O Isus cărdea mai but sar te phenel le manușenghe că o anav le Devlesco si Iehova. Le iudei anda lesco timpo prinjianenas deja cado anav. I Biblia phenel că o Isus sas codo cai sicadea sar silo o Del. (Ioan 1:17, 18) Sar exemplo, andel Scripturi ebraico sicavel-pe că o Iehova silo pherdo mila hai lașimos. (Ex. 34:5-7) Le manușa hachiarde mai mișto sar oricana cado ciacimos cana o Isus phendea lenghe i ilustrarea anda o șiavo hasardo hai lesco dad. Cana beșas hai gândisaras amen sar codo dad dichlea pesche șiaves „cana sas-lo încă dur”, nașlea angla leste, lea-les andi angali hai iertisardea-les anda sea o ilo, cherel-pe ande amari goghi iech imaginea vi mai claro anda i bari mila hai o baro lașimos le Iehovasco. (Luca 15:11-32) O Isus ajutisardea le manușen te hachiaren sar silo o Iehova ciaces. w24.02 10 ¶8, 9

O Iehova vazdel hai del zuralimos codolenghe perade. Sar daisaras te las amen pala o Iehova cana simțosaras mila anda aver hai cana zuriaras-len? (1 Tes. 4:18) Iech buchi cai daisaras te cheras-la si te bariaras ande amare ile calități save cheren amen te sicavas mila. Save si chichiva anda cadal calități? Cana șioas amen ando than amare phralengo, sicavas lenghe iubirea phralicani hai lașimos, daisaras vi mai dur te zuriaras amen iech averes. (Col. 3:12; 1 Pet. 3:8) Sar va ajutina amen cadal calități? Cana i mila hai le sentimentea cai silen phanglimos laia cheren partea anda amari viața, camas anda sea o ilo te zuriaras codolen cai nachen prin pharimata. Cado ciacimos sas phendo vi le Isusostar: „Anda sea o ilo del duma o mui. O manuș lașio încalavel lașe buchia anda pesco lașio barvalimos”. (Mat. 12:34, 35) Iech anda le mai importanto buchia prin save daisaras te sicavas iubirea caring amare phrala hai pheia si te zuriaras-len. w23.11 10 ¶10, 11

Caște hachiaras le profeții biblico, trebul te mangas ajutoro. Gândisar tut că jias ande iech than cai ci prinjianes-les hai manglean ieche amales cai jianel te phirel othar te jial tusa. Vo jianel mișto cai san hai cai îngărel fiesavo drom. Si ciaces, sanas voime cana chio amal camlea te jial tusa! Cadea sar cado amal, o Iehova jianel ande so timpo traisaras hai so mai ajucărel amen po drom cai si angla amende. Cadea că, caște hachiaras le profeții biblico, trebul te mangas le Iehovas pherde umilința te ajutil amen. (Dan. 2:28; 2 Pet. 1:19, 20) Cadea sar iech lașio dad, o Iehova camel ca lesche șiaven te avel-len iech șucar viitorii. (Ier. 29:11) Tha, o Iehova, jianel mai mișto sar orisavo dad so va avela ando viitorii hai siles sea o timpo ciacimos. Vo camel ca vi amen le manușa te jianas le buchia importanto cai va avena. Anda codoia, lea sama ca ande lesco Cuvânto te aven scriime le profeții. (Is. 46:10) w23.08 8 ¶3, 4