Octombria

Nachlean vroiechdata prin situații ande save sas tuche pharo te așunes averendar? Vi o rege David nachlea prin cadaia. Vo manglea-pe le Devlesche: „Cher man te camav te așunav tutar!”. (Ps. 51:12) O David iubilas le Iehovas. Cu sea cadala, sas situații ande save ci sas ușoro anda o David te așunel averendar, cadea sar si vi anda amende poiechdata. Sostar? Ando iechto than, o fapto te na așunas si iech moștenirea catar o Adam hai i Eva. Ando duito than, o Satan del sea peschi zor caște cherel amen te na mai încăras conto le Iehovastar cadea sar cherel vo. (2 Cor. 11:3) Ando trinto than, beșas mașcar manușa cai sicaven iech phiraimos șăralo, „o spirito cai cherel buchi acana andel șiave cai ci camen te așunen”. (Ef. 2:2) Trebul te das sea amari zor na numai caște na peras ando athaimos te păcătuisaras, tha vi te daisaras te așias zurale angla o Satan hai leschi lumea cai camen te cheren amen te na mai așunas. Si ciaces, trebul te cheras sea so daisaras caște așunas le Iehovastar hai codolendar cai vo dea-len autoritatea. w23.10 6 ¶1

Anda o miracolo cai cărdea-les o Isus cana parudea o pai andi mol daisaras te sichioas vareso zurales cuci anda i umilința. Vo ci așardea-pe cana cărdea cado miracolo. Mai but, o Isus ci așardea-pe niciechdata le buchianța cai cărdea-len. Ando than te cherel cadaia, vo sea o timpo dea gloria le Iehovasche pherdo umilința. (Ioan 5:19, 30; 8:28) Dacă va avela te las amen pala lesco exemplo hai sicavas umilința, ci va avela te das amen bare le buchianța cai cheras-len. Te na țârdas i atenția caring amende, tha caring amaro lașio Del casche slujisaras. (Ier. 9:23, 24) Cadea că, amen trebul te das sea i pachiv le Iehovasche anda sea so cheras, anda codoia că bi lesco ci daisaras te cheras chanci. (1 Cor. 1:26-31) Cana sicavas umilința, ci rodas te avas așarde anda le lașe buchia cai cheras-le anda aver. Amen sam mulțumime că o Iehova jianel hai dichel sea le buchia cai cheras-len. (Dich vi o Matei 6:2-4; Evr. 13:16.) Daisaras te pachias ciaces că o Iehova si zurales bucurime cana das amari zor te sicavas umilința cadea sar o Isus! (1 Pet. 5:6) w23.04 4 ¶9; 5 ¶11, 12

Tela inspirația le Devleschi, o apostolo Pavel zuriardea le creștinen te gândin-pe vi ca averengo miștimos. Sar daisaras te cheras cadaia cana sam ca le întruniri? Cana încăras ande amari goghi că vi aver camen te den răspunsuri. Te gândisaras amen: cana das duma amare amalența, das duma numai amen corcore hai len ci mechas-len? Nici! Camas ca vi von te den duma amența. Sa cadea, ca le întruniri camas te mechas ca sea mai but phrala te sicaven pengo pachiamos prin le răspunsuri cai den-le. O ciacimos si, că cado si o mai lașio modo te zuriaras amare phralen. (1 Cor. 10:24) Cadea că, de răspunsuri harne. Cadea va așela timpo vi anda aver răspunsuri. Chiar cana das răspunsuri harne, te na das duma anda prea but idei. Dacă va avela te phenas sea le sicaimata anda iech paragrafo, le coaveren ci va mai avela-len so te răspunzon. w23.04 22, 23 ¶11-13

Te na bâstras că trebul te das amari zor te ajutisaras averen, vi mai but prin i predicarea. Trebul te jianas te mechas amendar vi ande amari buchi anda o Iehova. Andi predicarea, arachas manușa saven silen iech phiraimos hai iech pachiamos diferime amendar hai cai barile ande aver culturi. O apostolo Pavel jianglea sar te del duma fiesave manușeia, cadea că vi amen daisaras te sichioas lestar. O Isus dea-les i buchi te avel „apostolo le națiunengo”. (Rom. 11:13) Cadea că, o Pavel dea duma anda i vestea lași evreiența, grecența, sicade manușența, codolența cai cherenas buchi i phuv, bare manușența hai regența. Caște arăsăl co ilo cadichi de but feluri manușenghe, o Pavel cărdilea „oriso andal manușa de orisavo felo”. (1 Cor. 9:19-22) Vo rodelas te hachiarel i cultura, o modo sar barile hai so pachianas codola casa delas duma. Cadaia ajutisardea-les te jianel sar te lel fiesave manușes caște daștil te țârdel-les co ciacimos. Vi amen daisaras te avas lașe ande amari buchi dacă das amari zor te hachiaras hai te ajutisaras codolen casa das duma andi predicarea. w23.07 23 ¶11, 12

I blândețea si iech zuralimos, na iech covlimos. Cana nachas prin situații cai holiaren amen, trebul amenghe iech zuralimos cai avel de andral caște daisaras te așias liniștime. I blândețea cherel partea anda „o rodo le spiritosco”. (Gal. 5:22, 23) I duma grecisco cai însemnol „blândețea” sas folosime poiechdata caște sicavel sar iech grast sălbatico sas-lo sicado te așel liniștime. Te gândisaras-ame sar paruvel pesco phiraimos iech grast sălbatico. Chiar cana o grast silo acana blândo, vo așel vi zuralo. Vi amen, le manușa, daisaras te sicavas mai but blândețea, buchi cai sicaven-la codola zurale. Sar? Ci daisaras te cheras cadaia corcore. Si importanto te mangas le Iehovas te del amen spirito sfânto caște daisaras te sicavas mai but blândețea. But mașcar amare phrala hai pheia sichile te cheren cadaia. Von dine duma pherde blândețea cana le manușa rodine te așen lenghe contra. Cadea, von ajutisarde le coaveren te dichen lașe iachența i organizația le Iehovaschi. (2 Tim. 2:24, 25) w23.09 14 ¶3

Ande iech șucar viziunea, o apostolo Ioan dichlea 24 phure cai anenas închinarea le Iehovasche ando cerii. Von așarenas le Devles hai phenenas că vo silo demno te primil „i gloria, i pachiv hai o zuralimos”. (Rev. 4:10, 11) Vi le îngeren silen but motivea caște așaren hai te anen pachiv le Iehovasche. Von sile ando cerii leia hai arăsle te prinjianen mișto lesche calități anda codoia că von dichen penghe iachența sea le buchia cai vo cherel-le. Cadea că, cana dichen sea cadal buchia, von camen te așaren-les vi mai but. (Iov 38:4-7) Vi amen camas te așaras le Iehovas ande amare manglimata. Daisaras te cheras cadaia, cana phenas lesche sostar iubisaras-les hai sostar silo cuci anda amende. Cana citis hai sichios andai Biblia, rode te diches sar si ciaces o Iehova hai so calități placian-tu o mai but leste. (Iov 37:23; Rom. 11:33) Pala codoia, phen che Dadesche cerisco chichi de cuci si anda tute cadal calități. Daștis te așares le Iehovas vi anda le buchia cai cherel-le ande amaro miștimos tha vi anda amari șucar familia phralența hai pheianța pa sea i phuv. (1 Sam. 2:1, 2) w23.05 3, 4 ¶6, 7

Anda o bărș 1919, o Babilono o Baro ci mai daisardea te încărel phandade le jenen anda o poporo le Devlesco. Sa ande codo bărș, sas-lo numime ‘o sclavo fidelo hai prevăzători’. Sas iech momento lașio anda codoia că sa ande codo timpo po „Drom Sfânto”, abia pâtărdo, astarde te phiren le manușa ieche ileia ujo hai o sclavo sas-lo pașa lende caște ajutil-len. (Mat. 24:45-47; Is. 35:8) Sea so cărde codola cai lașiarde cado drom simbolico, ajutisardea codolen cai astarde te phiren po „Drom Sfânto” te sichion mai but anda o Iehova hai anda so cherel vo. (Prov. 4:18) Sa cadea, von daisarde te cheren le paruimata cai trebunas caște aven cuci andel iacha le Devlesche. O Iehova ci ajucărdea-pe ca lesco poporo te cherel sea le paruimata pe thaneste, tha țâra po țâra. Vo ujiardea pesco poporo ando timpo. So bari bucuria va avela te simțoasaras ando ilo cana va avela te cheras cu sea so ajucărel o Iehova amendar! Ca orisavo drom, trebul te cherel-pe mai butivar buchi caște avel lașiardo. Anda o bărș 1919, le buchia cai cărde-pe caște avel lașiardo „o Drom Sfânto” cheren-pe vi mai dur, ca sea mai but manușa te daștin te mechen o Babilono o Baro. w23.05 17 ¶15; 19 ¶16

Le phrala anda o Corpo de Guvernare sicaven chiar von le phralen asistenți cai cheren buchi ande diferime comitetea anda o Corpo de Guvernare. Încă de acanara, cadala asistenți len sama te cheren mișto le phare buchia cai si lenghe dine andi organizația le Iehovaschi. Von sile pregătime te len sama le bacreandar le Cristososche pala so le creștini machle va jiana co cerii. Pala so le palutne creștini machle va avena line co cerii, caring o sfârșito le bare necazosco, le manușa le Iehovasche pa i phuv va anena lesche vi mai dur iech închinarea uji. Anda codoia că o Isus Cristos si amaro Rai, i închinarea uji ci va avela așadi nici măcar iech secunda. Si ciaces, ande codo timpo, amen va avela te avas tela o ataco cai va anela-les o Gog anda o Magog – iech phanglimos cărdo mașcar mai but națiuni nasul, chidine ande iech than contra amenghe. (Ezec. 38:18-20) Tha cado ataco va avela harno hai ci va reușila. Vo ci va daștila te așavel i închinarea uji. Daisaras te pachias ciaces că o Iehova va zinghiarela pesco vast hai va ajutila amen. Ande iech viziunea, o apostolo Ioan dichlea angla peste „iech bari mulțimea” avere bacreanța le Cristososche. Lesche sas phendo că cadai mulțimea avelas anda „o baro necazo”. (Rev. 7:9, 14) Cadea că, jianas că o Iehova va salvila pesche manușen. w24.02 5, 6 ¶13, 14

So daisaras te cheras caște avel amenghe dino o spirito sfânto? Trebul te mangas amen anda leste, te sichioas anda o Cuvânto le Devlesco hai te așias pașa leschi organizația cai sili îndrumime catar o spirito. Cana cheras cadea, va avela te bariaras „o rodo le spiritosco”. O Iehova del pesco spirito sfânto numai codolenghe cai încăren penghi goghi hai phiraimos uje. Tha cana meliaras amari goghi buchianța neuje hai vi cheras so gândisaras, o Iehova va țârdela pesco spirito amendar. (1 Tes. 4:7, 8) Sa cadea, ca vo te del amen mai dur pesco spirito sfânto, ci trebul ‘te prasas le profeții’. (1 Tes. 5:20) Ande cado verseto i duma „profeții” sicavel că cadala si le mesajea bișialde le Devlestar prin o spirito sfânto, mașcar save si vi codola cai den duma anda o ghies le Iehovasco. Cadea că, te na pachias că o Armaghedono silo încă dur hai ci va avela ande amare ghiesa. Tha, te încăras ande amari goghi o ghies le Iehovasco hai te das amari zor te avel amen iech phiraimos lașio hai ‘te cheras buchia cai sicaven că slujisaras anda sea o ilo le Devlesche’. (2 Pet. 3:11, 12) w23.06 12 ¶13, 14

So trebulas te cheras cana pe amaro televizorii sau telefono apăril iech imaginea pornografico? Trebul te las sigo amare iacha latar hai te na mai dichas-la. Ande codol momentea, avelas mișto te anas ande amari goghi că i mai cuci buchi cai si amen si amaro amalimos le Iehovaia. Tha vi le imagini anda save pachaial-pe că nai-le pornografico daștin te astaren camnimata sexualo ande amende. Sostar trebulas te duriaras-len amendar? Anda codoia că ci camas te cheras nici o mai țâno paso caring iech adultero ande amaro ilo. (Mat. 5:28, 29) Ita so pușimos șiol pesche iech phuro de congregație anda Thailanda po anav David: „Daștil-pe că le imagini ci sile pornografico, tha va avela bucurime o Iehova dacă dichav-len mai dur? Cadaia ajutil man te phiravav man goghiaver”. I lași dar te na cheras vareso cai holiarel le Iehovas, va ajutila amen te phiravas amen goghiaver. I dar sfânto si „o începuto”, sau i baza, le goghiaverimaschi. w23.06 23 ¶12, 13

Le „camere” daștin te aven le congregații. O Iehova phenel că, ando baro necazo, va ferila-ame dacă așias pașa amare phrala. Anda codoia, trebul te das sea amari zor încă de acanara na numai te suportisaras le phralen pașa amende tha vi te sichioas te bariaras amari iubirea caring lende. Numai cadea daisaras te așias jiuvinde. O baro ghies le Iehovasco” va anela but pharimata le manușenghe. (Țef. 1:14, 15) Vi le manușa le Iehovasche va nachena prin pharimata. Tha dacă pregătisaras-ame încă de acanara, va daisaraia te așias liniștime hai te ajutisaras averen. Ci va avela te mechas amen, indiferento prin so pharimata va trebula te nachas. Hai cana amare phrala va avena duchade, va sicavaia lenghe mila hai va avela te ajutisaras-len. Sa cadea, va avela amen iech amalimos mai chidino le phralența dacă sichioas încă de acanara te iubisaras-le. O Iehova va dela amen sar pochinimos viața veșnico ande iech lumea cai le dezastrea hai le pharimata va avena bâstărde. (Is. 65:17) w23.07 7 ¶16, 17

Butivar, i Biblia sicavel că le manușa loialo le Iehovasche sas-le zurale. Tha chiar vi le mai zurale mașcar lende simțosarde-pe poiechdata covle. Sar exemplo, le reges David, sas-les ghiesa cana simțosardea-pe „zuralo sar iech plain”, tha ande aver ghiesa ‘sas-lo astardo catar iech bari dar’. (Ps. 30:7) Iech aver manuș anda savo del-pe duma andi Biblia si o Samson, saves sas-les iech baro zuralimos cana o spirito sfânto cherelas buchi opral leste. Vo jianelas că bi cadale zuralimasco cai avelas le Devlestar, ‘avileas te avel covlo hai te avel sar sea le cover manușa’. (Jud. 14:5, 6; 16:17) Cadal murșa pherde pachiamos sas-le zurale numai anda codoia că o Iehova dea-len zuralimos. O apostolo Pavel jianelas că vi les sas-les nevoia catar o zuralimos cai avelas le Iehovastar. (2 Cor. 12:9, 10) Le Pavelos sas-les nasfalimata. (Gal. 4:13, 14) Poiechdata, sas pharo anda leste te cherel so jianelas că si mișto. (Rom. 7:18, 19) Aver data, vo sas-lo darado hai ci jianelas so daștilas te întâmplol-pe lesa. (2 Cor. 1:8, 9) Cu sea cadala, cana sas-lo covlo, vo cărdiolas zuralo. Sar? O Iehova delas-les o zuralimos cai trebulas lesche. Vo cărdea le Pavelos zuralo. w23.10 12 ¶1, 2

Dacă o gândo că ci sam lașe chancesche peravel amen, te na bâstras că o Iehova țârdea amen peste. (Ioan 6:44) Vo dichel amende șucar buchia cai amen daștil-pe că ci dichas-len. Sa cadea, vo prinjianel mai mișto amaro ilo sar amen. (2 Cron. 6:30) Cadea că, te pachias-les ciaces cana phenel că sam cuci ande lesche iacha. (1 Ioan 3:19, 20) Angla te prinjianas o ciacimos, chichiva mașcar amende cărdeam buchia nasul anda save doșaras amen vi acana. (1 Pet. 4:3) Hai aver creștini zurale ando pachiamos maren-pe vi acana contra lenghe covlimata. Tha so daștis te phenes anda tute? Pachias poiechdata că o Iehova ci daștil te iertil tut? Dacă da, va zuriarela tut o exemplo chichiva manușengo loialo le Iehovasche cai nachle vi von prin cadaia. Iech anda lende sas o apostolo Pavel. Vo sas-lo zurales perado catar pesche covlimata. (Rom. 7:24) Chiar cana falea-les pharo anda le păcatea cai cărdea-len hai boldea-pe, o Pavel phendea anda peste că sas „o mai țâno mașcar le apostoli” hai „o dintuno” mașcar le păcătoși. (1 Cor. 15:9; 1 Tim. 1:15) w24.03 27 ¶5, 6

Anda le buchia nasul cai cărdea-le o rege Ioas, sichioas că si zurales importanto te alosaras amenghe amala cai iubin le Iehovas hai camen te bucurin lesco ilo. Cadala amala va ajutin amen te cheras lașe buchia. Na bâstăr că daștis te cărdios amal codolența cai sile mai phure sau mai tărne tutar. Sar exemplo, o Ioas sas-lo but mai tărno sar pesco amal, o Iehoiada. Vi tu daștis te pușes tut anda le amala cai alosares-len tuche: „Ajutin man te bariarav mânro pachiamos ando Iehova? Zuriaren man te așunav le Devlestar? Ciaiol-len te den duma anda o Iehova hai anda le cuci ciacimata cai sicavel-len i Biblia? Sicaven pachiv caring so phenel o Del? Phenen manghe numai so camav te așunav sau silen tromai te ortosaren man cana greșisarav?”. (Prov. 27:5, 6, 17) O ciacimos si, că dacă che amala ci iubin le Iehovas, ci si tut nevoia lendar. Tha, dacă von iubin le Iehovas, na de-len drom; von va ajutina tut te cheres so si mișto. (Prov. 13:20) w23.09 9 ¶6, 7

„Alfa” si i litera saveaia astarel o alfabeto grecisco, hai „Omega”, si i litera saveaia terminil-pe. Cana phenel anda peste că silo „Alfa hai Omega”, o Iehova ajutil amen te hachiaras că atunci cana astarel iech buchi vo terminil-la. Pala so cărdea le Adamos hai la Eva, o Iehova phendea lenghe: „Aven roditori, butiaon hai pheren i phuv, supunin-la”. Cana cărdea prinjiando i dintuni data pesco scopo, si sar cana o Iehova phenelas „Alfa”. Vo camelas ca pi phuv te beșen sea le manușa cai țârdenas-pe catar o Adam hai i Eva, manușa perfecți cai așunen lestar, hai cai avenas te cheren i phuv iech paradiso. Cana va avela te pherel pesco scopo, o Iehova si sar cana va phenela, „Omega”. Pala so „sas-le terminime le ceruri hai i phuv hai sea so sas ande lende”, o Iehova dea iech garanția. Vo dea amen i garanția că cana va terminila-pe o efta-to ghies va pherela ciaces pesco scopo anda le manușa hai i phuv. w23.11 5 ¶13, 14

O purano drom cai încărelas anda Babilono ji ando Israelo, sas iech drom pharo hai daștilas te avel cărdo cam ande ștar șiona. Tha o Iehova promitisardea le israelițenghe că avelas te del de iech rig orisavo pharimos anda lengo drom. Le evrei pherde pachiamos jianenas că le miștimata cai avenas-len pala so risarenas-pe ando Israelo sas-le but mai bare sas orisavi buchi cai mechenas-la palal. O mai baro miștimos sas anda lenghi închinarea andini le Iehovasche. Ando Babilono ci sas niciech templo anda o Iehova. Code, ci arachelas-pe niciech altaro cai daștinas te aven andine jertfe hai nici rașaia caște daștin te cheren penghi buchi cadea sar manghelas i Legea mozaico. Mai but, le jene anda o poporo le Iehovasco sas-le but mai țâra sar le murșa hai le jiuvlea cai anenas închinarea neciaci avere devlenghe hai ci sicavenas niciech pachiv caring o Iehova sau lesche norme. Cadea că, mii evrei cai iubinas le Iehovas abia ajucărenas te risaren-pe ando Israelo cai daștinas te anen parpale i închinarea uji. w23.05 14, 15 ¶3, 4

Caște phiravas amen vi mai dur „sar niște șiave la luminache”, trebul amenghe spirito sfânto. Sostar? Anda codoia că jianas că na-i ușoro te așias uje ande cadai lumea melali. (1 Tes. 4:3-5, 7, 8) O spirito sfânto daștil te ajutil amen te na gândisaras sar i lumea hai te duriaras amendar le sicaimata nasul hai le gânduri melale, cai ci ciaion le Devles. Sa cadea, o spirito sfânto daștil te ajutil amen te sicavas „orisavo felo lașimos [hai] ortomos”. (Ef. 5:9) Daisaras te primisaras spirito sfânto cana mangas amen anda leste. O Isus phendea că o Iehova „va dela spirito sfânto codolenghe cai manghen-les lestar”. (Luca 11:13) Sa cadea, cana așaras le Iehovas ca amare întruniri, vo del amen spirito sfânto. (Ef. 5:19, 20) O spirito sfânto, cai si o zuralimos le Devlesco, daștil te ajutil amen te cheras so si mișto ande Lesche iacha. w24.03 23, 24 ¶13-15

Trebul tuche mai but răbdarea? Dacă da, mang-tu anda cadaia. I răbdarea cherel partea anda o rodo le spiritosco sfânto. (Gal. 5:22, 23) Cadea că, daisaras te manghas le Iehovas te del-ame zuralimos caște avas mai răbdători. Dacă nachas prin iech situația ande savi si amenghe pharo te sicavas răbdarea, ‘te mangas mai dur’ o spirito sfânto. (Luca 11:13) Sa cadea, daisaras te mangas le Iehovas te ajutil amen te dichas le buchia cadea sar dichel-len vo. Pala codoia, trebul te cheras sea so încărel amendar caște sicavas răbdarea ande fiesavo ghies. Cana mangas amen mai dur anda răbdarea hai das amari zor te sicavas-la, cadaia va bariola sea mai but ande amaro ilo, ji cana va arăsăla te cherel partea anda amende. Ajutil-ame but vi cana gândisaras-ame ca o exemplo le manușengo cai arachas-le andi Biblia. Andai Biblia, daisaras te prinjianas bute manușen cai sicade răbdarea. Anda lengo exemplo daisaras te sichioas sar te sicavas răbdarea. w23.08 22, 23 ¶10, 11

O Isus phendea caring o apostolo Petru că o Iehova va lela sama te avel-les sea so trebul lesche. Pala so sas-lo uștiado andal mule, vo ajutisardea prin iech miracolo le Petros hai vi le coavere apostolen te astaren pale zurales but mașe. (Ioan 21:4-6) Si ciaces, cadaia zuriardea vi mai but o pachiamos le Petrosco că o Iehova daștil te del-les sea so trebul lesche caște trail. Daștil-pe că o apostolo andea pesche andi goghi, le dumes le Isusosche cana phendea că o Iehova va lela sama pe codola cai „roden mai anglal o Regato”. (Mat. 6:33) Cadaia ajutisardea le Petros te mechel peschi buchi ande savi astarelas mașe hai te șiol po iechto than ande peschi viața i predicarea. Ando bărș 33 a.e., ca i Penticosta, vo dea duma pherdo tromai hai cadea mii manușa daisarde te așunen i vestea lași. (Fap. 2:14, 37-41) Pala codoia, vo ajutisardea codolen cai sas-le samariteni hai le manușen anda națiuni te cărdion creștini. (Fap. 8:14-17; 10:44-48) Si ciaces, o Iehova, folosisardea-pe catar o Petru caște ajutil manușen de orisavo felo te aven andi congregația creștino. w23.09 20 ¶1; 23 ¶11

Pala dui bărșa so o Ierusalimo sas-lo distrugime catar le babilonieni, le reges Nebucadnețar sas-les iech suno cai daradea-les, ande savo dichlea iech bari statuia. Vo phendea că va mudarela sea pesche goghiaveren, mașcar save sas vi o Daniel, dacă ci phenen lesche o suno hai so sicavel vo. (Dan. 2:3-5) O Daniel trebulas te cherel sigo vareso anda codoia că i viața bute manușenghe sas-li ando pericolo. Cadea că vo „gălea co rege hai manglea-les te del-les timpo caște cherel lesche prinjiando o suno.” (Dan. 2:16) Caște cherel cadaia trebuisardea lesche but tromai hai pachiamos. I Biblia ci phenel că o Daniel mai sicadea ji atunci so sas andel sune. Vo phendea pesche amalenghe „te manghen lașimos catar o Del le cerurengo ande soste priveal cado secreto”. (Dan. 2:18) O Iehova așundea lenghe manglimata hai ajutisardea le Danielos te cherel prinjiando o suno le regesco Nebucadnețar. Cadea, vo hai lesche amala așile jiuvinde. w23.08 3 ¶4

So miștimata anel amenghe i răbdarea? Cana sicavas răbdarea sam mai voime hai mai liniștime. Cadea că, i răbdarea daștil te ajutil amen te avel amen iech goghi sastevesti hai iech lașio sastimos. Mai but, cana sicavas răbdarea hachiaras amen mai mișto le coaverența, hai cadea i congregația așel chidini. Cana varecon phenel vareso nasul, ci va avela te sighiaras te holiaras amen hai te cheras i situația vi mai phari. (Ps. 37:8, n.s.; Prov. 14:29) Tha, mai opral sar oriso, las amen pala amaro Dad cerisco hai pașioas lestar. Si zurales șucar te sicavas răbdarea hai cadaia anel amenghe vi but miștimata. Chiar cana ci si amenghe sea o timpo ușoro te sicavas răbdarea, o Iehova va ajutila amen te daisaras te cheras cadaia. Hai, ando timpo so ajucăras pherde răbdarea i lumea nevi, daisaras te pachias ciaces că „i iach le Iehovaschi dichel caring codola cai daran lestar, caring codola cai ajucăren leschi iubirea loialo”. (Ps. 33:18) Cadea că, te avas hotărâme vi mai dur ‘te las pe amende’ i răbdarea. w23.08 22 ¶7; 25 ¶16, 17

O Iacov sicadea că iech manuș daștil te pachial că siles pachiamos, tha vo ci sicavel cadaia prin so cherel. (Iac. 2:1-5, 9) Sa cadea, o Iacov dea duma vi anda varecon cai dichel ieche phrales sau iecha pheia saven „ci silen sosa te hureaven-pe hai nai-len o haben de fiesavo ghies”, tha ci cherel chanci anda lende caște ajutil-len. Chiar cana codo manuș phenel că siles pachiamos, si de ivea, anda codoia că ci sicavel cadaia prin so cherel. (Iac. 2:14-17) O Iacov phendea anda i Rahav că si iech exemplo anda sar te sicaves chio pachiamos prin so cheres. (Iac. 2:25, 26) Voi așundea le Iehovastar hai hachiardea că Vo sas pașa le israeliți. (Ios. 2:9-11) Voi sicadea pesco pachiamos prin so cărdea. I Rahav, lea sama catar dui spioni israeliți cana lenghi viața sas ando pericolo. Cadea că, cadai jiuvli imperfecto hai cai ci sas-li israelita, sas arachli orta andel iacha le Devlesche, cadea sar o Avraam. Catar i Rahav sichioas că si zurales importanto te sicavas amaro pachiamos prin so cheras. w23.12 5 ¶12, 13

Amen sar slujitori le Iehovasche ci camas te hachiaras numai le ciacimata de bază andai Biblia. O spirito sfânto daștil te ajutil amen te camas te hachiaras „chiar vi le buchia profundo le Devlesche”. (1 Cor. 2:9, 10) Daștias te șios tuche andi goghi te sichios mai but buchia cai ajutin tut te pașios le Iehovastar? Sar exemplo, rode te diches sar sicadea vo peschi iubirea caring pesche slujitori andal puraimata caște hachiares sar sicavel vo peschi iubirea vi anda tute. Sa cadea, daștis te sichios anda sar camelas o Iehova ca le israeliți te anen lesche închinarea hai sar camel te anas lesche amen închinarea aghies. Sau daștis te rodes te hachiares mai mișto le profeții cai o Isus pherdea-len cana sas-lo pi phuv. Cadai buchi daștil te avel șucar anda tute dacă folosis o Indexo le publicațiengo Watch Tower sau o Ghido de cercetare anda le Martori le Iehovasche. Cana sichios profundo andai Biblia daștis te zuriares chio pachiamos hai cadaia ajutil tut te araches „o prinjianimos anda o Del”. (Prov. 2:4, 5) w23.10 18, 19 ¶3-5

Andi dintuni partea anda o verseto 8, o apostolo Petru phendea sar trebul te avel amari iubirea: „iech iubirea zurales bari”. I duma grecisco anda „zurales” însemnol „zinghiardo”. I duito partea anda o verseto sicavel că cana si amen iech iubirea zurali anda le coaver, pachiaras lenghe păcatea. Te gândisaras-ame că i iubirea si sar iech cotor pohtan cai încăras-les duie vastența hai zinghiaras-les ji cana pachiarel na iech sau dui păcatea, tha „but păcătea”. I duma „te pachiaras” însemnol te iertisaras .Cadea sar iech cotor pohtan daștil te pachiarel iech defecto, sa cadea dacă si amen iech iubirea zurali anda amare phrala hai pheia, daisaras te pachiaras lenghe imperfecțiuni hai covlimata”. Amari iubirea anda le phrala hai pheia trebul te avel cadea de zurali caște daisaras te iertisaras-len chiar cana na-i amenghe ușoro. (Col. 3:13) Tha, cana cheras cadai buchi sicavas că amari iubirea caring lende si zurali hai că camas te avas mișto dichle andel iacha le Iehovasche. w23.11 10, 11 ¶13-15

Cana sas-les 26 bărșa, o rege Iosia astardea te lașiarel o templo. Ando timpo so cherenas le lașarimata, arachle „o lil andai Legea le Iehovaschi, cai sas dini prin o Moise”. Cana așundea so phenelas i Legea, o Iosia cărdea sigo paruimata caște încărel so sas scriime ande late. (2 Cron. 34:14, 19-21) Ciaiolas-tu te citis ande fiesavo ghies andai Biblia? Dacă cheres cadaia, sar jial? Scriis le versetea cai daștin te ajutin tut? Cana sas-les cam 40 bărșa, o Iosia cărdea iech greșeala cai andea lesche o merimos. Ando than te manghel i îndrumarea le Iehovaschi, vo pachiaia-pe ande pesco zuralimos. (2 Cron. 35:20-25) So sichioas de catar? Indiferento chichi bărșa si amen sau de chichi timpo sichioas andai Biblia, trebul te rodas le Iehovas vi mai dur. Caște cheras cadaia, trebul te mangas amen anda leschi îndrumarea, te sichioas anda lesco Cuvânto hai te așunas le sfaturi cai den-len amenghe amare phrala cai sile zurale ando pachiamos. Cadea, daștil-pe că ci va avela te cheras greșeli bare, hai va avela te avas fericime. (Iac. 1:25) w23.09 12 ¶15, 16

I Biblia del duma anda but jiuvlea cai iubisarde le Iehovas hai slujisarde lesche. Cadala ‘încărde-pe parpale hai phirade-pe pachivales ande sea le buchia’. (1 Tim. 3:11) Mai but, le pheia daștin te arachen andi congregația jiuvlea spiritualo cai iubin ciaces le Iehovas hai savendar daștin te sichion but buchia. Tărne pheiale, si vi ande tumari congregația pheia spiritualo savendar daștin te sichion? Dacă da, prinjinanen-len mai mișto hai dichen mai anglal lenghe șucar calități. Iech calitatea zurales importanto anda iech phei spiritualo si i umilința. Cana iech jiuvli sili umilo, voi va bucurila-pe catar iech amalimos chidino le Iehovaia hai va hachiarela-pe mișto le coaverența. Sar exemplo, iech jiuvli cai iubil le Iehovas sicavel că încărel pherdi umilința so phenel-pe ando 1 Cor. 11:3, ande savo o Iehova sicadea cas dea vo i buchi te avel angla i congregația hai vi con si o șăro la familiaco. w23.12 18, 19 ¶3-5

O Iehova camel ca iech rrom te iubil pesca rromia, te lel sama pe late, te avel anda late iech lașio amal angla savo daștil te pătrel pesco ilo hai te ajutil-la te așel pașă le Iehovastar. Dacă bariares o zuralimos la goghiaco, te avel tut pachiv caring le jiuvlea hai te sicaves că san demno pachiamasco, cadala va ajutina tut te aves iech lașio rrom. Pala so les tuche rromni, daștis te aves dad. So daștis te sichios le Iehovastar anda sar te aves iech lașio dad? (Ef. 6:4) O Iehova phendea le Isusosche că iubil-les hai că aprobil-les. (Mat. 3:17) Dacă va avela te aves dad, sichio te phenes che șiavenghe că iubis-len. Sa cadea, na încăr tut parpale te așares-len anda sea o ilo de fiesavi data cana cheren vareso lașio. Le dada cai len-pe pala o Iehova, ajutin penghe șiaven te barion spiritualo. Daștis te sichios încă de acanara te aves iech dad lașio, dacă sicaves iubirea caring chi familia hai caring i congregația hai les sama lendar. Sichio te phenes lenghe că iubis-len hai că sile cuci anda tute. (Ioan 15:9) w23.12 28, 29 ¶17, 18

Chiar cana sam le manușa le Iehovasche vi amen nachas prin pharimata hai nasfalimata, cadea sar savore jene. Mai but, daștil-pe că va avela te nachas prin persecuții cana codola cai urân amen așen amenghe contra. Chiar cana o Iehova ci feril amen cadale pharimatandar, vo promitil amenghe că va avela pașa amende. (Is. 41:10) Le Iehovasche ajutorosa daisaras te avas mai dur voime, te cheras lașe alosarimata hai te așias lesche loialo chiar ande le mai bare pharimata. O Iehova promitil amenghe că va dela amen leschi pacea. (Filip. 4:6, 7) Tha so si i pacea le Devleschi? Si iech bari liniștea cai pherel amari goghi hai amaro ilo anda codoia că si amen iech amalimos chidino le Iehovasa. Cadai pacea „nachavel orisavo hachiarimos”. Si mai but sar daisaras te gândisaras amen. Simțosardean vroiechdata vi tu iech bari liniștea pala so manglean tut anda sea o ilo le Iehovasche? Cadaia si „i pacea le Devleschi”. w24.01 20 ¶2; 21 ¶4

Anda codoia că iubin le Iehovas, sea lesche manușa loialo camen te așaren lesco anav anda sea o ilo. O David jianglea că cana așaras o anav le Iehovasco si sa codoi buchi sar cana așaras le Iehovas. Cana așunas o anav le Iehovasco, gândisaras amen ca sar silo vo ciaces, anel ande amari goghi lesche șucar calități hai le bare buchia cai cărdea-len. O David dichlea sfânto cado anav hai camlea te așarel-les anda sea o ilo. Sa cadea, vi le leviți sas-le iech lașio exemplo anda sar așarde o anav le Iehovasco. Von phende pherde umilința că lenghe așarimata ci daștinas te sicaven cu sea so baro si o sfânto anav le Devlesco. (Neem. 9:5) Si ciaces, lenghe așarimata andine anda sea o ilo hai pherde umilința bucurisarde le Iehovas! w24.02 9 ¶6

O Iehova ci va pachiala că san iech manuș covlo anda codoia că ci daisardean te cheres so șiutean ande chi goghi, dacă cadai buchi sas prea phari anda tute. (2 Cor. 8:12) Sichio anda fiesavi buchi cai cherel-tu te des parpale. Încăr ande chi goghi so cărdean ji acana. I Biblia phenel: „O Del na-i neorta caște bâstrel tumari buchi”. (Evr. 6:10) Cadea că, nici tu ci trebulas te bâstres-la. Gândisar tut ca le buchia cai cărdean-len deja. Daștil-pe că, phanglean iech amalimos chidino le Iehovasa, dean duma averența anda leste sau boldean tut. Cadea sar daisardean ji acana te cheres so șiutean ande chi goghi, av siguro că daștis te cheres cadaia vi mai dur. Le ajutoroia le Iehovasco daștis te cheres so șiutean ande chi goghi.Ando timpo so des chi zor te cheres so șiutean andi chi goghi, na bâstăr te bucuris tut cana diches sar ajutil tut o Iehova hai so but miștimata del tut vo. (2 Cor. 4:7) Dacă ci meches tut, va avela te primis vi mai but miștimata. (Gal. 6:9) w23.05 31 ¶16-18

O Iehova camel te pachias ciaces că iubil amen hai că sam lesche cuci. Andi Biblia arachas scriime dui-var sar o Iehova phendea le Isusosche că iubilas-les hai că vo sas-lo cuci ande lesche iacha. (Mat. 3:17; 17:5) Ciaiolas tut te așunes le Iehovas te phenel tuche că vi tu san cuci ande lesche iacha? Aghies, o Iehova ci del duma amența anda o cerii, tha daisaras te așunas-les prin i Biblia. Cana citisaras so phendea o Isus andel evanghelii, si sar cana „așunas” o glaso le Iehovasco. O Isus sicadea ciaces sar silo lesco Dad. Cadea că, cana citisaras le dumes pherde iubirea prin save o Isus sicadea că lesche continuatori imperfecto, tha loialo, sile cuci ande lesche iacha, si sar cana o Iehova phenel cadal dumes caring amende. (Ioan 15:9, 15) Tha, cana nachas prin pharimata te na pachias că o Iehova ci mai arachel peschi plăcerea ande amende. Ande cadal situații phare daisaras te sicavas le Iehovasche chichi de but iubisaras-les hai că șioas amaro pachiamos ande leste. (Iac. 1:12) w24.03 28 ¶10, 11