Dich caring o Iehova hai vo zuriarel tut

1. Prin so nachenas le evrei cai sas-le încărde ando Babilono?

BUT bărșa, le evrei ci așunde le Iehovastar, cadea că vo mechlea le babilonieni te rimosaren lengo them hai te îngăren le evreien phandade ando Babilono. (2 Cron. 36:15, 16, 20, 21) Sar sas lengo traio code? Si ciaces, len daștinas te avel-len iech traio sar le coavere manușen. (Ier. 29:4-7) Tha, sas vi pharo anda lende hai ci sas-len i viața cai von camenas-la. Te dichas so phendea iech evreo zuralo ando pachiamos, cai sas-lo vi vo code: „Pașa le lena le Babilonosche, beșleam tele. Astardeam te rovas cana andeam amenghe amintea anda o Siono”. (Ps. 137:1) Le evrei sas-le zurales perade. Tha con avelas te zuriarel-len?

2, 3. a) So cărdea o Iehova anda le evrei cai sas-le încărde ando Babilono? b) So va avela te dichas mai dur?

² O Iehova si „o Del cai zuriarel amen”. (2 Cor. 1:3) Anda codoia că o Del iubil pesche manușen, vo camel te zuriarel-len. Vo jianglea că ando Babilono sas vi evrei cai falas-len nasul că ci așunde lestar hai cai camenas te jian parpale co Iehova. (Is. 59:20) Anda codoia, 100 bărșența mai anglal, vo phendea le profetosche Isaia te scriil o lil cai phiravel lesco anav. Sar ajutisardea cadaia le evreien cai sas-le încărde ando Babilono? Ando Isaia 40:1 citisaras: „«Zuriaren, zuriaren mânre poporos! », phenel tumaro Del”. Cadea, o Iehova, prin o profeto Isaia, zuriardea le evreien.

³ Cadea sar le evrei încărde ando Babilono, vi amen trebul te avas zuriarde poiechdata. Mai dur, va avela te dichas trin buchia prin save o Iehova zuriardea le evreien andel phare ghiesa: 1) vo phendea că va iertila codolen cai fal-len ciaces nasul, 2) dea-len iech speranța hai 3) duriardea lenghe daraimata. Sa cadea, va avela te dichas sar zuriarel vi amen o Iehova prin sea codol buchia.

O IEHOVA SICAVEL AMENGHE MILA

4. Sar sicadea o Iehova peschi mila? (Isaia 55:7)

⁴ O Iehova si „o Dad la milaco duioso”. (2 Cor. 1:3) Vo sicadea peschi mila cana phendea le evreienghe încărde ando Babilono că va avela te iertil-len dacă fal-len ciaces nasul. (Citisar Isaia 55:7.) O Del phendea: „Va avela te sicavav tuche lașimos iecha iubireasa loialo cai așel anda sea o timpo”. (Is. 54:8) Sar sicadea o Iehova peschi mila? Chiar cana le evrei avenas te beșen ando Babilono but bărșa anda codoia că ci așunde le Iehovastar, vo phendea lenghe că ci va așena code anda sea o timpo. (Is. 40:2) Cadal dumes zuriarde but codolen cai falas-len pharo anda so cărde.

5. Sostar daisaras te pachias mai but sar le evrei că o Iehova iertil amen?

⁵ So sichioas amen? O Iehova camel te iertil anda sea o ilo pesche manușen. Amen daisaras te pachias vi mai but sar le evrei anda o Babilono că o Iehova iertil amare păcatea. Sostar? Anda codoia că jianas so bari buchi cărdea o Iehova caște iertil amare păcatea. Șăla bărșa pala so o Isaia scriisardea pesco lil, o Iehova bișialdea pesche cuci Șiaves caște del peschi viața anda sea codola cai fal-len ciaces nasul anda lenghe păcatea. Anda codoia că o Isus mulea anda amende, o Iehova daștil te ‘chosel amare păcatea‘ cu sea. (Fap. 3:19; Is. 1:18; Ef. 1:7) O Iehova si ciaces iech Del pherdo mila!

6. Sostar sam zuriarde cana gândisaras amen sar iertil amen o Iehova? (Dich vi i imaginea.)

⁶ Doșares tut vi acana anda le buchia nasul cai cărdean-len mai anglal? So phendea o Iehova ando Isaia 55:7 daștil te zuriarel tut. Chichiva mașcar amende doșaras amen, vi mai but cana țârdas nasulimata anda so cărdeam mai anglal. Te pachias anda sea o ilo că o Iehova iertil amen dacă phendeam amare păcatea hai cărdeam le paruimata so trebun ande amari viața. Cana o Iehova iertil, vo ci mai anel pesche amintea niciechdata. (Dich vi Ieremia 31:34.) Anda codoia că o Iehova ci mai anel pesche amintea anda amare păcatea, nici amen ci trebul te cheras cadaia. Anda o Iehova si importanto le buchia cai cheras-len acana, na le buchia nasul cai cărdeam-len mai anglal. (Ezec. 33:14-16) Pa iech țâra timpo, o Dad la milaco duioso va chosela orisavo pharimos cai țârdas-les pala amende anda codoia că greșisardeam.

7. So daștil te zuriarel amen te phenas le phurenghe iech păcato cai garadeam-les?

⁷ Tha so daisaras te cheras dacă amaro ilo doșarel amen anda iech baro păcato cai garadeam-les? I Biblia zuriarel amen te mangas o ajutorii le phurengo. (Iac. 5:14, 15) Cu sea cadala, daștil te avel pharo te phenas le buchia nasul cai cărdeam-len. Tha trebul te anas amenghe amintea că o Iehova, prin cadal murșa, ajutil amen hai că von va sicavena amenghe iubirea hai mila, cadea sar o Iehova. Dacă încăras andi goghi cadaia hai dacă fal amen ciaces nasul anda so cărdeam, va avela te camas te phenas so garadeam. Te dichas sar zuriardea i mila le Iehovaschi ieche phrales po anav Arthur,a cai doșarelas-pe anda iech păcato. Vo phenel: „Cam iech bărș, dichlem materialea pornografico. Tha, pala so așundem iech cuvântarea cai delas duma andai conștiința, phendem mânra rromniache hai le phurenghe so cărdem. Simțosardem man mai mișto pala so dem duma lența, anda codoia că i doș ci mai halas mânro ilo. Tha, vi mai dur, somas zurales perado. Le phure phende manghe că o Iehova camel mai dur te avel mânro amal. Vo ortosarel amen anda codoia că iubil amen. Lenghe lașe dumes dine manghe iech bari pacea ando ilo hai ajutisarde man te hachiarav că o Iehova iertisardea man”. Aghies, o Arthur silo pioniero hai slujitoro auxiliaro. Chichi de but zuriarel amen te jianas că, cana fal amen ciaces pharo anda so cărdeam, o Iehova iertil amen anda sea o ilo!

O IEHOVA DEL AMEN SPERANȚA

8. a) So speranța dea o Iehova le evreien cai sas-le încărde ando Babilono? b) Cadea sar sicavel-pe ando Isaia 40:29-31, sar avelas te ajutil le evreien cai sas-le încărde ando Babilono i speranța cai dea-len o Iehova?

⁸ Le evrei cai sas-le încărde ando Babilono daștinas te pachian că ci va jiana niciechdata parpale chăre. Anda codoia că butivar, le babilonieni ci mechenas le manușen cai încărenas-len code te jian parpale ande pengo them. (Is. 14:17) Tha o Iehova dea pesche manușenghe iech speranța. Vo phendea lenghe că va avena dine drom de cothar hai chanci ci așadea-les te cherel so phendea. (Is. 44:26; 55:12) Andel iacha le Iehovasche, o Babilono sas cadea sar iech țâra prafo. (Is. 40:15) Arăsălas lesche te phurdel iech data caște chosel-len cu sea. Sar daștilas te ajutil le evreien cadai promisiunea? Cadaia avelas te zuriarel-len but. O Isaia phendea: „Codola cai șion pengo pachiamos ando Iehova neviaren pengo zuralimos”. (Citisar Isaia 40:29-31.) Von avenas te aven sar le bare ciriclea cai vazden-pe co cerii, anda codoia că lenghi speranța delas-len iech nevo zuralimos.

9. Sostar daștinas le evrei te pachian-pe andi promisiunea le Iehovaschi?

⁹ O Iehova sicadea le evreienghe vi sostar daștinas te pachian-pe ande lesche promisiuni. Te gândisaras amen ca le profeții cai von prinjianenas-len hai cai pherdine-pe ji ande codo ghies. Sar exemplo, von jianenas că i Asiria lea tela pesco zuralimos o regato le nordosco anda o Israelo hai încărdea sar phandade le manușen cai beșenas code. (Is. 8:4) Von dichle penghe iachența sar o Ierusalimo sas-lo distrugime catar le babilonieni hai sar le evrei sas-le îngărde ando Babilono. (Is. 39:5-7) Chiar ande lenghe ghiesa, o rege Zedechia sas-lo îngărdo ando Babilono, pala so sas-le line avri lesche iacha. (Ier. 39:7; Ezec. 12:12, 13) Le profeții le Iehovasche pherdine-pe vi ande le mai țâne buchia. (Is. 42:9; 46:10) Sea cadala zuriarde lengo pachiamos andi promisiunea le Iehovaschi că va dela-len ciaces drom de cothar.

10. So daștil te ajutil amen te încăras jiuvindi amari speranța ande cadal phare ghiesa?

¹⁰ So sichioas amen? Cana sam perade, i speranța daștil te zuriarel amen hai te vazdel amen te jias mai dur. I lumea si sea mai nasul hai le bare dușmani le Devlesche așen amenghe contra. Tha ci trebul te mechas amen perade. O Iehova del amen iech șucar speranța te traisaras anda sea o timpo ando Paradiso andi pacea hai andi liniștea. Si zurales importanto te încăras jiuvindi ande amari goghi hai ande amaro ilo cadai speranța. Dacă ci cheras cadaia, i speranța cai si amen daștil te arăsăl sar iech șucar than cai dichas-les po geamo, tha o geamo silo melalo. Sar daisaras te ujiaras o geamo caște dichas o șucarimos codole thanesco? Aver varesar phendo, sar daisaras te încăras jiuvindi amari speranța? Dacă sam sicade te beșas hai te gândisaras amen că sam andi lumea nevi hai că bucurisaras amen catar le miștimata cai phendea-len amenghe o Iehova. Daisaras te citisaras articolea, te dichas materialea video hai te așunas ghilea anda amari speranța. Sa cadea, daisaras te das duma le Iehovasche ando manglimos anda le șucar buchia cai phendea că va cherela-len. Abia ajucăras te dichas-len!

11. So ajutisardea iecha pheia cai sila iech baro nasfalimos te avel-la pale zuralimos?

¹¹ Iech phei cai bușiol Joy, cai sila iech baro nasfalimos, phenel sar zuriardea-la hai vazdea-la i speranța: „Cana som peradi, dav duma le Iehovasa anda le mai bare buchia cai garaven-pe ande mânro ilo, hai vo hachiarel man o mai mișto. Ande codol momentea, o Iehova del man «o zuralimos cai si mai baro sar oriso»”. (2 Cor. 4:7) Mai but, i Joy beșel hai gândil-pe sar va avela lachi viața andi lumea nevi, cana „niciech manuș ci va phenela: «Som nasfalo»”. (Is. 33:24) Dacă vi amen șioras amaro ilo angla o Iehova hai încăras jiuvindi ando ilo hai andi goghi amari speranța, va avela amen pale zuralimos.

12. Sostar daisaras te pachias amen andel promisiuni le Iehovasche? (Dich vi i imaginea.)

¹² Cadea sar andel ghiesa purane, o Iehova sicadea vi amenghe sostar daisaras te pachias amen ande lesche promisiuni. Te gândisaras amen ca le profeții cai dichas-len sar pheren-pe. Sar exemplo, dichas sar pherel-pe i profeția anda o zuralimos mondialo cai si „pe iech partea zuralo hai pe iech partea covlo”. (Dan. 2:42, 43) Sa cadea, așunas că si „anda iech than ande aver izdraimata phuveache” hai das duma sea le manușența anda i vestea lași. (Mat. 24:7, 14) Cadal profeții hai but aver zuriaren amaro pachiamos că so phendea o Iehova va cherela.

O IEHOVA DURIAREL AMARE DARAIMATA

13. a) Prin so pharimata avenas te nachen le evrei cana o ghies te aven dine drom pașiolas? b) Cadea sar sicavel-pe ando Isaia 41:10-13, sar zuriardea o Iehova le evreien cai sas-le încărde ando Babilono?

¹³ O Iehova dea le evreien cai sas-le încărde ando Babilono iech șucar speranța, că va avena dine drom de cothar. Tha Vo jianglea că ci va avela ușoro anda lende ando timpo so pașiolas codo ghies. O Iehova phendea de mai anglal că iech rege zuralo va lela tela pesco zuralimos o Babilono hai că va peravela-les cu sea. (Is. 41:2-5) Trebunas te daran le evrei? Bute bărșența mai anglal, o Iehova phendea lenghe vareso cai avelas te zuriarel-len. Vo phendea: „Na dara, că me som tusa! Na dich pașa tute, că me som chio Del!”. (Citisar Isaia 41:10-13.) So camlea te phenel o Iehova prin le dumes „me som chio Del”? O Iehova ci camlea te anel lenghe amintea casche trebunas te anen închinarea, anda codoia că von jianenas mișto cadaia. Mai but, camlea te ajutil-len te dichen mai mișto că Vo sas-lo pașa lende. (Ps. 118:6)

14. So mai cărdea o Iehova caște duriarel i dar le evreienghi cai sas-le încărde ando Babilono?

¹⁴ Sa cadea, o Iehova duriardea le daraimata le evreienghe cana andea lenghe amintea anda pesco baro zuralimos hai pesco prinjianimos. O Iehova phendea le evreienghe te dichen le cerhaia po cerii hai andea lenghe andi goghi că vo na numai că cărdea le cerhaia, tha vi prinjianel fiesavea pala o anav. (Is. 40:25-28) Cadea că, daisaras te pachias că vo prinjianel o anav fiesave manușesco cai slujil lesche. Dacă le Iehovas sas-les o zuralimos te cherel le cerhaia, daisaras te pachias că siles vi o zuralimos te ajutil pesche manușen. Si ciaces, le evrei cai sas-le încărde ando Babilono ci sas-len sostar te daran sau te aven perade.

15. So phendea o Iehova pesche manușenghe caște na daran anda so avelas?

¹⁵ O Iehova phendea pesche manușenghe so te cheren cana va avela o ghies te aven dine drom. Iech țâra mai anglal, ando lil Isaia, o Del phendea pesche manușenghe: „Jia andre ande che camere hai phande le udara pala tute! Garav tut numai iech țâra ji cana va nachela i holi!”. (Is. 26:20) Pala so fal-pe, cadai profeția pherdilea-pe i dintuni data cana o Babilono sas-lo lino tela o zuralimos le regesco Cirus. Iech manuș greco andal purane ghiesa cai jianelas but andai istoria phendea că, cana o Cirus lea tela pesco zuralimos o Babilono, vo „phendea [pesche soldațenghe] te mudaren orisave manușes cas arachenas-les po drom”. Te gândisaras amen chichi de darade sas-le le manușa cai beșenas ando Babilono! Tha le evrei cai sas-le încărde ando Babilono ci nachle prin sea cadal buchia anda codoia că așunde catar so phendea lenghe o Iehova.

16. Sostar ci trebul te daras prea but anda so va avela? (Dich vi i imaginea.)

¹⁶ So sichioas amen? Pa țâra timpo va avela te nachas prin o mai baro pharimos cai sas-lo pi phuv. Cana cado va astarela, le manușa ci va jianena so te cheren hai va avena darade, tha na vi le manușa le Iehovasche. Amen jianas că o Iehova si amaro Del. Va avela amen pachiamos hai tromai anda codoia că jianas că „[amari] eliberarea pașiol”. (Luca 21:28) O pachiamos cai si amen ando Iehova ci va avela covliardo nici cana o Gog, adică mai but națiuni ande iech than, va avena contra amenghe. (Ezec. 38:18) O Iehova va dela amen pesco ajutorii prin le îngeri, tha vi va phenela amenghe so te cheras caște așias andi viața. Sar va cherela vo cadaia? Va trebula te ajucăras hai te dichas. Daștil-pe că Vo va phenela amenghe so te cheras prin le congregații. Le congregații daștin te aven le „camere” ande save daisaras te avas ferime. Sar daisaras te avas gata anda so va avela? Daisaras te cheras cadaia cana așias pașa amare phrala hai pheia, cana așunas catar so phenel amenghe o Iehova prin peschi organizația hai cana pachias anda sea o ilo că o Iehova si angla peschi organizația. (Evr. 10:24, 25; 13:17)

17. Sar daisaras te sicavas că pachias anda sea o ilo că o Iehova va zuriarel amen?

¹⁷ Chiar cana i viața ci sas ușoro anda le evrei cai sas-le încărde ando Babilono, o Iehova zuriardea-len. Vo va cherela sa cadea vi anda amende. Cadea că, oriso va avela, te rodas vi mai dur o zuralimos cai avel le Iehovastar. Te pachias amen anda sea o ilo ande leschi bari mila. Te încăras jiuvindi amari speranța hai te na bâstras că, anda codoia că o Iehova si amaro Del, na-i sostar te daras.