Te ajutisaras amare phralen cana nachen prin pharimata

1. Sar del răspunso o Iehova butivar pesche slujitorenghe?

JIANGLEAN că o Iehova daștil te folosil tut caște del răspunso ca o manglimos cai cherel-les iech anda lesche slujitori? Daștis te ajutis averen vi cana san iech phuro de congregație, slujitoro auxiliaro, pioniero sau vestitoro. Sa cadea, daștis te cheres vareso anda aver vi cana san tărno sau phuro, phral sau phei. Cana varecon cai iubil le Iehovas del cingar caring leste anda ajutorii, amaro Del folosil butivar le phuren de congregație hai avere slujitoren loialo caște aven ‘iech ajutorii cai zuriarel’ anda codo jeno. (Col. 4:11) Ce bari pachiv si te slujisaras le Iehovasche hai amare phralenghe ande cado modo! Daisaras te ajutisaras amare phralen cana astarel iech baro nasfalimos, iech dezastro naturalo sau iech persecuția.

TE AJUTISARAS AVEREN CANA ASTAREL IECH BARO NASFALIMOS

2. Sostar daștilas te avel amenghe pharo te ajutisaras averen cana si iech baro nasfalimos?

² Cana astarel iech baro nasfalimos sau avel iech pandemia daștil te avel amenghe pharo te ajutisaras-ame iech averes. Sar exemplo, camas te jias ca amare amala, tha ci si goghiaver te cheras cadaia. Sau daștil-pe că camas te acharas amende codolen cai sile mai ciore caște has ande iech than, tha ci daisaras te cheras nici cadaia. Chiar cana camas te ajutisaras averen, cadaia daștil te avel amenghe pharo dacă le jene anda amari familia sile nasfale sau nici amen ci si amen cadea de but love. Cu sea cadala, o Iehova dichel că camas te ajutisaras anda sea o ilo codolen cai silen nevoia hai sam zurales cuci anda leste cana cheras so daisaras anda lende. (Prov. 3:27; 19:17) So daștil te cherel fiesavo anda amende?

3. So sichioas catar le phure andai congregația la pheiachi Desi? (Ieremia 23:4)

³ So daștin te cheren le phure de congregație. Dacă san phuro de congregație, de chi zor te prinjianes mai mișto le phralen hai le pheian. (Citisar Ieremia 23:4.) I Desib, iech phei anda savi deam duma ando articolo cai nachlea, phenel: „Angla i pandemia, le phure anda mânri grupa de serviciu găle manța hai avere phralența andi predicarea. Von chiar cărde penghe timpo te beșen amența ande iech than”. Cadea că, le phurenghe anda cadai congregația sas lenghe mai ușoro te ajutin la pheia Desi cana astardea i pandemia de COVID-19 hai cana chichiva jene anda lachi familia mule anda o viruso.

4. Sostar daisarde le phure te ajutisarde le pheia Desi, hai so sichion le phure de cathar?

⁴ I Desi phenel: „Sas manghe mai ușoro te pâtrav mânro ilo angla le phure hai te dav duma lența anda mânre daraimata, anda codoia că samas deja amala”. So sichion le phure de cathar? Păstorin codolen savendar trebun te len sama angla so te nachen prin iech pharimos. Aven amala lența. Dacă ci daștin te jian lende chăre, anda codoia că astarel iech baro nasfalimos, încăren o phanglimos lența aver varesar. I Desi phenel: „Poiechdata, ande sa codo ghies, mai but phure denas-ma telefono hai bișialenas manghe mesajea. Chiar cana prinjiandem mișto le versetea cai citisarde-le manghe, cadala arăsle ande mânro ilo hai zuriarde-ma”.

5. Sar daștin te jianen le phure so si nevoia le phralen hai le pheian hai sar daștin te ajutin-le?

⁵ Le phure daștin te jianen so si nevoia le phralen hai le pheian, cana șion lenghe pușimata cai ci cheren-le te avel lenghe lajiav. (Prov. 20:5) Trebul lenghe haben, draba sau aver buchia? Sile pașă te hasaren penghi buchi sau pengo chăr? Trebun te aven ajutime caște primin o ajutorii dino catar o stato? I Desi primisardea ajutorii po plano materialo catar i congregația, tha o ajutorii po plano spiritualo hai emoționalo cai sas lache dino le phurendar, ajutisarde-la o mai but te daștil te nachel părdal le pharimata. Voi phenel: „Le phure mangle-pe le Iehovasche ande iech than manța. Chiar cana ci avel ande mânri goghi so phende andel manglimata, ci bâstărdem sar cărde-ma te simțosarav-ma. Sas sar cana o Iehova phenelas manghe: «Ci san corcori!»”. (Is. 41:10, 13)

6. Sar daisaras te ajutisaras-ame iech averes? (Dich le imagini.)

⁶ So daștin te cheren le coaver. Amen ajucăras-ame ca le phure de congregație te aven le dintune cai len sama catar i congregația. Tha o Iehova acharel fiesaves anda amende te zuriaras hai te ajutisaras averen. (Gal. 6:10) Chiar cana daisaras te cheras numai vareso țâno anda varecaste nasfalo, cadaia daștil te zuriarel-les but. Iech șiavorro daștilas te bișialel iech lil sau daștilas te cherel iech șucar deseno caște zuriarel ieche phrales. Iech tărno daștilas te chinel haben sau te pochinel le facturi anda iech phei. Aver jene andai congregația daștinas te cheren haben anda varecon nasfalo, te îngăren-les leste chăre hai te mechen-les co udar. Si ciaces, cana astarel iech nasfalimos cai si peste sea, savore andai congregația trebun te aven zuriarde. Daisaras te așias iech țâra mai but amare phralența pala le întruniri, te beșas ande iech than sau te das duma prin videoconferința. Vi le phure de congregație trebun te aven zuriarde. Chichiva phrala bișialde dumes andai mulțumirea le phurenghe, saven silen but buchia te cheren cana astarel iech baro nasfalimos. Savore camas te cheras amari partea caște ‘zuriaras-ame vi mai dur iech averes hai te vazdas-ame iech averes’. (1 Tes. 5:11)

TE AJUTISARAS AVEREN CANA NACHEN PRIN IECH DEZASTRO NATURALO

7. So pharimata daștinas te aven amare phralen pala iech dezastro?

⁷ Iech dezastro naturalo daștil te paruvel i viața varecaschi anda-iech. Codola cai nachen prin iech dezastro daștinas te hasaren penghe buchia, pengo chăr sau chiar varecas drago. Amare phrala hai pheia ci sile ferime catar cadal buchia nasul. So daisaras te cheras caște ajutisaras-le?

8. So daștin te cheren le phure de congregație hai le șăre la familiache angla so te astarel iech dezastro?

⁸ So daștin te cheren le phure de congregație. Phure, ajutin tumare phralen te aven pregătime angla so te avel iech dezastro. Len sama ca savore jene andai congregația te jianen so trebun te cheren caște ferin-pe hai sar te len o phanglimos le phurența. I Margaret, anda savi deam duma ando articolo cai nachlea, phenel: „Prin iech tema catar «Necesități localo», le phure phende amenghe te na bâstras că încă daștil te astarel iech bari iag ando than cai beșas. Samas zuriarde te nașas othar sigo, dacă le autorități avenas te phenen amenghe te tiliaras sau dacă i situația cărdiolas vi mai nasul”. Le buchia cai phende-le le phure le phralenghe avile exacto cana trebulas anda codoia că, pala panji curche, astardea iech bari iag. Le șăre la familiache daștin te den duma anda so trebulas te cheren fiesavo jeno andai familia dacă avel iech dezastro. Dacă vi le dada hai vi le șiave sile pregătime, va daștina te așen ciaces liniștime cana si iech dezastro.

9. So daștin te cheren le phure angla hai pala iech dezastro?

⁹ Dacă san supraveghetoro iecha grupaco, le sama te aven-tu le lașe numerea de telefon hai o than cai beșen codolenghe cai si ande chi grupa de serviciu, angla so te avel iech dezastro. Cher iech lista hai dacă si paruimata scriisar-le code. Cadea, dacă avel iech dezastro, va daștia te des duma fiesave phraleia caște diches sostar siles nevoia. De sigo cadal informații mai dur caring o coordonatoro le phurengo, cai va dela duma vi vo le supraveghetoroia de circumscripție. Cana cadal phrala cheren buchi ande iech than, von daștin te ajutin le phralen ande o mai lașio modo. Sar exemplo, pala i iag, o supraveghetoro anda i circumscripția anda savi cherel partea i Margaret, așilea uștiado 36 ceasurea, caște organizil i buchi le phurenghi cai denas penghi zor te len sama cam catar 450 phrala hai pheia cai trebuisarde te mechen penghe chăra. (2 Cor. 11:27) Cadea, sea le phralenghe cai trebuisarde te mechen penghe chăra sas arachlo iech than cai te beșen.

10. Sostar pachian le phure că si importanto te păstorin le phralen? (Ioan 21:15)

¹⁰ Le phuren silen vi i buchi te zuriaren le phralen andai Biblia hai te ajutin codolen cai sile perade. (1 Pet. 5:2) Cana si iech dezastro, von trebun mai anglal te dichen dacă fiesavo phral hai phei sile mișto hai te len sama te avel-le haben, hureaimata hai iech than cai te beșen. Tha lenghi buchi ci așel po than cade. Vi pala mai but șiona, le phralen silen vi mai dur nevoia te aven zuriarde. (Citisar Ioan 21:15.) „Trebul te nachel mai but timpo caște sastiol chio ilo”, phenel o Harold, iech phral cai slujil ando comiteto iecha filialaco hai cai dea duma mai bute phralența hai pheianța cai nachle prin dezastrea. „Daștil-pe că lenghi viața jial angle hai astarel te avel pale normalo, tha butivar aven ande lenghi goghi amintiri duchade anda codola drago cas hasarde-le, anda iech buchi cai sas lenghe zurales cuci sau anda i situația nasul anda savi phares scăpisarde jiuvinde. Cadal amintiri daștin te astaren pale ande lengo ilo iech bari duch. Cadaia ci sicavel că nai-le pachiamos, tha si vareso normalo.”

11. So nevoi daștinas te aven le familien cai nachle prin iech dezastro?

¹¹ Le phure hachiaren chichi de importanto si o sfato „roven codolența cai roven”. (Rom. 12:15) Codola cai nachle prin iech dezastro daștilas te aven-len nevoia te așunen că o Iehova hai le phrala iubin-le vi mai dur. Le phure va ajutina le familien te cheren penghe timpo andal buchia spiritualo: te manghen-pe le Iehovasche, te sichion andai Biblia, te jian ca le întruniri hai andi predicarea. Sa cadea, von va zuriarena le daden te ajutin penghe șiaven te dichen mai importanto le buchia cai ci daștin te aven distrugime catar niciech dezastro. Dada, anen andi goghi tumare șiavenghi că o Iehova va avela sea o timpo lengo Amal hai că va lela sama pe lende de fiesavi data. Mai but, phenen lenghe că von cheren partea anda iech familia phralența hai pheianța pa sea i phuv cai sile gata te ajutin-le oricana. (1 Pet. 2:17)

12. So daștin te cheren le coaver caște ajutin cana si iech dezastro? (Dich i imaginea.)

¹² So daștin te cheren le coaver. Dacă si iech dezastro ando than cai beșes, de duma le phurența caște jianes sar daștis te ajutis. Daștis te meches-le te beșen ande chio chăr anda iech timpo, codolen cai trebuisarde te tiliaren anda penghe chăra sau codolen cai avile te ajutin. Sau daștis te îngăres haben sau aver buchia codolenghe cai silen nevoia. Tha vi cana si iech dezastro ande iech than mai dur tutar, vi cadea daștis te ajutis. Sar? Daștis te manghes-tu le Iehovasche anda codola cai nachen prin o dezastro. (2 Cor. 1:8-11) Sa cadea, daștis te cheres donații anda i lucrarea mondialo. (2 Cor. 8:2-5) Dacă daștis te jias ando than cai sas o dezastro de duma le phurența caște jianes so trebul te cheres caște ajutis. Cana san achardo, daștil-pe că va avela te aves sicado caște daștis te aves folosime cana hai cai si o mai mișto.

TE AJUTISARAS LE PHRALEN CAI NACHEN PRIN PERSECUȚII

13. Prin so pharimata nachen le phrala andal thema cai amari buchi anda o Iehova sili așiadi?

¹³ Andel thema cai amari buchi anda o Iehova sili așiadi, le persecuții cheren i viața vi mai phari. Pașa i persecuția, le phrala anda cadal thema nachen prin pharimata le lovența, sile nasfale hai meren lenghe varecon drago. Tha anda codoia că si interdicția, le phure ci daștin te jian ca le phrala sau te den duma lența libero caște zuriaren-le. Prin cadaia nachlea vi o Andrei, anda savo deam duma ando articolo cai nachlea. Iech phei anda leschi grupa de serviciu nachelas prin pharimata le lovența. Pala codoia sas-la iech accidento la mașinaia. Voi trebuisardea te avel operime mai butivar hai ci mai daisardea te cherel buchi. O Iehova dichlea ande so phari situația sas cadai phei, hai lea sama ca le phrala te daștin te cheren sea so așelas ande lengo zuralimos caște ajutin-la, chiar cana sas persecuția hai restricții anda i pandemia.

14. Sar daștin le phure te aven iech exemplo cana șion pengo pachiamos ando Iehova?

¹⁴ So daștin te cheren le phure de congregație. O Andrei manghlea-pe le Iehovasche hai cărdea sea so daisardea caște ajutil. Sar dea lesche răspunso o Iehova? Vo folosisardea le phralen hai le pheian andai congregația cai daștinas te ajutin la pheia vi mai but. Chichiva anda lende îngărde cadala pheia la mașinaia co medico, hai aver ajutisarde-la lovența. O Iehova cărdea-le te ajutin-la soia daisarde fiesavo hai binecuvântisardea lenghe tromane eforturi. (Evr. 13:16) Phure, cana amari buchi anda o Iehova sili așiadi, na încăren tumen parpale te den vi averen anda tumare responsabilități! (Ier. 36:5, 6) Tha, mai opral sar oriso, șion tumaro pachiamos ando Iehova, anda codoia că vo va ajutila tumen te len sama pe amare phrala hai pheia.

15. Sar daisaras te așias chidine cana nachas prin persecuția?

¹⁵ So daștin te cheren le coaver. Cana amari buchi anda o Iehova sili așiadi, daștil-pe că va trebula te chidas-ame ande iech than amare phralența ande grupuri mai țâne. Anda codoia, si zurales importanto te avel pacea mașcar amende. Te na bâstras că trebul te maras-ame contra o Satan, na contra amare phrala. Te nachas părdal lenghe greșeli hai te rezolvisaras sigo le nehachiarimata mașcar amende. (Prov. 19:11; Ef. 4:26) Te avas gata te ajutisaras-ame iech averes. (Tit 3:14) O ajutorii cai le phrala dine-les la pheiache zuriardea sea i grupa de seviciu. Von arăsle te aven vi mai pașă iech averestar, sar iech familia. (Ps. 133:1)

16. Cadea sar phenel-pe ando Coloseni 4:3, 18, sar daisaras te ajutisaras amare phralen hai pheian cai sile persecutime?

¹⁶ Mai but mii phrala hai pheia slujin le Iehovasche chiar cana le guvernea șion restricții. Chichiva anda lende sile phandade anda lengo pachiamos. Amen daisaras te mangas-ame le Iehovasche anda lende hai anda lenghe familii. Sa cadea, daisaras te cheras manglimata vi anda le phrala cai sicaven tromai hai jian te zuriaren le phralen phandade, chiar cana vi von daștinas te aven astarde hai șiute ando phandaimos. Von ajutin penghe phralen vi te așen zurale ando pachiamos, îngăren lenghe so silen nevoia sau apărin-le andi instanța.c (Citisar Coloseni 4:3, 18.) Te na bâstras niciechdata so baro zuralimos si amare manglimatan! (2 Tes. 3:1, 2; 1 Tim. 2:1, 2)

17. Sar daisaras te pregătisaras-ame încă de acanara anda i persecuția?

¹⁷ Încă de acanara, tu hai chi familia daștin te pregătin tumen anda i persecuția. (Fap. 14:22) Na zumaven te gândin tumen ca sea le buchia nasul cai daștinas te întâmplon-pe tumenghe. Mai mișto avelas te zuriaren tumaro amalimos le Iehovaia hai te ajutin tumare șiaven te cheren sa cadea. Cana daran, șioren tumaro ilo angla o Iehova. (Ps. 62:7, 8) Sar familia, den duma anda sea le motivea sostar daștin te pachian tumen ande leste.d Sa cadea sar pregătin tumare șiaven anda iech dezastro naturalo, pregătin-le vi anda i persecuția. Cadea von va avena tromane hai va avela-len pacea anda codoia că sicadean-le te pachian-pe ando Iehova.

18. So viitorii ajucărel-ame?

¹⁸ I pacea le Devleschi cherel-ame te simțoasaras-ame ferime. (Filip. 4:6, 7) Prin late, o Iehova liniștil amaro ilo cana nachas prin nasfalimata, dezastrea naturalo hai persecuții. Vo păstoril-ame prin le phure cai cheren buchi phares anda amende. Sa cadea, del fiesaves anda amende i ocazia te ajutisaras-ame iech averes. Ande cado timpo cana si încă pacea, daisaras te pregătisaras-ame anda le pharimata vi mai bare cai va avena hai vi anda ‘o baro necazo’. (Mat. 24:21) Atunci va trebula te încăras amari pacea hai te ajutisaras vi averen te cheren sa cadea. Tha pala codoia, ci va mai trebula te nachas prin situații phare cai daraven-ame. Atunci va avela te bucurisaras-ame catar so camlea o Iehova te del-ame sea o timpo – perfecțiunea hai iech ciaci pacea cai încărel. (Is. 26:3, 4)