Te așias uștiade caște na peras ando păcato!

1, 2. a) Ca so buchi importanto phendea o Isus pesche discipolenghe te len sama? b) So cărdea le discipolen te mechen le Isusos? (Dich vi le imagini.)

„O SPIRITO camel, tha o mas silo covlo.”a (Mat. 26:41b) Prin cadal dumes, o Isus sicadea că hachiarel că sam imperfecți. Tha, vo mai phendea vi pe soste trebul te las sama: te na pachias amen prea but ande amaro zuralimos. Chichiva ceasurența mai anglal le discipoli cai pachianas că sile zurale, phende că ci va mechena niciechdata penghe Raies. (Mat. 26:35) Von camenas te cheren so si mișto. Tha von ci denas penghi sama că, ande iech pharimos, daștinas te hasaren sigo pengo zuralimos te cheren so si mișto hai te arăsăn te cheren vareso nasul. Anda codoia, o Isus phendea lenghe vareso importanto: „Așen uștiade hai manghen tumen sea o timpo, caște na peren ando păcato!”. (Mat. 26:41a)

² Cu sea cadala, le discipoli ci așile uștiade cadea sar phendea lenghe o Isus. Cana o Isus sas-lo phandado, von ci așile pașa leste, daraile hai nașle. Bi te ajucăren-pe, le discipoli cărde chiar so phende că ci va cherena niciechdata – mechle le Isusos. (Mat. 26:56)

3. a) Sostar trebul te na pachias amen prea but ande amaro zuralimos? b) So va avela te sichioas mai dur?

³ Niciech de mașcar amende ci trebul te pachial-pe prea but ande pesco zuralimos. Si ciaces, camas anda sea o ilo te na cheras vareso cai duriarel amen le Iehovastar. Hai, anda codoia că sam imperfecți, daisaras te peras mai sigo ando păcato. (Rom. 5:12; 7:21-23) Bi te ajucăras amen, poiechdata, amaro ilo daștil te țârdel amen te cheras vareso nasul. Caște așias loialo le Iehovasche hai lesche Șiavesche, trebul te las amen pala so phendea o Isus te cheras: te așias uștiade caște na peras ando păcato. Mai dur, va avela te dichas sar daisaras te cheras so phendea o Isus. Mai anglal, va avela te das duma anda chichiva buchia ande save trebul te așias uștiade. Pala codoia, va avela te das duma anda sar daisaras te așias zurale angla le buchia cai daștinas te țârden amen ando păcato. Sa cadea, va avela te dichas sar daisaras te încăras amen uștiade.

DICH SAVE SI CHE COVLIMATA

4, 5. Sostar trebul te așias uștiade chiar vi angla le păcatea mai țâne?

⁴ Chiar vi le păcatea cai fan-pe mai țâne daștin te cheren ca amaro amalimos le Iehovasa te na mai avel cadea de zuralo. Mai but, cadala daștin te îngăren amen te cheras păcatea mai bare.

⁵ Angla savore de mașcar amende aven buchia cai daștinas te țârden amen te cheras vareso nasul. Tha fiesaves siles lesche covlimata, sar avelas te cherel iech baro păcato, te avel-les iech phiraimos neujo sau te mechel-pe îngărdo catar i gândirea cadala lumeachi. Sar exemplo, chichiva daștin te maren-pe contra o camnimos te soven varecasa bi te aven căsătorime. Anda aver, le buchia neuje, sar avelas i masturbarea sau i pornografia, sile iech zumaimos. Anda aver, o pharimos si că daran le manușendar, că sile phuchiarde, că astaren-pe sigo holiatar sau silen aver covlimata. Cadea sar phendea o Iacov, „fiesavo silo zumado, țârdino hai athado pesche camnimastar”. (Iac. 1:14)

6. Sostar trebul te dichas save si amare covlimata?

⁶ Tu jianes angla save covlimata trebul te așes mai zuralo? Si ande amaro hasarimos cana ci camas te dichas amare covlimata hai cana pachias că sam cadea de zurale că ci daisaras te cheras iech păcato. (1 Ioan 1:8) Ji la urmă, o Pavel sicadea că chiar vi codola cai sile „zurale spiritualo” daștin te peren ando zumaimos dacă ci așen uștiade. (Gal. 6:1) Cadea că, te na hohavas amen corcore hai te dichas save si amare covlimata angla save trebul te așias mai zurale. (2 Cor. 13:5)

7. Save buchiandar trebul te ferisaras amen o mai but? Den iech exemplo cai sicavel cadaia.

⁷ Pala so hachiardeam save si amare covlimata, so trebul te cheras? Te das amari zor te avas mai zurale angla le buchia cai daștin te țârden amen ando păcato. Sar exemplo, andel ghiesa biblico, o mai covlo than anda o zido ieche forosco sas lesche udara. Anda codoia, le udara trebunas te aven o mai păzime than. Sa cadea, vi amen trebul te ferisaras amen mai but le buchiandar save jianas că sile iech covlimos anda amende. (1 Cor. 9:27)

SAR TE AȘIAS ZURALE ANGLA LE BUCHIA CAI ȚÂRDEN AMEN ANDO PĂCATO?

8, 9. So daștilas te cherel o tărno andal Proverbe, o capitolo 7 caște na cherel iech baro păcato? (Proverbe 7:8, 9, 13, 14, 21)

⁸ Sar daisaras te ferisaras amen catar o păcato? Te dichas chichiva buchia cai daisaras te sichioas-len le tărnestar andal Proverbe, o capitolo 7. Vo sutea iecha jiuvleasa imoralo hai bilajiavuni. O verseto 22 sicavel că o tărno gălea pala late „de iech data”. Tha, anda le versetea de mai anglal, hachiaras că vo cărdea chichiva buchia cai, țâra po țâra, îngărde-les ando păcato.

⁹ Save sas cadala? Ando dintuno than, vo nachelas pi riat „pașa o colțo la ulițaco” cai beșelas cadai jiuvli imoralo. Pala codoia, jialas po drom cai îngărel caring laco chăr. (Citisar Proverbe 7:8, 9.) Pala codoia, cana dichlea-la, vo ci risailo. Mai but, vo mechlea-la te ciumidel-les hai așundea-la cana dea duma anda le jertfe de comuniune cai andea-len, daștil-pe caște sicavel că si iech jiuvli lași. (Citisar Proverbe 7:13, 14, 21.) Dacă ci cherelas sea cadal buchia negoghiaver, ci avelas țârdino te cherel vareso nasul, hai cadea, ci arăsălas te păcătuil.

10. Sar daștilas varecon te cherel sa codoi greșeala cai cărdea-la o tărno anda o lil Proverbe?

¹⁰ So scriisardea o Solomon sicavel so daștil te întâmplol-pe orisavesa mașcar amende. Varecon daștilas te arăsăl te cherel iech baro păcato hai pala codoia te phenel că întâmplosardea-pe „de iech data”, bi te ajucărel-pe. Tha, dacă așel hai gândil-pe, daștil te del peschi sama că cărdea chichiva buchia negoghiaver cai îngărde-les te cherel cado păcato. Sar avelas, le amalimata cai îngărde-les pe iech drom nasul, le thana cai gălea sau so dichlea po interneto ci sas buchia lașe anda iech creștino. Sa cadea, daștil-pe că ci mai dea duma le Iehovasa ando manglimos, ci mai citisardea andai Biblia, ci mai gălea ca le întruniri sau andi predicarea. Cadea sar o tărno anda o lil Proverbe, daștil-pe că ci arăslea te cherel de iech data, bi te ajucărel-pe, o păcato.

11. Save buchiandar trebul te duriaras amen caște na arăsas te cheras iech păcato?

¹¹ So sichioas de catar? Hachiaras că ci trebul te duriaras amen numai catar o păcato, tha vi catar le buchia cai îngăren amen te cheras iech păcato. O Solomon sicavel cadai buchi cana del duma anda o tărno cai si țârdino catar i jiuvli imoralo. Vo phendea: „Te na hasares tut hai te na arăsăs pe lache droma”. (Prov. 7:25) Anda cadai jiuvli imoralo, vo mai phendea: „Beș dur latar hai te na pașios catar o udar lache chăresco”. (Prov. 5:3, 8) Caște na cheras iech păcato, si importanto te așias dur catar le buchia cai daștinas te îngăren amen te cheras vareso nasul.b Cadea că, chiar dacă chichiva buchia na-i greșime anda iech creștino, ci va avela te cheras-len dacă jianas că daștin te aven iech zumaimos anda amende hai te îngăren amen te cheras vareso nasul. (Mat. 5:29, 30)

12. So solaharimos cărdea o Iov hai sar ajutisardea-les cado te așel dur catar le buchia cai daștinas te îngăren-les co păcato? (Iov 31:1)

¹² Caște duriaras amen le buchiandar cai îngăren amen ca iech păcato, trebul te camas anda sea o ilo te așias uștiade. Cadaia cărdea vi o Iov. Vo ‘cărdea iech solaharimos pesche iachența’ te na dichel pe iech jiuvli hai cadea te arăsăl te camel te sovel lasa. (Citisar Iov 31:1.) Vo încărdea pesco solaharimos, hai cadaia ajutisardea-les te așel dur catar i imoralitatea. Vi amen daisaras te alosaras te așias dur catar orisavi buchi cai daștil te îngărel amen te cheras iech păcato.

13. Sostar trebul te las sama ca so gândisaras amen? (Dich vi le imagini.)

¹³ Mai but, trebul te las sama pe amari goghi. (Ex. 20:17) Chichiva pachian că na-i vareso nasul te aven ande chio șăro gânduri melale, dacă, ji la urmă, ci arăsăs te cheres codol buchia. Tha na-i mișto te gândisaras amen cadea. Varecon cai gândil-pe but ca iech buchi melali va camela sea mai but te cherel-la. Dacă leschi goghi așel code, va avela lesche mai pharo te așel contra codo zumaimos. Si ciaces, poiechdata, ande amari goghi daștin te aven gânduri melale. Tha, trebul te das-len sigo avri anda amari goghi hai te șioas ande lengo than gânduri lașe. Cana cheras cadaia, ci mechas ca iech gândo melalo te arăsăl cadea de zuralo cai te îngărel amen ji la urmă te cheras iech baro păcato. (Filip. 4:8; Col. 3:2; Iac. 1:13-15)

14. So mai daștil te ajutil amen te așias dur le buchiandar cai țârden amen te cheras vareso nasul?

¹⁴ So mai daștil te ajutil amen te așias dur le buchiandar cai țârden amen te cheras vareso nasul? Trebul te pachias anda sea o ilo că, de fiesavi data cana așunas catar le legi le Iehovasche, va avena amen but miștimata. Poiechdata, daștil te avel pharo te gândisaras, te simțosaras hai te cheras le buchia cadea sar camel o Iehova. Tha, cana das sea amari zor te cheras cadaia, va avasa ciaces fericime.

15. Sostar, cana camas sea mai but te cheras so si mișto, daisaras te așias mai zurale angla le zumaimata?

¹⁵ Sa cadea, trebul te camas sea mai but te cheras so si mișto. Dacă sichioas ‘te urâsaras o nasulimos hai te iubisaras o miștimos’, va avela te camas anda sea o ilo te cheras so si mișto hai te duriaras amen le buchiandar cai daștin te țârden amen ando păcato. (Am. 5:15) Sa cadea, cana camas te cheras so si mișto, va avela amenghe mai ușoro te așias zurale ande le zumaimata cai daștin te aven bi te ajucăras amen.

16. Sar ajutin amen le buchia cai cheras-len anda o Iehova te așias uștiade? (Dich vi le imagini.)

¹⁶ Tha so daștil te ajutil amen te camas sea mai but te cheras so si mișto? Le buchia cai zuriaren amari iubirea caring o Iehova. Cana jias ca le întruniri sau andi predicarea, amaro ilo ci va mai țârdela amen cadea de but te cheras vareso nasul. Mai but, sam zuriarde te rodas te cheras so si mișto andel iacha le Iehovasche. (Mat. 28:19, 20; Evr. 10:24, 25) Sa cadea, cana citisaras anda o Lil le Devlesco, sichioas hai gândisaras amen leste, va avela te iubisaras mai but so si mișto hai te urâsaras o nasulimos. (Ios. 1:8; Ps. 1:2, 3; 119:97, 101) Te gândisaras amen so phendea vi o Isus pesche discipolenghe: „Manghen tumen sea o timpo, caște na peren ando zumaimos”. (Mat. 26:41) Cana das duma le Iehovasa ando manglimos, mechas-les te ajutil amen hai cadea camas vi mai but te avas mișto dichle lestar. (Iac. 4:8)

SAR DAISARAS TE ÎNCĂRAS AMEN UȘTIADE?

17. Contra savo covlimos marelas-pe o Petru?

¹⁷ Daștil-pe că daisaras te nachas părdal chichiva anda amare covlimata. Tha contra aver covlimata, daștil-pe că va trebula te maras amen mai dur. Te dichas prin so nachlea o Petru. Vo mechlea-pe astardo catar i dar le manușendar cana phendea trin-var că ci prinjianelas le Isusos. (Mat. 26:69-75) Tha, pala codoia, vo dea duma tromanes anda o Iehova angla o Sanhedrino hai falea-pe că nachlea părdal cado covlimos. (Fap. 5:27-29) Cu sea cadala, pala chichiva bărșa, vo „daralas codolendar anda o grupo cai sas-le circumciși” hai ci camlea te hal ande iech than le creștinența cai ci sas-le evrei. (Gal. 2:11, 12) O Petru mechlea-pe pale astardo catar i dar le manușendar. Daștil-pe că vo ci nachlea niciechdata părdal cado covlimos cu sea.

18. So daștil te întâmplol-pe pala so pachiaiam că nachleam părdal iech covlimos?

¹⁸ Cadea sar o Petru, vi amen daisaras te nachas prin cadaia. Iech covlimos părdal savo pachiaiam că nachleam daștil te avel parpale. Iech phral phendea: „Ci mai dichlem materialea pornografico de deș bărșa hai pachiaiem ciaces că cado pharimos nachlea. Tha, mânro covlimos sas sar iech jiungalo animalo cai așelas garado hai ajucărelas o mai lașio timpo caște astarel man”. Si mișto că o phral ci mechlea-pe. Vo hachiardea că trebulas te del peschi zor ande fiesavo ghies caște na mechel-pe astardo catar cado covlimos, hai daștil-pe că sea leschi viața ande cado sistemo va trebula te marel-pe contra lesche. Vo lea sama te așel dur catar le materialea pornografico, hai leschi rromni hai le phure de congregație ajutisarde-les but.

19. So daisaras te cheras caște așias contra iech covlimos cai ci nachlea încă?

¹⁹ So daisaras te cheras caște așias contra iech covlimos cai ci nachlea încă? Te las amen pala so phendea o Isus: „Te așias uștiade”. Chiar vi cana simțosaras amen zurale angla amare covlimata, te duriaras amen mai dur catar le situații cai daștinas te țârden amen te cheras vareso nasul. (1 Cor. 10:12) Te cheras vi mai dur le buchia cai ajutisarde amen deja te așias zurale angla amare covlimata. Andel Proverbe 28:14 phenel-pe: „Voime si o manuș cai așel sea o timpo uștiado”. (2 Pet. 3:14)

SO MIȘTIMATA SI AMEN CANA AȘIAS UȘTIADE?

20, 21. a) So miștimata va avena amen dacă așias uștiade? b) Dacă amen cheras amari partea, so va cherela o Iehova anda amende? (2 Corinteni 4:7)

²⁰ Daisaras te pachias ciaces că si amen numai miștimata dacă așias uștiade hai așias contra le buchia cai țârden amen te cheras vareso nasul. I bucuria cai si ande amare ile cana traisaras pala sar camel o Iehova si but mai bari sar „i plăcerea le păcatoschi cai nachel”. (Evr. 11:25; Ps. 19:8) Ji la urmă, sam cărde te traisaras pala sar camel o Iehova. (Gen. 1:27) Cana cheras cadaia, ci va doșarela amen amaro ilo hai, ando viitorii, va avela te traisaras anda sea o timpo. (1 Tim. 6:12; 2 Tim. 1:3; Iuda 20, 21)

²¹ Si ciaces, „o mas si covlo”, tha ci sam corcore. O Iehova silo gata te del amen anda pesco zuralimos, oricana si amen nevoia. (Citisar 2 Corinteni 4:7.) Cu sea cadala, te încăras ande amari goghi că o zuralimos le Iehovasco si mai baro sar orisavo zuralimos. Tha, mai anglal trebul te cheras sea so daisaras amare zuralimasa caște maras amen contra amare covlimata ande fiesavo ghies. Cana cheras amari partea, daisaras te pachias ciaces că o Iehova va dela amen răspunso ca amare manglimata hai va dela amen o zuralimos cai mai trebul amenghe. (1 Cor. 10:13) Daisaras te pachias anda sea o ilo că, le Iehovasa pașa amende, daisaras te așias uștiade hai te așias contra le buchia cai țârden amen te cheras vareso nasul.