Sar daisaras te așias zurale cana sam țârdine te cheras vareso nasul

1. Sosa maren-pe sea-l manușa imperfecți?

DICHES că poiechdata chio ilo țârdel tut te cheres vareso nasul cai o Iehova ci dichel lașe iachența? Dacă da, na mech tut perado. I Biblia phenel că vi aver manușa nachle prin sa codol zumaimata prin save tu naches. (1 Cor. 10:13) Cadea că, cana chio ilo țârdel tut te cheres vareso nasul, na bâstrăr că ci san corcoro. Vi aver manușa marde-pe caște așen zurale cana nachle prin cadaia. Le Iehovasa pașa tute, daștis te câștighis cado marimos.

2. Save si chichiva buchia nasul contra save maren-pe le creștini hai codola cai sichion andai Biblia? (Dich vi le imagini.)

² I Biblia phenel: „Fiesavo silo zumado, țârdino hai athado pesche camnimastar”. (Iac. 1:14) Cathar hachiaras că fiesaves daștilas te țârdel-les o ilo te cherel aver buchi nasul. Sar exemplo, chichiva murșa creștini daștil-pe că sile țârdine te soven iecha jiuvleasa, sau chichiva jiuvlea creștino sile țârdine te soven ieche murșesa; aver daștil-pe că sile țârdine te soven murș murșesa sau jiuvli jiuvleasa. Codola cai mai anglal dichle materialea pornografico daștil-pe că sile țârdine te dichen pale cadal materialea. But creștini cai mai anglal pienas but pimos sau țârdenas droguri daștil-pe că acana sile țârdine te cheren pale cadaia. Cadala si numai chichiva buchia nasul contra save le creștini hai codola cai sichion andai Biblia maren-pe. Daștil-pe că savore simțosardeam iech data andi viața so scriisardea o apostolo Pavel: „Cana camav te cherav so si orta, o nasulimos si ande mande”. (Rom. 7:21)

3. Sar daștil te simțol-pe varecon cai marel-pe mai butivar contra iech buchi nasul cai lesco ilo camel-la?

³ Cana trebul te mares tut mai butivar contra iech buchi nasul cai chio ilo țârdel tut te cheres-la, daștil-pe că simțos tut bi zuralimasco, sar cana ci daștis te așes zuralo angla codo zumaimos. Daștil-pe că simțos tut vi bi speranțaco, sar cana o Iehova doșarelas tut anda codoia că chio ilo țârdel tut te cheres vareso nasul. Tha niciech anda cadal dui buchia na-i ciace! Caște hachiaras sostar, va avela te dichas o răspunso ca dui pușimata: 1) Con camel te simțosaras amen bi zuralimasco hai bi speranțaco? hai 2) Sar daisaras te câștighisaras o marimos contra le buchia nasul cai amaro ilo țârdel amen te cheras-len?

SAR CAMEL O SATAN TE SIMȚOSARAS AMEN?

4. a) Sostar camel o Satan te simțosaras amen bi zuralimasco? b) Sostar ci sam bi zuralimasco cana maras amen contra le buchia nasul cai camel-len amaro ilo?

⁴ O Satan camel te pachias că ci si amen o zuralimos te așias zurale contra le buchia nasul cai camel-len amaro ilo. O Isus phendea cadaia cana sicadea pesche discipolen te manghen-pe cadea: „Te aves pașa amende caște na peras ando păcato hai ferisar amen le benghestar”. (Mat. 6:13) O Satan phenel că o manuș ci mai așunel le Iehovastar cana nachel prin zumaimata. (Iov 2:4, 5) Tha te gândisaras amen chichi de dilivani si cadai buchi! Chiar o Satan sas-lo țârdino le buchiandar nasul cai lesco ilo camelas-len hai ci mai camlea te așel fidelo le Iehovasche. O Beng pachial că sam cadea sar vo hai că sam gata te mechas le Iehovas cana amaro ilo țârdel amen te cheras vareso nasul. Vo pachiaia că chiar vi o Șiavo perfecto le Devlesco daștilas te mechel le Iehovas cana sas-lo zumado. (Mat. 4:8, 9) Tha te pușias amen: „Si ciaces că na-i amen zuralimos caște maras amen contra le buchia nasul cai amaro ilo camel-len?”. Jianas că na-i ciaces! Amen pachias sa cadea sar o Pavel, cai phendea: „Anda sea le buchia si man zuralimos prin codo cai del man zor”. (Filip. 4:13)

5. Catar jianas că o Iehova pachial ciaces că daisaras te câștighisaras o marimos contra le buchia nasul cai camel-len amaro ilo?

⁵ O Iehova si cu sea diferime le Satanostar. O Iehova pachial ciaces că daisaras te așias zurale angla le buchia nasul cai amaro ilo camel-len. Catar jianas cadaia? O Del phendea de mai anglal că iech bari mulțimea manușenghi va așela andi viața ando baro necazo. So hachiaras cathar? O Iehova ci daștil te hohavel. Vo phenel că but manușa, na numai chichiva, va avena dichle uje anda codoia că „von halade penghe robe hai parniarde-len ando rat le Bacresco”. (Rev. 7:9, 13, 14) Hachiaras mișto că o Iehova jianel că daisaras te așias zurale angla le buchia nasul cai amaro ilo țârdel amen te cheras-len.

6, 7. Sostar camel o Satan te simțosaras amen bi speranțaco cana maras amen contra le buchia nasul cai camel-len amaro ilo?

⁶ O Satan camel te simțosaras na numai bi zoraco, tha vi bi speranțaco, sar cana o Iehova doșarelas amen numai anda codoia că amaro ilo țârdel amen te cheras vareso nasul. Te gândisaras amen pale chichi de dilivani si cadai buchi! O Satan si codo cai ci siles speranța. O Iehova judechisardea-les hai ci va mechela-les niciechdata te trail veșnico. Vo chiar va avela choslo cu sea. (Gen. 3:15; Rev. 20:10) O Satan camel ca vi amen te avas bi speranțaco, mai but anda codoia că amen primisardeam iech baro miștimos cai les ci va avela-les niciechdata. Amen ajucăras iech șucar viitorii! I Biblia phenel că o Iehova camel te ajutil amen te traisaras veșnico, na te doșarel amen. Vo „ci camel ca vroiech te merel, tha camel ca savore te arăsăn te risaren-pe catar pengo phiraimos nasul”. (2 Pet. 3:9)

⁷ Cadea că, dacă arăsas te pachias că sam bi zuralimasco sau bi speranțaco cana maras amen contra le buchia nasul cai camel-len amaro ilo, gândisaras cadea sar camel o Satan te gândisaras. Cana hachiaras mișto cadai buchi, sam vi mai zuriarde te cheras sea so daisaras caște așias contra o Satan. (1 Pet. 5:8, 9)

SAR DAISARAS TE SIMȚOSARAS AMEN ANDA CODOIA CĂ SAM PĂCĂTOȘI?

8. So aver buchi hachiaras prin i duma „păcato”? (Psalmo 51:5) (Dich vi i nota hachiar mai mișto.)

⁸ Na numai o Satan si codo cai daștil te cherel amen te simțosaras amen bi zuralimasco hai bi speranțaco cana maras amen contra le buchia nasul cai amaro ilo camel-len. Mai si vi o păcato, cai savore primisardeam-les catar o Adam hai i Eva.a (Iov 14:4; citisar Psalmo 51:5)

9, 10. a) Sar simțosarde-pe o Adam hai i Eva pala so arăsle imperfecți? (Dich vi i imaginea.) b) Sar simțosaras amen anda codoia că primisardeam le Adamostar hai la Evatar i imperfecțiunea?

⁹ Gândisar tut sar simțosarde-pe o Adam hai i Eva pala so arăsle imperfecți. Pala so uștiarde i duma le Iehovaschi, von garade-pe hai zumade te pachiaren penghe corpuri. Cadea că o păcato cărdea-len te simțon-pe doșale, darade hai lajiavune. Sas sar cana o Adam hai i Eva sas-le phandade ande iech chăr cai sas-les numai trin camere. Von daștinas te jian anda iech camera ande aver, tha ci daștinas te înclen anda o chăr. Aver varesar phendo, ci daștinas te aven eliberime anda lenghi starea păcătoso.

¹⁰ Tha amen ci sam ande sea le buchia cadea sar o Adam hai i Eva. O pochinimos cai dea-les o Isus prin pesco merimos ci si anda lende. Cado pochinimos sas dino anda amende caște aven chosle amare păcatea hai te avel amen iech amalimos chidino le Devlesa. (1 Cor. 6:11) Cu sea cadala, primisardeam le Adamostar hai la Evatar i imperfecțiunea. Cadea că ajucăras amen te simțosaras amen doșale, darade hai lajiavune. I Biblia chiar phenel că o păcato încărel mai dur le manușen tela lesco zuralimos. Les siles zor „chiar vi opral codola cai ci cărde iech păcato cadea sar o Adam”. (Rom. 5:14) Chiar cana cadaia daștilas te cherel amen te simțosaras amen perade, ci trebul te pachias că sam bi zuralimasco sau bi speranțaco. Daisaras te duriaras amendar cadal sentimentea nasul. Sar?

11. So trebulas te cheras cana simțosaras că sam bi zuralimasco hai sostar? (Romani 6:12)

¹¹ Anda codoia că sam imperfecți, poiechdata daisaras te simțosaras că ci daisaras te așias zurale angla iech zumaimos. Si sar cana așunas iech „glaso” ande amaro șăro cai phenel că ci daisaras te maras amen contra le buchia nasul cai amaro ilo camel-len. Tha ci trebul te așunas cadale glasostar. Sostar? Anda codoia că i Biblia sicavel că ci trebul te mechas „te rail” sar rege o păcato opral amende. (Citisar Romani 6:12.) Aver varesar phendo, daisaras te alosaras te na cheras le buchia nasul cai amaro ilo camel-len. (Gal. 5:16) O Iehova pachial ciaces că daisaras te așias zurale angla cadal zumaimata. Dacă ci avelas cadea, vo ci manghelas amendar cadai buchi. (Deut. 30:11-14; Rom. 6:6; 1 Tes. 4:3) Cadea că, acana jianas mișto că ci sam bi zuralimasco cana maras amen contra le buchia nasul cai amaro ilo camel-len.

12. So trebulas te cheras cana simțosaras că sam bi speranțaco hai sostar?

¹² Sa cadea, daștil-pe că simțosaras amen bi speranțaco, sar cana o Iehova doșarelas amen numai anda codoia că amaro ilo țârdel amen te cheras vareso nasul. Cana simțosaras cadaia, trebul te hachiaras că amari starea păcătoso del duma. Tha ci trebul te așunas latar. Sostar? Anda codoia că i Biblia sicavel că o Iehova hachiarel că sam imperfecți. (Ps. 103:13, 14) Vo „prinjianel sea” le buchia anda amende, chiar vi sar o păcato cai primisardeam-les le Adamostar hai la Evatar cărdea amaro ilo te camel buchia nasul. (1 Ioan 3:19, 20) Cana maras amen contra le buchia nasul cai amaro ilo camel-len, tha ci cheras-len, o Iehova va dichela amen uje. Sostar daisaras te pachias ciaces cadai buchi?

13, 14. Ci dichel amen lașe iachența o Iehova cana amaro ilo țârdel amen te cheras vareso nasul? Phenen sostar.

¹³ I Biblia sicavel că si iech bari diferența mașcar iech buchi nasul cai cheres-la (vareso cai daștis te alosares te cheres sau nici) hai iech buchi nasul cai chio ilo manghel-la (vareso cai daștil te avel ande chio ilo bi te cames). Sar exemplo, ando iechto secolo, chichiva creștini anda o Corinto sovenas murș murșesa sau jiuvli jiuvleasa. O Pavel scriisardea: „Cadea sanas chichiva anda tumende”. Hachiaras că lengo ilo ci mai țârdea-len niciechdata te cheren cadal buchia? Ci trebulas te pachias cadaia, anda codoia că butivar si zurales pharo te așaves chio ilo te na mai camel iech buchi. Tha le creștini cai încărenas-pe parpale hai ci mai cherenas so camelas lengo ilo sas-le dichle lașe iachența le Iehovastar. Vo dichelas-len sar cana ‘sas-le halade’. (1 Cor. 6:9-11)

¹⁴ Sa cadea si vi aghies. Daștis te așes zuralo angla orisavi buchi nasul cai chio ilo manghel-la. Chiar cana ci daștis te choses-len cu sea, daștis te sicaves că încăres tut parpale hai ci cheres ‘le buchia cai camel-len chio mas hai che gânduri’. (Ef. 2:3) Mai dur, va avela te dichas chichiva buchia cai daștin te ajutin tut te câștighis o marimos contra le buchia nasul cai camel-len chio ilo.

SAR TE AȘES ZURALO ANGLA LE BUCHIA NASUL CAI CHIO ILO CAMEL-LEN?

15. Sostar si importanto te phenas amenghe o ciacimos cana camas te maras amen contra le buchia nasul cai camel-len amaro ilo?

¹⁵ Caște așes zuralo angla le buchia nasul cai chio ilo camel-len, trebul te phenes o ciacimos ande chio ilo hai te prinjianes mișto che covlimata. Le sama te na athaves tut corcoro „iecha gândireasa hohamni”. (Iac. 1:22) Cana phenes, sar exemplo: „Aver pien mai but sar mande”, hai gândis tut că chi problema ci si cadichi de bari, lașiares o drom caring o păcato. Sa cadea si vi cana doșares averen, sar exemplo dacă gândis: „Mânro ilo ci țârdelas man te dichav materialea pornografico dacă mânri rromni sicavelas manghe mai but iubirea”. Na rode motivea sostar te avel tut iech phiraimos melalo, nici măcar ande chi goghi. Trebul te hachiares că tu corcoro alosares so cheres. (Gal. 6:7)

16. Sar daștis te cames vi mai but te cheres so si mișto?

¹⁶ Tha ci arăsăl te jianes save si che covlimata. Trebul te cames vi mai but te așes zuralo angla le buchia nasul cai camel-len chio ilo. (1 Cor. 9:26, 27; 1 Tes. 4:4; 1 Pet. 1:15, 16) Dich so buchia cheren tut te cames iech buchi nasul hai cana. Daștil-pe că si iech buchi nasul cai chio ilo țârdel tut mai but te cheres-la sau iech momento anda o ghies cana si tuche mai pharo te încăres tut parpale. Sar exemplo, si mai pharo anda tute cana san chino sau ando mașcar la ratiaco? Pregătisar tut mai anglal hai gândisar tut so va avela te cheres cana chio ilo va țârdela tut te cheres vareso nasul. O mai mișto si te pregătis tut angla te avel o zumaimos. (Prov. 22:3)

17. So daisaras te sichioas le Iosifostar? (Geneza 39:7-9) (Dich vi le imagini.)

¹⁷ Te dichas so cărdea o Iosif cana i rromni le Potifaroschi camlea te sovel lesa. Vo phendea lache sigo că ci va cherela cadaia. (Citisar Geneza 39:7-9.) So daisaras te hachiaras de cathar? Angla ca i rromni le Potifaroschi te zumavel te sovel lesa, o Iosif jianelas mișto că si vareso nasul te lel i rromni avere murșeschi. Sa cadea, vi tu daștis te cames mai but te cheres so si mișto angla te naches prin iech zumaimos. Cadea, cana va trebula te alosares so te cheres, va avela tuche mai ușoro te les tut pala so alosardean mai anglal.

„DICHEN SEA O TIMPO” CARING TUMENDE

18. Sar daștis te câștighis o marimos contra le buchia nasul cai camel-len chio ilo? (2 Corinteni 13:5)

¹⁸ Caște câștighis o marimos contra le buchia nasul cai camel-len chio ilo, trebul te ‘diches sea o timpo’ caring tute. (Citisar 2 Corinteni 13:5.) Dich mai butivar sar gândis hai le buchia cai cheres-len hai cher le lașiarimata cai trebun. Sar exemplo, chiar vi pala so daisardean te așes zuralo angla iech zumaimos, daștis te pușes tut: „Chichi timpo lea manghe te phenav «na»?”. Dacă ci phendean cadaia sigo, te na doșares tut. Mai mișto, gândisar tut sar daștis te aves mai zuralo i data cai avel. Daștis te pușes tut: „Cana ande mânro șăro aven gânduri nasul, daștiv te așavav te gândiv man lende mai sigo? Le buchia cai dichav-len, citisarav-len sau așunav-len cheren man mai covlo angla le buchia nasul cai mânro ilo camel-len? Cana angla mande aven imagini melale, phandavav sigo mânre iacha? Hachiarav că, chiar cana trebul te dav mânri zor caște încărav man parpale caște așunav le Iehovastar, cadaia si sea o timpo ande mânro miștimos?”. (Ps. 101:3)

19. Sar daștin le alosarimata cai fan-pe țâne te cheren mai pharo o marimos contra le buchia nasul cai camel-len o ilo?

¹⁹ Sa cadea, cana diches caring tute, trebul te les sama te na rodes scuze anda iech phiraimos nasul. I Biblia phenel: „O ilo athavel mai but sar oriso hai ci del-pe parpale chancestar”. (Ier. 17:9) Hai o Isus sicadea că anda o ilo înclen „le gânduri nasul”. (Mat. 15:19) Sar exemplo, iech manuș cai dichlea mai anglal materialea pornografico daștilas te pachial că, pala iech timpo, daștil te dichel imagini cai cherel-les te camel buchia sexualo numai anda codoia că ande cadal imagini ci si manușa nanghe. Sau daștilas te phenel pesche: „Ci si vareso nasul te avel man gânduri melale dacă na cherav-len”. Ande iech felo, o ilo cadale manușesco ‘cherel planuri anda so camel lesco mas’. (Rom. 13:14) Sar daștis te na peres ande cado athaimos? Trebul te hachiaras că le țâne alosarimata nasul cheren o drom caring alosarimata nasul mai bare, sar avelas iech baro păcato. Av gata te na jias pe cado drom.b Sa cadea, duriar tutar orisavo gândo nasul cai daștilas te avel iech scuza anda iech phiraimos melalo.

20. So șucar viitorii ajucărel amen hai so ajutoro primisaras aghies?

²⁰ Cadea sar dichleam, o Iehova del amen o zuralimos cai trebul amen caște așias zurale angla le buchia nasul cai camel-len amaro ilo. Sa cadea, anda codoia că vo sicavel mila, si amen i speranța te traisaras anda sea o timpo andi lumea nevi. Va avela te simțosaras amen zurales bucurime cana va avela te slujisaras le Iehovasche iecha goghiasa hai ieche ilesa uje! Ji atunci, te pachias ciaces că ci sam bi zuralimasco hai bi speranțaco cana maras amen contra le buchia nasul cai camel-len amaro ilo. Te pachias anda sea o ilo că o Iehova va dela amen miștimata anda i phari buchi cai cheras-la hai, cadea, va avela te câștighisaras o marimos!